953-ə hissə-Fəthi surə -14-16 şərifə ayəon

953-ə hissə

وَ لِلَّهِ مُلْکُ السَّماواتِ وَ الْأَرْضِ یَغْفِرُ لِمَنْ یَشاءُ وَ یُعَذِّبُ مَنْ یَشاءُ وَ کانَ اللَّهُ غَفُوراً رَحِیماً(14)

Osmonon iyən zəmini hukmronəti bə Xıdo məxsuse.hakəsi bıpyişe bəbaxşe iyən harki nıpyişe əzob bəkarde və Xıdovənd Əbaxş iyən Mehribone.

Vəynə proqramədə botınədə kofir,əmmo zohırədə ıştəni bənə mısılmoni nışon doə mınofiğon barədə sıxan votey be.ın ayə hamyedə:həlbəttə Xıdovənd Əbaxş iyən Mehribone və harki tobəko iyən ıştə dəvardə kardə koonku peşmon bıbu,bəçəy əfvi şomil bəbe.əmmo əvon ki,ıştə nodırıstə royədə isror və çı həxı mığobilədə inodkorəti kardedən,həyğətədə ıştənışon İlahi rəhmətiku məhrumışon kardə və bəştə nodırıstə koon cəzo bərəseyn.

In ayə bə Xıdovəndi hestemoni aləmədə bıə hakimiyyəti təkid kardedə ta hiçkəs fik nıko ki,çı Xıdovəndi hukumət iyənb hukmronəti jiyku xaric bıey bəzıne və yə bəçəy irodə əks qıləy ko kardey bəzıne.çın ayəku omuteəmon:

1-İlahi lutf iyən rəhməti bəçəy ğəzəbi qıləy ğələbəş heste.tosə qıləy zəmoni ki,inson deştə kardə koon ıştəni İlahi rəhməti ğəbuliku məhrum nıko,bə Xıdovənri lutfi şomil bəbe.

2-bo insoni hərəbaxtətiro tars iyən umu iyande kəno lozıme.bə həmonə dəlili xoto,İlahi perosney nizomədə insonon bəpe çı xof iyən rəca miyono bıbon ta nə məyus nıbon və həmən məğrur.bəlkəm bə İlahi rəhməti umudəvo bıbon və çəy ğəzəbiku çı xof iyən tarsi dılədə bıbon.

سَیَقُولُ الْمُخَلَّفُونَ إِذَا انْطَلَقْتُمْ إِلى‏ مَغانِمَ لِتَأْخُذُوها ذَرُونا نَتَّبِعْکُمْ یُرِیدُونَ أَنْ یُبَدِّلُوا کَلامَ اللَّهِ قُلْ لَنْ تَتَّبِعُونا کَذلِکُمْ قالَ اللَّهُ مِنْ قَبْلُ فَسَیَقُولُونَ بَلْ تَحْسُدُونَنا بَلْ کانُوا لا یَفْقَهُونَ إِلَّا قَلِیلً(15)

Bə zəmon ki,şımə bo ğəniməton bə dast vardero(bə Xeybəri səmt)rəvonə beydəbiyon,(bə Hudeybiyyə sulhi) zidd beşə kəson bəvoteyn:bıdə əmə(həm) şımə dumo boəmon.çəvon dılışon heste Xıdo kəlomi əvəzkon (ki,Hudeybiyyə sulhi mıxolifonış peşonə ğənimətonku məhrumış karde.bəvon vuji:)şımə hiçvaxti çəmə dumo nibomeyon.Xıdovənd naviku şımə barədə jıqo hamyəşe.çən,əvon rəyrə bəvoteyn:Xıdo bəmə ğədəğən kardəşni,bəlkəm)şımə bəmə nisbətədə pəxıləti kardedon.(ne jıqo ni).bəlkəm çəvonku kamə dastə famedən.

Fırsət tələbə mınofiğon xıslətonku qıləyni ım be ki,əvon xətər və təhlukə zəmonədə  de mıxtəlifə bəhonəon ıştəni bə kəno kəşeydəbin və bə məsuliyyəti ji dəşeydə nıbin.əmmo harco hiss kardedəbin ki, boəvon əyo qıləy mənfəət heste,rəyrə bə səhnə omeydəbin.

Hudeybiyyə sulhiku oqardemoni royədə Xıdovəndi bəştə peyğombəri çı Xeybəri ğalə fəthi mıjdəvoniş doe və bə Hudeybiyyə sulhi əks beşə kəson,çı Xeybəri canqədə iştirokiku məhrum kardedə.əmmo çı mısılmınon bə Xeybəri səmt hərəkəti zəmonədə ım dastə boştə navnə səhlənkoəti cubran kardey iyən əvəzi beşeyro,peyğombəriku tələb kardeşone ki,de mısılmınon bəico bə Xeybəri səmt hərəkətkon ta çəy ğənimətonku qıləy bəhrəşon bıbu.əmmo peyğombər(s) çı Xıdo fərmonış boəvon handeşe və əvonış bın canqədə iştirokiku məhrumış karde.

