682-ə hissə-Nəmli surə-29-35 şərifə ayəon

682-ə hissə

‏ قَالَتْ يَا أَيُّهَا المَلَأُ إِنِّي أُلْقِيَ إِلَيَّ كِتَابٌ كَرِيمٌ (29) 

(Bılğeysi)Voteşe: ha əyan-əşraf ha!(ha kişvəri yolon ha!) bəçımı tərəf qıləy erjinə nomə ğandey be.

إِنَّهُ مِن سُلَيْمَانَ وَإِنَّهُ بِسْمِ اللَّهِ الرَّحْمَنِ الرَّحِيمِ (30) 

Nomə çı Suleymonikue. və(çəy məzmun) ıme: de əbaxş iyən mehribonə Xıdo nomi.

أَلَّا تَعْلُوا عَلَيَّ وَأْتُونِي مُسْلِمِينَ (31) 

Iştəni mıku bəpe qətey dumo məbənən. çımı palu boənən iyən bəmı təslim(muti) bıbənən.

Navnə proqramədə votemone ki, həzrəte Suleymon(ə) Səba sərzəminiku məlumat pəydu kardey iyən çəvon bə həşi pərəstış kardey zıney bədiqə, qıləy nomə nıvışteşe və doşe bə Hud-Hudi ki, bışi bırosni bə vırə. Hud-Hud bə Səba məleykə və kraliçə saray daxil be və noməş çı kraliçə palu şodeşe.

In ayəon hamyedə: Səba məkeykə de ım nomə vindey, sərəse ki, ım nomə rosnə reçiniə pərəndə çı qıləy yolə şəxsi tərəfiku omə. əve çım xəbə barədə deştə mışovir iyən ətrofədə bıə kişvəri yolon məşvərətış karde. əvonış cəm karde iyıən noməş şəxsən çəvon huzurdə handeşe.

Məktub de əbaxş iyən mehribonə Xıdo nomi bino bıəbe iyən çəy məzmun çımiku iborət be: qıləyni çı həxı vədə təslim bıey və co qıləyni bə Suleymoni hukuməti nıpemandeyku bə diyəro mandey.

Çın ayəonku umutedəmon:

1-ıştə qırd koon de əbaxş iyən mehribonə Xıdo nomi binokəmon. hətta bo kofirə şəxson nomə nıvışteyədə, Bismillahir-Rəhmanir-Rəhimi çı viro beməkəmon.

2-ıştəni bəpe qətey, insoni bə həxı təslim bıey vəy qətedə. əvhəm bə ilahi ovliyaon təslim bıey.

قَالَتْ يَا أَيُّهَا المَلَأُ أَفْتُونِي فِي أَمْرِي مَا كُنتُ قَاطِعَةً أَمْراً حَتَّى تَشْهَدُونِ (32) 

(Bılğeysi)Voteşe: ha yolon ha! çımı koyədə nəzə bıdənən ki, az(tosə ısət) beşımə hiç qıləy muhimmə ko əncomım doə ni.

قَالُوا نَحْنُ أُوْلُوا قُوَّةٍ وَأُولُوا بَأْسٍ شَدِيدٍ وَالْأَمْرُ إِلَيْكِ فَانظُرِي مَاذَا تَأْمُرِينَ (33) 

(Əyan-əşrafi)Voteşe: çəmə vey zumand iyən şiddətinə ğıvvəmon heste(şucoətinimon). əmmo(ijən) tı ixtiyori soybiş. diyəkə ki, çı fərmon doydəş.

Həzrəte Suleymon(ə)-i nomə handey bəpeşt, Səba sərzəmini məleykə ki, qıləy siyosətmədor iyən diyəro vində jen be, ıştə sarayədə bıə kişvəri barzə məğamə şəxsonış cəm karde və çəvonku bo ım nomə qıləy cəvobış tələb karde. təbiiye ım məşvərət bəy koməq əkəy ki,əv de Suleymon(ə)-i mıborizə bardeyro ıştə saray odəmonku aqah bıbu iyən həmməysə çokə metodi bıvıjno.

