982-ə hissə-Ğəməri surə -1-8 şərifə ayəon

982-ə hissə

Vəynə proqramədə de Nəcmi mıborəkə surə bə oxo rəsey,ımruj əmə çe Ğəməri mıborəkə surə hoston iyən rəvonə ayəon təfsiri bino kardedəmon.ın surə həm Məkkədə enovney bıə iyən bə mışrikon iyən mıxolifon tars iyən çəşnavi doə məğamədən.

İlahi məlayikon dəvəti mığobilədə çı dəvardə ğovmon yavə sərnıvışt ki,bəştə inodkorəti xoto tuğyonqərəti kardedəbin,bəyon kardey boçəy xotoye ki,mışrikon de İslomi peyğombəri(s)mıxolifət kardey koyku dast bıkəşon və çı həxı vədə təslim bıbon.

İbtido deşmə bə ico bə Ğəməri mıborəkə surə i,dı iyən seminə şərifə ayəon tilovəti quş doydəmon:

بِسْمِ اللَّـهِ الرَّحْمَـنِ الرَّحِیمِ

 Bismillahir-Rəhmanir-Rəhim.

اقْتَرَبَتِ السَّاعَةُ وَانْشَقَّ الْقَمَرُ(1)

Ğıyomət nez be iyən Ovşım iyandeyku poə be.

وَإِنْ یَرَوْا آیَةً یُعْرِضُوا وَیَقُولُوا سِحْرٌ مُسْتَمِرٌّ(2)

və ehanə(kofiron) qıləy mecuzə bıvindon,dim qordıneydən və votedən:ım dumo yande iyən dayimi bıə qıləy coduye.

وَکَذَّبُوا وَاتَّبَعُوا أَهْوَاءَهُمْ وَکُلُّ أَمْرٍ مُسْتَقِرٌّ(3)

və(tı iyən Ğıroni) təkzib kardeşone və bəştə həvaye-həvəson tabe bin.qıləy holədə ki,har qıləy ko (oxoyədə ıştə vırədə) ğərol bəqəte(və ıştı həxəti oşko bəbe).

Ğəməri mıborəkə surə sıftənə ayəon bə İslomi azizə peyğombəri(s) dıjdə mecuzəonku qıləyni işorə kardedə.Məkkə mışrikon bo peyğombəri(s) dəvəti ğəbuliku fərol kardero,çə həzrətiku qıləy çi tələb kardeşone və fik kardedəbin ki,peyğombər(s) hiçvaxti çəy ehdəku omey əzıni.əvon bə Xıdo-Rəsuli(s) voteşone ki,ehanə tı rost voteydəş və çı Xıdo peyğombərişbu,ovşımi dı poəkə.əvon bın bovədə bin ki, zəmini koonədə sehr iyən codu qıləy təsirış heste,əmmo osmononədə qıləy təsirış ni və əgər ovşım poə bıbu,ruşin bəbe ki,çı Muhəmmədi(s) ko sehr ni.

İyo be ki,peyğombər(s) çı pərvərdıqori dərqoyku təğazo iyən tələbış karde ki,çəvon tələb kardə çi bəy bıdo.de Xıdovəndi izni qıləy şəvədə ki,çı ovşımi hilol komil be,de peyğombər(s) işorə poə be və Məkkə mışrikon ın macəra deştə çəşon vindey bədiqə,həmonə ovşım ijən bəştə iminə holəti oqarde.

Demiyən çı peyğombəriku(s)jıqo qıləy ko çəş nıkardə mıxolifon,əvışon inev sehr iyən codu zıneşone və voteşone ki,həyğətədə ovşım dı poə bıə nıbe,bəlkəm tı bənə sehrbozon jıqo çəmə çəşon təsərrıfı karde ki,əmə qımon kardemone ovşım dı poə bıə.

Bə mışrikon iddio əks,ım hodisə həyğətən bə əməl ome.çoko ki,çı Şam iyən Yəməni kərvonon mısofiron ıştə məsir iyən royədə ım heyrətamizə hodisəşon vində və hətto çı Hindıstoni sərzəmini milləti həm çı ovşımi poə bıeyışon mışohidə kardəşone.

Kərimə-Ğıron hamyedə:çın təkzibi rəğ-rişəon həvaye-həvəsone ki,icozə doydəni əvon çı həxı mığobilədə təslim bıbon iyən çəvon dılışon heste hejo bəştə meylon mıtobiğ rəftorkon.əmmo nəhoyətən həyğət oşko bəbe iyən kufr və şırk həm ğərəz suğut iyən həlokəti co qıləy ağıbətış nibəbe.çın ayəonku omutedəmon:

1-ğıyoməti hodisə nez iyən hətmiye və bə ğıyomət iyən çəy hisob və sıvoliku ğafil bıə kəson ım qıləy ciddiyə çəşnaviye.oxonə peyğombəri besət həm çə nışonəonku qıləyniye ki,bə dınyo oxo nez bıey dəlolət kardedə.

2-İslomi azizə peyğombəri(s) əbədiyə mecuzə bıə ğərəz Ğıroni,çə həzrəti coqlə mecuzəonış həm bıə ki, ovşımi dı poə bıey həm çəvon muhimmə qıləyni bıə.

3-inodkorə fərdon ki,deştə çəşon mecuzəon vindedən,əy sehr və codu hisob kardedən və Xıdovənd iyən peyğombəri bə həşə jeydən.

4-bəştə nəfsoni meylon pemandey,çı mıxolifon bo peyğombəron həxəti ğəbul nıkardero həmməysə muhimmə dəlilonkuye.

