664-ə hissə-Şuəra surə-102-109 şərifə ayəon

664-ə hissə

فَلَوْ أَنَّ لَنَا كَرَّةً فَنَكُونَ مِنَ الْمُؤْمِنِينَ (102) 

Çən, ey kaş boəmə qıləy(bə dınyo) oqardemon bıəbe, əmə çı muminonku əbimon.

إِنَّ فِي ذَلِكَ لَآيَةً وَمَا كَانَ أَكْثَرُهُم مُّؤْمِنِينَ (103) 

Bə rosti ki, bın(sərquzəştonədə) qıləy ibrəti dərs və nışonəon heste. əmmo çəvon veyni imon vardəkəsonku nıbin.

وَإِنَّ رَبَّكَ لَهُوَ الْعَزِيزُ الرَّحِيمُ (104) 

Həlbəttə, ıştı pərvərdıqor həmonə zumand, mehribone.

Dəvardə proqramədə bə cəhəndımi əhli işorə be və votemone ki, əvon bə qınokoron tabe bıey xoto, peşmon bin iyən əvoni mığəssır zıneydəbin. bın ayəonədə Xıdovənd çəvon ım tələbi bəyon kardedə ki, əvon bə dınyo oqardey oruzuədən. əve voteydən ki, ey kaş imkon bıəbe əmə ijən bə dınyo oqardəbimon və çı muminon səfədə ğərol əqətimon. ısət  dərəsəmon ki, çəmə dınyoədə qətə roy səhv bıə və əmə ıştənımon bə həlokəti tərəf şodəmone. əmmo əyo həni təəssıf hardey befoydəy. zira həni bə dınyo oqardeyro qıləy ro mandəni.

Kərimə-Ğıron çəvon sıxani cəvobədə hamyedə: dınyoədə boçəvon hidoyətiro ziyodə nışonəon hestebe, əmmo əvon çı həyğəton dərk iyən ğəbul kardey dumo nıbin.deməkə ki, Xıdovənd bəvon i umr mohlət doydə ta əvon çı botılə royku oqardon və bə həxı tərəf boon, əmmo əvon çə həmonə mohlətiku suyi-istifodə kardedən və bəştə nodırıstə ro dəvom doydən. çən, çəvon ımruj votə çiyon qıləy hədərə sıxane və əvon ijən bə dınyo oqardon, məlum ni ki, çı imoni əhliku bıbon ya ne.

Çın ayəonku umutedəmon:

1-ğıyoməti ruji çı həsrət iyən peşmonəti ruje.əmmo çın peşmonəti hiç qıləy foydəş ni və çəy əvəzi bekardey həm mumkin ni.

2-ehanə insonon inodkorətikəyn və həxı ğəbul kardeyışon nıpyo, boçəvon hidoyətiro bıə ilahi dıjdə nışonəon həm hiç foydəş nibəbe.

3-Xıdovənd rəhim iyən mehribon bıə holədə, çı ğudrət iyən izzəti soybe və çı həxı mığobilədə mandəkəson de şiddəti rəftor kardedə.

كَذَّبَتْ قَوْمُ نُوحٍ الْمُرْسَلِينَ (105) 

Nuhi ğovmi ıştə peyğombəronışon bə həşə je.

إِذْ قَالَ لَهُمْ أَخُوهُمْ نُوحٌ أَلَا تَتَّقُونَ (106)

Bə zəmon ki, çəvon bo Nuh bəvon voteşe: ayə Xıdoku tarseydəniyon?

إِنِّي لَكُمْ رَسُولٌ أَمِينٌ (107) 

Həyğətən, mı boşımə qıləy əminə peyğombərim.

Həzrəte İbreym(ə)-i sərquzəşton bəyoni bədiqə, çı həzrəte Nuh(ə)-i macəra omə. həlbəttə tarıxi nəzəku, həzrəte Nuh(ə) çı həzrəte İbreym(ə)-i bənav bıə və Kərimə-Ğıron həzrəte İbreym(ə)-i çəy ayini tərəfdor zıneydə. əmmo çun Ğıron qıləy tarıxiyə kitob ni və bə dəvardə sərquzəşton tarıxi nəzəku diyə kardeydəni, əve əvoni de tərtibi zikr kardey ko rioyət kardey lozım zıneydəni.

