923-ə hissə- Duxani surə -9-18 şərifə ayəon

923-ə hissə

بَلْ هُمْ فِی شَکٍّ یَلْعَبُونَ ﴿٩﴾

Bəlkəm, əvon ıştə şək və tərdidədə ıştə səşon tasponıə.

فَارْتَقِبْ یَوْمَ تَأْتِی السَّمَاءُ بِدُخَانٍ مُبِینٍ ﴿١٠﴾

Çən, qıləy ruji mıntəzir bıbi(çəşkə) ki, osmon qıləy duyəvulə bəvarde.

یَغْشَى النَّاسَ هَذَا عَذَابٌ أَلِیمٌ ﴿١١﴾

(qıləy duyəvulə ki) Həmmə milləti dəbəqəte. ım qıləy dardnokə əzobe.

Vəynə bərnomədə bə Kərimə-Ğıroni nozil bıey və bo milləti hidoyətiro omə bə İlahi peyğombəron besəti işorə kardedəbe ki, ım çı Xıdovəndi bəştə bandəon bıə rəhməti qıləy nışonəy. ım ayəon hamyedə: əmmo millətiku iqlə dastə deməkə ki, həxışon famə və dərəsən, ijən boəy ğəbul kardey hozzı nin və hejo ıştə iyən cokəsonədə şəkko-tərdid icod kardedən. əvon çı şəkko-tərdidiku dəvardey və bə qıləy yəğın iyən xotırcəməti rəsey əvəzi, ıştə səşon de şəkko-tərdidi tasponəşone və de osmoniyə kitobi həyğətonhənək kardedən. peşo bə ım inodkorə kofiron çəşnavi doydə ki, çoko ki,əvon İlahi əzobi nışonəon mışohidəkon, ğəfləti pardəon çəvon çəşon mığobiliku bə kəno bəşe və əvon ıştədıjdə səhfi dəbərəseyn ki, İlahi peyğombəron votə çiyon rost və dırıst bıə, nəyinki, xorafat və mevhumot bıən.

Çın ayəonku omutedəmon:

1-şək bəpe bo ğəflət iyən bihudəti zəminə nıbu. həyğətədə bəd və nodırıstə çi, şəkkədə baği mandeye. və jıqo bıənıəbe, şək kardey çı bəşəri ağl iyən dərki tələbe ki, bəpe de təhğıği çı şəkkiku dəvardey bıbu.

2- de dini bovəonədə şəkko-tərdidi icod kardə kəson sıxanon ıştə sə tasponey və bə İlahi ayəon məsxərə kardey, dumo ıştə qıləy saxtə əzob vardedə.

رَبَّنَا اکْشِفْ عَنَّا الْعَذَابَ إِنَّا مُؤْمِنُونَ ﴿١٢﴾

(Votedən)Xıdolim ha! Im əzobi çəməku bərtərəfkə ki, əmə imon bəvardemon.

أَنَّى لَهُمُ الذِّکْرَى وَقَدْ جَاءَهُمْ رَسُولٌ مُبِینٌ ﴿١٣﴾

Əmmo ım pandi ğəbul kardey boəvon çı foydəş heste? və holınki, qıləy ruşinəkə peyğombər bəçəvon soyəx ome.

 ثُمَّ تَوَلَّوْا عَنْهُ وَقَالُوا مُعَلَّمٌ مَجْنُونٌ ﴿١٤﴾

Peşo çəyku dim qordıneşone və voteşone: əv təlim vində səfiye.

Təbiiye ki, Xıdo munkiron de İlahi əzobi nışonəon vindey, qıləy vəhşət iyən iztirob çəy qırd vucudi dəbəqəte və bə Xıdo dərqo dim bəqəteyn və bəvoteyn: Xıdolim ha! əzobi çəməku dəfkə, əmə imon bəvardemon. qıləy holədə ki, ım imon bə tarsi xotoye və hiç qıləy erjış ni. həyğətədə, çə imoni qıləy erjış heste ki, de dıli xoşi, tars və xarici təzyiğ nıbə holədə bo insoni hosil beydə.

Ayəon dəvomədə hamyedə: ım oğoəti iyən oqardımon boşmə holi hiç qıləy foydəş ni.zira, peyğombər(s) de ruşinə dəlil iyən mecuzəon bəşmə soyəx omeyədə, çəy əmron ğəbul kardey iyən bə Vohidə Xıdo imon vardey əvəzi, şımə çəyku dim qordıneyone. çəy ruşinəkə təlimonbə cokəson nisbət doyone və hozzı nıbiyon ğəbulkənən ki, əvon İlahi vəhy və Xıdovəndi sıxanonin.

Qahi zəmon votedən: əv de cınon qıləy irtibotış heste və çəvonku omutə mətləbon bəyon kardedə. qahi vaxt həm votedən: əv sayir fərdonku ım sıxanonış məsə və cokəson ım mətləbonış bəy ilğo kardə və əv ımoni bə Xıdo nisbət doydə.

Çın ayəonku omuteydəmon:

1-əvon ki, ımruj bə Xıdo dini məsxərə kardedən, iruj çəvon çəşon oj bəbe və çı ğəflət iyən şəkkiku xaric bəbeyn. əvon oqardemoni tələbi bəkardeyn. əmmo həni çımi hiç qıləy foydəş nibəbe.

