918-ə hissə- Zuxrufi surə -63-69 şərifə ayəon

918-ə hissə

وَلَمَّا جَاءَ عِیسَى بِالْبَیِّنَاتِ قَالَ قَدْ جِئْتُکُمْ بِالْحِکْمَةِ وَلأبَیِّنَ لَکُمْ بَعْضَ الَّذِی تَخْتَلِفُونَ فِیهِ فَاتَّقُوا اللَّهَ وَأَطِیعُونِ ﴿٦٣﴾

Və çun İsa ruşinə dəlilonış varde, voteşe: bərosti boşmə hikmətım vardə və(oməm) ta şımə ixtilof kardə kali çiyon boşımə ruşinkəm. çən, Xıdoku bıtarsənən və bəmı pemandənən.

إِنَّ اللَّهَ هُوَ رَبِّی وَرَبُّکُمْ فَاعْبُدُوهُ هَذَا صِرَاطٌ مُسْتَقِیمٌ ﴿٦٤﴾

Beşək, Xıdovənd çımı iyən şımə pərvərdıqore. çən, əy pərəstışkənən ki, ıme rostə ro.

Navnə proqramədə bə məsihiyon çı həzrəte İsa-Məsih(ə) həxədə bıə nodırıstə nəzə işorə kardemone ki, əvon əy bənə Xıdo zoə unvoni pərəstış iyən təğdis kardedən. ın ayəon bə həzrəte İsa(ə) dəvəti mehtəvo iyən məzmuni işorə kardedə vəhamyedə: İsa-Məsih(ə) həm bənə coqlə peyğombəron mecuzəonış nışon doə ta bəçəy həxəti iyən risoləti iddio rostəvıjəti qıləy dəlil bıbu.

Əv milləti bəhikməti səmt dəvət kardedəbe. yəni bə dırıstə məntıği əsos həxə bovəon bəyon kardedəbe ta həmmə kəs bıfamon və ğəbulkon və fik iyən əğedədə çı harcurnə inhirofiku əmonədə bımandon. həlbəttə hikmət bə əməli sahə həm şomil beydə və bə insoni əxloği təhzib iyən sofəti işorə kardedə ta çı rəzilətonku bə diyəro bımando və ıştəni de əxloği fəziləton dərosto.

Təbiiye çı milləti miyono mıxtəlifə mezvuonədə bıə ixtilofon barədə həm bə hikməti əsos hakiməti kardey və dırıst iyən ədolətinə hukm bekardey bəbe.

Ayəon dəvomədə həzrəte İsa-Məsih(ə) çəy məbud bıey barədə bıə harcurnə iddio nəfy iyən rədd kardey xoto, hamyedə: Xıdovənd çımı iyən şımə pərvərdıqore. ə həzrət de ım ruşinə təbiri bəyon kardedə ki, az iyən şımə həmmə insonimon və çəmə Xalığ Xıdoye. mı həm bənə şımə ıştə vucudi qırd cəhətonədə bə Xaılğ iyən Tədbirəkə Xıdo ehtiyocim heste və Əv bəmı ro nışon doydə. Əv çı həmməkəson pərvərdıqore, fəğət əy pərəstışkənən və ğərəz Əv hiçki bo pərəstıışiro qıləy ləyoğətış ni. həzrəte İsa-Məsih(ə) ıştə sıxanon təkmilədə votedə: mıstəğim iyən rostə ro pərvərdıqori həmonə ubudiyyət və bandəçəti roye.qıləy ro ki, bəvədə hiç qıləy inhirof və kəcəti mevcud ni.

Çın ayəonku omutedəmon:

1-peyğombəron dəvət bə hikmət və ruşinə dəlilon əsos bıə ta millət deştə ağl və əndişə çəy dırıst və səhihəti dərk kardey bızınon və əy ğəbulkon.

2-dini iyən iştimoyi ixtilofon bərtərəf kardey ro, bə İlahi peyğombəron barzə təlimon ovard kardey və şəxsi iyən kollektiv zevğon tətbiğiku bə diyəro mandeye.

