981-ə hissə-Nəcmi surə -43-62 şərifə ayəon

 

981-ə hissə

 

وَأَنَّهُ هُوَ أَضْحَکَ وَأَبْکَى(43)

Və əve ki,sırvoneydə iyən bovneydə.

وَأَنَّهُ هُوَ أَمَاتَ وَأَحْیَا(44)

və əve ki,kışteydə iyən bəyji kardeydə.

وَأَنَّهُ خَلَقَ الزَّوْجَیْنِ الذَّکَرَ وَالْأُنْثَى(45)

və əve ki,dıqlə zevc niyə iyən moəş ofəye.

مِنْ نُطْفَةٍ إِذَا تُمْنَى(46)

nutfəonku qıləy zəmon ki(bətnədə) rubeydə.

وَأَنَّ عَلَیْهِ النَّشْأَةَ الْأُخْرَى(47)

və coqlə (dınyo) bə vucud vardey bəçəy ehdəy.

وَأَنَّهُ هُوَ أَغْنَى وَأَقْنَى(48)

və əve ki,be ehtiyoc kardedə iyən sərmoyə baxşeydə.

وَأَنَّهُ هُوَ رَبُّ الشِّعْرَى(49)

və əve ki,(i qrupi pərəstış kardə)Şi`ri astovə pərvərdıqore.

 

Navnə proqramədə bə Xıdovəndi bə dınyo bıə hakimiyyət iyən rububiyyəti işorə kardedəbe ki,həmmə koon bə pərvərdıqori səmt oqardedə.ın ayəon çə həmonə koon nımunəon bəyon kardedə və hamyedə: şımə insonon iyən həmmə məxloğati həyot iyən maq,de Xıdovəndi dastiye.şımə deştə irodə bə ın dınyo oməniyon iyən hejo Əv şıməni çın dınyoku bəbarde.

İnsonon de coqlə coninə məxloğaton mığoyisədə bıə barizə xıslətonku qıləyni,çəvon sırey iyən bəmey xısləte ki,Xıdovəndi tərəfiku çı insonon daxilədə noey bıə ta ıştə hiss iyən emosiyəon buruzkon və qıləy fəol iyən çokə əhvol-ruhiyyəşon bıə qıləy jimonışon bıbu.

Əve ki,boşmə iyən bo coqlə mevcudoton nəsli baği mandero,kali qıləyni niyə iyən coqləyni moəş ofəyə. Reproduktiv sistem iyən hırdən bə dınyo vardey nizom,Əy çəvon miyono ğərolış doe və qıləy noçizə nutfəku qıləy kırtə mıddətədə qıləy tam iyən komilə nuyəzand bə vucud vardedə.

Əve ki,çın dınyo bədiqə co qılə dınyoş ğərol doə ta bızınon ki,iyo ıştə kom əməli bıkaşton,ğıyoməti ruji cəm bəkardeyn iyən har qıləy əməli ıştən qıləy əksul-əməl və reaksiyəş heste.Əve ki,de reproduktiv sistemi iyən ticorəti roy vositə,bəşmə mol iyən sərvət baxşeydə və şımə jimoni iyən məyişşəti ehtiyocon bərtərəf kardedə.

Nəyinki,zəmin iyən çəy əhl,bəlkəm osmon iyən çəy həmmə astovəon ki,ısət çəvon kali qıləyni nomi zıneydon ya bəzi qıləyniyon həm zıneydəniyon,əvoni ofəyə pərvərdıqor Xıdovənde.çən,bə kom dəlili əsos şımə bə cokəson soyəx şeydon iyən əvoni Xıdo şərik ğərol doydon və çəvon mığobilədə tə`zim kardedon?. çın ayəonku omutedəmon:

1-həmmə xeyri məbdə iyən mənşə,Xıdovəndikuye.harçənd zohirədə de iyande təzad həm bıbu və əmə çəvon qıləyni xeyr bızınəmon və coqləyni şər.bənə jimon iyən maqi və ya bənə sırey iyən bəmey.

2-zevciyyəti nizom çəvon baği mandey amil bıə mevcudoton miyono,çın aləmi əcib və heyrətamizə çiyonkuye və çı Xıdovəndi bın dınyo idorədə bıə tədbir iyən hikməti nışonəy.

3-mol iyən sərvəti ıştəku məzınəmon.zira çı bəşəri istehsolon həm məbdə,qıləy maddəonin ki,Xıdovəndi ofəyəşe və qıləy ağl iyən şuure ki,Əy bə insoni ətoş kardə.

 

وَأَنَّهُ أَهْلَکَ عَادًا الْأُولَى(50)

Və Əve ki,navnə Adi nəslış nobud kardeşe.

وَثَمُودَ فَمَا أَبْقَى(51)

və Səmudış,çən(çəvonku i nəfərış həm)baği nıhaşteşe.

وَقَوْمَ نُوحٍ مِنْ قَبْلُ إِنَّهُمْ کَانُوا هُمْ أَظْلَمَ وَأَطْغَى(52)

və çəvon bənav Nuhi ğovmış ki,vey sıtəmokor iyən vey tuğyongər bin

وَالْمُؤْتَفِکَةَ أَهْوَى(53)

və (Luti ğovmi)şəhron pevuşkıneyşe və eşe.

فَغَشَّاهَا مَا غَشَّى(54)

çən,həmonə şəhron çoko ki,lozıme puşniyeşe.

