656-ə hissə-Şuəra surə-41-48 şərifə ayəon

656-ə hissə

فَلَمَّا جَاء السَّحَرَةُ قَالُوا لِفِرْعَوْنَ أَئِنَّ لَنَا لَأَجْراً إِن كُنَّا نَحْنُ الْغَالِبِينَ (41) 

Çən, çoko sehrbozon(ıştə şəhronku Fironi palu) omin, bəy voteşone: ayə ehanə əmə ğalib bıbəmon, boəmə qıləy mızd(mıkofot) bəbe?

قَالَ نَعَمْ وَإِنَّكُمْ إِذاً لَّمِنَ الْمُقَرَّبِينَ (42) 

Fironi voteşe: bəle, bın surətədə şımə çımı sarayi nezə odəmonku bəbiyon.

Vəynə proqramədə votemone ki, Firon iyən çəy saray əhl de həzrəte Mosə(ə)-i mecuzəon vindey əvışon sehrboz hisobışon karde və bə ğərol omin ki, Misri viloyəti qırd coduqəron cəmkəyn bə paytəxt ta Mosə(ə)-i çı milləti çəşi vədə rısvokəyn.

In ayəon hamyedə: sehrbozon həmmə cəm bin omin və jıqo əvon bəştə ko peştıpur iyən umudəvo bin ki, bə Fironi voteşone: ehanə əmə bə Mosə(ə)-i səbarz bıbəmon və ıştı abru hifzkəmon, tı boəmə çiç mızd iyən mıkofot təyin bəkaş? təbiiye jıqo qıləy şərayitədə ıştə rısvo bıey vəy qəte iyən Mosə(ə)-i məğlub kardey bo Fironi vey muhim be. liza bəvon voteşe: az bəşmə nəinki, bəşmə maddiyə mıkofot bədom, bəlkəm az şıməni ıştə nezə odəmon iyən muşavironku bəkam. həm bəşmə mol-dıvlət bədom iyən həm məğam. fəğət şımə qıləy kokənən ki, Mosə bın mıborizədə məğlub bıbu və çımı hukuməti sutunon nılorzıno.

Çın ayəonku umutedəmon:

1-dınyopərəston,həxı çı botıliku co kardey dumo nin. əvon fəğət bəştə maddiyə mənfəəton fik mandedən.çoko ki, sehrbozon fəğət ıştə maddiyə mənafeyon dumon ta çı fironiku qıləy mızd bıstənon və boştə həx ya botıl bıey barədə hiç qıləy fik kardedənin.

2-sıtəmkorə hukuməton de həxı mıborizə bardeyro lozım bıə qırd əbzor iyən vositəonku bəhrə bardedən.hətta sehr-codu iyən xorafatiku. 

قَالَ لَهُم مُّوسَى أَلْقُوا مَا أَنتُم مُّلْقُونَ (43) 

(Təyin bıə ruj ome rəse)Mosə bəvon voteşe: çiçon piyedə şodənən.

فَأَلْقَوْا حِبَالَهُمْ وَعِصِيَّهُمْ وَقَالُوا بِعِزَّةِ فِرْعَوْنَ إِنَّا لَنَحْنُ الْغَالِبُونَ (44) 

Çən,(coduqəron) ıştə rismon iyən əsoşon ğande və voteşone: bə Fironi izzət(ğudrəti) ğəssəm hukmən əmə səbarz bəbemon.

فَأَلْقَى مُوسَى عَصَاهُ فَإِذَا هِيَ تَلْقَفُ مَا يَأْفِكُونَ (45) 

Peşo Mosə ıştə əsoş şode. çən, ğəflətən(əv əşivo be) və çəvon pesoxtə çiyonış ebordıne.

Oxoyədə mıəyyən bıə ruj ome rəse və Firon iyən çəy saray əhl itərəfo və təmşoəkə i dastə məxloğ co tərəfo çı şəhri dıjdə meydonədə cəm bin və çəş kardedəbin ki, hələ bunum sehrbozon çiç kardedən. Mosə(ə) iyən çəy bo Harun(ə) həm bə qırd ım dıjdə cəmiyyəti be etino kardə holədə bə meydoni tərəf omin.əvon çı sehrbozonku hiç qıləy tars iyən vohimə nıbə holədə çəvonku tələbışon karde ki, çiçışon heste bekən bə meydon və ıştə zu iyən ğudrəti nışon bıdəyn. sehrbozon həm bəştə koon peştıpur bin, əve de təkəbbır iyən yoləşəxəti ıştə dastə bıə əbzoron ki, çı çu iyən jiyəku iborət be, şodoşone bə meydon. Sehrbozon bə sehri ayid bıə əbzoron şivəonku oko doşone və çəvon həmonə əbzoron çı məxloği çəşonədə bənə hırd iyən dıjdə mori çin.

