671-ə hissə-Şuəra surə-167-175 şərifə ayəon

671-ə hissə

قَالُوا لَئِن لَّمْ تَنتَهِ يَا لُوطُ لَتَكُونَنَّ مِنَ الْمُخْرَجِينَ (167) 

Məxloğ(pand qətey əvəzi) voteşone: ha Lut ha! əgər ıştə sıxanonku dast nıkəşoş, şək ni tı(çı şəhriku) xaric bıə kəsonku bəbeyş.

قَالَ إِنِّي لِعَمَلِكُم مِّنَ الْقَالِينَ (168) 

Luti voteşe: bərosti, az de şiddəti bəşmə kardə ko ələyhim.

Vəynə bərnomədə votemone ki, həzrəte Lut(ə) ıştə ğovmi yavə əməlış rədd karde iyən əvonış çın koyku nəhyış karde. ın ayəon hamyedə: əvon ıştə peyğombəri nəsyəton ğəbul kardey iyən yavə ko bıə həmcinsbozəti tərk kardey əvəzi, Lut(ə)-şon təhdid karde ki, ehanə tı ıştə moyizə iyən nəsyətonku dast nıkəşoş və bəçəmə ko mane bıbuş, bəvədə əmə tıni çı şəhriku bə bi bebəkamon ta rohətə formədə ıştə koy əncom bıdəmon.

Əmmo həzrəte Lut(ə) çəvon təhdidku tarsey əvəzi, de ğəti holəti cəvobış doe ki, az bəşmə kardə koon nifrət kardedəm iyən bəşmə bın koon ələyh beşeyku dast nibəkəşem.

Vey əcibə ko ıme ki, Lut(ə) hamyedəni ki, mı şımə şəxsi deşmınim. bəlkəm, votedə ki, mı deşmə kardə koon deşmınətim heste. yəni əgər şımə ıştə kardə koonku dast bıkəşon, az ijən şımə miyono səmimiyyət iyən dustəti bərğərol bəkam. şımə bə xoş nomə koon, boyis bedə ki, mı deəy mıborizə bardey iyən çəy vəy qətey iyən çəy pevolo bıey royədə, ıştə dasto omə koon əncom bıdəm.

Çın ayəonku umutedəmon:

1-pokə merdon çəvon diyoriku bə bi bekardey, çı nopok iyən sıtəmkorə fərdon metod bıə ta rohət bəştə xilofə koon iyən cinoyəton dəvom bıdən.

2-çı yavə ko soybon vədə tam jıey cayiz ni. çoko bevəcə koon ələni surətədə əncom doey bedə, bəbe ələni formədə həm bəvon ıştə nifrət iyən etıroz nışon doey bıbu. həm de zıvoni və həmən de əməli deəvon bəbe mıborizə bobəy.

3-çun peyğombəron fəğət bə Xıdo təvəkkul kardedəbin, çı deşmınon təhdidonku tarsışon nıbe və hiç qıləy şərayitədə de fəsod iyən zılmi mıborizə bardey koyku dast kəşeydənıbin.

رَبِّ نَجِّنِي وَأَهْلِي مِمَّا يَعْمَلُونَ (169) 

Xıdolim ha! mıni iyən çımı əhli çəvon əncom doə çi(şərriku) ozodkə(peroxon).

فَنَجَّيْنَاهُ وَأَهْلَهُ أَجْمَعِينَ (170) 

Çən,(çəy dıvo mıstəcob kardemone) əv iyən çəy qırd xıyzon nicot domone.

إِلَّا عَجُوزاً فِي الْغَابِرِينَ (171) 

Ğərəz(Luti jeni) piyə jeni ki, çə mandəkəson miyono mandə be.

De həzrəte Lut(ə)-i dayimə tars doey iyən hidoyəti, həni huccət bə xilofkoron təmom be. əmmo əvon bə Xıdo peyğombəri ələyh qıləy məkrinə planışon kəşe. liza ə həzrəti Xıdoku tələbış karde ki, boəy iyən boçəy tərəfdoron nicotiro qıləy ğərol bıdəy ta əvon çın qınokorə ğovmi şərriku perəxon. Xıdovənde-Aləm həm çı Lut(ə)-i ım dıvoş ğəbul karde. bəy iyən bəy imon vardə qırd kəson ki, çəy əhliku bə hisob omeydəbin, əmrış karde bəşəvnəy həmmə kəs hıtə faxti, çı şəhriku xaric bıbon ta əzob nozil bıyədə, şəhrədə nımandon. həlbəttə, çı Lut(ə)-i xıyzon iyən tərəfdoron miyono çəy jimoni həmro ki, mınhərif bıəbe və bəy de ın yavə koon mıborizədə bəy koməq kardedənıbe. Lut(ə)-i jen çə həmonə ğovmi miyono mande və bənə co kəson bə əzobi dıço be.

