661-ə hissə-Şuəra surə-78-82 şərifə ayəon

661-ə hissə

الَّذِي خَلَقَنِي فَهُوَ يَهْدِينِ (78) 

Həmon kəs ki, mınış ofəyə, əv həm mıni hidoyət bəkay.

وَالَّذِي هُوَ يُطْعِمُنِي وَيَسْقِينِ (79) 

Və ə kəs ki,(vəşi mandədə) bəmı təam doydə və(çımı luzi) si kardedə.

وَإِذَا مَرِضْتُ فَهُوَ يَشْفِينِ (80) 

Və az noxəş bıyədə əv, bəmı şifo doydə.

Navnə proqramədə həzrəte İbreym(ə)-i de bıtpərəston bıə diyaloqi barədə izoh domone. bə dı tərəfinə votemonədə həzrət İbreym(ə) de məntığiyə şivə bə bıton bəşəri jimonədə bıə roli təsirin nıbey işorə be və zınemone ki, çəvon bə İbreym(ə)-i doə cəvobfəğət ımbe ki, əvon bəştə dədə-bobon qətə roy pemandedən.

Bın bərnomədə həzrəte İbreym(ə)-i sıxanon dəvomi məseydəmon ki, bə bıtpərəston votedə: şımə Xıdoon jıqo be ki, əmə həm əvonımon vinde. əmmo çımı Xıdo əkəse ki, çımı xılğət iyən tərbiyə və perosney ko çəy dastədəy. əv bəmı ağl iyən fikış doə ta az sərost və dırıstə ro çı nodırıstə royku mıəyyənkəm. əve bəmı qıləy ğudrətış doə ki, az çoki çı bədiku cokəm ta bə rostə roy tərəf hidoyət bıbum.

Əv nəinki, roy bəmı nışon doydə, bəlkəm çımı cismi ehtiyocon həm bomı hozzı kardedə. əve çımı hardənin iyən peşoməninə çiyon bomı hozzı kardəkəs. əve mı noxəş bıeyədə, çımı şifo pəydu kardey zəminə və səbəbon çımı ixtiyorədə ğərol doə kəse və əv bəmı umutedə ki, çokonə boştə noxəşəti vəy qəteyro çəvonku oko bıdəm. bəle çımı dəvardə, ısətnə iyən vəomə soron, çımı cism iyən ruf və çımı səlomətəti iyən noxəşəti çəy dastədəy və əv çımıku hiçfaxti co ni və az tələb nıkardə holədə, əv çımı ehtiyocon bomı hozzı kardedə.

Çın ayəonku umutedəmon:

1-xılğəti neməti bədiqə, hidoyəti nemət Xıdovəndi bə bəşəri əto kardə vey yolə neməte.

2-dəvo-dəmon çı mulaicə vositəy. əmmo bo noxəşəti bərtərəf kardey iyən insoni şifo pəydu kardeyro çəy təsir, Xıdovəndi tərəfikue. əv çəmə bədəmış jıqo ofəyəşe ki, noxəşətiyon dəf kardey iyən çı noxəşi uzvi mərəmmət kardey imkonış bıbu. dəvo-damon həm əy xəlğış kardə və çı dəmoni zıney elmi de ağli ro vositə əy bə insoniş doə. çən, qırd çiyon çəy tərəfikue.

وَالَّذِي يُمِيتُنِي ثُمَّ يُحْيِينِ (81) 

Əkəs ki, mıni bəkışte(çımı coni bəstəne) peşo mıni bəyji bəkay.

وَالَّذِي أَطْمَعُ أَن يَغْفِرَ لِي خَطِيئَتِي يَوْمَ الدِّينِ (82) 

Ə kəse ki, umum heste cəzo ruji çımı xətoon bəbaxşe.

Vəynə ayəonədə həzrəte İbreym(ə) bə Xıdovəndi insoni dınyo jimonədə bıə roli işorəş karde və bın ayəonədə Xıdovəndi çı mardey bədiqə bıə aləmədə bıə roli həxədə sıxan voteydə ta bə bıtpərəston dərosni ki,çımı jimon iyən marq iyən ım və ə dınyo koon həmmə çı Xıdovəndi dastədəy. çoko ki,az nıbim iyən əy mınış bə ım dınyo vardeşe, ijən çımı coni bəstəne və çın dınyoku bəbarde. əmmo əv, mıni ıştənbəsə va nibədoe, bəlkəm co qıləy dınyoədə bəmı həyot baxş bəkay iyən bəçımı çokə koon xoto bəmı mıkofot və bəçımı yavə əməlon xoto, həmonə dınyoədə bəmı cəzo bədoe.

Çımı Xıdo vey mehribone. nəinki, fəğət dınyoədə ıştə neməton bəştə bandəon baxşeydə, həmçinin axırətədə həm əv bəştə bandəon lutf kardedə və çımı umum heste ki, çımı dınyoədə səhlənkorəti iyən xətoon bəştə buzurquvarəti xoto bəbaxşe iyən çımı qınoonku dəbəvarde.

Bəçəmə etığodi əsos, peyğombəron çı qınoonku pok və məsumin və hiçfaxti bə Xıdo əmron ələyh beşedənin.de ım holi əvon hejo ıştəni Xıdo dərqoyədə mığəssır iyən qınokor zıneydən və ıştə risoləti vəzifə qonə ko çok-çoki əncom doeyədə, ehanə qıləy səhlənkorəti kardey xoto, Xıdoku ıştə baxşeşi tələb kardedən.

De qıləy co iborəti çəvon niyyət iyən məğsədon, qırd milləti irşod iyən hidoyət kardeye. əmmo əmələn hiçfaxti çəvon ım tələb bə həyğət rəseydəni və çəvon vədə ziyodə maneəon buruz bedə. pəyğombəron tarseydən ki, həmonə maneəon peqətey iyən Xıdo həxə sıxani bə məxloği quşi rosneyədə ğasbu əvon qıləy səhlənkorətişon əncom doə və əvon mığəssırin. liza Xıovənde-Mutəaliku tələb kardedən ki, əgər əvon ıştə dasto omə koon əncom nıdon, əvoni bıbaxşo və çəvon qınonku dəvardo.

Çın ayəonku umutedəmon:

1-ilahi ideloqiyədə mardey çı koy oxo ni.bəlkəm, çı co qıləy jimoni bino bıeye.

2-bəştə bəxoşomə iyən çokə koon təkyə məkəmon.həmməkəsi bə ilahi lutf iyən baxşeşi ehtiyocış heste.hətta peyğombəron həm bə ilahi lutf və məğfırəti ehtiyocışon heste, nəinki, bəştə əməlon.

3-bə ilahi baxşeşon iyən bəçəy məğfırəti umudəvo bıey,ilahi peyğombəron şivəonku bıə.

4-insoni jimoni sıftəku de tosə oxo, çəy maddi iyən mənəviyə ehtiyocon, Xıdovəndi dastədəy.