892-ə hissə-Fussiləti surə-29-30 şərifə ayəon

892-ə hissə

وَقَالَ الَّذِینَ کَفَرُوا رَبَّنَا أَرِنَا الَّذَیْنِ أَضَلانَا مِنَ الْجِنِّ وَالإنْسِ نَجْعَلْهُمَا تَحْتَ أَقْدَامِنَا لِیَکُونَا مِنَ الأسْفَلِینَ ﴿٢٩﴾ 

Və kofiron voteşone: Xıdolim ha! əvon ki, cın iyən insiku idastə bə zəlolət eğandəşone, bəmə nışon bıdə ta(əmə) əvoni ıştə lınqi jiyədə bəhaştəmon.(dıləhırdkəmon) ta əvon həmməysə exrocə(millət) bıbon.

Navnə bərnomədə çə dastə kofiron həxədə be ki, əvon milləti bə Kərimə-Ğıroni quş doey və məsey mane beydəni. ın ayə hamyedə: de ın fərdon vositə ıştə roy dəqıjnə kəson ğıyoməti ruji çəvonku şikoyət bəkardeyn. əvon Xıdoku tələb bəkardeyn ki, həmonə ım vəsvəsəəkə iyən şəytonsıfətə odəmon əvonışon bə bədbəxti iyən inhirofə roon səmt şıkırneşone və əvonışon bə zəlolət eğandeşone, tı ısət əvoni bə cəhəndımi həmməysə nığılə vırə şodə və əvoni vey yavə vırədə ğərol bıdə. həmçinin tı bəmə icozə bıdə əmə ım dastə ıştə lınqon jiyədə hırdkəmon və çəvon sıfəti bə zəmini bımoləmon ta dınyoədə qıləy məğam iyən vırə soyb bıə kəson de qıləy roy vositə xar və təhğır bıbon.

Çın ayəku omutedəmon:

1-kofiron ğıyoməti ruji səy bəkardeyn ki, ıştə kufr iyən zəloləti bə cokəson qıy şodon və cokəson ıştə roy qim kardey amil nışon bıdon.

2-bəşəri inhirof iyən zəloləti amilon ziyode. vəsvəsəkə insonon və ro dəqıjnə şəytonon.

3-kofir iyən inhirofə rəhbəron dınyoədə de bə cokəson sultə pəydu kardey, əvoni bə zəloləti səmt şıkırneydən. əmmo, ğıyoməti ruji çəvon tərəfdoron oruzu bəkardyn ki, əvoni ıştə lınqon jiyədə hırdkon, bəhaşton.

إِنَّ الَّذِینَ قَالُوا رَبُّنَا اللَّهُ ثُمَّ اسْتَقَامُوا تَتَنَزَّلُ عَلَیْهِمُ الْمَلائِکَةُ أَلا تَخَافُوا وَلا تَحْزَنُوا وَأَبْشِرُوا بِالْجَنَّةِ الَّتِی کُنْتُمْ تُوعَدُونَ ﴿٣٠﴾ 

Beşək, əkəson ki, voteşone: çəmə pərvərdıqor Xıdoye, peşo(ıştə ın əğedədə) istiğomət nışon doşone, məlayikon bəvon nozil bəbeyn (və bəvotyen:)mətarsənən və ğəmqin məbənən və bə şımə və`də doə bıə qıləy vəhışti mıjdəvoni bıbu.

Kofir iyən ıştə roy qim kardə kəson ki, dınyoədə çı har qləy dəvət və ləzzəti dumo şeydən, çəvon mığobilədə idastə camaat heste ki, əvon fəğət ilahi peyğombəron dəvəti ğəbul kardedən. əvon fəğət bə vohidə Xıdo imonışon vardə və həni bə co sıxan iyən sədoon dığğət kardedənin. əvon votedən ki, çəmə pərvərdıqor Xıdoye. əvon ıştə sıxanon sape mandedən və mığovimət nışon doydən və ıştə bovə və kardə sıxaniku bə dumo pekırıdənin. bə ilahi və`dəon iyən ğıyoməti ruji bovə kardey, çəvon vucudədə jıqo ğoym iyən mehkəme ki, dınyəvi rə dəvardə və`dəon əvəzi, əvon fəğət bə Xıdovəndi ğəti iyən sabitə və`dəon dıl dəvastedən. liza, hiç qıləy amil bəçəvonıştə dini vəzifəon bə vırə rosneyədə bə sıstəti boyis beydəni.

