652-ə hissə-Şuəra surə-14-20 şərifə ayəon

652-ə hissə

وَلَهُمْ عَلَيَّ ذَنبٌ فَأَخَافُ أَن يَقْتُلُونِ (14) 

(Mosə voteşe)Çəvon (iddioədə)çımı giyədə qıləy dıjdə qıno heste. əve tarsedəm ki, əvon mıni bıkışton.

قَالَ كَلَّا فَاذْهَبَا بِآيَاتِنَا إِنَّا مَعَكُم مُّسْتَمِعُونَ (15) 

Xıdovəndi hamyeşe: jıqo ni. çən, şımə dı xonəxo deçəmə nışonəon(mecuzəon) bışənən ki, əmə deşmə bə ico(çəvon votəyon) bəməsemon.

Dəvardə bərnomədə işorə be ki, Xıdovənd bo Bəni-İsrayli çı Fironi sultə jiku ozod kardeyro, bə həzərte Mosə(ə)-i məmuriyyətış doe ki, bə fironıjon tərəf bışo. ın ayəon hamyedə: həzrəte Mosə(ə) çə məmuriyyəti problemonku qıləyniş bə Xıdovəndi ərzış karde və voteşe:az çımi bənav de Bəni-İsrayili məzlumə fərdonku çanbəyəxə bıə qıləy sıtəmkorə fironıjım kıştıme və ısət tarsedəm ki, ehanə əvon mıni bıvindon hukmən mıni bəkıştın yaanki, bə həmonə merdi kıştey macəra xoto, əvon bəçımı ko mane bıbon və az ıştə bın koyədə mıvəffəğ bıey nibəzınem.

Xıdovəndi çə həzrəti cəvobədə hamyeşe: tı niqəron məbi. zira əvon bəşmə qıləy zərəl rosney nibəzıneyn. həlbəttə tı həm bın məmuriyyət coyli həm məşi. çoko ki, tı ıştən tələbı karde deştə bo Haruni(ə)bə ico bışi və bızın ki,mı deşmə bə icom və şımə deçəvon miyono bıə qırd çiyon nəinki, az bəvindem, bəlkəm çı neziku həm bəməsem və bəşmə az koməq həm bəkam.

Çın ayəonku umutedəmon:

1-bə deşmoni ələyh harcurnə hərəkəti, bəbe de bə dəvardə şərayiti dığğət kardey bə ico bıbu iyən ıştə həmfikə ğıvvonku koməq tələbkəy ta bə nəticə rəsey imkonış bıbu.

2-bə mınosibə ğərol omey bədiqə, bəbe bə Xıdo təvəkkulkəy ki, əv bə imoninə şəxson koməq kardedə.

3-Xıdovənd qırd vırədə hazıro-nazire və çəmə həmmə koon cuziyyatonku xəbədoe.

4-həxı bəyonədə nə çı tərəfdoron kam bıeyku iyən nə çı deşmoni ziyod və ğudrətin bıeyku mətarsənən.

فَأْتِيَا فِرْعَوْنَ فَقُولَا إِنَّا رَسُولُ رَبِّ الْعَالَمِينَ (16) 

Bə Fironi soyəx bışənən və bıvotənən: əmə pərvərdıqore-aləmi tərəfiku vığandə bıəmon.

أَنْ أَرْسِلْ مَعَنَا بَنِي إِسْرَائِيلَ (17) 

Çən, Bəni-İsrayili(ozodkə və) deəmə bə ico bıvğand.

Bın ayəonədə Xıdovənde-Aləm de ruşinə formə  çı həzrəte Mosə(ə)-i məmuriyyəti mıəyyən kardedə və hamyedə: şımə bə milləti soyəx şıey əvəzi, iminə ğədəmədə bə Fironi soyəx bışənən və bəy bıvotənən ki, əmə çı Xıdovəndi tərəfiku bəştı tərəf oməmon ta ım mesaji bətı bırosnəmon. tı bəbe Bəni-İsrayli ğovmi ıştə sultəku ozodkəyş, ta az əvoni bəçəvon əsliyə sərzəmini oqordınom.

In ayəon de çokə formə çı peyğombəron de zılmo-sıtəmi mıborizə bardey iyən məzlumə milləti çı sıtəmkorə hukuməton əsorətiku ozod kardey roli nışon doydə. tosə əvrə ki, bə tohid iyən yektapərəstəti dəvəti bənav, həzrəte Mosə(ə) məmur be ki,sıftədə ıştə ğovmi çı tağutə rejimonku ozodkəy və bın koyədə çı hiç qıləy xətər və təhlukəku nıtarso.