Təbiiye ki, millət de ım moron vindey bə tars-vəhşəti dıço bin.əmmo çı itərəfo əvon çı sehrbozon səbarzətiku şo iyən xoşhol bin. əvon qımon kardedəbin ki, de sehrbozon nışon doə sehri çı Mosə(ə)-i ko həni orəxə.əmmo ım şoyvonəti ziyod dəvomış pəydu nıkarde. de Mosə(ə)-i əso bə zəmin şodey və çəy bə qıləy dıjdə iyən tarsnokə mori təbdil bıey, millət bə ikkərə bə şoki dıço bin. zira ıştə vində çiyon ğəbul kardey zıneydənıbin. bəqəm imkonış heste ki,jıqo sodə formədə Mosə(ə) bə sehrbozon səbarz bıbu?

Çın ayəonku umutedəmon:

1-ilahi ovliayon de bə Xıdo təvəkkul kardey, hejo saxtə səhnəonədə hozzon və çı mıxolifon cəmiyyəti əksəriyyət və əzəmət bəvon hiç qıləy təsir noydəni.

2-imoni əhl bəbe çı botıli bərobərədə bəbe de mıxtəlifə əbzoron mucəhhəz bıbon ki, kardey bızınon çəvon mığobilədə bımandon iyən həmonə botıli məğlubkəyn.

3-çun botıl sıst iyən rəğ-rişəş ni, çı həxı vədə mığovimət kardey zıneydəni. çoko ki, çı sehrbozon sehr Mosə(ə)-i mecuzə vədə məhv bin.

فَأُلْقِيَ السَّحَرَةُ سَاجِدِينَ (46) 

Bın zəmon sehrbozon bə səjdə eqınin.

قَالُوا آمَنَّا بِرَبِّ الْعَالَمِينَ (47) 

(Və)Voteşone: əmə bə aləmi pərvərdıqori imon vardemone.

رَبِّ مُوسَى وَهَارُونَ (48) 

Bə Mosə iyən Haruni pərvərdıqori.

Meydonədə hozzı bıə kəsonku fəğət sehrbozon çı sehro-codu koyku aqah bin. əve rəyrə çı həzrəte Mosə(ə)-i ko mecuzə bıeyışon zıne və dərəsin ki, bəşər jıqo ko əncom doeyku ocize. zira hiç qıləy inson çu bə mori oqordıney nibəzıne. həzrəte Mosə(ə)-i ko həx bıey oşko be və sehrbozon be ixtiyor bə səjdə eqınin. əvon səjdəku əyşte bədiqə bəştə vində həxı iğrorışon karde. əvon ki,çand ləzə çəy bənav dılışon hestebe çı fironi palu deçəy vositə bə mol-məğami bırəson və ıştə koşon de fironi nomi bino kardeşone, jıqo əvəz bin ki, de təmom curəti ıştə bə Mosə(ə)-i Xıdo imon vardeyışon elan karde.

Rufi cəhəto ım rəyrə əvəz bıey, de mərıfət iyən zıney ro bə dast ome. əvon yəğın kardeşone ki, çı Mosə(ə)-i əncom doə çi qıləy dıjdə mecuzə be və ım ko çı bəşəri ko nıbe. çoko ki, əvon həxışon jıqo oşko vindeşone, əvışon ğəbul karde və bə milləti elan kardeşone ki, əvon həm dərəson çı Mosə(ə)-i kardə ko sehro-codu nıbe.

Çın ayəonku umutedəmon:

1-əgər harçi ağl sərəseydə və ğəlb həm ğəbul kəy və çı həxı mığobilədə muti bıbu,ım bə imoni bərəse.

2-inson qıləy ixtiyorış bıə məxloğe. çəy ım ğudrətış heste ki, ıştə səhvi bıvindo və iləzədə ıştə roy səmti əvəzkəy və səhihə royədə ğədəm şodəy. həyğətədə ım çı insoni imtiyazonkue.