655-ə hissə-Şuəra surə-34-40 şərifə ayəon

655-ə hissə

قَالَ لِلْمَلَإِ حَوْلَهُ إِنَّ هَذَا لَسَاحِرٌ عَلِيمٌ (34) 

(Fironi)Bəştə ətrofi voteşe: həyğətən, ın merd qıləy veyəzınə sehrboze.

يُرِيدُ أَن يُخْرِجَكُم مِّنْ أَرْضِكُم بِسِحْرِهِ فَمَاذَا تَأْمُرُونَ (35) 

Çəy dılış heste deştə sehri şıməni(şımə) sərzəminiku avarəkəy. çən, şıməçı rəy doydon(çiç votedon).

Vəynə proqramədə votemone ki, çoko ki, Fironi həzrəte Mosə(ə)-ış de zindon iyən işkəncə təhdidış karde, ə həzrəti deştə əso bə zəmin şode, əv bə qıləy dıjdə mori təbdil bıey, jıqo tarso-larz bə Fironi coni dəşe ki, oxoyədə ıştə kardə koyku peşmon be və bə qıləy çorə fik dəşe. ısət  həmonə macəra dəvom doydəmon.

Firon ki, çı həzrəte Mosə(ə)-i mecuzəon mığobilədə məğlub bıə be, ıştə saray əhli iyən ətrofədə bıə kəson palu ıştə movğıyyəti oqəteyro bəvon voteşe: ısət mıəyyən be ki, Mosə qıləy mahirə sehrboze və qırd ımon çəy de sehro-codu vositə əncom doə qıləy hiyləy və əv deçımi vositə dılış heste camiyədə boştə qıləy vırə və məğam kəsbkəy iyən şıməni malik bıə məğamiku beğando bə bi. çən, boçəy ım hiylə vəy qəteyro qıləy çorə fikkənən. şımə qıləy nəzə bıdənən və ya qıləy məşvərətəkən ki, çəy barədə əmə qıləy mınosibə ko əncom bıdəmon. 

Odəmi dığğəti cəlb kardə çi ıme ki, Firon ki, xıdoəti iddioədə be iyən ıştəni qıləymıtləğə hakim zıneydəbe, təhlukə hiss kardə faxti, ğərəz ımi co qıləy çorə nıvindeşe ki, ıştə dasti jiyədə iyən ıştə ətrofədə bıə kəsonku koməq tələbkəy ta xətəri çəy iyən çəy hukumətiku dəfkəy.

Çın ayəonku umutedəmon:

1-həxı vədə mandə istikborə fərdon sovə du iyən iftiro co qıləy şivəşon ni. Firon ki, Mosə(ə)-i cındo hisop kardedəbe, çə həzrəti mecuzəon vindey bədiqə əvış qıləy mahirə sehrbozış elan karde. qıləy holədə ki,ım ko de səfiyəti i omeydəni.

2-vətəni piye, çı milləti bəy vey dığğət kardə movzuonkue. bə həminə dəlili xoto, Firon bo məxloği bə Mosə(ə)-i ələyh təhrik kardeyro, ım məsələş bəhonə ğərolış doe və voteşe: əv piyedəşe şıməni şımə sərzəminonku xarickəy. həyğətədə bo həxı çı milləti miyono pevolo bıey vəy qəteyro çı deşmınon metodonku qıləyni, de mıxtəlifə roon bə həxə rəhbəron ələyh milləti hisson təhrik kardeye.

قَالُوا أَرْجِهِ وَأَخَاهُ وَابْعَثْ فِي الْمَدَائِنِ حَاشِرِينَ (36) 

Voteşone: bəy iyən bəçəy bo mohlət bıdə və bə qırd şəhron bo(sehrbozon) cəm kardeyro odəm bıvğand.

يَأْتُوكَ بِكُلِّ سَحَّارٍ عَلِيمٍ (37) 

Ta har qıləy mahirə sahiri ıştı palu biyən.