Çın ayəonku umutedəmon:

1-peyğombəron ıştə risoləti ibloğ iyən dəvəti koyədə, ğoym bıən və Xıdovəndi bəvon çiçış vəhyış kardə, çoko heste hejo jəqo həm əvış bə milləti rosnə.

2-hestemoni aləm de Xıdovəndi tədbiri idorə bedə. liza xıdoəti iddioədə bıə kəsi mığobilədə bəbe de ojə-şkoə holəti bıvoti: qırd hestemoni iqlə malikiş heste vıə tı həm çəy hakimiyyəti jiyədə ğərolı qətə.

قَالَ أَلَمْ نُرَبِّكَ فِينَا وَلِيداً وَلَبِثْتَ فِينَا مِنْ عُمُرِكَ سِنِينَ (18) 

(Fironi)Voteşe: ayə hırdənəti faxti əmə tınımon ıştə palu nıperosnemone? Və çandə soron ıştı umr çəmə tonoku nıdəvarde?

وَفَعَلْتَ فَعْلَتَكَ الَّتِي فَعَلْتَ وَأَنتَ مِنَ الْكَافِرِينَ (19)‏

Və de ın holi tı ıştə ko karde. (bəbe kardə nıbe)və tı nunkoronkuş.

قَالَ فَعَلْتُهَا إِذاً وَأَنَا مِنَ الضَّالِّينَ (20) 

Mosə voteşe: ə ko bə zəmon əncomım doe ki, az çı bexəbəonku bim.

Firon de həzrəte Mosə(ə)-i sıxanon məsey, çəy risolət iyən məmuriyyəti barədə qıləy sıxan votey əvəzi, çı həzrəte Mosə(ə)-i dəvardə soronış bəçəy yodış varde ta əy xəcolətinkəy və əy ğarzıxo bekəy.

Sıftədə bə Fironi odəmon əy çı Nili ruku peqətey iyən çandə soron çəy palu əy dıjd kardey dovarni işorəş karde. bə zəmon ki, çı Bəni-İsrayliku tojə bə dınyo omə zoə toyfon kışteydəbin və hiç qıləy aylə çın ğanuniku istisno nıbe. bın zəmon de Xıdovəndi tədbiri Mosə(ə) çı Fironi sarayədə de nazo-neməti dıjd be və de qıləy komliə əmniyyəti perəse.

Firon de həzrəte Mosə(ə)-i ım dovarni bəçəy yod vardey, dılış hesteb bıvoti ki, tı çəmə sufrə kəno dıjd bıəş, ısət çokonə curətı pəydu kardə  deəmə jıqo sıxan kardedəş iyən çəməku jıqo qıləy tələbı heste?

Dıminə nuktə ki, Firon bəy işorəş karde, çı ğıbtiyonku qıləyni de həzrəte Mosə(ə)-i dasti kıştey macəra be. çın macəra zikr çı həzrəte Mosə(ə)-i məğami zəyif nışon doey mənoədə be ki, çokonə qıləy ğatil peyğombərəti iddioədə bıbu? çımisə əlovə bə Mosə(ə)-i ələyh ım qıləy təhdid be ki,ehanə tı bəştə koy dəvom bıdoş, tıni xısos bəkamon iyən tı çəməku ıştə coni roxney əzıniş.

Əmmo həzrəte Mosə(ə) çı Fironi cəvobədə hamyeşe: çı Bəni-İsrayli şəxsonku qıləyni de Ğıbtiyon çanbəyəxə faxti az bə məzlumi koməqım karde və bə zolımi qıləy zərbəm je.az nızınıme ki, deçımı ım zərbə çəy ko bə oxo bərəse və əv bəmarde. çımı məğsəd əy kıştey nıbe, bəlkəm çımı dılım hestebe əy çı məzlumiku bə diyərokəm. əmmo az ım ko məğsədım nıbe iyən ğəlbən əncomım nıdoe və zıneydənıbim ki, çımi oxoş jıqo bəbe.

Çın ayəonku umutedəmon:

1-bəştə zəhməton xoto bə cokəson mınnət noey, çı Fironıjon iyən ğudrəti soybon xısusiyyətonkue.

2-bə cokəson xıdmət kardey, bəvon sultə pəydu kardeyro dəlil bıey əzıni və bəbe bə milləti xıdmətiro çəvonku nokəti tələb məkəmon.

3-irşod iyən əmr be məruf həmmə holədə lozıme. hətta bəmə i umr xıdmət kardə  valideyn ya ğəyyumi nisbətədə həm bıbu.

4-Xıdo məxsusə ovliyaon, bəştə jimon kardə qıləy muhit və şərayiti təsiri ji dəşeydənin. həzrəte Mosə(ə) deməkə ki, çı Fironi sarayədə dıjd bıəbe, əmmo hiçfaxti bəçəvrə muhiti təsiri ji nıdəşe.