693-ə hissə-Nəmli surə-86-88 şərifə ayəon

693-ə hissə

أَلَمْ يَرَوْا أَنَّا جَعَلْنَا اللَّيْلَ لِيَسْكُنُوا فِيهِ وَالنَّهَارَ مُبْصِراً إِنَّ فِي ذَلِكَ لَآيَاتٍ لِّقَوْمٍ يُؤْمِنُونَ (86) 

Ayə nıvinde ki, əmə şəvımon ğərol doe ta bəvədə orom bıbon və rujımon ruşnə baxş kardə kardemone. (ta bəvədə boştə maaşiro cəhdkəyn)şək ni bın koyədə bo imon vardəkəson ibrəton heste.

Navnə ayəonədə ğıyoməti barədə nuktəonku bəhs be ta ğıyoməti inkor kardəkəson, ıştə əndişə iyən fikonku dast bıkəşon və ğıyoməti qıləy ğeyri-mumkinə ko nızınon. ın ayə bə ilahi ğudrəti məzhəronku qıləyni işorə kardedə və hamyedə: ayə tosə ısət bə ım movzu dığğət kardeyone ki, ehanə zəmin hejo ruşin bıəbe və nur iyən çı həşi sutunə şua hejo bıəbe, şımə çokonə istirohət əkəyon və orom əbiyon? ya əgər zəmini kurə hejo bənə şəvi toyki bıəbe, çokonə de ko-sənəti məşğul əbiyon? Bın surətədə beməyon və doon çokonə ruşd əkəyn iyən perəsin? ayə zəmini 24 saatədə ıştə qırdo qardey ki, şımə harujnə ko və cəhdi de şəvi istirohət və hıtey bə proqrammə əsos kardəşe, qıləy təsadufiyə koye? ımruj həm elmi nəzəku sabit bıə ki, şəvi toykiyəti insoni psixi cəhəto oromətiyədə iyən və ruji ruşnəti çəy mıxtəlifə zəminəonədə bıə fəaliyyətonədə əsosinə rolış heste.

Kərimə-Ğıron de jıqonə ayəon tikror kardey, bə həxpərəst iyən həxı ğəbul kardə insonon yod dənoydə ki, de bəştə ətrofi nəzə kardey, bə Xalığə İlahi elm, ğudrət iyən hikməti imon biyəyn və bə hədərə ğıyoməti inkor nıkəyn.

Çın ayəku umutedəmon:

1-şəvı-ruji omey-şıey, aləmi pərvərdıqori elm iyən tədbiri nışonəy. bəbe bə bın koy de dığğəti diyəkəmon və jimoni harujnə koon əməni çı təfəkkur kardeyku nıoqəto.

2-ğıyoməti ayəon miyono han iyən oğoəti movzuku bəhs kardey, bəçəy xotoe ki, əmə həmonə bın dınyoədə haruj mardey iyən sənibəton bəyji bıey təcrubə kardedəmon.

3-insoni jimoni bərnomə bəbe de təbyəti soxtemoni mıtobiğ bıbu. şəv bo istirohət və ruj bo ko kardey. de ın tərtibi de tosə şəvi nimə oğo mandey və tosə ruji nimə hıtey, bə xılğəti təbiiyi sistemi əkse.

وَيَوْمَ يُنفَخُ فِي الصُّورِ فَفَزِعَ مَن فِي السَّمَاوَاتِ وَمَن فِي الْأَرْضِ إِلَّا مَن شَاء اللَّهُ وَكُلٌّ أَتَوْهُ دَاخِرِينَ (87) 

Və(bə yod biyə) ə rujiki, bə sur pu kardey bəbe. çən, hakəs ki, osmonədə iyən zəminədəy, bətarse. illa sovə Xıdo piyəkəsi və qırd(əvon) mutiyə holədə çəy palu bomeyn.

