984-ə hissə-Ğəməri surə -23-32 şərifə ayəon

984-ə hissə

کَذَّبَتْ ثَمُودُ بِالنُّذُرِ(23)

Səmudi ğovm çəşnavi doəkəson təkzib kardeşone.

فَقَالُوا أَبَشَرًا مِنَّا وَاحِدًا نَتَّبِعُهُ إِنَّا إِذًا لَفِی ضَلَالٍ وَسُعُرٍ(24)

çən,voteşone:aya əmə bəçəmə neviku bıə vohidə bəşəri tabe bıbəmon?bın surətədə əmə zəlolət iyən cındoətiyədə bəbemon.

أَأُلْقِیَ الذِّکْرُ عَلَیْهِ مِنْ بَیْنِنَا بَلْ هُوَ کَذَّابٌ أَشِرٌ(25)

aya çəmə miyono fəğət bəy vəhy nozil beydə?bəlkəm əv duyəvoj iyən xudxahe.

سَیَعْلَمُونَ غَدًا مَنِ الْکَذَّابُ الْأَشِرُ(26)

(əvon)vəomədə bəzıneyn ki,duyəvoj iyən xudxah kiye?

Navnə bərnoməonədə bə Nuhi iyən Adi ğovmi sərquzəşton işorə kardedəbe,bın ayəonədə bə Səmudi ğovmi tale və sərnıvışti işorə kardedə.ım ğovm çı Cəzirətul-Ərəbi şimolədə jiyedəbin və çəvon peyğombər həzrəte Saleh(ə)be.əvon bəştə məğrurəti iyən yoləşəxəti xoto,bə Xıdovəndi vığandə həmonə peyğombəri dığğət nıkardeşone və bəştə kardə yavə koon dəvom doydəbin.

Əvon nəyinki,boçəy dəvəti ğəbul kardero hozzı nıbin,bəlkəm əvışon qıləy səfi iyən ıştə roy qim kardə kəsışon zıne ki,bəy tabe bıey bəçəvon zəloləti iyən cındoəti boyis bəbe.həlbəttə çəvon bo de həzrəte Salehi(ə) mıxolifət kardero bıə bəhonəonku coqləyni həm ım be ki,votedəbin:çokonə qıləy fərd ki,bənə əməy,çəmə miyono addiyə formədə jimon kardedə və çəy hiç qıləy ğudrət,sərvət iyən cəmyətış ni,çın dıjdə iddiyoku bəhs kardedə ki,boçəmə hidoyətiro çı Xıdovəndi tərəfiku məmur bıə?.çın ayəonku omutedəmon:

1-peyğombəron imtiyozonku qıləyni ımbe ki,əvon çı addiyə milləti miyono beşən və çəvon qıləy sodə jimonış bıə ta bo milləti ulqu bıbon.

2-qahi zəmon insonon jıqo suğut kardedə ki,bənə peyğombəron dırıstko iyən pokə şəxson itoət kardey ğəbul kardedənin.qıləy holədə ki,həmonə fərdon ya çı tağuton sultə jiyədə jiyən və ya qıləy beconə cismonışon pərəstış kardə.

3-bə peyğombəron duyəvıjəti iyən narsisizmi ittihom jıey,çı mıxolifon taktikəonku bıə.qıləy holədə ki, əvon ıştən duyəvıjonin.

إِنَّا مُرْسِلُو النَّاقَةِ فِتْنَةً لَهُمْ فَارْتَقِبْهُمْ وَاصْطَبِرْ(27)

Əmə boçəvon imtihoniro həmonə moə şatur vığandemone.çən,çəvon koy(oxoyku)mığət bıbi iyən səbrkə.

وَنَبِّئْهُمْ أَنَّ الْمَاءَ قِسْمَةٌ بَیْنَهُمْ کُلُّ شِرْبٍ مُحْتَضَرٌ(28)

və bəvon xəbə bıdə ki,ov çəvon de şaturi miyono təğsım bıə.har qıləyni ıştə nevbəti zəmonədə ovi piyo hozzı bıbu.

