667-ə hissə-Şuəra surə-128-136 şərifə ayəon

667-ə hissə

أَتَبْنُونَ بِكُلِّ رِيعٍ آيَةً تَعْبَثُونَ (128) 

(Hudi bə milləti voteşe:) Ayə har qıləy bılındə vırədə bəştə həvaye-həvəsi xoto qıləy bina soxteydon?

وَتَتَّخِذُونَ مَصَانِعَ لَعَلَّكُمْ تَخْلُدُونَ (129) 

Və ğoymə ğəsron tumo kardedon, de ım umu ki, əbədi bəmandiyon?

وَإِذَا بَطَشْتُم بَطَشْتُمْ جَبَّارِينَ (130) 

Və hafaxti bə qıləy şəxsi cəzo bıdon, bənə zolımon cəzo doydon.

Vəynə proqramədə votemone ki, həzrəte Hud(ə) bo Ad ğovmi hidoyətiro, məbus bıəbe iyən hejo de çəvon irşodi ko məşğul bedəbe və bəvon çəşnavi doydəbe. ınayəon hamyedə: həzrəte Hud(ə)-i ələyhdoron sərvətin iyən rifohtələb bıə odəmon bin. əvon bo ıştəni nışon doey iyən fəxr kardey xoto, bılındə vırəonədə bina və kə dutedəbin. əvon əyo hiç jimon həm kardedənıbin iyən bəy ehtiyocışon həm nıbe və fəğət boştə eyş-işrət iyən nəfsaniyə kefon xoto, əyo şedəbin.

Əvon boştə kə iyən imorəton soxteyro, jıqo bə qlamur iyən isrofi dıço bıəbin ki,jıqo bızın bın dınyoədə dayimi bəmanden və həni mardey bəçəvon soyəx nibome.

Dınyo pərəstəti zikri bədiqə ki, çı Ad ğovmi xısusiyyətonku be, həzrəte Hud(ə) bəçəvon co qıləy sıfəton işorə kardedə və hamyedə: şımə bə iyənde nisbtədə çı quzəşt və baxşeşi əhl niyon və şımə çoko ikəsi dastiku ğeyzin bıbiyon, bənə zolımə odəmon çı həddiku dəvardedon və bə cokəson sıtəm kardedon. ımi zikr kardey lozıme ki, həmonə Adi ğovm berəhm iyən hoziyə fərdon bin ki, bo qıləy qədə cinoyəti vey dıjdə cəzoon nəzədə qəteydəbin.

Çın ayəonku umutedəmon:

1-dini mədəniyyətədə, bo ıştəni nışon doey iyən fəxriro bıə har qıləy ko, mızəmmət bıə. harçənd hınə cəhəto çımi qıləy erjış həm bıbu.

2-dəbdəbəninə ğəsr iyən imorəton soxtey, bə dınyo dıl dəvastey iyən axırətiku ğəflətədə mandey boyis bəbe. qıləy holədə ki, sarayon hiçfaxti bo insoni əbədiyət bə ərməğon vardedəni.

3-kə-bə soxtey, bənə co dınyəviyə koon mumkine ıştə kəno ofotonış həm bıbu ki, bəbe çəvonku bə diyəro bımandi. məsələn, isrof nıkəy, qlamuriku bə diyəro bımandi. Və ya çı fəxr iyən ıştəni nışon doeyku pərhizkəy iyən çı ğəflət və dınyopərəstətiku pərhizkəy.

فَاتَّقُوا اللَّهَ وَأَطِيعُونِ(131) 

Çən, Xıdoku bıtarsənən iyən bəmı pemandənən.

وَاتَّقُوا الَّذِي أَمَدَّكُم بِمَا تَعْلَمُونَ (132) 

Şımə zınə çiyon bəşmə əto kardə Xıdoku bıtarsənən.

