668-ə hissə-Şuəra surə-137-150 şərifə ayəon

668-ə hissə

‏ إِنْ هَذَا إِلَّا خُلُقُ الْأَوَّلِينَ (137) 

(Iştı ım dəvət) Ğərəz navkonə nəslonşivəsə co çi ni.

وَمَا نَحْنُ بِمُعَذَّبِينَ (138) 

Və bəmə əzob doey nibəbe.

فَكَذَّبُوهُ فَأَهْلَكْنَاهُمْ إِنَّ فِي ذَلِكَ لَآيَةً وَمَا كَانَ أَكْثَرُهُم مُّؤْمِنِينَ (139) 

Çən, əvışon(Hudışon) bə həşə je. əmə həm əvonımon həlok karde. həlbəttə bın(dastonədə) dıjdə nışonəon heste. (əmmo)milləti veyni imon vardəkəs nin.

وَإِنَّ رَبَّكَ لَهُوَ الْعَزِيزُ الرَّحِيمُ (140) 

Və Həyğətən, ıştı pərvərdıqor həmonə əziz iyən mehribonə Xıdoe.

Navnə proqramədə Ad ğovmi bə həzrəte Hud(ə)-i doə cəvobımon məse. ə həzrət əvoni bə pərhizkorəti iyən çı yavə koonku bə diyəro mandey dəvət kardeydə, əvon voteşone: hədərə bəştə zəhmət mədə. tı çı bəmə pand bıdə ya mədə, bo əmə fərğ kardedəni və ıştı sıxanon bəmə hiç qıləy təsir nibəkay.

In ayəon çı Ad ğovmi sıxanon dəvomədə, boştə noloyığə koon qıləy bəhonə vardedəbin və voteydəbin ki, əmə ıştə dədə-bobo qətə roy şedəmon və tı hədərə çəmə koonədə irod və eyb məqət.tı qımonməkə ki, əmə inhirofə royədəmon. əmə ıştə həmonə əbo-əjdodi şıə roy dumomon ki, çəvon qətə ro həm səhihə roye və əmə bəştı votə sıxanon ələyh, bəmə hiç qıləy cəzo doey nibəbe. zira əmə bə qıləy xilof və yavə ko mırtəkib bıənimon.

Xıdovənde-Aləm çəvon cəvobədə hamyedə: əvon çı Hud(ə)-i sıxanon du hisob kardeşone iyən çəy risolətışon təkzib karde. binobərin həmonə bın dınyoədə bə əzobi dıço bin və bə həlokəti rəsin. zira çəvon veyni nə imon nıvardeşone və nə bo imon vardeyro çı həxı dumo nıbin.

Ayəon dəvomədə hamyedə: Xıdovəndi deəvon bıə ım rəftor, ibrəti dərs iyən ilhai ixtidore ki, bəbe mıxtəlifə ğovmon çəyku pand bıqəton.

Çınayəonku umutedəmon:

1-dədə-bobon rəftor, bəçəvon həx bıey dəlil ni. həmçinin bə dəvardə nəslon təəssıb iyən kanə rəsmo-adəton kur-kuronə surətədə təğlid kardey, de ağli i omeydəni.

2-ıştə nodırıstə koon bə dəvardə nəslon metodi təkyə kardə holədə bəhonə məvəmon iyən məsuliyyəti ıştə giku peməqətəmon.

كَذَّبَتْ ثَمُودُ الْمُرْسَلِينَ (141) 

Səmud ğovmi(həm) ıştə peyğombəron təkzib kardeşone.

إِذْ قَالَ لَهُمْ أَخُوهُمْ صَالِحٌ أَلَا تَتَّقُونَ (142) 

Bə zəmon ki, çəvon bo Salehi bəvon voteşe:a yə tarseydəniyon?

إِنِّي لَكُمْ رَسُولٌ أَمِينٌ (143) 

Mı boşımə qıləy əminə peyğombərim.

فَاتَّقُوا اللَّهَ وَأَطِيعُونِ (144) 

Çən, Xıdoku bıtarsənən iyən bəmı pemandənən.