Həzrəte Nuh(ə)-i nom Kərimə-Ğıronədə 43-kərə omə və Xıdovənd bə Nuh(ə)-i qıləy məxsusə səlom vığandedə. Nuh(ə)-i ğovm əvışon təkzib karde. əmmo Kərimə-Ğıron hamyedə: çəy ğovm qırd peyğombəronışon inkor karde. zira həmmə peyğombəron iqlə hədəfışon bıə və çəvon ha qılə bə həşə jıey, qırd əvoni inkor kardey mənoədəy.

Har qıləy peyğombər ıştə zəmonədə, qıləy əmin, dırıstko iyən rostəvıjə şəxs bıən və millət əvoni de ın xısusiyyəton zıneydəbin. əmmo çəvon inodkorəti və bə əmri nıpemandey ruhiyyə, boyis bedəbe peyğombər çı həx iyən həyğətonku qəp jıeyədə, əvon əy ğəbul nıkəyn və ıştə şəxsi mənafe iyən ləzzəton fikədə bıbon.

Peyğombəron de sıvoli şivə iyən bənə boə formədə de məxloğisıxan kardedəbin və çəvonku dəparseydəbin: şımə boçi ıştə Xalığiku həyo kardedəniyon və de yavə koon məşğuliyon? əmmo əvon bo peyğombəron ım nəsyət və pandon məsey hozzı nıbin və boəvon dıləsut bıə peyğombəronku bə diyəro mandedəbin.

Çın ayəonku umutedəmon:

1-qırd ilahi vığandə kəson, iqlə hədəfi dumo bıən və çəvon ha qıləyni təkzib kardey, həyğətədə həmmə peyğombəron inkor kardeye.

2-peyğombəron deştə zəmoni məxloği bıə əxloğ iyən rəftor, vey bəpe bıə və əvon ıştəni çı milləti boə elan kardedəbin, nəinki rəyis və əğə.

3-bo qırd məxloği hıtə vijdonon oğo kardeyro, bəbe çı sıvoli metodiku oko bıdəy, nəinki, de əmri formə.

4-peyğombəron ıştə əsri milləti miyono, çokə nomışon bıə. de ın holi ijən ziyodə insonon bəvon imon vardəşon ni.

فَاتَّقُوا اللَّهَ وَأَطِيعُونِ (108) 

Çən, Xıdoku bıtarsənən və bəmı pemandənən.

وَمَا أَسْأَلُكُمْ عَلَيْهِ مِنْ أَجْرٍ إِنْ أَجْرِيَ إِلَّا عَلَى رَبِّ الْعَالَمِينَ (109) 

Və mı bo ın(risoləti) ko xoto, şıməku hiç qıləy mızd(mıkofot) tələb kardedənim. çımı mızd çı aləmon pərvərdıqori ohdədəy.

Iyo ijən çı ilahi təğvaku bəhs bıə. zira insoni bə qıno səmt bardə çi, bəmə nemət doə və bəmə mınnət noə Xıdo çı yodo bekardeye. quya Nuh(ə) bəştə ğovmi voteş piyedə: çokonə şımə bə Xıdo pemandedəniyon? qıləy holədə ki, ha şəvı-ruj çəy ruzi hardedon və deçəy tələbi şımə bəyjiyon. peşo çı qınoku bə diyəro mandey iyən bə həyğəti rəsey ro nışon doydə və hamyedə: az çı Xıdo tərəfiku boşmə hidoyətiro oməm. çən, ehanə şımə bəçımı sıxanon quş bıdon, ım bəşmə xəyriye. zira şımə əməliku bəmı hiç qıləy xəy nibərəse. az həm çı mol, məğam iyən posti dumo nim və şıməku hiç qıləy tələbım həm ni. əgər mı bəştə vəzifə çok-çoki əməlkəm, Xıdovənd həm bəmı çokə mıkofot bədoe iyən çımı ehtiyocon bərtərəf bəkay.

Çın ayəonku umutedəmon:

1-milləti tərbiyə iyən irşodi koyədə, Xıdo zikr iyən təğva bıə tovsiyəon hejo bəbe tikror bıbu ta məxloğ bə ğəflət iyən inhirofi dıço nıbon.

2-dini mıbəllığon və milləti bə dindorəti dəvət kardə kəson, bəbe millətiku maddi təvəğğoşon nıbu, bəlkəm xolisonə bo Xıdo xoto kokən və bəy təvəkkulkəyn. bın surətədə çəvon sıxanon təsirin və çəvon çı milləti palu nufuzışon vey bəbe.