972-ə hissə-Zariyati surə -54-60 şərifə ayəon

972-ə hissə

فَتَوَلَّ عَنْهُمْ فَما أَنْتَ بِمَلُومٍ(54)

Çən,çəvonku dim bıqordon ki,tı mızəmmət bıənin niş.

وَ ذَکِّرْ فَإِنَّ الذِّکْرى‏ تَنْفَعُ الْمُؤْمِنِینَ(55)

və dayima təzəkkur(pand)bıdə ki,bo muminon foydənine.

Navnə proqramədə votemone ki,torıxi dırozi çı nıbuvvəti cərəyoni mıxolifon İlahi peyğombəron de coduqərəti ya beməxəti mıttəhəm kardedəbin ta de ın formə çəvon xaruğul-adə koon iyən mecuzəon kamə erjin cilvə bıdon və çəvon de Xıdo bıə irtitboti inkorkon.

In ayəon bə İslomi azizə peyğombəri(s) xitobən hamyedə:tı i hissə insonon hidoyəti koyədə ıştə vəzifə çok-çoki bə vırə rosnə və həni mızəmmət bıənin niş.çən,çın fərdonku dim bıqordon və əvoni bəçəvon ıştən holi vobıdə ki,boçəvon hidoyətiro qıləy umu ni.zira əvon həyğəti zıney iyən ğəbul kardey məğamədə nin.

Həlbəttə bə umum milləti çəşnavi iyən pand doey,çı peyğombəron əsliyə vəzifəonkuye və bo həxı zıney iyən bəy imon vardey dumo bıə kəson,bəpe çı Xıdo-Rəsuli(s) ruşinəkə pand iyən nəsyətonku bəhrə bıbon və çı hidoyəti roy pəydukon.çın ayəonku omutedəmon:

1-peyğombəron vəzifə İlahi peyğomi bə umum məxloği rosneye.əmmo çın koy oxo çəvon ixtiyorədə ni. əvon çı imon nıvardə kəson mığobilədə qıləy məsuliyyətışon ni.

2-bəpe həmmə milləti imon vardey intizorımon nıbu və ıştə zu və imkonaton ziyodə bo əkəson sərfkəmon ki,bəvonədə çı ğəbul kardey umu iyən zəminə mevcud bıbu.

3-pandi ğəbul kardey çı imoni əhli xıslətonkuye və ikəsi jıqo xıslətonış nıbu,bəpe ıştə imonədə şək bıko.

وَ ما خَلَقْتُ الْجِنَّ وَ الْإِنْسَ إِلاَّ لِیَعْبُدُونِ(56)

Və cın iyən inson nıofəyemone illa boəy ki,mıni pərəstışkon.

ما أُرِیدُ مِنْهُمْ مِنْ رِزْقٍ وَ ما أُرِیدُ أَنْ یُطْعِمُونِ(57)

və az çəvonku hiç qıləy ruzim piyedəmni və dılım ni ki,bəmı təam bıdon.

إِنَّ اللَّهَ هُوَ الرَّزَّاقُ ذُو الْقُوَّةِ الْمَتِینُ(58)

həyğətən,Xıdovənde həmonə ruziəroson,zumand,ğoym.

Vəynə ayədə bə imoni əhli təzəkkur iyən pand doey foydənin bıey barədə sıxan votedəbe,ın ayəon hamyedə:vey muhimmə mevzuonku qıləyni ki,dayima bəpe çı insoni dığğəti mərkəzədə ğərol bıqəto,çəy xılğəti hədəfe və insoni çəyku ğafil mandey,bəçəy ıştə sə qim kardey iyən zəloləti boyis bəbe.

Ruşine ki,çı insoni xılğəti qıləy hədəfış bıə və Mutəolə Ğadirə Xıdovənd bəçəy xılğəti qıləy ehtiyociş bıəni. həyğətədə çı insoni xılğətiku hədəf,çəy ruşd,kəmol iyən ozavziye bıə.ın ayəon çı insoni kəmoli məsir iyən roy bəy nışonış doə və Xıdo bandəçəti iyən ibodətış,bo bə insoni kəmoli rəseyero qıləy ro zınəşe.