Həlbəttə, ziyodə odəmon bə Xıdo imon vardey iddioədən, əmmo əmələdə i dastə ıştə qətə royədə istiğomət nışon doydənin və mığovimət nışon doydənin. əvon sıst iyən ocizə fərdonin ki, çoko ki, ıştə şəhvəton tufoni mığobilədə ğərol qəteydən ya çəvon mənfəəton bə xətər eqıneydə, ıştə həmonə zəyifə imoni həm çı dasto doydən. həyğətədə, ıştə nəfsi meylon və ıştə nezə odəmon bemənoə tələbon mığobilədə mandə kəson mığdor kame. həmçinin, çı deşmınon təhdid iyən yavə hərəkəton mığobilədə bə sıstəti iyən zəyfəti dıço nıbə kəson həm kamin.

Ha holədə Xıdovəndi sınnət və adət ıme ki, bə rostəvıjə muminon komək kardedə və çəvon dastiku qətedə. ilahi mədəd və koməki roonku qıləyni, məlayikon bə həmonə muminon ğəlb iyən dılon nozil bıeye. joqo ki, əvon bə həmonə muminon dılon zu və umu baxş kardedən və çı deşmınon təhdid iyən tars çəvonku bə diyəro beydə. əvon bə dəvardə ruj və soron nisbətədə həni bəştə dıli tars və ğəmqinəti ro doydənin və mığovimət nışon doydən. firiştə və məlayikon bə jıqo şəxson vəhışti bəşorət və mıjdəvoni doydən.

Beşək, ilahi firiştəon bəşorəton bə imoninə insonon ruf iyən coni şua əks kardedə. əvon bə muminon çı jimoni saxtə ləzəonədə qıləy ğıvvə baxş kardedən, çəvon fırsiyə zəmonədə çəvon dastiku qəteydən və əvoni sabitğədəm kardedən.

Im bəçəy xotoye ki, dınyoədə çı muminon vəzifəonku qıləyni ımbe ki, əvon ıştə nəfson kontrol kardedəbin və ıştə tuğyongərə nəfsani meyl və tələbon dumo nışin. zira, jıqoşon kardəbe, ım bəçəvon fəsod iyən həlokəti boyis əbi. əmmo, axırətədə çəvon boştə kardə ım məhrumiyyət və  ğədəğənon cubran bəkarde və çəvon əvəzi bebəşe və çəvon dıli çiç bıpyişe, bəvon əto bəkarde. zira,vəhışt çı fəsod iyən puçəti vırə ni. əvon bə Xıdovəndi əbədiyə mehmonəti bıə vəhışti roşon pəydu kardə və əy dayima bəmandeyn. qıləy mehmonəti ki, çəy soyb əbaxş və mehribonə Xıdoye və çəy mehmon həm pok və bə vəhışti loyığ  bıə kəsonin.

Çın ayəku omutedəmon:

1-ehanə dınyoədə mığovimət nışon doə muminon kamebu, əmmo məlayikon çəvon osmoniyə dustonin ki,dınyo iyən axırətədə bəvon komək kardedən və çəvon dastiku qəteydən.

2-vəhışti ləzzəton, fəğət de maddi ləzzət və cismoni tələbon xulosə beydəni. bəlkəm, bə insoni ləzzəti boyis bıə harçi əyo hozzıe. oşkoye ki, mənəvi ləzzət və xoşə məğamon həm vəhışti əhli palu çı maddi ləzzətonku kam ni.

3-Xıdovəndi de vəhışti əhli bıə rəftor, bəçət rəhmət və məğfırəti əsose və ım çı Xıdovəndi bəvon bıə lutf iyən baxşeşi bəyon kardedə.