938-ə hissə-Əhğafi surə -19-23 şərifə ayəon

938-ə hissə

وَلِکُلٍّ دَرَجَاتٌ مِّمَّا عَمِلُوا  وَلِیُوَفِّیَهُمْ أَعْمَالَهُمْ وَهُمْ لَا یُظْلَمُونَ(19)

Və boçəvon har qıləyni əncom doə çiyon əsos qıləy dərəcəon heste və Xıdovənd çəvon koon cəzo komil bədoe və əvon bə sıtəmi mə`ruz nibəmendeyn.

Vəynə proqramədə bə millətiku dıqlə qrupi işorə kardey be:qıləyni bə volideyni ehsoni əhl iyən bə Xıdo bovə kardə kəson və coqləyni Xıdo munkir və bə volideyni həxon be etıno bıə fərdon.

In ayə hamyedə:Xıdovənd ğıyoməti ruji bə har dıqlə qrupi bəçəvon kardə əməl və rəftoron mıtənosib bəvon cəzo ya mıkofot bədoe və çəvon har qıləyni dərəcə və mərtəbəon bəçəvon niyyət iyən əməlon əsos tafutin bəbe.

Ayə dəvomədə cəzo nizomədə bə İlahi ədoləti işorə kardedə və hamyedə:hakəs ıştə kardə koon nəticə komilə surətədə ğəbul bəkarde və hiçkəsi həxədə qıləy zərrə ğədərədə həm sıtəm nibəbe.çın ayəku omutedəmon:

1-dınyo iyən axırətədə hakəsi tale çəy ıştən dastədəy və ğıyoməti ruji insoni vırə bəçəy niyyət iyən əməlon tabeye.

2- de zəmoni dəvardey insoni kardə koon məhf nibəbe.bəlkəm insoni əməl iyən əsəron əsl,çəy əməlon nomədə ğeyd kardey bəbe və ğıyoməti ruji komilə formədə təcəssım pəydu bəkarde.əv ğıyoməti ruji insoni cəzo iyən səvobi məbno bəbe.

وَیَوْمَ یُعْرَضُ الَّذِینَ کَفَرُوا عَلَى النَّارِ أَذْهَبْتُمْ طَیِّبَاتِکُمْ فِی حَیَاتِکُمُ الدُّنْیَا وَاسْتَمْتَعْتُم بِهَا فَالْیَوْمَ تُجْزَوْنَ عَذَابَ الْهُونِ بِمَا کُنتُمْ تَسْتَکْبِرُونَ فِی الْأَرْضِ بِغَیْرِ الْحَقِّ وَبِمَا کُنتُمْ تَفْسُقُونَ(20)

Və kofiron bə (cəhəndımi)otəşi vığandə bıə ruji(bəvon votey bəbe:)şımə ıştə dınyo jimonədə pokə neməton sərf kardeyone və çəvonku ləzzəton barde(və bo ımrujnə ruji qıləy zəxirə nıkardeyone). çən,ımruj bə zəminədə nohəxə tuğyongərəti xoto və hejo bə əmron nıpemandey səbəbi xoto,(ımruj) de xarəkə əzobi cəzo doey bəbiyon.

İlahi lutf və rəhmət dınyoədə bə həmmə insonon ısət çı mumin bıbu ya kofir,şomil beydə və Xıdovənd maddi iyən dınyəvi neməton bə kofir iyən mışrikon həm doydə.

In ayə hamyedə:dınyoədə kofir iyən qınokoron İlahi neməton iyən ləzzətonku kifoyət ğədərədə bəhrə bardedən və hiççiku məhrum mandedənin.əmmo ğıyoməti ruj ki,cəzo ruje,İlahi hevujə rəhmət fəğət bə pok iyən salehə şəxson şomil bəbe.yəğınən əvon ki,dınyoədə çı həxı mığobilədə mandən və bəştə təkəbbır iyən inodkorəti xoto həxışon ğəbul kardəni,əvoni qıləy saxt və xarəkə əzob çəş kardedə.çın ayəku omutedəmon:

1-İlahi nemətonku dınyodə bəhrə bardey şərt,bə Xıdo imon vardey ni.bəlkəm qıləy rızğe ki,Xıdovənd əy bəştə həmmə məxloğati min cumlə bə insonon həm əto kardedə.

2-yoləşəxəti iyən ıştəni pekırney əmələdə bə fısğo-fucur iyən həxı mədor və orbitiku xaric bıey boyis beydə.

