648-ə hissə-Furğani surə-70-73 şərifə ayəon

648-ə hissə

إِلَّا مَن تَابَ وَآمَنَ وَعَمِلَ عَمَلاً صَالِحاً فَأُوْلَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُوراً رَّحِيماً (70) 

Sovə tobəş kardə iyən imonış vardə və salehə əməl əncom doəkəson. çən, ımon(əkəsonin ki,) Xıdovəndi çəvon bevəcə əməlon bə çoki təbdil bəkay və Xıdovənd əbaxş iyən mehribone

وَمَن تَابَ وَعَمِلَ صَالِحاً فَإِنَّهُ يَتُوبُ إِلَى اللَّهِ مَتَاباً (71) 

Və hakəs tobəkəy iyən loyığinə ko əncom bıdo, həyğətədə bə Xıdo tərəf bə xoşomə oqardemonış heste(ıştə əcri çəyku bəstəne).

Dəvardə proqramədə bənə şırk,ğətl iyən zino bıə yolə qınoonku bəhs kardedmone və votemone ki, çə qınoon bevəcə təsir dınyo iyən axırətədə bə insoni bome bərəse. ın ayəon hamyedə:mehribonə Xıdo jıqo qınoon həm baxşedə, əmmo de ın şərti ki, çı insoni tobə həyği bıbu və həmonə qınokorə fərd deştə çokə əməlon vositə ıştə dəvardə yavə əməlon əvəzi beşo.yəni əv ıştə şırkiku dast bıkəşo və bə tohidi tərəf dim bıqəto iyən çı milləti zay kardə həx-huğuğon imkoni daxilədə iyən ıştə zu vışkiye ğədərədə bəvon oqordıni.

In ayə nəinki, bə tobə xoto qınoon baxşeşiku sıxan voteydə,bəlkəm hamyedə: həyğiyə tobə jıqo insonədə qıləy inğilob bə əməl vardedə ki, çəy yavə xısləton bə çokə xısləton peqordıneydə. şırk iyən riya ruhiyyə bə tohid iyən ixlosi ruhiyyə, bə məzlumon zılm, bə de zolımon cihod kardey iyən nopokəti bə pokdovnəti  təbdil kardeydə.

Kərimə-Ğıron qınokoronvey bo tobə kardey təşviği xoto, ijən təkid kardedə ki, ehanə şımə ıştə yavə koonku dast bıkəşon iyən de çokə koon çəvon əvəzi beşon, hukmən şımə tobə ğəbul bəbe və şımə bə ilhai lutf iyən rəhməti şomil bəbiyon.

Çın ayəonku umutedəmon:

1-islomədə ro hejo oje. bo qınokoron həm ro oje və har qıləy qıno de tobə iyən çokə əməlon çəy əvəzi beşe bəbe.

2-tobə qıləy daxiliyə inğilobe, nəinki, qıləy səthi iyən zohiriyə hərəkət və ımon fəğət de ləfzon hosil bedəni. həyğiyə tobə de çokə əməlon bə icoe.

3-tobə çı insoni əfkar iyən əməlon əvəz kardedə.

وَالَّذِينَ لَا يَشْهَدُونَ الزُّورَ وَإِذَا مَرُّوا بِاللَّغْوِ مَرُّوا كِرَاماً (72) 

Və(Xıdo çokə bandəon) əkəsonin ki, botılə şoydəti kardənin(bə botıli məclison şedənin) və ləğvo-ləğviyyat iyən befoydə məclison peqıniyədə, de alicənobəti(çəyku) dəvardedən(şedən).

In ayə bə Xıdo xosə bandəon co qılə xısusiyyəti işorə kardedə və hamyedə: çəvon barzə xıslətonku ıme ki, əvon bə cokəson həx-huğuğon ehtırom noydən. əvon hiç qıləy şərayitədə bo botıli şoydəti kardedənin və bə cokəson həx-huğuğon zay bıey boyis bıə sıxan, bəştə zıvon vardedənin. çoko ki, əvon bə botılə məclison tərəf şedənin və bə botılə sıxanon quş doydənin. boçi ki, bə jıqo məclison şıey, yəni çı isoni dıl iyən rufi çırkin kardə ım qıno məclison təsdığ kardeye.

Ayə dəvomədə bə Xıdo salehə bandəon co xısləton işorə kardedə və hamyedə: əvon çı bihudə sıxan iyən ləğvo-ləğviyyatə koonku bə diyəron və de jəqo çiyon dimbədim omeyədə, de alicənobəti iyən bəvon etıno nıkardə holədə çəvrəku dəvardedən şedən. əvon jıqo buzurqıvarin ki, hiçfaxti çırkinə muhiton bəvon təsir noey zıneydəni və əvon jıqo muhitonku ranq iyən təsir ğəbul kardeydənin. həlbəttə çəvon ım be etinoəti deçəvon alicənobəti bə icoe və çəvonku hiçki rəncidə bedəni.

Çın ayəku umutedəmon:

1-nəinki, fəğət qıno əncom doey,bəlkəm bə qıno nəzə kardey iyən əyo şoyd beıy həm cayiz ni. imoni əhl çı qıno məclisonku pərhiz kardən, harçənd əyo əvon ıştən bə qıləy qıno mırtəkib həm nıbon.

2-nəhy əz munkəri roonku qıləyni, bə qınokori etıno nıkardey iyən çı qıno məclisonku xaric bıeye.

3-Xıdo bandəon jimonədə qıləy hədəf heste və əvon ıştə umri bəhədərə iyən befoydə vırəonədə sərf kardedənin.

وَالَّذِينَ إِذَا ذُكِّرُوا بِآيَاتِ رَبِّهِمْ لَمْ يَخِرُّوا عَلَيْهَا صُمّاً وَعُمْيَاناً (73) 

Və əvon ki, deştə pərvərdıqori ayəon təzəkkur(pand) doey bıbon, bənə kor iyən ku bə səjdə eqıniyedənin(bəlkəm, çəvon əməlon aqahonə şikilədəy).

Xıdo bandəon vey muhimmə xısusiyyətonku qıləyni çəvon çı bəsirət iyən mərıfəti soyb bıeye. əvon ıştə çəş iyən quşi bastə holədə qıləy çi ğəbul kardedənin iyən ilahi ayəon məseyədə bəvədə fik-fam kardedən ta Xıdovəndi məğsədi ğəbulkəyn və çəy həyğəton nığılə vırə dumo bıbon.

Im nığıl fik kardə iyən bəsirətinə muminon, çı hiçkəsi dastədə alət bedənin və əvon hejo bənə bandi mandən. zira əvon səthi nəzə kardedənin və çı ko zohiri vindedənin ki, fəğət bə ayəon zohiri nəzəkən iyən çəy botıniku bexəbə bımandon. bə çəvon çəşon iyən quşon bastə bıə kəson əks ki, jıqo fərdon rəyrə bə hiyləon bovə kardedən və çı həxə royku mınhərif bedən və bə kufr iyən zəloləti vadi eqıneydən.

Çın ayəku umutedəmon:

1-ağl iyən fiki oko doey, çı har qıləy mumini koon əsose və Xıdovəndi piyəşe ki, şəy bandəon bə bəsirət iyən aqahəti əsos bə dini soyəx bışon.

2-imoni əhl ıştə çəş iyən quşi bastə holədə ibodət kardedənin, bəlkəm çəvon ibodət bə aqahəti iyən mərıfəti əsose.