أَمَدَّكُم بِأَنْعَامٍ وَبَنِينَ (133) 

Və bəşmə çolınqon iyən fərzəndon nemət ətoş kardə.

وَجَنَّاتٍ وَعُيُونٍ (134) 

İyən boğon və honiyon.

Hud(ə)-i ıştə ğovmi noloyığə rəftoron tənğıd kardey bədiqə, bın ayəonədə Xıdovəndi bə ğovmi əto kardə neməton aşmardedə iyən çəvonku tələb kardedə ki, de jıqo Xıdo əmron mıxolifət nıkəyn. bəlkəm, bəçəy sıxanon pemandon ta bə səodət iyən hərəbaxtəti bırəson. həzrəte Hud(ə)-i bəçəvon yod dənoə neməton, ə neməton hisob bedə ki, çəvon ətrofış eqətə. de ovi pur iyən cari bıə çeşməon, miyvə boğon, kaştemoni məhsulon və çolınqə heyvonon ki, həm çəvon hardemoni təmin kardedə və həmən çəvon ko iyən nəğliyyat vositəon bin. i tərəfo bo heyvondorəti iyən kaştevoniro lozım bıə zu və ğıvvəş bıə çəvon fərzəndon çəvon ixtiyorədə ğərolış doəbe.

Çın ayəonku umutedəmon:

1-betəğvati çı qırd fəsodon iyən fərdi və iştimayi problemon amile. liza çı həmmə peyğombəron iminə sıfarış, bə təğva iyən pərhizkorəti rioyət kardey bıə.

2-bə təğva rioyət kardey, inov Xıdovəndi bə insonon əto kardə neməton qıləy təşəkkur iyən şık kardeye. əgər ilahi her-hevujə neməton vədə qıləy ko əncom nıdəmon ki, çəy əvəz beşey bıbu, lamalə bəçəy əmron pemandəmon.

إِنِّي أَخَافُ عَلَيْكُمْ عَذَابَ يَوْمٍ عَظِيمٍ (135) 

Az bo şımə çı dıjdə əzobi rujiku tarsedəm.

قَالُوا سَوَاء عَلَيْنَا أَوَعَظْتَ أَمْ لَمْ تَكُن مِّنَ الْوَاعِظِينَ (136)

(Ad ğovmi)Voteşone: tı piyedə bəmə pand bıdə ya mədə, boəmə fərğ kardedəni(əmə imon nibəvardemon).

Bın ayəonədə həzrət Hud(ə) de məhəbbət iyən dıləsutəti ki, ım çı qırd peyğombəron xısusiyyət be, bəştə mıxolifon xitob kardə holədə hamyeşe: çımı votə çiyon, bəşmə xəyriye və bomı hiç qıləy nəfış ni.mı nə şıməku qıləy molım piyedə və nə bəşmə yolyəti kardey fikım heste. az şımə ko ağıbətiku tarsedəm ki, şımə deştə qırd ım itoət nıkardey, oxoyədə bə qıləy dıjdə əzobi giriftor bəbiyon. əmmo əvon ki, deştə ğudrət iyən sərvəti məsto-xumar bıəbin, bə həzrəte Hud(ə)-i sıxan iyən nəsyəton quş doey iyən çəy barədə fik kardey iyən pand qətey əvəzi, be etino kardə iyən beədəbə formədə voteşone: tı hədərə bəştə sıxanon zu mədə. ıştı votə sıxanon bəçəmə quş nidəbəşe və bəçəmə dılon hiç qıləy təsir nibənoe.

Çın ayəonku umutedəmon:

1-bəbe bə ğəflət iyən məğrurəti dıço bıə kəson, tars bıdəy, harçənd həxə sıxan bəvon təsir həm nıkəy.

2-ehanə fərdon bo həxı ğəbul kardey ğabiliyyətışon nıbu, hətta çı Xıdo veyçokə bandəon sıxan həm bəvon təsir nibənoe və əvon əy ğəbul nibəkayn.