Fironi saray əyan-əşrafon de iyənde məşvərət kardey bədiqə, bəy voteşone: bə Mosə iyən bəçəy bo mohlət bıdə və çəvon koonədə tadibəsə məbi. tı çandə nəfər bə Misri çıkıç bə kıçi bıvğand və çanəndə mahirə sehrboz heste bıdə əvoni qırd cəmkəyn biyən iyo bə paytəxt. çən, bəvədə tı de həmonə təcrubəninə sahiron vositə Mosə ifşo iyən rısvo kardey bəzıneyş. çı Fironi saray əhli jıqo qıləy təklif nışon doydə ki, əvon həm çı Mosə(ə)-i coduqər bıəy barədə bıə Fironi iddioşın ğəbul kardəbe və əvon fəğət de ə həzrəti de mahirə coduqəron ğudrəti vositə mıborizə bardey, çın problemi həlli roy zıneydəbin. qıləy holədə ki, ehanə dığğətışon kardəbe, sərəsin ki, Mosə(ə) sehrboz ni. zira tarıxi dırozi hiçfaxti coduqəron millətışon bə Xıdo pərəstəti tərəf dəvətışon kardəni. bəlkəm əvon hejo məxloği bəştə tərəf dəvət kardedəbin ta əvon bə şohrət iyən sərvəti bırəson və umumən əvon hejo ıştə mənfəəton dumo bıən.qıləy holədə ki, Mosə(ə)-i çı Fironiku tələb kardə çi çəy çı zılmo-fəsod iyən Xıdo bandəon nokəti jiyəku ozod kardey be. əv çı Fironiku boştə hiç qıləy çiş tələb nıkarde.

Çın sıxani şoyd peşonə ayəonədəy. çoko ki, Misri məmləkəti səviyyədə bıə qırd coduqəron cəm bin, əvon bə Mosə(ə)-i ələyh qıləy ko əncom doey bənav, Fironiku dəparseşone: ehanə əmə ğalib omimon, bo əmə qıləy çokə mıkofot bəbe? Bəle coduqəron dumo ıştə mənfəətin nəinki, çı milləti mənfəəti dumon. çımi əks peyğombəron bo məxloği nicotiro hərəkət kardedən və mey mumkine bın royədə hətta əvon ıştə coni həm çı dasto bıdəyn və bın royədə şəhid həm bıbon.

Çın ayəonku umutedəmon:

1-tağutə rejimonədə, çəvon saray əhl iyən ətrofədə bıə kəson,hukuməti proqrammə iyən ğərolonədə rolışon heste. nəinki, çı milləti.

2-tağutə soxtemonon cəhd kardedən mıtəxəssisə insonon boştə xıdmət bıqəton ta boştə mənafeyonro çəvon elmiku bəhrə bobən.

فَجُمِعَ السَّحَرَةُ لِمِيقَاتِ يَوْمٍ مَّعْلُومٍ (38) 

Çən, sehrbozon mıəyyən bıə ruji qıləy faxtədə qırdə kardey bin.

وَقِيلَ لِلنَّاسِ هَلْ أَنتُم مُّجْتَمِعُونَ (39)‏

Və bə milləti votey be: ayə şımə həm cəm bəbiyon?

لَعَلَّنَا نَتَّبِعُ السَّحَرَةَ إِن كَانُوا هُمُ الْغَالِبِينَ (40) 

Ta əgər sehrbozon səbarz bıbon, bəvon tabe bıbəmon.

Çı Fironi saray əhli bə ray omə ğərol bəçəy xoş ome və əmrış karde ki, təcrubəninə odəmon bə Misri məmləkəti həmmə vırəon bışon və har vırədə ki, mahirə sehrbozışon vinde bə paytəxt biyən. çəy bədiqə ziyodə coduqəron cəm bin və qıləy mıəyyənə zəmon iyən məkonışon təyin karde ta millət həmmə cəm bıbon və bə Mosə(ə)-i de sehrbozon bıə mıborizə təmşokəyn.

Firon iyən çəy saray əhl jıqo fik kardedəbin ki, de ın ro əvon Mosə(ə)-i məğlub kardey bəzıneyn və millət həm ijən bə Fironi ğudrət iyən hukuməti tiki həm vey bovəşon bəbe. liza çı millətiku tələbışon karde ki, bın mərosimədə iştirokkəyn.zira məxloği dıjdə izdihom boyis əbi ki, Mos(ə) iyən Harun(ə) ıştəni yali hisskəyn. çımisə əlovə millət həmonə sehrbozon təşviğəkəyn və çəvon ğələbə zəminə hozzı əbi.

Çəvon nəzəku çı sehrbozon bə Mosə(ə)-i bıə səbarzəti, çı Misri xıdoon bə Mosə(ə)-i Xido ğalib ome mənoədə be və ım həm boyis əbi Mosə(ə) həni milləti bəştə tərəf cəlb kardey nıəzıni və əvoni bə Fironi hukuməti ələyh bıə koyədə bə vahidə umməti hol vardey nıəzni.

Çın ayəonku umutedəmon:

1-tağutə rejimon bəştə hədəfon rəseyro, qahi faxti boştə ğudrəti nışon doeyro milləti bə səhnə dəvət kardedən. əmmo həyğətədə çəvon nəzəku millət boçəvon hukuməti dəvom doeyro qıləy əbzore.

2-tağutə sistemonədə bo ilahi təlimon nufuzi vəy qəteyro, inhirofiyə fikon təblığ iyən tərvic kardedən.