وَلَقَدْ جَاءَهُمْ مِنَ الْأَنْبَاءِ مَا فِیهِ مُزْدَجَرٌ(4)

Və beşək bə(kufriku)oqətey boyis bıə(dəvardəyon)muhimmə xəbonku boəvon ome.

حِکْمَةٌ بَالِغَةٌ فَمَا تُغْنِ النُّذُرُ(5)

(deməkə ki,ın xəbon) qıləy dərk kardə bıə hikmət be,əmmo(bo inodkorə fərdon)qıləy foydəş nıbe.

Navnə ayəon dəvomədə ın ayəon hamyedə:de Xıdo-Rəsuli(s)fərmonon mıxolifət kardə fərdon ım ko bəçəvon noaqahəti xoto ni.əvon çı dəvardə ğovmon sərnıvıştiku qıləy məlumotışon hestebe ki,çokonə əvon bəştə tuğyonqərəti iyən bə Xıdo əmron nıpemandey dəlili xoto,bə həlokət rəsin.əvon çı dəvardə dinon tərəfdoronku məsəşon be ki,çı maqi bədiqə ğıyomət bərpo bəbe və vəhışt iyən cəhəndım həm mevcude.əmmo ijən əvon ıştə kardə yavə koonku dast kəşeydənin.

Beşək çı Xıdo iyən çəy Rəsuli(s) tərəfiku omə çiyon bəpe bə vırə rosney bıbu,huccəti təmom kardeye ki, həx iyən həkimonə sıxanon bə milləti quşi bırəso.harçənd,çı insnonku veyni bə ın çəşnasvi dığğət kardedənin iyən boçəvon holi qıləy foydəş həm ni.çın ayəonku omutedəmon:

1-dəvardəyon torıxi mıtoliyə kardey,insoni çı dəvardə ğovmon təməddun iyən sivilizasiyə məhfəti amilon zıneyədə komək kardedə və əy çı kufr,qıno iyən tuğyoniku oqəteydə.

2-Ğıroni peyğomon bə hikmət iyən məntıği əsose və de umum milləti ağl iyən dərki famey iyən ğəbul kardey mumkine.

3-peyğombəron bəştə vəzifəon əməlışon kardə və de həxə sıxanon rosney huccətışon bə bəşəri təmom kardəşone.əmmo əvon hiç kəsışon məcbur kardəşon ni iyən millət bəpe deştə ixtiyori həxı ğəbulkon.

فَتَوَلَّ عَنْهُمْ یَوْمَ یَدْعُ الدَّاعِ إِلَى شَیْءٍ نُکُرٍ(6)

Çən,çəvonku dim bıqordon.(və çəşkə) qıləy ruji ki,əy dəvətəkə(əvoni) bə qıləy noməlum iyən hovlnokə çi səmt vanq jeydə.

خُشَّعًا أَبْصَارُهُمْ یَخْرُجُونَ مِنَ الْأَجْدَاثِ کَأَنَّهُمْ جَرَادٌ مُنْتَشِرٌ(7)

əvon qıləy holədə ki,çəvon çəşon(bə tars iyən vəhşəti xoto)saru eqıniyə,bənə pərokəndə vaştənə ğəbonku xaric bəbeyn.

مُهْطِعِینَ إِلَى الدَّاعِ یَقُولُ الْکَافِرُونَ هَذَا یَوْمٌ عَسِرٌ(8)

de surəti bə dəvətəkə səmt dastpoçən.kofiron bəvoteyn:ım qıləy vey saxtə ruje.

Kofir iyən munkiron inodkorəti ovci bəyoni bəpeştə,ın ayə bə Peyğombəre-Əkrəmi(s) xitobən hamyedə : ımoni bəçəvon ıştən holi vobıdə və bə kəson soyəx bışi ki,bo həxə sıxanon ğəbul kardero hozzon.ın fərdon bə zəmon oğo bəbeyn ki,ğıyoməti ruji deştə çəşon bıvindon.bə zəmon ki,de İlahi fərmoni bımyon qılə-qıləyni zəminiku xaric bəbeyn və bəruji tars iyən vohimə xoto,əvon bın tərəf-bə tərəf bəviteyn.

Ğıyoməti ruji vəzyət iyən əhvol bo ın fərdon noməlume və əvon çı har qıləy sədo iyən vanqi dumo bəviteyn ta qıləy xəbə pəydukon və bə qıləy oroməti bırəson.əmmo çanədə bənav bışon,çəvon vəhşət ziyod bəbe və dəbərəseyn ki,ım həmonə ruje ki,dınyodə bəvon votey beydəbe,əmmo əvon ımi inkor kardedəbin.çın ayəonku omutedəmon:

1-bə mıxolifon huccəti təmom kardey bədiqə,qahi zəmon bəpe əvoni bəçəvon ıştən holi vodoy lozıme ta qımon nıkon ki,çəmə bəçəvon imon vardey qıləy ehtiyocimon heste və əmə çəvonku xahiş bəkardemon ki,imon biyon.

2-ğıyoməti ruji səhnəon bo kofir iyən bədkoron saxt,dəhşətin iyən çəş nıkardə holədə bəbe.joqo ki,əslən intizorışon nıbe de jıqo qıləy səhndə dimbədim bomeyn

3-miod qıləy cismoni koye və insonon çı zəmini dıləku xaric bəbeyn.nəyinki,fəğət çəvon ruf ğıyoməti ruji məhşur bəbe.