663-ə hissə-Şuəra surə-90-101 şərifə ayəon

663-ə hissə

وَأُزْلِفَتِ الْجَنَّةُ لِلْمُتَّقِينَ (90) 

Və(həmonə ruji) vəhışt bo pərhizkoron nez bəbe.

وَبُرِّزَتِ الْجَحِيمُ لِلْغَاوِينَ (91) 

Və cəhəndım bo ro dəqıjnə kəson oşko bəbe.

وَقِيلَ لَهُمْ أَيْنَ مَا كُنتُمْ تَعْبُدُونَ (92) 

Və bəvon votey bəbe: şımə pərəstış kardə çiyon koncoon?

مِن دُونِ اللَّهِ هَلْ يَنصُرُونَكُمْ أَوْ يَنتَصِرُونَ (93) 

Ayə şımə sovə Xıdo bıə(məbudon) bəşmə koməq kardeydən ya ıştəni mıdofiyə kardey bəzıneyn?

In ayəon ki, bə həzrəte İbreym(ə)-i jimoni ayid bıə ayəon dəvome, ya çı ə həzrəti sıxanon dəvomədəy və ya çı Xıdovəndi kəlome ki, vəhışt iyən cəhəndımi vəsf kardedə. sıftədə dıqlə dastə yəni vəhışti əhl bıə təğvaninə şəxson iyən cəhəndımi əhl bıə ro dəqıjnə kəson çı iyəndeyku co kardedə ta bəyonkəy ki, insoni bə vəhışt bardə çi təğva iyən pərhizkorətiye və insoni bə cəhəndımi əzobi dıço kardə çi ro dəqıjniye iyən bə zəlolət eqıniye.

Cəhəndımi əhl bəvədə dəbərəseyn ki, çəvon dınyoədə pərəstış kardə çiyon, bəvon koməq kardey zıneydənin iyən əvoni çı cəhəndımiku peroxney zıneydənin, ım boəvon vey saxt iyən çətin bəbe. həmonə ruji səbərəseyn ki, əvon ıştən bə zəlolət iyən inhirofi dıço bıən, əmmo jıqo zıneydəbin ki, muminon ıştə roşon dəqıjniyə.

Çın ayəonku umutedəmon:

1-vəhışt iyən cəhəndım bəvədə insoni bərobərədə zohir bəbe ki, həni çəy əməlon dosye bastə bəbe iyən çı hiçkəsi dastiku hiç qıləy ko nibome.

2-pərhizkorə mumini məğam iyən movğıyyət jıqo barze ki, vəhışti boəy hozzı bəkan.

3-bıton ya insonon ki, ıştəni mıdofiyə kardey zıneydənin,çokonə ğıyoməti ruji əməni mıdofiyə bəkayn?.

فَكُبْكِبُوا فِيهَا هُمْ وَالْغَاوُونَ (94) 

Çən, qırd əvon(məbudon) iyən ro dəqıjnə abidon bə cəhəndım şodey bəbeyn.

وَجُنُودُ إِبْلِيسَ أَجْمَعُونَ(95) 

Və(həmçinin) İblisi qırd ləşkəri.

قَالُوا وَهُمْ فِيهَا يَخْتَصِمُونَ (96) 

Və əvon cəhəndımədə de iyənde canq kardə holədə bəvoteyn:

تَاللَّهِ إِن كُنَّا لَفِي ضَلَالٍ مُّبِينٍ (97) 

Bə Xıdo ğəssəm həyğətən, əmə oşkoə zəlolətədə bimon.

إِذْ نُسَوِّيكُم بِرَبِّ الْعَالَمِينَ (98) 

Çunki, əmə şıməni de aləmon pərvərdıqori bərobər qəteydəbimon.