Odəmi dığğəti cəlb kardə çi ıme ki,ım fırsət tələbə qrup ıştəni mığəssır zıney əvəzi,cokəson taxsırkor zıneydən və votedən:əvon bəştə həsodət iyən pəxıləti xoto,dılışon ni əmə bın cihodədə iştirokkəmon və əvon piyedəşone həmmə ğəniməton boştə peqəton.çın ayəku omutedəmon:

1-Əvon ki,saxti iyən xətəri zəmonədə ıştə iştimoyi vəzifəon tərk kardedən,bəpe çı camiyə rufoh iyən imkonaton i baxşonku məhrum kardey bıbon ta cəmyətədə çı fırsət tələbon ruşdi zəminə hozzı nıbu.

2-həmmə mısılmınon imon iyən bə Xıdo dəsturon pemandey iddio kardedən.əmmo həyğiyə muminon və mınofiğon saxtə şərayitədə iyandeyku zıney beydən.

3-çı mınofiğon mızəmmət iyən behtononku mətarsənən ki,əvon ıştə bə vırə rosnə xilofə koonku  ıştəni bə sofi bekardero,muminon mıttəhəm kardedən.

قُلْ لِلْمُخَلَّفِینَ مِنَ الْأَعْرابِ سَتُدْعَوْنَ إِلى‏ قَوْمٍ أُولِی بَأْسٍ شَدِیدٍ تُقاتِلُونَهُمْ أَوْ یُسْلِمُونَ فَإِنْ تُطِیعُوا یُؤْتِکُمُ اللَّهُ أَجْراً حَسَناً وَ إِنْ تَتَوَلَّوْا کَما تَوَلَّیْتُمْ مِنْ قَبْلُ یُعَذِّبْکُمْ عَذاباً أَلِیماً(16)

Bə xilofkorə Badiyənişinə(ərəbon)vuji:rəyrə şımə de qıləy inodkorə ğovmi(dimbədim)ome səmt dəvət bəbiyon ki,deəvon canqkon ta təslim bıbon.çən,ehanə itoətkon,Xıdovənd qıləy dıjdə mıkofot bəşmə bədoe və əgər inodkorətikon,çoko ki,çımi bənav bə əmri nıpemandiyon,bəşımə de qıləy dardnokə əzobi əzob bədoe.

Vəynə ayə dəvomədə ki,çı mınofiğon Xeybəri canqədə bıə iştirokış rədd karde,ın ayə hamyedə:ehanə həyğətən şımə ıştə dəvardə səhlənkoətiku peşmon bıon,ıştə sədoğəti şıməni çəş kardə saxtə meydonədə nışon bıdənən və Xıdovəndi ım roş boşımə ojış haştə ta şımə dəvardəyonku quzəştko.

Həlbəttə bın canqədə şımə maddiyə ğəniməton çəş məkənən və de ğəniməton kəsb kardey umu,bə canqi meydoni po mənənən.de ın holi əvon həm bənə bə İlahi mıkofoti şomil bıə həxə royədə canq kardə kəson bə İlahi mıkofoti məşmul bəbeyn.əmmo əgər həmonə meydonədə həm əvon bə əmri xilof beşon və bə Xıdo iyən bəçəy Rəsuli(s) əmron nıpemandon,bın zəmon əvoni qıləy saxtə əzob çəş kardedə. çın ayəku omutedəmon:

1-iştimoyi nizomədə oqardemon iyən cubron kardey roy bo ğanuni darıştə kəson oj bınəmon və əvoni dayima baykot məkəmon.

2-hiçvaxti deşmıni zəyif məzınəmon iyən dəvardə ğələbəon ayəndə və vəomə canqonədə bıə zəbarzəti dəlil hisob məkəmon.çıro ki,mumkine deşmın həm ıştəni təchiz iyən ğəviko və səhnədə dəvardə zəmoniku vey zumand hozzı bıbu.

3-çı mısılmınon zu iyən  mıdofiyə ğudrət bəpe qıləy həddədə bıbu ki,deşmın bo təslim bıey iyən bo məğlubiyyəti ğəbul kardey vodor bıbu.

4-cihodədə iştirokiku hədəf,Xıdo iyən çəy Rəsuli fərmoni əncom doeye.nəyinki,kişvəri fəth kardey iyən bə cokəson sultə pəydu kardey.liza həyğiyə mıcohidon Xıdovəndi roziyəti iyən çəy ğəhr və ğəzəbiku bə diyəro mandey fikədən.