657-ə hissə-Şuəra surə-49-52 şərifə ayəon

657-ə hissə

قَالَ آمَنتُمْ لَهُ قَبْلَ أَنْ آذَنَ لَكُمْ إِنَّهُ لَكَبِيرُكُمُ الَّذِي عَلَّمَكُمُ السِّحْرَ فَلَسَوْفَ تَعْلَمُونَ لَأُقَطِّعَنَّ أَيْدِيَكُمْ وَأَرْجُلَكُم مِّنْ خِلَافٍ وَلَأُصَلِّبَنَّكُمْ أَجْمَعِينَ (49) 

(Ğeyzin bıə Fironi)Voteşe: ayə çımı bəşmə icozə nıdoey bənav şımə bəy imon vardeyone? şək ni əv bəşmə sehrış umutə şımə yole. çən, rəyrə şımə ıştə cəzo bəzıniyon. hukmən az şımə dast-lınqon çı çəpo-rostiku bəbırniyem və qırd şıməni bə dar bəjem ebəhaştem.

Dəvardə proqramədə votemone ki, sehrbozon de həzrəte Mosə(ə)-i mecuzəon vindey, zıneşone ki, çəy ko çı bəşəri dasti ko ni və ım sehr-codu ni, bəlkəm qıləy həyğiyə mecuzəy. liza əvon həmmə bəy imon vardeşone və çı milləti çəşi vədə ıştə imon vardeyışon elan karde. Firon ki, çəy sehrbozon qırdə kardeyku hədəf, bə Mosə(ə)-i ğalib omey iyən əy rısvo kardey be, ısət vindeşe ki, de həmonə sehrbozon vositə ıştən çı milləti çəşi vədə rısvo be mande. əve ha ləzə mumkin be ki, millət həm bə Mosə(ə)-i imon biyəyn və bəy sıtoyiş iyən pərəstış kardeyku dast bıkəşon. binobərin sıftədə sehrbozonış mıttəhəm karde ki, şımə çı Mosə şoqirdoniyon və qırd şımə bə ico bəçımı ələyh qıləy hiyləon əncom doə. peşo əvonış de şiddətinə cəzoon təhdid kardeşe və voteşe: az əmr bədom şımə dast-lınqon çarpaz yəni bə yənde əks iqlə lınq iqlə dast  bıbırnonta şımə çı saxtə işkəncəon jiyədə bımardiyon və bo cokəson qıləy ibrət bıbənən və həni çımi bədiqə ikəs curət nıkəy və bə Mosə imon nıvəy.

Çın ayəku umutedəmon:

1-tağutə hukumətonədə, milləti vicdon iyən əğedə ozodətişon ni. bın hukumətonədə sıtəmkorə hukuməton de har formə bə milləti sultə pəydu kardey dumon.

2-sıtəmkorə hukuməton palu çı insonon coni hiç qıləy erjo-ğeymətış ni. əve hakəs bəçəvon mənafeyon əks hərəkətko, çəvon xuni rukardey cayiz zıneydən.

قَالُوا لَا ضَيْرَ إِنَّا إِلَى رَبِّنَا مُنقَلِبُونَ (50) 

Sehrbozon voteşone: zərəlış ni, əmə bəştə pərvərdıqori tərəf obəqardemon.

إِنَّا نَطْمَعُ أَن يَغْفِرَ لَنَا رَبُّنَا خَطَايَانَا أَن كُنَّا أَوَّلَ الْمُؤْمِنِينَ (51) 

Çəmə umu heste ki, çəmə pərvərdıqor çəmə xətoon bəbaxşe. boçi ki, əmə iminə imon vardə kəsonimon.

Fironi saxtə təhdidon mığobilədə sehrbozon nəinki, hiç qıləy tarsışon nıbe iyən ıştə imoniku dastışon nıkəşe, bəlkəm çəvon dılon jıqo de imoni nuri ruşin və ğoym bıəbe ki, de ğətiyyəti və hiç qıləy vohimə nıbə holədə çı Fironi cəvobışon doe. əvon bə Fironi voteşone: əməni de işkəncə iyən kıştey torsıneydəş? bəqəm zınedəniş ki, əmə çı Xıdo royədə işkəncə iyən kıştə bıeyku xoşımon omeydə? zira çəmə umu heste ki,ım ko bəçəmə kanə qınoon əfvi boyis bəbe iyən əmə bə Mosə(ə)-i iminə imon vardə kəson unvanədə bə Xıdovəndi məxsusə inoyət və lutfi şomil bəbemon. çən, ıştı əməni təhdid kardə çiyon əmə boştə bəşorət zınedəmon iyən əy boştə qıləy fəxr hisob kardedəmon.

Çın ayəonku umutedəmon:

1-bə mərıfəti əsos bıə imon, de xariciyə təhdid iyən təzyiğon vositə nibəlarze. bəlkəm, ım bə insoni qıləy şucoət iyən istiğomət həm doydə.

2-muhim çı koy ağıbəte, nəinki, çəy sıftə. sehrbozon ki, ıştə qırd umri zəlolət iyən inhirofədə dəvordınəşonbe, de Mosə(ə)-i mecuzə vindey imonışon varde və ağıbət bə xeyr bin. çımi əks vey mısılmınon heste ki, i umr nımojışon votə və rujəşon qətə, əmmo ıştə umri oxoyədə beimon çı dınyoku şin.

وَأَوْحَيْنَا إِلَى مُوسَى أَنْ أَسْرِ بِعِبَادِي إِنَّكُم مُّتَّبَعُونَ (52) 

Və əmə bə Mosə vəhy kardemone ki, çımı bandəon bəşəvnəy(çı Misriku) kuç bıdəy. zira şımə təğib bəbiyon.

Həzrəte Mosə(ə)-i mığobilədə Firon məğlub bıey bədiqə, əv bə ğərol ome ki, Mosə(ə) iyən bəy imon vardə kəson təğibkəy və icozə nıdəy ki, çəy ideya iyən təlimon çı milləti miyono pevolo bıbu. co tərəfo Xıdovənd bə həzrəte Mosə(ə)-i vəhyış karde ki, bo Fironi sultəku ozod bıeyro, nəinki, tı ıştən iyən ıştı bo, bəlkəm Misrədə bənə nokə jiyə Bəni-İsrayili həm deştə bə ico çı Misriku xarickə və əvoni bəçəvon sərzəmin bıə Şami viloyəti oqordın. Bəni-İsrayil həm ki, çı Mosə(ə)-i bə Fironi ğalib omey ğudrətışon vindəbe iyən bəçəy zu peştıpur bin, bəçəy vanqi  mısbətə sədoşon doe və de har mumkin bıə formə ıştənışon bə paytəxt rosneşone ta de Mosə(ə)-i rəhbərəti çı Fironi sultəku perəxon.

Çın ayəku umutedəmon:

1-de fosidə camiyə rəftorədə, ehanə zumon heste çəvon mığobilədə bımandəmon və de zılmo-fəsodi mıborizəkəmon. və əgər kardey zıneydənimon, lamalə hicrətkəmon ta fosidə cəmiyyəti muhitədə həzm məbəmon.

2-çı sıtəmkorə dıvləti sultəku milləti peroxney, çı peyğombəron proqraməonku qıləyni bıə ki, ım həm de Xıdovəndi koməqi hosil bıə.