687-ə hissə-Nəmli surə-57-60 şərifə ayəon

687-ə hissə

فَأَنجَيْنَاهُ وَأَهْلَهُ إِلَّا امْرَأَتَهُ قَدَّرْنَاهَا مِنَ الْغَابِرِينَ (57) 

Çən, əv(Lut) iyən çəy xıyzonro nicot domone. ğərəz çəy jeni ki, mığəddər kardemone şəhrədə mandə kəsonku(iyən həlok bıə kəsonku) bıbu.

وَأَمْطَرْنَا عَلَيْهِم مَّطَراً فَسَاء مَطَرُ الْمُنذَرِينَ (58) 

Peşo(sığə) voşon bəçəvonsə rukardemone və çı bevəce tars doə bıə kəson voş.

Vəynə bərnomədə votemone ki, Lut(ə)-i ğovm bə ə həzrəti sıxanon dığğət kardey iyən ıştə yavə əməlonku dast kəşey əvəzi, əvışon təhdid karde və voteşone ki, çun deəmə həmkorəti kardedəniş iyən bəçəmə kon mane bedəş, əve əmə tıni çı şəhriku xaric bəkamon. qahi faxti həm de ləğ-ləğə fəson votedəbin ki, ehanə pok mandey piyedəbu, bəbe çı şəhriku bə bi beşoş ta tı həm bə boəmə omə əzobədə giriftor nıbuş.

In ayəon hamyedə: Xıdovənd bo ın qınokorə ğovmi huccəti təmom kardey bədiqə, əzobış boəvon enovneşe və bə həzrəte Lut(ə)-i vəhyış karde ki, çı əzobi nozil bıey bədiqə, de co muminon bə ico çı şəhriku xaric bıbon ta bə əzobi dıço nıbon.

Həlbəttə çı Lut(ə)-i jimoni həmro bəçəy deştə şuyə mıxolifon həmkorəti kardey və çı kə məlumaton bəvon rosney xoto, de ilahi əmri bə cəzo şomil be və bə həlokət rəse.

Çın ayəonku umutedəmon:

1-bə co kəson qıno rozi bıey iyən deəvon həmkorəti kardey, Xıdovəndi palu qıno hisob bedə vəçəy həm cəzoş heste.

2-ilahi məktəbədə, zabitə bə rabitə hakime. Lut(ə)-i jimoni həmro iyən çı Nuh(ə)-i fərzənd bə ın dıqlə Xıdo peyğombəri həmməysə vey nez bıəkəson bin, əmmo bə ilahi ğəhri dıço bin. bə Fironi jeni əks ki, oxoyədə vəhışti əhl be.

3-dınyoədə təğva iyən pokdovnəti, bə ilahi ğəhro-ğəzəbiku nicot pəydu kardey boyis bedə.

قُلِ الْحَمْدُ لِلَّهِ وَسَلَامٌ عَلَى عِبَادِهِ الَّذِينَ اصْطَفَى آللَّهُ خَيْرٌ أَمَّا يُشْرِكُونَ (59)

(Ha pəyğombər ha!) Vuji: sıtoyiş bo Xıdoe. səlom(bıbu) bəçəy bandəon ki, əvonış vıjniyə. ayə Xıdo veyçoke ya çəvon şərik ğərol doə çiyon?

Penc qılə ilahi peyğombəron sərquzəşton oxoyədə,ın ayə bə islomi peyğombəri(s) xitob kardedə və hamyedə: bəbe Yolə Xıdo sıtoyişkəy və bəy təşəkkurkəy ki, qınokor iyən fosidon çı zəmini dimiku pok kardedə.çımisə əlovə bəbe hejo bə ilahi peyğombəron və ovliayon səlom bıvğandəmon. zira əvon çı Xıdovəndi vıjniyə kəsonin və bo milləti hidoyət iyən ro nışon doey cəhəto,ziyodə cəhdışon kardə.

Ayə dəvomədə hamyedə: ayə mışrikon pərəstış kardə bıton ya şımə bəy təkyə kardə sırvət iyən ğudrət şıməni çı ilahi əzobiku peroxne bəzıne? çıro əvon çı İ bıə Xıdo əvəzi,bə xiyoliyə məbudon soyəx şedən?bəqəm navkonə ğovmon sərquzəşton mışohidə nıkardeyone ki, çokonə həmonə bın dınyoədə bə həlokət rosnemone.

Çın ayəku umutedəmon:

1-bə ilahi neməton şukr kardey kənoyədə, çəy çokə bandəon sıtoyiş həm lozıme. zira bə vıjniyə bıə insonon dığğət kardey, bə insoni ziyodə mısbətə təsir noydə.

2-Xıdo ovliyaon bəyjin və çəmə səlomi ğəbul kardedən. hətta Xıdovənd bəvon səlom doydə.

أَمَّنْ خَلَقَ السَّمَاوَاتِ وَالْأَرْضَ وَأَنزَلَ لَكُم مِّنَ السَّمَاءِ مَاء فَأَنبَتْنَا بِهِ حَدَائِقَ ذَاتَ بَهْجَةٍ مَّا كَانَ لَكُمْ أَن تُنبِتُوا شَجَرَهَا أَإِلَهٌ مَّعَ اللَّهِ بَلْ هُمْ قَوْمٌ يَعْدِلُونَ (60) 

Osmonon iyən zəmini ofəyəkəs iyən osmoniku bo şımə ov vığandəkəs kiye? çən, deçəy vositə tərovətinə boğo-bostonon perosneydə ki, çəy doon perosney şımə ko ni. ayə de Xıdo bə ico qıləy məbud(heste?ne) bəlkəm, əvon mınhərifə ğovmin.

Navnə ayə oxoyədə, hamyeşe: ayə ğadirə Xıdo veyçoke ya şımə şərik ğərol doə çiyon? ın ayə bə Xıdovəndi zəmini dimisə mıxtəlifə neməton bə əməl omey boyis bıə kali elm iyən ğudrəti cilvəon işorə kardedə və hamyedə: ayə şımə pərəstış kardə çiyon, osmonon iyən zəminış ofəyə və əv boşımə çı osmoniku ovi nozil kardedə? Ayə şımə məbudon ım tərovətin və havzə boğo-bostonon bo şımə bə vucud vardedən? çıro həxıku dəvardedon iyən bə inhirofi tərəf şedon?

In ayə və peşonə ayəon, insonon bo Xıdoşunasiro vey çokə ro bıə çı xılğəti barədə təfəkkur kardey dəvət kardedə. zira har qıləy ağılmandə inson ımi dərk kardedə ki, ım əzəmətinə dınyo çəmə insonon pesoxtə çi ni və deçəmə irodə iyən tələbi idorə bedəni. çən, de tikəy təfəkkur kardey bəbe ğəbulkəy ki, qıləy zumandə xalığ bəştə elm iyən hikməti əsos, ım dınyoş ofəyə və çəy nizom və sistemış təğdır kardə.

Çın ayəku umutedəmon.

1-xılğəti barədə təfəkkur kardey, bo Xıdo zıneyro vey çokə roye.

2-bə zəmon Xıdovəndi dınyo xılğətədə bıə ğudrəti dəbərəsemon ki, ıştə hətta qıləy do perosneyədə bıə ğudrəti nıbey, əmə dərkəmon.

3-hestemoni aləmi tədbir, Xıdovəndi dastədəy. əmmo ım ko de səbəb və vositəon bə əməl omeydə. çoko ki, çı beməyon perəse, de voşi ovi rubey bə əməl omeydə.