3-İsa-Məsih(ə) əsliyə peyğom bəşəri bə Vohidə Xıdo səmt dəvət kardeye. bo pərəstışi fəğət ə kəs loyığe ki, koon tədbir çəy dastədəy və sıvoy Xıdo hakəs iyən harçi sıtoyiş kardey inhirofətiye. çən, hiçkəsi ğərəz Xıdo bo pərəstışi ləyoğətış ni, harçənd əv peyğombər bıbu iyən de mecuzə roy bə dınyo həm booy.

فَاخْتَلَفَ الأحْزَابُ مِنْ بَیْنِهِمْ فَوَیْلٌ لِلَّذِینَ ظَلَمُوا مِنْ عَذَابِ یَوْمٍ أَلِیمٍ ﴿٦٥﴾

Əmmo çəvon miyono dastəon ixtilof kardeşone. çən, vay bıbu bo əkəson ki, sıtəmışon karde, çı dardnokə ruji əzobiku.

هَلْ یَنْظُرُونَ إِلا السَّاعَةَ أَنْ تَأْتِیَهُمْ بَغْتَةً وَهُمْ لا یَشْعُرُونَ ﴿٦٦﴾

Aya ğərəz Ğıyoməti ruji co intizori kəşeydən ki, ğəflətən bəçəvon soyəx bome, qıləy holədəki, bexəbədon.

الأخِلاءُ یَوْمَئِذٍ بَعْضُهُمْ لِبَعْضٍ عَدُوٌّ إِلا الْمُتَّقِینَ ﴿٦٧﴾

Həmonə ruji ğərəz pərhizkoron həmmə duston de iyande deşmınin.

Həzrəte İsa(ə) Bəni-İsrayili ğovmi miyono bə peyğombərəi məbus be. əmmo Bəni-İsraili dastəon əvışon duyəvoj zıneşone və çə həzrəti risolətışon ğəbul nıkarde. çımi mığobilədə həm idastə çə həzrəti barədə ğuluv kardeşone vəəvışon peyğombərəti məğamisə həm barz qəteşone və bə uluhiyyəti məğami rosneşe. əvon ə həzrətışon osmon iyən zəmini ofəyə Xıdoşon hisob kardeşoneki, çı insoni ğolibədə təcəssımış pəydu kardə.bəziyon həm əvışon seqlə Xıdoku qıləyni zıneşone.

Nəhoyətən Təslis və məsihiyyəti dınyodə seqlə xıdoon əğedə ğalib be və çoko ki, ımrujəmə şoydimon əksər xristiyanon bə Təslisi ğaiyilin.

Həzrəte İsa-Məsih(ə) həxədə ım ifrot iyən təfrit qıləy holədə be ki, əv ıştəni çı Xıdo bandə elon kardedəbe və məxloği fəğət bə vohidə Xıdo pərəstışi səmt dəvət kardedəbe. liza ayə hamyedə: vay bıbu bo əkəson ki, sıtəmışon kardə və çı mıstəğimə royku mınhərif bıən. əvon bə nıbuvvəti məğami zılmışon kardə və ğıyoməti ruji bə cəhəndımi otəşi dıço bəbeyn.

Əvon bə Xıdo peyğombəri deştə ın nodırıstə nisbəton çı intizorışon heste və çiç çəş kardedən? aya ğərəz qıləy ğıyoməti ki, ğəflətən bəçəvon soyəx bome və əvoni giriftor bəkarde, əvon coqlə intizorışon həm heste? bəle, maq və ğıyoməti saat jıqo ğəflətən bome ki, əvon əslən boəy hozzı nibəbeyn və əvon qımon kardedənin ki, həmonə ruj bome əvoni dəbəqəte.

Çın ayəonku ruşin beydə ki, ğıyoməti saxt və dəhşətinə hodisə de dıqlə xısləti bə icoye. qıləyni ğəflətən və coqləyni milləti xəbə nıbey və çəvon boəy hozzı nıbey.