Çoko ki, Kərimə-Ğıroni co ayəonədə omə, ğıyoməti ruji Xıdovənd çı mışrikon pərəstış karə bıton cəm bəkay ta mışrikon iyən bıtpərəston bıvindon ki, çəvon dınyoədə ehtirom noə iyən hurmət ğayil bıə və əvoni pərəstış kardə və boəvon nəzr co kardə bıton, ımruj hiç qıləy zu və ğudrəti soyb nin.çoko ki, de Xıdovəndi əmri bıton bə cəhəndımi şodey bəbeyn,əvon ıştəni mıdofiyə kardey nibəzıneyn, ısət çı bımando əvon bıtpərəston mıdofiyəkəyn.

Çı bıt iyən bıtpərəstonsə əlovə, şəyton iyən çəy ləşkər həm bə cəhəndım şodey bəbeyn və ım çand dastə cəhəndımədə de iyənde çan-bəyəxə bəbeyn və har qıləy qrup iyənde mıttəhəm bəkan.

Əmmo vəhıştədə çımi əkse və əyo qıləy səmimi iyən dustiyə atmosfer movcud bəbe. bə cəhındımi hakim bıə sfera de deşmınəti, kin-kudurəti iyən nifrəti pur bıə qıləy vırəy. cəhəndımi əhli miyono bə iyənde bıə nifrət və çəvon ıştə dəvardəku peşmonəti hiss və həsrət hardey və bəştə inhirofədə bıey etırof kardey movcud bəbe.

Çın ayəonku umutedəmon:

1-dınyoədə bə qıno iyən inhirofi əsos bıə dustətiyon, ğıyoməti ruji bə deşmınəti pebəqarde. əyo cəhəndımi əhl de iyənde canqo-dəvo bəkayn.

2-insoni vijdon ğıyoməti ruji oğo bəbe və əv əy de şiddəti mızəmmət bəkay. əmmo həni çə həsrət iyən səs-sıxan kardey hiç qıləy foydəş ni və fəğət bə peşmonəti boyis bəbe.

وَمَا أَضَلَّنَا إِلَّا الْمُجْرِمُونَ (99) 

Və ğərəz qınokoron hiçki əmənış bə zəlolət nıeğande.

فَمَا لَنَا مِن شَافِعِينَ (100) 

Oxoyədə(ımruj) boəmə nə qıləy şəfoətəkə heste.

وَلَا صَدِيقٍ حَمِيمٍ (101) 

Və nə qıləy səmimiyə dust.

Nəhoyətən mışrik iyən bıtpərəston votə çi ım bəbe ki, əməni bın ruj eğandəkəson  qınokoron bin. əvon boyis bin ki, əmə ro dəqıjnəmon və jıqo bədbəxt bıbəmon.ə kəson ki, ıştə mol iyən sərvətiku suyi-istifodə kardeşone və əmə həm çəvon dumo hərəkət kardemone. əmə jıqo fik kardemone ki, çəvon qətə ro həxe və əməni bə xoşbəxtəti tərəf bəbarde. əmmo ısə famemone ki, əmə bə inhirofi tərəf şıəmon. zira nə ikəs boəmə şəfoət kardey zıneydə və nə çəmə qıləy səmimiyə dustımon heste ki, bəmə qıləy koməqkəy. nə bıton və pesoxtə bıə məbudon çəmə şəfoətəkə bıey zıneydən və nə çəmə çı muminon miyono qıləy səmimiyə dustımon heste ki, ımruj boəmə qıləy ko bıkəy və əməni çı cəhəndımiku peroxno.

Çın ayəonku umutedəmon:

1-ğıyoməti ruji hakəs taxsi bə iyənde gi şobədoe. mışrikon iyən ro dəqıjnə kəson ıştə rəhbəronku şikoyət bəkayn.

2-ğıyoməti ruji şəfoət movcude. əmmo bə mışrikon holi şomil nibəbe. peyğombər iyən məsumon fəğət ləyoğətışon bıə muminon şəfoət bəkayn.

3-inson ğıyoməti ruji həm bə qıləy çokə dusti ehtiyocış heste. de əkəson dust bıbəmon ki,həm dınyoədə bəmə koməqkəy və həmən axırətədə. jıqo duston fəğət imoni əhlin.