665-ə hissə-Şuəra surə-110-115 şərifə ayəon

665-ə hissə

فَاتَّقُوا اللَّهَ وَأَطِيعُونِ (110) ‏

Çən, Xıdoku bıtarsənən iyən bəmı pemandənən.

قَالُوا أَنُؤْمِنُ لَكَ وَاتَّبَعَكَ الْأَرْذَلُونَ (111)

(Əvon)Voteşone: ayə əmə bətı imon biyəmon, qıləy holədə ki, exroc və bevəcə odəmon bətı pemandedən?

Dəvardə proqramədə votemone ki, həzrəte Nuh(ə) hejo ıştə ğovmi bə təğva iyən bə çı qınoonku bə diyəro mandey tərəf dəvət kardedəbe və əv bəvon çı jimoni dırıstə ro nışon doydəbe ta əvon ə həzrəti bənə qıləy ilahi peyğombəri bızınon və bəçəy əmron pemandon.

In ayəon həm de həmonə sıxanon bino bedə, əmmo çə həzrəti ələyhdoron iminə reaksiya ım be ki, voteşone: ıştı qırdo cəm bıə kəson həmmə çı beçiz iyən fəğırə odəmonku iborəte. çəvon nə pulışon heste və nə qıləy post-məğam. əvon çəmə dasti jiyədə bıə kəsonin və çəvon iştimaiyyətədə hiç qıləy vırə və məğamışon ni. çən, çokonə əmə həm çəvon cərqədə bə ico bıbəmon və bənə əvon bətı itoətkəmon?

Həyğətədə çın fərdon palu çı erji meyar, nom, sərvət, məğam iyən şan-şohrət be və çun çı həzrəte Nuh(ə)-i tərəfdoron jıqo qıləy məğamışon nıbe, əve çəvon nəzəku jıqo şəxson hiç qıləy erjo-ğeymətışon nıbe. qıləy holədə ki, Xıdo iyən həzrəte Nuh(ə)-i palu çı insoni ğeymət bəçəy pokəti iyən təğva xotoe ki, ım bəroməş kamə təbəğədə ziyod bəçəş çiyedə və çı ğafilə puldoron palu veykam.

Çın ayəonku umutedəmon:

1-çı şan-şohrət iyən sərvəti ofotonış heste ki, çəvonku qıləyni məğrurəti, təkəbbır iyən fəğırə insonon exroc zıneye.

2-həx iyən həyğəti meyari, bəbe çəy ıştənədə bınəvi, nəinki, çəy ğəbul kardə kəsonədə. həxə sıxani bəbe de filon dastə tərəfdoron bəhonə, rədd ya ğəbul kardey lozım ni.

3-peyğombəron məktəbədə qırd insonon i və mısovin və çəvon miyono qıləy diskriminasiya movcud ni.

قَالَ وَمَا عِلْمِي بِمَا كَانُوا يَعْمَلُونَ (112) 

(Nuhi)Voteşe: mı çəvon dəvardə əməlonku xəbəm ni.

إِنْ حِسَابُهُمْ إِلَّا عَلَى رَبِّي لَوْ تَشْعُرُونَ (113) 

Çəvon ko hisob bə çımı pərvərdıqori ohdəy. ehanə dərk kardeydon?

Çı Nuh(ə)-i ələyhdoron bəhonəon mığobilədə ki, voteydəbin çəy tərəfdoron çı camiyə vey exrocə insononin, həzrəte Nuh(ə) çəvon cəvobədə hamyedə: çımı vəzifə cəmiyyəti qırd qrupon bə həxı tərəf dəvət karfdey iyən əvoni çı botıliku bə diyəro kardeye. ısət kon dast imon bəvarde və kon qrup nibəvarde, əv çımı ixtiyorədə ni. həmçinin əvon dəvardə soronədə çı kon koy soyb bıən və de çiçi məşğul bıən, bəmı ayid ni. muhim ıme ki, ısət əvon imonışon vardə. əgər şımə həm tikəy fikkoyn, dəbərəsiyon ki, çəvon koon hisob bə Xıdovəndi ohdəy, nəinki, bəçımı ohdə. çən, hədərə çəvon dəvardəku bomı sıxan məvotənən və əvoni boştə mıxolifəti xoto bəhonə ğərol mədənən.

Umumən dini mədəniyyətədə, əmə həxımon ni çı cokəson koon barədə təcəssus iyən təhğığkəmon iyən çı fərdon zəyifə nuktəon peydu və ifşokəmon. çəmə vəzifə bə şəxson zohiri əsos hukm doeye və ehanə qıləy şəxs imon biyəy, əmə kardey nibəzınemon çəy imoni ğəbul nıkəmon və çəy dəvardə soronədə kardə koonku bəhskəmon.

Çın ayəonku umutedəmon:

1-peyğombəron bəfərdon dəvardə iyən ısətnə holi bıə elm, ilahi tələbi girovədəy. nəinki, əvon mıstəğillin və ıştəku elmı-ğeybışon heste.

2-çı fərdon hisob de Xıdoe, nəinki,deəmə və hakəs bəştə kardə koon cəvobdehe, nəinki, bə cokəson koon. çı fərdon ğıyoməti barədə çəmə hukm doeyhəxımon ni.

وَمَا أَنَا بِطَارِدِ الْمُؤْمِنِينَ (114) 

Az(Imruj bəmı imon vardə) muminon(ıştə paluku) tojnıəkəs nim.

إِنْ أَنَا إِلَّا نَذِيرٌ مُّبِينٌ (115) 

Mı sovə qıləy oşkoə torsınəkəsi co çi nim.

Həzrəte Nuh(ə)-i mıxolifon boştə imon vardeyro şərtışon noəbe ki, əv bəbe zəyif və fəğırə insonon ıştə tonoku bə diyərokəy ta əvon həm bəy imon biyən. həlbəttə ın sıxan qıləy vavunəsə co çi nıbe və mumkin be əgər Nuh(ə) əvonış ıştə paluku tojnıəşbe, əvon co qıləy bəhonə əvardin və ijən imon nıəvəyn.

Əmmo həzrəte Nuh(ə) çəvon bemənoə tələbonış rədd karde və hamyeşe: çımı ko milləti irşod iyən hidoyət kardey və həx iyən həyğəti bəyon kardeye. az dumo pul, sərvət, məğam iyən şan-şohrəti kəsb kardey dumo nim ta fəğırə şəxson ıştə paluku bıtojnom və puldor iyən ərbobə şəxson cəzb kardey dumo bıbum.

Vey cəzbəkə nuktə ıme ki, bə Kərimə-Ğıroni ayəon əsos, çı co peyğombəron zəmonədə həm sərvətinə insonon jıqo qıləy tələbışon bıə və əvon bəştə peyğombəron votəşone ki, ehanə çəmə imon vardey piyedəbu, bəbe exrocə şəxson ıştə palu bıtojnoş.əmmo həmmə peyğombəron bəvon rədd cəvobışon doə və əvon çı camiyə qırd camaati hidoyəti koyədə ıştəni cəvobdeh zıneyşone.

Çın ayəonku umutedəmon:

1-çı mıxolifon bemənoə təvəğğon mığobilədə bəbe de ğətiyyəti bımandi və boçəvon cəzb kardeyro, muminon çı dasto doey nibəbe.

2-peyğombəron məktəbədə, çı imoni ğeymətış heste, nəinki, çı mol-dıvləti ya çı fərdon iştimaiyyə movğe.