3-ğıyoməti ruji zıllət və xarəti çə kəson cəzoye ki,əvon dınyoədə təkəbbırəti kardedən və çı ğudrət,izzət iyən yolyəti dumon.

وَاذْکُرْ أَخَا عَادٍ إِذْ أَنذَرَ قَوْمَهُ بِالْأَحْقَافِ وَقَدْ خَلَتِ النُّذُرُ مِن بَیْنِ یَدَیْهِ وَمِنْ خَلْفِهِ أَلَّا تَعْبُدُوا إِلَّا اللَّـهَ إِنِّی أَخَافُ عَلَیْکُمْ عَذَابَ یَوْمٍ عَظِیمٍ(21)

Və bıvə Adi(həzrət Hud) ğovmi sərquzəşti bə yod biyə.bə zəmon ki,ıştə ğovmış Əhğafi sərzəminədə çəşnaviş doe.qıləy holədə ki,çəy bənav iyən bəpeşt çəşnavi doə kəson oməbin ki.ğərəz Xıdo pərəstış nıkon.həyğətən,mı boşımə əzobi rujiku tarsım heste.

قَالُوا أَجِئْتَنَا لِتَأْفِکَنَا عَنْ آلِهَتِنَا فَأْتِنَا بِمَا تَعِدُنَا إِن کُنتَ مِنَ الصَّادِقِینَ(22)

voteşone:aya bəçəmə soyəx oməş ta əməni çəmə xıdoonku oqordınoş? çən,əgər rost votedəş bəmə və`də doə çi biyə.

قَالَ إِنَّمَا الْعِلْمُ عِندَ اللَّـهِ وَأُبَلِّغُکُم مَّا أُرْسِلْتُ بِهِ وَلَـکِنِّی أَرَاکُمْ قَوْمًا تَجْهَلُونَ(23)

Hudi voteşe:(bə əzobi bıə elm)fəğət Xıdo nəzdədəy və az deəy vığandə bıə çi bəşmə ibloğ kardedəm(rosneydəm)əmmo şıməni bəştə nodonəti isror kardə ğovm vindedəm.

In ayəon bə həzrəte Hud(ə) iyən bəçəy ğovmi sərquzəşton işorə kardedə və hamyedə:Hud(ə) bə İlahi coqlə peyğombəron bə milləti çəvon şırk,bıtpərəsətəti,yavə iyən bə xoş nıomə koon həxədə xəbərdoərəti doydəbe,əmmo əvon ıştə nodırıstə rəftori barədə fik-fam kardey iyən ıştə pesoxtə bıə xıdoon pərəstış kardeyku dast kəşey əvəzi,ıştə peyğombəriku tələb kardedəbin ki,bəvon və`də doə əzobi hejo bın dınyoədə boəvon nozilko.və holınki,cəzo Xıdo dastədəy və peyğombəron dınyo iyən axırətədə çəy nozil beyədə hiç qıləy rolışon ni.

Liza həzrəte Hud(ə) çəvon cəvobədə hamyeşe:şımə çımıku piyə çi,çımı ixtiyorədə ni və çəy elm Xıdo paluye.az fəğət Xıdovəndi dəsturon rosnə və şıməni bə Vohidə Xıdo dini səmt dəvət kardə məmurim.mı nə  şıməni boştə sıxani ğəbul kardero məcbur kardedəm və nə bə ikəsi cəzo doey zum heste.şımə ım inodkorəti və həxı ğəbul nıkardey rəğ-rişə həm şımə cəholət və nodonətiyədə vindedəm ki,ım həm bəşmə həxı nıdərəsey iyən bəy imon nıvardey boyis beydə.çın ayəonku omutedəmon:

1-peyğombəron çı mışrik iyən fosidə ğovmon vədə iminə vəzifə,bəvon xəbərdorəti doey bıə ta əvon çı xətər və təhlukəku aqah bıbon.

2-torıxi dırozi həmmə peyğombəron hədəf və sərlovhə iqləyni bıə:Vohidə Xıdo pərəstış iyən harcurnə şırk iyən kufriku bə diyəro mandey.

3-ehanə insoni bə ğıyoməti ruji bovəş bıbu,dınyoədə ıştə əməl və rəftoron isloh bəkarde.

4-peyğombəron vəzifə İlahi risoləti ibloğ kardey və rosneye,nəyinki,milləti bo pərəstışiro məcbur kardey.

5-bəştə ğovm iyən ğəbilə bovə və adəton bemənoə təəssıb,insoni cəhli nışonə və bəçəy çı həyğətonku diyəro mandey iyən əy dərk nıkardey boyis bəbe.