917-ə hissə- Zuxrufi surə -57-62 şərifə ayəon

917-ə hissə

وَلَمَّا ضُرِبَ ابْنُ مَرْیَمَ مَثَلا إِذَا قَوْمُکَ مِنْهُ یَصِدُّونَ ﴿٥٧﴾

Qıləy zəmon ki, Məryəmi zoə İsa həxədə misol jıey be, ğəflətən ıştı ğovm həmonə sıxaniku(de məsxərə) səro-sədo bəro dəğandeşone.

 وَقَالُوا أَآلِهَتُنَا خَیْرٌ أَمْ هُوَ مَا ضَرَبُوهُ لَکَ إِلا جَدَلا بَلْ هُمْ قَوْمٌ خَصِمُونَ ﴿٥٨﴾

Və voteşone: aya çəmə məbudon vey çokin ya əv? əvon ım misolışon botı jıəşon ni illa bə cədəl iyən deşmınəti xoto. zira əvon qıləy deşmınə millətin.

Çoko ki, torıxi mənbəonədə omə, Məkkə mışrikon boştə bıtpərəstəti bəhonə vardero bə məsishi iyən xristiyanon ko istinod kardedəbin və bə İslomi-Peyğombəri(s) votedəbin: əvon həm İsa-Məsihi pərəstış kardedən ki, Məryəm nomo qıləy jeniku bə dınyo omə. ehanə çəmə ko səhfebu, jəqoədə əvon həm xətoşon kardə və əgər bəşmə votey əsos əmə iyən çəmə məbudon cəhəndımədə bəsuteynbu. çən İsa-Məsih(ə) həm bə cəhənnım daxil bəbe. çıro ki, əv həm məbud vağe bıə.

Im çı bıton de həzrəte İsa-Məsih(ə) bemənoə mığoyisə botıləti ruşine və çı mışrikon tərəfiku de peyğombəri(s) mıcodilə və deşmınətiku bəhs kardedə. əvon ıştə nodırıstə koyku dast kəşey əvəzi, boştə ım yavə ko qıləy bəhonə vardedəbin. bənə ımrujnə ziyodə fərdon ki, boştə xilofə koon mıxtəlifə bəhonəon vardedən və bəştə kardə koon həx doydən.

Imi həm zikr kardey lozıme ki, insononku məbudon bə cəhəndım daxil bəbeyn ki, məbud bıey bıpyişone, bənə fironi milləti bəştə ibodəti səmt vanq jeydən, əmmo həzrəte İsa-Məsih(ə) hiçvaxti bo məbud bıeyro hozzı nıbe və jıqo koyku de şiddəti bə diyəro be.

Çın ayəonku omuteydəmon:

1-cokəson nodırıstə əğedəon məsxərə kardey, de istidlol iyən məntıği rədkəmon.

2-bo həyğəton zıneyro diyaloq və votemon, Ğıroni sıfarış kardə məsələonkuye. əmmo, boştə nodırıstə koon bəhonə vardero bəhs kardey və de cokəson mıborizə bardey qıləy noloyığə koye.

إِنْ هُوَ إِلا عَبْدٌ أَنْعَمْنَا عَلَیْهِ وَجَعَلْنَاهُ مَثَلا لِبَنِی إِسْرَائِیلَ ﴿٥٩﴾

İsa ğərəz çəmə bəy nemət doə qıləy bandəsə co kəs ni və əvımon bo Bəni-İsrayili nımunə ğərol domone.

 وَلَوْ نَشَاءُ لَجَعَلْنَا مِنْکُمْ مَلائِکَةً فِی الأرْضِ یَخْلُفُونَ ﴿٦٠﴾

Və əgər bıpyimone şımə əvəzi zəminədə firiştəon şımə canişin  ğərol ədomon.

Navnə ayəonədə çı həzrəte  İsa-Məsih(ə) de Məkkə mışrikon mığoyisə barədə bəhs be, ım ayəon çı həzrəte İsa-Məsih(ə) mıdofiyə həxədə jıqo hamyedə: əv ıştəni çı Xıdo bandə hisob kardedəbe və hiçvaxti rozi nıbe ki, məsihiyon əy pərəstışkon və ə həzrət de ım ko mıborizə bardedəbe. əv qıləy inson be ki, Xıdovəndi bəy çı risolət və nıbuvvəti nemətış əto kardəbe ta çı Bəni-İsrayili peyğombər bıbu və bənə qıləy komilə ulqu və nımunə bəçəvon hidoyəti boyis bıbu. həyğətədə çə həzrəti har qıləy mecuzə və nışonəon çı Xıdovəndi əzəməti və çəy nıbuvvəti məğamiku qıləy barizə nımunə be. əv həmmə devronədə ki, çı milləti miyono jimon kardedəbe, bə pərvərdıqori ubudiyyəti məğami etırofış hestebe və həmmə insonon bə vohidə Xıdovəndi bandəçəti səmt vanq jeydəbe. əmmo məələsəf məsihi iyən xristiyanon Xıdo əvəzi əy pərəstış və təğdis kardedən.