In ayə ijən bə ğıyoməti ruji movzu işorə kardedə və çəy vəsəbə suri pu kardey zıneydə. bə Ğıroni ayəon əsos, bə suri dı kərə pu kardey bəbe. ikərə dınyo oxoyədə ki, ın ayə bəy işorə kardedə bə de əy məsey, həmməkəs bə tars iyən vəhşəti dıço bəbe və bəmardeyn. dıminə kərə ğıyoməti bərpo bıə faxti ki, bə suri pu kardə faxti, mardəkəson bəyji bəbeyn və məhşəri səhradə cəm bəbeyn.

Çoko ki, ın ayə hamyedə: bə suri pu kardə faxti, qırd insonon bə tarso-larzi dıço bəbeyn. əmmo çok iyən pokə insonon ijən ilahi məlayikon çın koyku mustəsnan və çoko ki, navnə iyən peşonə dıqlə ayədə(89-ə ayədə) omə, əvon oroməti iyən əmniyyətədən. həlbəttə, bə zəmon çokon, bevəcon iyən məlayikon qırd əvon bəmardeyn və ilahi irodə mığobilədə muti bəbeyn tain ki, de dıminə kərə suri sədo məsey, bəyji bəbeyn və Xıdovəndi məhzərədə hozzı bəbeyn.

Bə rəvoyəton əsos, bə suri pu kardə mələki nom, İsrafile ki, ilali mığərrəb və nezə mələkonkue.

Çın ayəku umutedəmon:

1-bə Ğıroni əsos, hestemoni aləmi volo bıey və çı qırd osmon iyən zəmini məxloğati mardey, de qıləy dəhşətə sədo bə ico bəbe.

2-osmononədə həm bəyjiyə məxloğon movcude. əvon həm bənə zəmini əhli ğıyoməto məhşur bəbeyn.

3-mardey iqlə bo insoni oməni. bəlkəm, co movcudaton min cumlə məlayikonhəm iruj bəmardeyn.

وَتَرَى الْجِبَالَ تَحْسَبُهَا جَامِدَةً وَهِيَ تَمُرُّ مَرَّ السَّحَابِ صُنْعَ اللَّهِ الَّذِي أَتْقَنَ كُلَّ شَيْءٍ إِنَّهُ خَبِيرٌ بِمَا تَفْعَلُونَ (88)

Və bandon vindedəş və fik kardedəş əvon behərəkətin. qıləy holədə ki, əvon bənə avə hərkətədən. (ım)çı Xıdo(mahironə) koye ki, həmmə koş de dığğəti soxtəşe. əv bəşmə əncom doə çiyon aqahe.

In ayə həm bə xılğəti əcib-ğəribə çiyon işorə kardedə və hamyedə: şımə nəzəku bandı-kuon sabit iyən hərəkət kardedənin. qıləy holədə ki, əvon bənə nam iyən besədo hərəkət kardə avəon hərəkət kardedən. ım çı aləmi pərvərdıqori əzəməti nışonəonkue ki, zəmini ıştə qırdo de surəti qardey, jıqo ğərolış doə ki, bəşər ımi hiss kardedəni və həmmə çiyon sabit iyən behərəkət fik kardedən. joqo ki, tarıxi dırozi məxloğ və hətta alimon qımon kardedəbin ki, zəmin sabit iyən behərəkəte və həşi iyən ovşum zəmini qırdo qardedən.

Çın ayəku umutedəmon:

1-bandon hərəkət çı zəmini hərəkətiku co ni. çən,zəmin həm hərəkət kardedə.

2-Ğıron həzo sor çı Qaliley iyən co alimon bənav zəmini hərəkətiku xəbəş doə və ım ilahi elmi  mecuzəonku qıləyniye.

3-bandon hərəkət bənə avəon hərəkəti vey surətine.de surəti hərəkət kardə zəmini sabit mandey və oroməti, ilahi çoçinə nışonəonkue.

4-Ğıroni nəzəku Xıdovəndi xəlğkardə qırd çiyon, ğoym iyən mohkəme və çəy xılğətədə hiç qıləy noxsan və eyb ni.