فَبِأَیِّ آلَاءِ رَبِّکَ تَتَمَارَى(55)

çən,(ha inson ha!) ıştə pərvərdıqori kom qılə nemətonədə şəkk kardedəş?.

 

Vəynə ayəon dəvomədə ki,çı Xıdovəndi bə dınyo iyən insoni bıə hakimiyyəti həxədə be,ın ayəon həmonə bəhsi dəvomədə hamyedə:çıro kofir iyən zolımon çı dəvardə ğovmonku ibrət qəteydənin?.bəqəm əvon zıneydənin ki,kali dıjdə sivilizasiyəon bəştə kardə zılm,qıno iyən tuğyoni xoto nobud və məhf bin iyən çəvonku hiç qıləy əsər-əlomət mandəni?.

Bənə Ad iyən Səmudi və həmçinin Luti ğovmon çı İlahi peyğombəron əvoni bə tohid iyən dırıstkoəti səmt bıə dəvəti mığobilədə,tuğyonqərəti iyən hışkəqiyəti kardeşone.liza həmonə bın dınyoədə İlahi əzobi jıqo əvonış dəqəte ki,çəvonku ğərəz pok iyən imoninə kamə dastə əvon həmmə bə həlokəti rəsin.

Im qıləy həyğəte ki,kofir iyən zolımə fərdonku i dastə nunkuyəti kardeşone iyən çı İlahi maddi iyən mənəvi nemətonışon çı viro bekardeşone.ım qrup insonon jıqo bə tuğyonqərəti iyən sıtəmkorəti dast jeydən ki,ıştə kardə koon cəzo ki,bəpe təbiiyi formədə axırətədə ğəbulkon,hejo bın dınyoədə həm bəvon nozil bəbe.çın ayəonku omutedəmon:

1-de dəvardəyon torıxi mıtoliyə kardey,çəvon yavə ağıbətiku ibrət peqətəmon iyən çı tuğyonqərəti iyən hışkəqiyəti roy məqətəmon.

2-İlahi cəzoon fəğət bə ğıyoməti ruji məxsus ni.bəzi vıronədə zolımon həmınə bın dınyoədə həm bəştə bədə əməlon cəzo rəseydən.

3-bə milləti zılm iyən sıtəm və Xıdovəndi vədə tuğyonqərəti,çı navnə etnoson həlokəti amil bıə.

 

هَذَا نَذِیرٌ مِنَ النُّذُرِ الْأُولَى(56)

In(peyğombər) çı navnə çəşnavi doə kəsonku qıləy çəşnavi doəkəse.

أَزِفَتِ الْآزِفَةُ(57)

rostbemon nez be.

لَیْسَ لَهَا مِنْ دُونِ اللَّهِ کَاشِفَةٌ(58)

ğərəz Xıdovəndi ikəs həmonə ruji(şiddəti) bərtərəfəkə ni.

أَفَمِنْ هَذَا الْحَدِیثِ تَعْجَبُونَ(59)

çən,aya ım sıxaniku təəccəb kardedon?

وَتَضْحَکُونَ وَلَا تَبْکُونَ(60)

və sıreydon iyən bəmeydəniyon?

وَأَنْتُمْ سَامِدُونَ(61)

qıləy holədə ki,şımə ğafil iyən həvəsboziyon.

فَاسْجُدُوا لِلَّهِ وَاعْبُدُوا(62)

çən,fəğət bə Xıdo səjdəkənən iyən (Əy) pərəstışkənən.

 

In ayəon ki,çı Nəcmi mıborəkə surə oxonə ayəy,bə məğrurəti iyən ğəfləti dıço bıə insonon xitobən hamyedə:çokonəye ki,çı ğıyomət iyən ıştə kardə koon mığobilədə cəvob doey barədə bə İlahi peyğombəron çəşnaviyon be etinoəti kardeyone iyən şımə əvın çı zehniku bə diyəro bıə qıləy ko hisob kardeyone?.qıləy holədə ki,maq neze iyən çəy bədiqə ğıyoməti ruji bome.

Dınyo jıqo şıməş deştə məşğul kardəşe ki,şımə həni çı axırətiku ğafil mandəyon.şımə boştə holi bəmey əvəzi,məstonə şikilədə sıreydon və xoş holiyon.şımə de imoni əhli bovəon zərfət iyən bəy məsxərə kardedon və şımə bəvon qıləy təhğıramizə nəzəon heste.

Çın surə oxonə ayə insoni çı ğəflət iyən məğrurətiku nicoti roy,çı Xıdovəndi mığobilədə xuzu iyən xuşu və bəy harcurnə tuğyonqərəti iyən şırkiku bə diyəro mandeye.çın ayəonku omutedəmon:

1-əmə ğıyoməti ruji diyəro məzınəmon.

2-ehanə əmə ıştə xilosi fikədəmonbu,bəpe ısətiku dınyoədə çəy səbəbon hozzıkəmon.çıro ki,axırətədə bo ozodəti iyən nicotiro qıləy ro mevcud ni.

3-bəmey fəğət bo dınyəvi koon xoto ni.Xıdo ovliyaon boştə ğıyoməti ruji bıə əhvoliro bəmeydən və İlahi məğfırəti tələb kardedən.

4-Xıdovəndi vədə səjdə kardey ki,çı nımoji har qıləy rıxətədə dı kərə əncom doey beydə,insoni çı ğurur, ğəflət iyən məstətiku mıolicə kardə roonkuye.