637-ə hissə-Furğani surə-21-26 şərifə ayəon

637-ə hissə

وَقَالَ الَّذِينَ لَا يَرْجُونَ لِقَاءنَا لَوْلَا أُنزِلَ عَلَيْنَا الْمَلَائِكَةُ أَوْ نَرَى رَبَّنَا لَقَدِ اسْتَكْبَرُوا فِي أَنفُسِهِمْ وَعَتَوْ عُتُوّاً كَبِيراً (21) 

Və de əmə vindemon kardey umuşon nıbə kəson(ğıyoməti ruji ğəbul nıkardə kəson) voteşone: boçi boəmə mələkon nozil bedəni və ya çıro əmə ıştə pərvərdıqori vindedənimon. şək ni əvon ıştə nəfsi barədə təkəbbırəti və qıləy dıjdə hışkəqiyəti kardeşone.

Navnə bərnomədə votemone ki, peyğombəron çı tohid iyən miadi barədə bıə ruşinə istidlolon mığobilədə,mışrikon boçəvon sıxani rədd kardeyro hiç qıləy dəlil iyən sənədışon nıbe və əvon fəğət çı bəhonəon dumo bim. ın ayə bəçəvon dıqlə vavunə işorə kardedə və hamyedə: əvon voteydəbin ki, boçi məlayikon fəğət bə peyğombəron nozil bedə? Çıro əvon bəçəmə ıştəni həm nozil bedəni və çı Xıdo xəbəon sərost bəçəmə ıştəni rosneydənin? Və umumən əmə boçi Xıdo ıştəni vindey zıneydənimon ki, ta bəçəy ıştəni imon biyəmon? Kərimə-Ğıron çın vavunə vardə kəson cəvobədə jıqo hamyedə:əvon bə təkəbbır iyən hezoperoməti giriftor bıən. liza bə sıxani pemandedənin və hışkəqiyəti kardedən. bəqəm peyğombər ıştən Xıdoş deştə çəşi vindəşe? De ın holi əv bə Xıdo ğoymə imonış vardə iyən məxloği boçəy ibodətiro vanq jeydə. bəqəm Xıdo sıxani ğəbul kardey, mələkon vindey iyən çəvon sıxani məseye? Fəğət ım kifoyət kardedə ki, şımə ıştə ağli oko bıdənən və de peyğombəron mecuzəon vindey iyən deçəvon sıxanon məsey, çəvon risolət və missiya həyğəton dəbərəsiyon. boçi şımə ıştəni bəsə peyğombəronsə bəpe zıneydon iyən isror kardedon ki, şımə mıstəğimən de Xıdo ıştəni iyən deçəy məlayikon rabitəon bıbu?

Çın ayəku umutedəmon:

1-təkəbbır iyən eqoistəti, insoni koy oxo bə ğıyoməti inkor kardey tərəf kəşedə.

2-qırd maddiyə koon həm de penc qıləninə hisson dərk kardey nibəbe. məsələn bənə ultravənəşə nur iyən infrasıə şuaon bıə lətifə nuron ki, de çəmə çəşon əy vindey bedəni. ya çı fizikə vey umumiyə ğanun ki, cazibə ğuvvəy ki, deçəmə hisson dərk kardey bedəni. çən, çokonə kali fərdon dılışon heste Xıdo deştə çəşon bıvindon?

يَوْمَ يَرَوْنَ الْمَلَائِكَةَ لَا بُشْرَى يَوْمَئِذٍ لِّلْمُجْرِمِينَ وَيَقُولُونَ حِجْراً مَّحْجُوراً (22) 

Qıləy ruj ki,firiştəon bəvindeyn həmonə ruj bo qınokoron hiç qıləy mıjdəvoni nibəbe. (bəlkəm, bəvon cəzo doey bəbe və mələkon bə qınokoron bəvoteyn) vəhışt boşımə hərom iyən ğədəğəne.

وَقَدِمْنَا إِلَى مَا عَمِلُوا مِنْ عَمَلٍ فَجَعَلْنَاهُ هَبَاء مَّنثُوراً (23) 

Və əmə bəçəvon əncom doə har əməli soyəx bəşemon və əy bənə volo-volo bıə ğubari bəkamon.

أَصْحَابُ الْجَنَّةِ يَوْمَئِذٍ خَيْرٌ مُّسْتَقَرّاً وَأَحْسَنُ مَقِيلاً (24) 

Həmonə ruji vəhışti əhl xoşə vırə iyən çokə asayişışon bəbe.

