891-ə hissə-Fussiləti surə-24-28 şərifə ayəon

891-ə hissə

فَإِنْ یَصْبِرُوا فَالنَّارُ مَثْوًى لَهُمْ وَإِنْ یَسْتَعْتِبُوا فَمَا هُمْ مِنَ الْمُعْتَبِینَ ﴿٢٤﴾ 

Çən, ehanə(əvon) səbrkon, otəş çəvon vırəy və əgər uzrxahətikon, çı baxşə bıə kəsonku nin.

وَقَیَّضْنَا لَهُمْ قُرَنَاءَ فَزَیَّنُوا لَهُمْ مَا بَیْنَ أَیْدِیهِمْ وَمَا خَلْفَهُمْ وَحَقَّ عَلَیْهِمُ الْقَوْلُ فِی أُمَمٍ قَدْ خَلَتْ مِنْ قَبْلِهِمْ مِنَ الْجِنِّ وَالإنْسِ إِنَّهُمْ کَانُوا خَاسِرِینَ ﴿٢٥﴾ 

Və boəvon həmnişinon ğərol domone ki, çəvon nav iyən peştono bıə çiyon çəvon nəzədə ğəşənq cilvəşon doə be və çəvon bənav cın iyən insiku iborət dastə dəqətə əzobi fərmon, boəvon həm həyğət və sabit be. əvon beşək, ziyonkor bin.

Navnə proqramədə bıə ayəon dəvomədə ki, murur kardemone və dəvardimon,ın ayəon bə insoni bədbəxtiyədə bəçəy dust iyən həmnişini roli işorə kardedə və hamyedə: ğıyoməti rujiçı ğınokoron uzraxhəti ğəbul nibəbe. zira, ım uzrxahəti bə iztiror iyən cəhəndımi otəşi təsiri deştə çəşi mışohidə kardey xotoye,nəyinki, deştə ixtiyori. liza, əvon çı səbr və təhəmmulkon ya nıkon, boçəvon holi hiç farğ və tafutış nibəbe və ehanə əvon uzrxahəti həm bıkon, bə qıləy vırə nibərəse və çəvon vırə və məğam cəhəndımi otəş bəbe.

Ayə dəvomədə çın saxtə əzobi rəğ-rişə, çəvon dınyo jimonədə bıə yavə əxloği soyb dust iyən bevəcə həmnişinon zıneydə. ə duston ki, inson bevəc və noloyığə koon bə vırə rosneydə, təzəkkur iyən nəsyəti əvəzi, insoni bə jıqo koon tərəf tərğib iyən təşviğ kardedəbin. həyğətədə, əvon ın yavə və bevəcə koon bəvon bənə ğəşənq və bə dılnıştə koon cilvə doydəbin. ım şəytonsıfət və vəsvəsə əkə duston çı har tərəfiku fərdon əhotə kardedəbin və jıqo bəçəvon fik iyən əndişə təsir noydəbin ki, əvon həni çoki çı bevəciku mıəyyən və co kardey zıneydənin. liza, həyğəton çəvon palu bərəks beydə və yavə çiyon çəvon nəzədə ğəşənq cilvə doey beydə. de ın tərtibi nəticədə yavə dusti vıjniye və intixob kardey, insoni bə fəsodi qırdəovi giriftor kardedə. əv,nəyinki, ıştə ımrujnə jimoni bəştə ım nodorıstə nəzə əsos bino kardedə, bəlkəm de ın səhvə roy dəvom doey, ıştə ayəndə və vəomə həm xərob kardedə və jıləvoni nicoti bəon bəştə dimi basteydə. həlbəttə, ım qıləy roy ki, çımi bənav veyə insonon çəyku dəvardən və ğərəz cəhəndımi bə co qıləy ro rəsənin.

Çın ayəonku omutedəmon:

1-çanədə dınyoədəmon, ıştə tobə iyən oqardey fırsəti çı dasto mədəmon. çumcıko, axırəto həni uzrxahəti iyən oqardemoni roy mevcud ni.

2-mığət bıbəmon ki, fosid iyən bədkorə duston çəmə ətrofi nıdəqəto. zira, əvon de mıxtəlifə şivəon bəçəmə fik iyən şəxsiyyəti nufuz kardedən və əməni deştə bə ico bə cəhəndım bardedən.

3-çəmə yavə koon tərif kardə kəson, həyğətədə çəmə dust nin. bəlkəm, insoni cildədə qıləy şəytone. zira, əv həm bənə şəytoni yavə koon boəmə ğəşənq cilvə doydə.

4-insoni suğut qəmbəqəm iyən tədriciye. iminə qəmədə fosidə duston yavə çiyon bəy nışon doydən və peşonə çəy bədiqə inson bəştə noloyığə koon pemujeydə və bəy dəvom doydə ta nəhoyətən bə qıləy yavə və ziyonəkə ağıbəti dıço beydə.

5-bevəcə dust bə insoni hiççi əlovə kardedəni, bəlkəm bəçəy dınyo iyən axırəti ziyonkorəti boyis beydə.