Çı Səba kraliçə mışoviron iyən de hərbi ğıvvon ziyodə imkonat və zu fəxr kardə iyən ıştə hozzı beıy elan kardə ləşkəri ğıvvon sərkərdəon de Suleymon(ə)-i canq kardey tərəfdor bin. həmçinin çandə qılə kişvəron hərbi yolon həm de Suleymon(ə)-i canq kardey təklifişon doe. əmmo əvon ijən oxonə ğərolışon bə məleykə ohdəşon noe ta əv çı fərmon bıdo, əvon əy əncom bıdəyn və bəçəy nəzə əks qıləy çi nıvoton.

Çın ayəonku umutedəmon:

1-bə hərbi ğıvvon malik bıey iyən zu imkonaton bo qıləy məmləkəti lozıme. həlbəttə de ın şərti ki, ım bə məğrurəti, sultə pəydu kardey iyən bo həxı ğəbul kardey mane nıbu.

2-məxsusən hukuməti koyədə məşvərət kardey, qıləy zəruriyə koye. əmmo oxonə ğəroli ikəs doydə ki, koon bə ixtilofi dıço nıbon.

قَالَتْ إِنَّ الْمُلُوكَ إِذَا دَخَلُوا قَرْيَةً أَفْسَدُوهَا وَجَعَلُوا أَعِزَّةَ أَهْلِهَا أَذِلَّةً وَكَذَلِكَ يَفْعَلُونَ (34) 

(Bılğeysi)Voteşe: şək ni hafaxti podşoon bə qıləy obodə məntəğə varid bıbon(hucum bıbon) həmonə vırə məhv bəkan iyən çə vırə əzizon zəlil bəkan və hejo əvon jıqo kardedən.

وَإِنِّي مُرْسِلَةٌ إِلَيْهِم بِهَدِيَّةٍ فَنَاظِرَةٌ بِمَ يَرْجِعُ الْمُرْسَلُونَ (35)‏

Və həyğətən, mı qıləy(ğeymətinə) hədiyə boəvon vığandedəm. ta hələ binim çımı vığandəkəson de çı(cəvobi) oqardedən?

Səba sərzəmini kraliçə ıştə saray əyan-əşrafi sıxanon və nəzəməsey iyən çəvon de Suleymon(ə)-i canq kardey rayku aqah bıey bədiqə, ıştə ğərolış bəyon karde ki, ehanə canqkəmon, boəmə sovə məhv bıey iyən çəmə məmləkəti vironəti hiççi nibəmande. zira sultə dumo bıə hukmdoron bə qıləy şəhr varid bıeyədə, çəvon kəon xərob kardedən iyən çəvon merdon kışteydən ya əsir kardedən və çə vırə məxloği bə xaro-zılləti dıço kardedən.

Çən, vey çoke ki, mıhoribə elan kardey əvəzi, ıştə tərəf mığobiliku vey məlumat bə dast biyəmon ta bıvindəmon çəvon ım nomə vığandeyədə hədəfışon çiç bıə? liza qıləy erjinə hədiyyəş bo həzrəte Suleymon(ə)-i vığandeşe ta hələ binim əv bımi çı reaksiyə nışon doydə. ayə canq nıkardey nışonə bıə hədiyyə vığandey ko bə oxo bərosne ya çəvon həyğiyə niyyət ım sərzəmini işğal kardey və qəteye? bə zəmon de Suleymon(ə)-i nışon doə reaksiyə bə ico, kardey bəbe bə qıləy lozım bıə ğəroli boy ki, ayə canq kardey lozıme ya qıləy co ro vıjiniye?.

Ğasbu həm Səba məleykə de hədiyyə vığandey, dılış hestebe Suleymon(ə)-i imtovonkəy ki, ayə əv həyğətən, Xıdo peyğombəre ya deştə podşohəti məst bıə iyən co sərzəminon zəbt kardey dumo bıə qıləy hukmdore? zira zınedəbe ki, peyğombəron çı dınyo moli dumo nin və əvon milləti hidoyət kardey fikədən. həyğətədə, ım dınyopərəstə podşoonin ki, boştə şəxsi mənafeyon iyən bə ziyodə sərvət və ğudrəti rəsey xoto, bə har koy dast ğandedən.

Çın ayəonku umutedəmon:

1-fəsodi pevolo kardey iyən canq və xunrukardey dumo bıey,çı ğeyri ilahi hukuməton şivəonkue ta bə cokəson sultə pəydukəyn.

2-mığət bıbəmon ki, qahi faxti çı cokəson tərəfiku bıə hədiyyəon rışvəy ta əməni imtovokəyn ya qıləy həxı zaykəyn.