Çın ayəonku umutedəmon:

1-fosid iyən nopokə muhitədə mandey, cayiz ni və bəbe çə muhitiku fərol və nicot pəydu kardey fikədə bıbu. ya bəbe muhiti islohkəy və ya lamalə çə vırəku ıştə coni peroxni.

2-Xıdovəndi palu, zabitə bəsə rabitəsə bənave. ehanə peyğombəri jen həm mınhərif bıbu, həlok bəbe. çəy de Xıdo peyğombəri bıə rabitə bəçəy xilos bıey boyis nibəbe.

ثُمَّ دَمَّرْنَا الْآخَرِينَ (172) 

Peşo cokəson rəğ-rişə bırniyemone.

وَأَمْطَرْنَا عَلَيْهِم مَّطَراً فَسَاء مَطَرُ الْمُنذَرِينَ (173) 

Və çəvon səpe(sığə) voşon enovne. çı yavəy(əzobi) voş bo tars doə bıə kəson.

إِنَّ فِي ذَلِكَ لَآيَةً وَمَا كَانَ أَكْثَرُهُم مُّؤْمِنِينَ (174) 

Şək ni bın(macəradə, ibrəti) nışonə heste. lakin çəvon veyni imon vardəkəs nıbin.

وَإِنَّ رَبَّكَ لَهُوَ الْعَزِيزُ الرَّحِيمُ (175) 

Və bərosti ıştı pərvərdıqor həmonə zumand, mehribone.

Lut(ə) iyən çəy imoninə xıyzon və tərəfdoron bəşəvnəy çı şəhriku xaric bin.qıləy dəhşətin iyən dıjdə buməlarzə həmonə vırəş eqəte iyən şəhr və çəy əhlış məhvış karde. ıştə şəvi de qıno iyən fəsodi dəvordınə iyən ğəfləti hanədə bıə kəson, çı volo bıə şəhri xərobə vırəonədə məhv bin mandin.

Nəinki, zəlzələ çəvon şəhrış lorzıneşe iyən çəvon kə-bəş xərobə karde, bəlkəm Xıdovəndi çı osmoniku sığə voşış bəçəvon sə rukardeşe. jıqo bızın bə ikkərə iyən bəjəm zəmin iyən osmon bə ım qınokor iyən fosidə ğovmi ələyh beşəbin və həmonə şəhri pevuşkıney məğsədışon hestebe. şəhri əhl çı xərobə vırəon jiyədə mandin və kulliyə surətədə çəvon rəğ-rişə bırniye be əvon həlok bin şin.

Isət qədə sığon çokonə bəçəvon sə rube, iyo bəhs heste. kali şəxson voteydən ki, qıləy dıjdə tufan be ki, hırd iyən dıjdə sığonış bə osmon rostış karde və bəçəvon sə rukardey be. yaan ki, həmuş bıə vulkan fəal be və çə vulkanə bandonku sıə bıə voşon bəvon nozil be.

Ayəon dəvomədə bənə co peyğombəron sərquzəşton oxoyədə bıə ayəon, hamyedə: bəçəvon sə ım əzobi nozil bıey səbəb ımbe ki, çəvon veyni ilahi ayət və nışonəonışon vinde və huccət bəvon təmom bıəbe, əmmo əvon ijən imon vardey fikdə nıbin və bə ilahi ovliyaon ələyh məkrinə planon kəşey dumo bin.

Çın ayəonku umutedəmon:

1-bəbe fosid iyən qınokorə camiyə, ilahi cəzo və tənbihi intizorədə bımandon. qıləy cəzo ki, çı har tərəfiku və de har mumkin bıə formə nozil bedə.

2-bo huccəti təmom kardeyro, tars iyən çəşnavi lozıme və huccəti təmom kardey bənav, əzob nozil bedəni.

3-təbyət ilahi ğudrəti ixtiyorədəy. həmonə ğudrət ki, voşi çı osmoniku nozil kardedə, kardey bəzıne çəyo sığ həm enovni.