2-Xıdovənd çanədə ki, de kofiron iyən munkiron huccəti təmom nıko, bəvon əzob nibədoe.

3-kofiron çı peyğombəron sıxanon rədd kardey əvəzi, qıləy məntıği dəlil və istidlol biyon. əvon səy kardedən de norəvoə iftiro iyən behtoni çəvon şəxsiyyəti təxribkon.

إِنَّا کَاشِفُوا الْعَذَابِ قَلِیلا إِنَّکُمْ عَائِدُونَ ﴿١٥﴾

Həlbəttə, əmə qıləy kamə zəmonədə əzobi bərtərəfkəmon, (əmmo)şımə(ijən bəştə kufri) oqardedon.

 یَوْمَ نَبْطِشُ الْبَطْشَةَ الْکُبْرَى إِنَّا مُنْتَقِمُونَ ﴿١٦﴾

Qıləy ruj ki, de dıjdə ğudrəti əvoni obəqətəmon. həyğətən, əmə intiğom bıstənimon.

İmon nıvardə kofiron iddio mığobilədə ım ayəon hamyedə: əmə çəvonku lıski əzobiku bəkamkəmon, əmmo ijən əvon ibrəti dərsışon qətəni. əvon ijən bəştə kufr iyən yavə koon səmt oqardeydən və ıştə kardə koonku peşmon həm nin.

De qıləy co iborəti ehanə bə əzobi çənqali giriftor bıə və əvon cəzo vində zəmonədə peşmon beydən və dılışon heste qıləy tojə ğərol bekon, ım qıləy mıvəğğəti iyən rədəvardə nəzəy. əmmo çoko ki, çı hodisəon tufon bınışto, ijən əvon ıştə bərnomə təkror kardedən. çən, çəvon ıştə imoni izhior kardey bə tarsi xotoye və qıləy erjış ni. liza əgər həm dınyoədə qıləy təxfif iyən sıvıkə cəzo bıvindon, ğıyoməti ruji qıləy saxtə əzob əvoni çəş kardedə. zira zolımon bə İlahi ğəzəbi tuş bomeyn və çəy əzobiku əmonədə nibəmandeyn.

Çın ayəonku omutedəmon:

1-mumkine vey zəmon Xıdovənd həmonə bın dınyoədə çəmə qınoonku dəvardo, əmmo demiyən əmə ıştə bədə koonku dast peqəteydənimon və ijən bəştə nodırıstə koon isror kardedəmon.

2-Xıdovənd peyğombəron iyən muminon himoyədore və çı kofir iyən zolımonku bəçəvon peyğombər iyən muminon həxədə bıə zulmi xoto, çəvonku intiğom bəstəne.

وَلَقَدْ فَتَنَّا قَبْلَهُمْ قَوْمَ فِرْعَوْنَ وَجَاءَهُمْ رَسُولٌ کَرِیمٌ ﴿١٧﴾

Və həyğətən əmə çəvon bənav fironi ğovmımon imtovon karde və boəvon qıləy buzurquvarə peyğombər ome.

 أَنْ أَدُّوا إِلَیَّ عِبَادَ اللَّهِ إِنِّی لَکُمْ رَسُولٌ أَمِینٌ ﴿١٨﴾

(Bəvon voteşe)Ki, Xıdo bandəon bəmı bəspardənən. həyğətən, mı boşımə qıləy əminə peyğombərim.

Navnə ayəon dəvomədə ki, çı Məkkə mışrikon de İslomi-peyğombəri(s) rəftori barədəbe, ın ayəon bə Mosə(ə) iyən fironi sərquzəşton işorə kardedə. ımi həm zikr kardey lozıme ki, fironi ğovm de bə qıləy zumandə hukumət, bərəkətinə sərvət iyən veyə imkoanton malik bıey çı ğudrəti ovc və pik həddədə be. əmmo ım dıjdə ğudrət əvonış məğrur karde və bə çandə nev qıno, zılm iyən sıtəmi əvon aludə biin.

Bın zəmon həzrəte Mosə(ə) bə fironıjon soyəx şe. əv de qıləy ədəb-ərkoni ləhn iyən toni firon iyən çəy ətrofədə bıə kəsonku tələbış karde ki, Bəni-İsrayili ğovm ki, çəvon nokə be, əvoni ozodkon ta əv bə İlahi təlimon əsos əvoni hidoyətko və əvoni bə hərəbaxtəti bırosno.

Çın ayəonku omutedəmon:

1-peyğombəron iminə risolət və missiyə, milləti çı zolımkorə hakimon sultəku ozod kardey və məhrum iyən mustəzəfon çı istismariku peroxney be. liza həzrəte Mosə(ə) bə Bəni-İsrayili soyəx şıey bənav firon iyən çəy ətrofi palu şe.

2-peyğombəron əmin iyən milləti etımod kardə şəxson bıən. çəvon çokə sabiğə və staj boçəvon risoləti iyən milləti boçəvon dəvəti ğəbul kardey zəminə hozzı kardedə.