Həlbəttə çı ibodəti dıqlə cəhətış heste:qıləyni çəy məxsusə mənoədə ki,bənə nımoj,rujə,həcc iyən coqlə ibodi mərosimon bə vırə rosney və coqləyni həm umumi iyən əhotəninə mənoədə ki,çı insoni jimoni həmmə cəhəton dəqəteydə.bın mənoədə ki,inson bəpe çı jimoni həmmə ğərolonədə çı Xıdovəndi roziyəti çərçivədə qəm peqəto və çəy rizoyət nıbə vıronku bə diyəro bımando.

Təbiiye ki,ehanə inson çı jimoni həmmə holonədə Xıdo ıştə nəzədə bıqəto,ıştə dınyəvi be erj iyən exrocə heyvoni tələb iyən təmayulon səthiku bəpe şeydə və bə aləmi ofəyə Xıdo mıtləğə kəmoli vey nez beydə. ım bə Xıdo ğurb iyən nezəti,çı insoni bə dast vardə kəmoli aliyə mərtəbə bıey bəzıne.çın ayəonku omutedəmon:

1-Xıdo bandəçəti çı cın və insi xılğəti hədəfədə və bəy rəsey koyədə mıştərəkin.

2-beşək Xıdovənd bəştə bandəon ibodəti qıləy ehtiyociş ni.bəlkəm əmə insonon deçəy bandəçəti roy ruşd kardedəmon və bə mənəvi kəmolaton dast pəydu kardedəmon.

3-bo rızğo-ruzi kəsb kardeyro səyon çı insoni vəzifəy.eyni holədə bəpe çın nuktəku ğafil məmandəmon ki, çı ruzi məbdə iyən sərçeşmə Xıdoku iyən deçəy dastiye.

فَإِنَّ لِلَّذِینَ ظَلَمُوا ذَنُوباً مِثْلَ ذَنُوبِ أَصْحابِهِمْ فَلا یَسْتَعْجِلُونِ(59)

Çən,bo sıtəm kardə kəson(əzobiku)qıləy səhm heste.həyğətən bənə çəvon duston səhmi.çən,mıku əcələ tələb məkənən(ki,bəy bərəseyn).

فَوَیْلٌ لِلَّذِینَ کَفَرُوا مِنْ یَوْمِهِمُ الَّذِی یُوعَدُونَ(60)

çən,vay bıbu bo əkəson ki,kufrışon karde,çə rujiku ki,(deəy)və`də doey beydən.

In ayəon ki,çı Zariyati mıborəkə surə oxonə ayəy,çın surə mehtəvo iyən məzmunış cəm kardə və hamyedə:bın surədə icmoli surətədə çəvon sərquzəşton omə ğovmon,məələsəf çı İlahi tərəfiku vığandə bıə peyğombəron dəvəti mığobilədə mıxolifət nışon doşone və əvonışon inkor kardeşone.əvon dınyoədə bə İlahi ğəzəbi dıço bin iyən axırətədə həm çəvon çı əzobiku qıləy səhmışon heste.

Peyğombəron mıxolifon dayima çəvonku dəparseydəbin ki,ğıyoməti ruj keynə bərpo bəbe və çunki,İlahi Peyğombəron həm çı rostbemoni rujiku xəbədo nıbin,əve əvon çı ğıyoməti omey rəsey məsələşon bə sıvoli ji bardeşone.liza Ğıron hamyedə:əcələ məkənən və dastpoçə məbənən və peştıpur bıbənən ki,İlahi və`də real bəbe və həmonə ruj bome bərəse.qıləy ruj ki,boşmə vey saxt iyən sanqin bəbe və həni bəruji oqardemoni və fəroli ro mevcud nibəbe.çın ayəonku omutedəmon:

1-Əqər ikəs çı Xıdo bandəçətiku iborət bıə xılğəti hədəfiku ğafil bımando və ıştəni boçəy xoto xəlğ nıbə royədə ğərol bıdo,bə qıləy dıjdə sıtəmi dıço bıə.

2-Xıdovəndi ğəzəb iyən rəhmət bəçəy elm iyən hikməti əsose və çəmə bə həmonə zəmoni omey rəseyro bıə əcələ iyən dastpoçəti bəvədə hiç qıləy təsirış ni.

3-insoni tale iyən sərnıvışt çəy əməlon qirovədəy.əve kufr iyən zılm dınyo iyən axıtrətədə ğərəz İlahi əzobi co qıləy oxoş ni.