وَقَالَ الَّذِینَ کَفَرُوا لا تَسْمَعُوا لِهَذَا الْقُرْآنِ وَالْغَوْا فِیهِ لَعَلَّکُمْ تَغْلِبُونَ ﴿٢٦﴾

Və kofir bıə kəson voteşone: bə ın Ğıroni quş mədənən və çəy(tilovəti zəmonədə) bihudə və ləğvə sıxanon bığandənən(əlovəkənən) ğasbu səbarz bıbon.

فَلَنُذِیقَنَّ الَّذِینَ کَفَرُوا عَذَابًا شَدِیدًا وَلَنَجْزِیَنَّهُمْ أَسْوَأَ الَّذِی کَانُوا یَعْمَلُونَ ﴿٢٧﴾ 

Çən, hukmən(əmə) bə kofiron qıləy saxtə əzobi bəçaştovnomon və hukmən əvoni bəçəvon əncom doə vey yavə koon cəzo bərosnomon.

ذَلِکَ جَزَاءُ أَعْدَاءِ اللَّهِ النَّارُ لَهُمْ فِیهَا دَارُ الْخُلْدِ جَزَاءً بِمَا کَانُوا بِآیَاتِنَا یَجْحَدُونَ ﴿٢٨﴾ 

Xıdo deşmınon cəzo ıme. (cəhəndımi)otəş ki, bəvədə boəvon əbədiyə vırə heste. bəçəvon hejo çəmə ayəon inkor kardey(xoto), qıləy cəzo.

In yəon bə Məkkə yavə fik kardə və çı peyğombəre-əkrəm(s)-i mığobilədə mandə mışrikon bevəcə koonku qıləyni işorə kardedə və hamyedə: havaxti peyğombər(s) Kərimə-Ğıroni bə dılnıştə iyən cəzbəkə ayəon bo Məkkə milləti tilovət kardeydəbe, mışrikonku kali qıləyni fit və vazilə jeydəbe və de barzəvanqi şeyr handedəbin ta peyğombər(s)-i sıxanon bə camaati quşi nırəso və əvon bə ə həzrəti imon nıvon.

Imruj həm ım proses de mıxtəlifə formə dəvomış heste. boçi ki,həxə ayini deşmınon zıneydən ki, havaxti dınyo millət Ğıroni barzə maarif iyən həyğətonku aqah bıbon, veyə insonon bəçəy tərəf dim bəqəteyn. liza, deştə təbliğot iyən informasiyə vositəon hartərəfinə şikilədə mırəşulə eğandedən, hay-huy kardedən və səy kardedən ta çı İslom iyən Kərimə-Ğıroni həyğəton bə dınyo milləti quş nırəso. əvon bəştə ın yavə hədəfon rəsey xoto, sərost ya ğeyri-mıstəğimə formədə çəyku bəhrə bardedən. əvon de bənə film, teyatr, karikaturə, daston iyən romani roon vositə bə dini erjon məsxərə kardedən. ım dastə həmçinin çı islomi dini barədə de nodırıst iyən ğeyri-realə məlumaton nəşr kardey və de çandə nev iftiro və şubhəon pevolo kardey bın fikədən ki, İslomi ğəşənqə çehrə və sima xərobkon və bə dınyo milləton əy ğəbul kardey mane beydən.

Həlbəttə, deşmınon jıqo fik kardedən ki, deştə ın koon vositə çı islomi bə qırd dınyo pevolo bıey vəy qətey bəzıneyn, qıləy puçə xiyol və hədərə zəhməte. beşək, çı həxı xıslət ıme ki,əv çəy vədə bıə çı har qıləy maneyəku dəvardedə və bəştə roy dəvom doydə. bə həmonə dəlili xotoye ki, Ğıroni həyğəton rujbəruj bo dınyo camaati veyruşin iyən veyoşko beydə.

Həlbəttə, ruşine ki, yavə əzob əkəson çəş kardedə ki, əvon milləti bə ilahi ayəon quş doey mane bıən və cokəsonışon həm dumo ıştə bə inhirofə roon səmt şıkırnəşone. əkəson ki, dayima həxə ayəon bə həşə jıəşone və həyğətədə əvon Xıdo iyən dini deşmınonin. beşək, çın fərdon cəzo deçəvon bə vırə rosnə yavə koon mıtənosib və vey şiddətin bəbe iyən çı cəhədımi otəşiku perəxeyro boəvon hiç qıləy ro nibəmande.

Çın ayəonku omuteydəmon:

1-adətən hiç qıləy məntığ iyən dəlilış nıbə kəson, de mıxtəlifə bəhonəon səy kardedən ki, milləti çı həxə sıxanon məseyku oqəton.

2-Kərimə-Ğıron qıləy məxsusə cozibə iyən təsiirinə ğıvvəş heste. joqo ki, çəy ayəon məsey həm dılon bə Xıdo səmt cəzb kardey zıneydə. liza, deşmınon bə ın koy mane beydən.

3-deşmınon de mıxtəliə əbzor iyən de nevbənevə təbliğot vositəon sər-sədo kardedən ta İslom iyən Ğıroni həyğəton bə dınyo camaati quş nırəso.

4-cəhəndım bo əkəson əbədiyə vırəy ki, əvon zıne-zıne de həxı mıborizə bardedən və ım boəvon qıləy adilonə və həxədə bıə cəzoye.