Votemone ki, peyğombəri mıxolifon intizorışon hestebe ki, firiştəon bəçəvon ıştəni nozil bıbon və əvon həm həmonə məlayikon bıvindon. çən, bəvədə əvon bə Xıdo imon bəvardeyn. Xıdovənd hamyedə:əvon ğıyoməti ruji mələkon bəvindeyn,əmmo əvoni vindeyku xoşhol nibəbeyn.zira məlayikon bəvon çı vəhışti mıjdəvoni doey əvəzi, çı cəhəndımi bəşorəti doydən.çəvon yavə koon cəzo ğərəz cəhəndımi co çi nibəbe və çəvon çokə koon həm dınyoədə mandə və bə axırət nibərəse.

Umumən ə əməl bə ğıyomət bərəse ki,de ilahi niyyəti əncom doey bıbu. noxolisə əməlon ki, Xıdo niyyət bəvədə ni, əv fani bəbe və bə ğıyoməti varid nibəbe.

Ayə dəvomədə çı vəhışti əhli de qınokoron vəzyəti mığoyisə kardedə və hamyedə: vəhışti əhl vey çokə vırə və məğamonədə vırə bə vırə bəbeyn iyən əvon komilə əmniyyət və asayşi dılədə jimon bəkayn.

Çın ayəonku umutedəmon:

1-bo bəşəri məlayikon vindey imkon heste. əve ğıyoməti ruji həm cəhəndımi əhl və həmən vəhışti əhl əvoni bəvindeyn.

2-fəğət çı dınyo barədə fik kardə iyən boəy ko kardə kəson, çoko de mardey vositə çəvon çəşon tul və xok eqəteydə, çəvon əməlon həm bənə xok iyən ğubari pevolo bəbe iyən çəyku hiç qıləy əsər-əlomət nibəmande.

3-ğıyoməti həsrətonku qıləyni, noxolisə əməlon məhv bıeye.qıləy əməl ki, çəmə bəy umumon heste, əmmo həyğətədə əv puç və hədəre.

وَيَوْمَ تَشَقَّقُ السَّمَاء بِالْغَمَامِ وَنُزِّلَ الْمَلَائِكَةُ تَنزِيلاً (25) 

Və qıləy ruj ki, osmonon de avəon poə bəbe və məlayikon(zəminisə) nozil bəbeyn.

الْمُلْكُ يَوْمَئِذٍ الْحَقُّ لِلرَّحْمَنِ وَكَانَ يَوْماً عَلَى الْكَافِرِينَ عَسِيراً (26) 

Həmonə ruj həxə hukmronəti bə Rəhmonə Xıdo məxsuse və qıləy ruj ki, bo kofiron saxt iyən sanqin bəbe.

In ayəon ijən bə məlayikon nozili təkid kardedə və hamyedə:ğıyoməti astanədə  ki, hestemoni aləm volo-volo bəbe iyən həşi,ovşum və zəmini qırd vırəsə dıjdə tıpemonon bə əməl bome.bın zəmon  ğəliz və tındə avəon qırd osmoni ebəqəte və osmon poə bəbe iyən məlayikon dumo yənde beji ebəvon.

De məxloği məhşəri ərsədə huzuri,həmməkəs çı Xıdovəndi bə hestemoni aləmi bıə hukmranəti dərk bəkayn.qıləy sabit və bə həxı əsos bıə hakimiyyət. təbiiye jıqo qıləy şərayitədə ım bo qınokor iyən kofiron şiddətin bəbe. zira de ikəsi vəbəvəyn ki, əvon ıştə qırd umri əvışon inkor kardə və hozzı bıənin çəy həx bıey iğrorkəyn. liza ımruj çəvon daston qırd vırəonku təyliye.nə çəvon ıştən qıləy əməlışon heste ki, deçəy vositə əvon perəxon və nə qıləy pənohqoşon heste ki, ilahi əzobiku əmonədə bımandon.

Çın ayəonku umutedəmon:

1-osmoniyə kurəon ki,ımruj ıştə təyin bıə orbitədə hərəkət kardedən, ğıyoməti ruji de ilahi irodə vırto-volo bəbeyn.

2-Xıdovəndi bə hestemoni aləmi bıə malikiyyət iyən hakimiyyət, həyğiye. nəinki, etıbori və zolımonə.

3-ğıyoməti ruj çı ilahi rəhməti cilvə pəydu kardə ruje.əmmo noloyığə əməlışon bıə kəson ıştən deştə yavə koon ıştəni çın her-hevujə rəhmətiku məhrum kardedən.