Ayəon dəvomədə çı ğıyoməti ruji tevsifədə hamyedə: həmonə ruj ğeyri ilahi qırd rabitəon pebəssiyen və iyandeyku co bəbeyn. zılm, fəsod iyən qıno royədə bıə dust bıə kəson de iyande deşmın bəbeyn və hakəs cokəsi ıştə bədbəxtəti iyən zəloləti məsul bəzıneyn və bəy bəvoteyn: tı mını bə inhirofi səmt şıkırne barde, dınyo bomı ziynətin cilvə doe və bə detı dustiyəti iyən muaşirəti xoto, ısət az bə jıqo qıləy telə tale dıço bıəm.

Fəğət əkəson ki, dınyoədə çəvon dustiyəti iyən deşmınəti bə İlahi erjon əsos bıə, ğıyoməti ruji çəvon dustiyəti dəvom pəydu bəkarde və bə lənət, nifin iyən deşmınəti təbdil nibəbe. çun çı pərhizkoron dustiyəti bə qıləy əbədiyə erjon mehvəri əsos bə əməl omə, əve ım qıləy əbədiyə rabitəy. həlbəttə, çın dustiyəti səmərəninə nəticəon ğıyoməti ruji vey oşko və məlum bəbe.

Çın ayəonku omutedəmon:

1-ğıyoməti hodisə ğəflətən bome. çəy zəmon bo hiçkəsi, hətto bo peyğombəron həm məlum ni və çəy elm fəğət bə Xıdo məxsuse.

2-dınyəvi rabitəon əgər bə uxrəvi meyaron əsos nıbu, ğıyoməti ruji bə deşmınəti təbdil bəbe.

3-de imoni əhli dustiyəti, əbədi iyən sabite. bə cokəson dustiyəti əks ki, etımod kardənin ni və mıvəğğətiiye.

یَا عِبَادِ لا خَوْفٌ عَلَیْکُمُ الْیَوْمَ وَلا أَنْتُمْ تَحْزَنُونَ ﴿٦٨﴾

Ha çımı bandəon ha! Imruj bo şımə nə qıləy tars heste və nə qıləy ğəmqinəti.

 الَّذِینَ آمَنُوا بِآیَاتِنَا وَکَانُوا مُسْلِمِینَ ﴿٦٩﴾

Həmonə kəson ki, bəçəmə ayəon imonışon vardə və təslim bıən.

Bın cahanədə pərhizkoron etığodi nəzəku qıləy ğoym və mehkəmə imonışon heste və əməli nəzəku həm bə aləmon pərvərdıqori fərmonon komilə surətədə təslimin. əvon nə bə İlahi ayəon şəkk kardedən və nə bəştə tuğyongərə həvaye-həvəson və meylon tabe beydən.

Xıdovəndi tərəfiku bə ın fərdon bəşorət doey bıə ki, ğıyoməti ruji boəvon hiç qıləy tars və xof nibəbe və çəvon dəvardəyon iyən ayəndəyon həxədə həm qıləy ğəmqinət və norohətçəti nibəbe. çı qıləy cozibədorə peyğom və mesaj? qıləy peyğom ki, bevositə Xıdovəndi səmtikuye ki, çı insoni dıliku çəy dəvardəyon iyən vəoməku bıə norohətçiyon çı miyoniku bardedə. bəle, qıləy inson ki, dayima ıştə vəzifəon bə vırə rosney dumoye, ehanə bə qıləy nəticə həm nırəso, dəboxtey və norohətçəti hiss kardedəni və bə tars iyən iztirobi dıço beydəni. əv bə İlahi luton umudəvoye və ıştə vucudi bəy aspardedə.

Çın ayəonku omutedəmon:

1-bə həyğiyə oroməti rəsey və ğıyoməti hovlnokə hodisədə çı tars və iztirobiku əmonədə mandey ro, Xıdo bandəçəti iyən bəçəy əmron təslim bıeye.

2-fəğət imon kifoyət kardedəni, əməl həm lozıme və bəpe bə Xıdovəndi əmron əmə tabe bıbəmon.