895-ə hissə-Fussiləti surə-41-44 şərifə ayəon

895-ə hissə

إِنَّ الَّذِینَ کَفَرُوا بِالذِّکْرِ لَمَّا جَاءَهُمْ وَإِنَّهُ لَکِتَابٌ عَزِیزٌ ﴿٤١﴾ 

Ə kəson ki, bənə Ğıroni bəçəvon soyəx ome, bəy kofir bin(bəştə cəzo bərəseyn). və ın(Ğıron) qıləy erjin(və nufuz ğəbul nıkə) kitobe.

لا یَأْتِیهِ الْبَاطِلُ مِنْ بَیْنِ یَدَیْهِ وَلا مِنْ خَلْفِهِ تَنْزِیلٌ مِنْ حَکِیمٍ حَمِیدٍ ﴿٤٢﴾ 

Hiiç qıləy çı nav iyən peştiku bəy ro pəydu nibəkarde. (zira)Həkim iyən Həmidə Xıdo tərəfiku nozil bıə.

Vəynə bərnomədə çə kəson barədə sıxan votey be ki, deştə duyə sıxanon və de dini təhrif kardey, səy kardedən milləti bə inhirofi səmt bıkəşon və bəçəvon çı din iyən Kərimə-Ğıroniku vitey boyis bıbon. ın ayəon hamyedə: ım Ğıron bo təzəkkur iyən pandi nozil bıə ta insonon çı ğəfləti haniku oğo bıbon və Xıdovəndi bəvon əto kardə bəştə pokə fıtrəti səmt oqardon.

Əmmo, de təəssıfı milləti kali qıləyni bəy kofir beydən vədini həyğəton inkor kardedən. qıləy holədə ki, əvon deştə təkzibi çın osmoniyə kitobi erj və ğeymətiku bəkam kardey nibəzıneyn. qıləy holədə ki, Xıdo kitob əbədi iyən məğlub nıbənine. qıləy kitob ki, çəy məntığ ruşin, çəy dəlilon ğoym və çəy təlimon rişədore.

Ayəon Kərimə-Ğıroni əzəməti tevsifədə hamyedə ki, ım kitob qıləy Xıdo tərəfiku nozil bıə ki, çəy qırd koon bə benəhoyətə hikmət, dırıstəti iyən kəmoli əsose. təbiiye qıləy kitob ki, həkim iyən bə həmdi loyığ bıə kəsi tərəfiku enovniyə bıə, nə çı naviku və nə çı peştiku bəy qıləy botılə sıxan ro pəydu kardey əzıni və çəy ayəonədə hiç qıləy ziddiyyət mışohidə kardey mumkin ni. çəy ğanun iyən fərmononədə səhv mevcud ni və hiçkəs çəy ayəon təhrif kardey nibəzıne. çımonsə əlovə hiçkəsi çəy həyğəton botıl kardey ğudrətış ni. ayəndə və vəomədə həmçininçı bəşəri elmi kəşf və inkişofon bəy qıləy noxsan və zərəl rosney nibəzıneyn.

Çın ayəonku omutedəmon:

1-dınyoədə çı ğəflət iyən zəlolətiku bə diyəro mandey xoto, Ğıroni tilovətkəmon ki, bə zikri iyən həyğəton bə yod dənoe boyis beydə.

2-Kərimə-Ğıron ıştə vəoməyku xəbə doydə və de oşkoə formə elon kardedə ki, bəy hiç qıləy xələl daxil nibəbe, əv təhrif nibəbe və hiçvəxti bəy botıl ro pəydu nibəkarde.

3-bə Ğıroni zidd mıxtəlifə məkrinə planon bə qıləy vırə nibərəse. liza, çanədə çı Ğıroni deşmınon cəhdkon, əy çı camiyə səhnədə bə kəno kardey nibəzıneyn.

4-çun Kərimə-Ğıroni ayəon ilhahi elm iyən hikməti cilvəonkuye, əve bə hikməti əsose iyən bo dini islomi qıləy ğoymə fundamente.

مَا یُقَالُ لَکَ إِلا مَا قَدْ قِیلَ لِلرُّسُلِ مِنْ قَبْلِکَ إِنَّ رَبَّکَ لَذُو مَغْفِرَةٍ وَذُو عِقَابٍ أَلِیمٍ ﴿٤٣﴾

(Ha pəyğombər ha!)Bətı votə bıə çi bəştı bənav bıə peyğombəron(həm) votey bıə. bərosti ıştı pərvərdıqor məğfırət və qıləy dardnokə əzobi soybe.

