Reyhanə-jen xıyzon iyən iştimoədə-2
Reyhanə-jen xıyzon iyən iştimoədə-2
Reyhanə-jen xıyzon iyən iştimoədə
Antik Yunanıstan qıləy təməddun iyən mədəniyyəte ki,Milodiku 500 ya 800 sor bənav mevcud bıə iyən Afinə şəhr həm qıləy kanə şəhronkuye ki, İsa –Məsihi(ə)milodiku 700 sor bənav bıə.ğasbu bəçəy xotoye ki,ziyodə şəxson Antik Yunanıstani çı demokratiyə təsisəkə zıneydən və fəlsəfə həm əyo bə əməl omə. əmmo jenon və çəvon həxon çın kanə sivilzasiyə hay-huy miyono qim bıəbe.
Antik Yunanıstanədə jen qıləy mırdol iyən şəytoniku bə əməl omə məxloğ hisob kardedəbin iyən Afinəvıjon əvoni bə jimoni baxşon mıdoxiləku oqəteydəbin və boəvon yeqanə ko fəğət kədə ko kardey iyən bə merdon və fərzəndon xıdmət rosney nəzədə qətəşon be.bə Yunani ğanunon əsos jen çı kəyku xaric bıey icozəşon nıbe və çəvon jimon bənə siron jimoni mandəbe.çun merdon əksər vaxtonədə ıştə vaxti kəyku xaricədə dəvordıneydəbin,jenon ehdədə həm çı kəy ko iyən fərzəndon tərbiyə kardey be.
Afinəvıjon jenon bənə qıləy əmtəə iyən məhsuli vıjoronədə həvateydəbin iyən qıləy ğeymət ki,boçəvon həvateyro nəzədə qəteydəbin,vey kam və be erj be.həmçinin jen jıqo be erj iyən exroc be ki,bənə mılk-əmvoli çəyku irs bardedəbin iyən de vəsiyyəti bə coqlə şəxsi intiğol beydəbe və ovaşteydəbe......
Afinə camiyədə jenon qıləy kamə nufuzışon hestebe və çı inə bıey bənav jəqo həm bəvon qıləy dığğət kardedə nıbin.çən,jen fərzəndi bə dınyo vardey bədiqə əy çəy şuyə palu vardedəbin və ehanə həmonə merd hırdəni ğəbul kardeyədə həmonə hırdən bəyji mandedəbe.əmmo jıqo nıbə holədə çə həmonə hırdəni tale ğərəz maqi co çi nıbe.ın məsələ Spartada vey ciddi be və bəpe çı hırdənon şura həmonə əğıl bə dınyo omey bədiqə qıləy test dəvordınon və ğeymət ənon ki,aya ım hırdən bo sərbozətiro qıləy şucoət və ğudrətış bəbe ya ne və ya ım qıləy foydəninə jen bəbe ya ne?.
Bə torıxi sənədon əsos Afinədə har qıləy merd çanədə dılışon piyedəbe jen sıey əzıni.təloğ sıey həm bo jenon ziyodə həddədə çı merdi nəzə və fikiku bə şıkrə be.əgər merd ıştə jimoni həmroku norozi bebu və ya se har qıləy dəlili çəy təloğış piyedəbebu,bə həmonə jeni çı şoydon çəşi vədə təloğ doydəbin və ya sırfən əy çəy xıyzoni palu vığandedəbin və çı jeni cehizon həm oqordıney beydəbe.həyğətədə jen de təloği ıştə fərzəndon barədə bıə qırd həxon çı dasto doydəbin və çı təloği bədiqə fərzənd ya fərzəndon bə dədə aspardey beydəbin.çımisə əlovə ehanə co bıey tələb kardeydə bebu,noçor be ki,bəpe çı yananon siyosi ğərol bekardə Arxunonku qıləyni nəzə cəlb kardənin be ta əv bo jeni təloğiro roziyəti bıdo......