Ayəon dəvomədə bə mışrikon xitobən hamyedə: ısət Xıdo iyən çəy rəsul şıməni bə rostə roy dəvət kardedə, bəçəy xoto ni ki, Xıdovəndi bəşmə imon iyən ibodəti ehtiyociş heste. zira ehanə əv bıpyişe, şımə əvəzi firiştəon zəmini dimisə şımə canişin ğərol bədoe. həmonə məlayikon ki, hejo bə Xıdo fərmoni təslimin və deçəy itoət vıə bandəçəti koy məşğulin.

Çın ayəonku omuteydəmon:

1-Xıdo bandəçəti bə insoni kəmol iyən ozavziye boyis beydə və peyğombəron bə bandəçəti vey barzə mərtəbon rəsən.

2-harçənd yəhudiyon tarıxi dırozi de həzrəte İsa(ə) mıxolifət kardəşone, əmmo əv çı Bəni-israyili ğovmiku be və yəhudyon tərəfiku çə həzrəti nəfy kardey bəçəvon inodkorəti xoto bıə.

3-Xıdovəndi piyəşe ki, bəşər deştə ixtiyor iyən aqahəti imon biyo. əgər jıqo bıənəbe, Əv məlayikon zəmini dimisə ğərol ədoy ki, çəvon hiç qıləy ixtiyorışon ni və dayima əvon Xıdo ibodət kardedən.

وَإِنَّهُ لَعِلْمٌ لِلسَّاعَةِ فَلا تَمْتَرُنَّ بِهَا وَاتَّبِعُونِ هَذَا صِرَاطٌ مُسْتَقِیمٌ ﴿٦١﴾

Və bərosti Əv ğıyoməti(zəmoniku) aqahe. çən, bəvədə şək məkənən və bəmı pemandənən ki, ıme rostə ro.

 وَلا یَصُدَّنَّکُمُ الشَّیْطَانُ إِنَّهُ لَکُمْ عَدُوٌّ مُبِینٌ ﴿٦٢﴾

Və şəyton şıməni(Xıdo royku) onıqəto ki, əv şımə oşkoə deşmıne.

Vəynə ayəon dəvomədə ım ayə bəhəzrəte İsa-Məsih(ə) coqlə xıslətonku qıləyni işorə kardedə və hamyedə: həzrəte İsa(ə) vucud ğıyoməti nışonəonku qıləyniye. zira çə həzrəti təvəllud, çəy moə şuyəş nıbə holədə bə əməl omə, ım ıştən çı Xıdovəndi insonon ğıyoməti ruji sənibəton ofəyey ğudrəti nışonəy. həmçinin həzrəte İsa-Məsih(ə) mecuzəonku qıləyni həmonə bın dınyoədə mardə insonon bəyji kardey be. çımisə əlovə bə İslomi metəbərə rəvoyəton əsos və bə Məsihiyon əğedə əsos oxorız-zəmonədə həzrəte İsa(ə) osmoniku nozil bəbe ki, ım ıştən çı dınyo oxoy nez bıey və ğıyoməti ruji rəsey nışon bədoe.

Ayə dəvomədə bə ğıyoməti ruji ğəti bıey təkid kardedə və hamyedə: hiçvaxti çəy barədə şək məkə və əy bəştə dıli ro mədə. zira ğıyomətiku ğafil mandey, bə çandə nev inhirof, curm və cinoyəton mırtəkibi boyis beydə və oxoysə bə cəhəndımi suğut kardedə. bəlkəm, bə İlahi rostə roy pemandənən. qıləy roy ki, de peyğombəron vositə təbyin bıə və insoni çı ziyodə xətəronku ki, çəy ratədə nıştə və əy çəş kardedə, nicot bədoe ta dınyo iyən axırətədə hərəbaxt bıbu.

Həlbəttə Xıdo roy mığobilədə çı şəytoni roye ki, dılış heste deştə vəsvəsə və hiyləon şıməni çı Xıdo royku və axırətədə bəştə ağıbəti dığğət kardeyku oqəto ta dınyo iyən axırətədə şımə giriftor bıbon. şəytoni ım ko rişə həm deşmə bıə nığılə deşmınəti iyən ədovəte. çun, əy bəşmə əjdod Odəmi(ə) səjdəş nıkarde və çı İlahi dərqoyku tojney be. peşo əy ğəssəmış harde ki, de tobə dınyo jimoni oxo çı Odəmi(ə) fərzəndon inhirofi zəminə hozzı bəkarde. ısət şımə çokonə jıqo qıləy ğəssəm hardə deşmıni hiyləon mığobilədə sakit nıştəyon və bəy icozə doydon ki, deştə dumo yənde bıə vəsvəsəon şıməni çı həxə royku oqəto?

Çın ayəonku omutedəmon:

1-Xıdo ovliyaon vucud və çəvon sıxan iyən rəftoron miad və ğıyoməti bə insoni yod dənoydə.

2-inson bo rostə royədə hərəkət kardeyro bə qıləy ulqu və nımunə ehtiyociş heste. liza sərostə ro bəpe çı Xıdovəndi pokə bandəonku yəni çəy peyğombəronku omuto, jıqo nıbu inson bəştə həvaye-həvəson və şəytoniyə vəsvəsəon dıço bəbe və zənn bəkarde rostə royədə ğərolış qətə.

3-şəyton həmişə çı insoni ratədə mandə ta har qıləy mumkin bıə royku bəçəy dıl iyən rufi nufuzko və əy həxə roy iyən siratəl mustəğimiku oqəto.