وَلَوْ جَعَلْنَاهُ قُرْآنًا أَعْجَمِیًّا لَقَالُوا لَوْلا فُصِّلَتْ آیَاتُهُ أَأَعْجَمِیٌّ وَعَرَبِیٌّ قُلْ هُوَ لِلَّذِینَ آمَنُوا هُدًى وَشِفَاءٌ وَالَّذِینَ لا یُؤْمِنُونَ فِی آذَانِهِمْ وَقْرٌ وَهُوَ عَلَیْهِمْ عَمًى أُولَئِکَ یُنَادَوْنَ مِنْ مَکَانٍ بَعِیدٍ ﴿٤٤﴾ 

Və ehanə əvımon qıləy ğeyri-ərəbiyə Ğıronımon ğərolımon doəbe, hukmən əvotin: çıro çəy ayəon ruşin bəyon bıəni? (qıləy kitob)ğeyri-ərəbi və(qıləy millət) ərəbi zıvonoe? vuji:ım kitob bo imon vardə kəson hidoyəti moyə və şifoye və əkəson ki, imonışon vardəni, çəvon quşonədə sanqini heste və(jıqo bızın əvon kuun və) Ğıron boəvon puşniyə bıə(və noməfhume). əvon(bənə əkəsonin ki) diyəroə royku vanq kardey beydən(əmmo,əvon sədo məseydənin).

Navnə ayəon dəvomədə ki, bə dini mıxolifon inkori işorə kardedəbe, ın ayəon hamyedə: əvon nəyinki, de Ğıroni mıborizə bardedən, bəlkəm bə islomi peyğombəri(s) həm norəvoə nisbəton doydən və əy caduqər və sehrboz hisob kardedən. Xıdovənde-Aləm bə peyğombər(s)-i xitob kardə holədə hamyedə: vəynə peyğombəron həm de jıqo norəvoə nisbəton dimbədim omən və de jıqo milləti dimbədim bıən. çən,bəçəvon sıxanon etıno məkə və de səbr iyən hovsələ bəştə risoləti dəvom bıdə.

Təbiiye ki, Xıdovənde-Xalığ bə cohil iyən ğeyri-mığəssırə fərdon nisbətədə əfv və baxşeşi soyb və əhle. əmmo, əkəson ki, aqahonə və zıne-zıne iftiro ğandedən və de ilahi peyğombər və Ğıroni mıborizə bardedən, bə jıqo qıləy şiddətinə əzobi giriftor bəbeyn. İslomi kali mıxolifon bəhonəonku qıləyni ımbe ki, boçi ıştı vardə kitob çəmə zıvonədəy? ehanə tı pəyğombərişbu, ıştı mecuzə ım bıbu ki, qeyri-ərəbi zıvono qıləy kitob boəmə nozilkə ta əmə bıfaməon ki, tı çı Xıdo pəyğombəriş.

Xıdovənde-Aləm çəvon cəvobədə bə ım bəhonə dumo bıə kəson hamyedə: əgər əmə Ğıronımon qıləy ğeyri-ərəbi zıvono nozil kardəmonbe, bə zəmon həm bəhonə əvardin ki, çəmə zıvon ərəbiye və çın kitobiayəon ruşin ni iyən dərəsey beydəni. ısət ki, ərəbi zıvonədəy və şımə həm çəy mehtəvo və məzmuni sərəseydon, deştə ləğv və bihudə sıxanon və de səro-sədo rost kardey, milləti çəy məseyku oqəteydon.

In ayəon dəvomədə hamyedə: Ğıron bo imon vardəkəson çı hidoyət iyən şifo moyəy. çəy hədəf şıməni dınyo iyən axırətdə bə pok və təmizə jimoni səmt hidoyət kardeye, Kərimə-Ğıroni piyedəşe bəşımə dılon şifo baxşko və şımə əxloği notəmizətiyon pokko ta şıməni bə insoni kəmoli bırıosno. əmmo, məələsəf idastə dılışon piyedəni həxı bıvindon və əy bıməson və quya çəvon quş iyən çəşonədə sanqinəti heste və əvon məsey iyən vindey ğudrətışon ni. əgər əvon de imoni ruf iyən həxtələbəti bə Ğıroni soyəx oməbin, çı Kərimə-Ğıroni nuroniyə ayəon şuadə hidoyət pəydu əkəyn və çı rufi iyən əxloği noxəşətionku şifo pəydu əkəyn. əmmo, jıqo bızın əvon ku iyən korə fərdonin ki, çanədə əvoni çı diyəroə vırəku həm vanq bıjənoş, əmmo əvon nibəməseyn.

Çın ayəonku omutedəmon:

1-dini rəhbər və mıbəllığon bəpe bə mıxolifon noloyığə sıxan və rəftoron təhəmmulkon və tov biyon.

2-həm baxşeş iyən həm ilahi tənbih bəçəy hikməti əsose və har qıləyni ıştə vırədə bə çokə ko soybon təşviği iyən bədkoron tənbihi boyis beydə. harçənd, Xıdo rəhmət bəsə çəy ğəzəbisə bənave.

3-çı deşmınon bəhonə oxoş ni, mısılmınon harcurnə həm əməlkon, ijən əvon çı ayb və irodon dumo bəbeyn.

4-Kərimə-Ğıron hidoyəti kitobe. Ğıron çı psixi, əxloği iyən iştimoyi noxəşətiyon damone. həlbəttə, bo əkəson ki, çəy nuri hidoyətiku bəhrə bardeyışon piyedə və ıştə çəş iyən quşışon boəy ojışon kardə.