وَمَا أَسْأَلُكُمْ عَلَيْهِ مِنْ أَجْرٍ إِنْ أَجْرِيَ إِلَّا عَلَى رَبِّ الْعَالَمِينَ (145) 

Və mı boştə risoltəiro şıməku hiç qıləy əcr(mıkofot) piyedəmni. çımı əcr bə aləmon pərvərdıqori ohdəy.

Çın surə ayəon bənə Nuh, İbreym, Mosə iyən Hud(ə) peyğombəron macəraon bəyoni bədiqə, ısət bə həzrəte Saleh(ə)iyən bəçəy bo Ad ğovmi hidoyətiro bıə şivə işorə kardedə. çə həzrəti şivə həm bənə co peyğombəron, seqlə muhimmə əsliku iborət be. qıləyni bə Xıdo əmron pemande, co qıləyni bə əmin iyən rostəvıjə peyğombəron itoət kardey ki,ım ko bəçəvon dınyo iyən axırəti baxtəvərəti rəsey boyis bəbe. və seminə qılə həm ım be ki, peyğombəron çı millətiku hiççi çəş kardedənıbin və çəvon koon fəğət bo Xıdo xoto be. nəinki, bə milləti xoto.

Çın ayəonku umutedəmon:

1-qırd peyğombəron dəvəti məzmun və mesaj i və mısovi bıə. əvon həmmə məxloğışon bə i bıə Xıdo tərəf dəvət kardəşone iyən bə Xıdo nıpemandeyku əvonışon torsınə.

2-əkəs risoləti bo bəştə kul peqətey bəzıne ki, çəy kanə stajış de əmonotdorəti iyən dırıstkorəti bıbu. dini mıbəllığon həm çı peyğombəron ro dəvom doəkəsonin, bəbe əvon həm həmonə xısusiyyətonışon bıbu.

أَتُتْرَكُونَ فِي مَا هَاهُنَا آمِنِينَ(146) 

Ayə(fik kardedon) şımə bın dınyoədə bıə çiyonədə de əmno-əmniyyəti va doey bəbiyon?

فِي جَنَّاتٍ وَعُيُونٍ (147) 

Boğon iyən çeşmənoədə?

وَزُرُوعٍ وَنَخْلٍ طَلْعُهَا هَضِيمٌ (148) 

Və hiyon iyən çəy ziziəon lətif(zərif) iyən iyənde səpe nıştə(veyə) xımo doonədə?

وَتَنْحِتُونَ مِنَ الْجِبَالِ بُيُوتاً فَارِهِينَ (149) 

Və şımə(de məhorəti) boştə eyş-işrətiro bandonədə kə toşedon.

فَاتَّقُوا اللَّهَ وَأَطِيعُونِ (150) 

Çən, Xıdoku bıtarsənən iyən bəmı pemandənən.

Bın ayəonədə həzrəte Saleh(ə) bəştə ğovmi qıləy ciddiyə çəşnavi doydə ki, boçi şımə qımon kardedon ki, bın dınyoədə əbədi bəmandiyon iyən hejo nazo-neməti dılədə iyən de asayişi jimon bəkayon? şımə çokonə təsəvvır kardeydon ki, şımə ım boğo-bostonon iyən xımoə plantasiyəon hejo bərpo bəbe və şımə çəvon miyvəonku hejo bəhrə bəbardiyon?

Çıro tosə ım həddi ıştə luz-ləvə əsiriyon iyən de eyşo-işrəti məşğuliyon? Şımə ilahi nemətonku bəhrə bardə holədə, hejo bə ilahi əmron ələyh beşiyon iyən bə əmri nıpemandiyon. şımə lamalə bəçəy əmron itoətkənən və Xıdoku bıtarsənən.

Əgər həm dılon heste bə dınyo iyən axırəti hərəbaxtəti bırəsən, bəçımı votə sıxanon quş bıdənən ki, az ıştəku hiççi voteydənim və mı fəğət çı Xıdo sıxanon boşmə bəyon kardedəm.

Çın ayəonku umutedəmon:

1-dınyo nemətonku bəhrə bobəmon, əmmo bəvon dıl dəməvastəmon. zira əvon əbədi iyən poydor nin.

2-ziyodə rifoh iyən asayiş, çı fəsod iyən betəğvati zəminə hozzı kardedə və camiyə hejo bə təzəkkur iyən nəsyəti ehtiyocış heste.