فَنَادَوْا صَاحِبَهُمْ فَتَعَاطَى فَعَقَرَ(29)

çən,əvon ıştə rəfoğışon vanq je.çən,əv həm şaturış bırniye.

Ruşine ki,hakəs peyğombərəti iddiyoş karde,əy ğəbul kardey nibəbe iyən bəpe qıləy mecuzə nışon bıdo ki,ım həm çəy iddiyo rostəvıjəti iyən dırıstəti əloməte.de Xıdovəndi irodə qıləy dıjdə cussənin iyən çı coqlə şaturonku tafutin bıə şatur çı bandı-ku dıləku zohir be.həmonə şaturi ovi mizon iyən mığdor jıqo ciddi be ki,bəpe ovi çı milləti de həmonə heyvoni miyono təğsım kardənin bin.

Həlbəttə ım qıləy İlahi imtovon be.millət bəpe bə ovi səhmiyyə iyən baxş kardey koy rioyət kardənin bin və ıştə nevbədə çı ovi piyo hozzı bıənin bin.

Səmudi ğovmi yolon ki,ım mecuzəon inkor kardey zıneydə nıbin,bə ğərol omin ki,ə şaturi bıkışton və qıləy fərdışon bo ın ko məmur kardeşone.həzrəte Salehi(ə) bəvon çəşnavi doşe ki,mecuzə mışohidə bəpeştə əy inkor kardey,bə əzobi nozil bıey boyis bəbe.əmmo əvon bə həzrəte Salehi(ə) çəşnaviyon dığğət nıkardeşone və həmonə şaturışon kışte.çın ayəonku omutedəmon:

1-İlahi mecuzəon bo milləti imtovon karderoye ta məlum bıbu ki,kom kəs çı həyğəti iyən çəy ğəbul kardey dumon və kom kəson bəştə inodkorəti xoto,de həxı mıborizə bardedən.

2-çanədə ki,huccət bə milləti təmom bıəni,Xıdovənd bə ikəsi cəzo nibədoe və əzobi nozil nibəkarde.

3-peyğombəron mıxolifon bo bəştə mırdol iyən məşumə hədəfon rəseyro,çı şər iyən xunrukardə fərdonku oko doydən.

فَکَیْفَ کَانَ عَذَابِی وَنُذُرِ(30)

Çən,əzob iyən çəşnavi çokonə be?

إِنَّا أَرْسَلْنَا عَلَیْهِمْ صَیْحَةً وَاحِدَةً فَکَانُوا کَهَشِیمِ الْمُحْتَظِرِ(31)

əmə fəğət iqlə səyhə(mardəvardə zikkə) çəvon piyo vığandemone. çən,əvon bənə hışk iyən hırdə bıə rəsəy bin ki,(moləvonon) bə molə təvilə ekardedən.

وَلَقَدْ یَسَّرْنَا الْقُرْآنَ لِلذِّکْرِ فَهَلْ مِنْ مُدَّکِرٍ(32)

və bərosti əmə Ğıron bo pandiro hoston iyən (dərk kardənin)kardemone.çən,aya qıləy pand ğəbuləkə heste?

Bo həzrəte Salehi(ə) çı Xıdovəndi tərəfiku bıey rostəvıjəti isbotiro omə şaturi kıştey bəpeştə,İlahi ğəzəb çı sayiğə iyən avəğurrə şikil və ğəlibədə nozil be ki,həmonə səmavi avaçəkə Səmudi məntəğə sakinonış ıştə vırədə hışk iyən behərəkətıış karde.

Səmudi ğovmi sərnıvışti oxoyədə Xıdovənde-Xalığ ijən zikr kardedə ki,Ğıroni nozil kardeyku hədəf,pand iyən nəsyəte ta inson ıştə vədə bıə xətəron bızıno,ıştəni çəvonku xilosko və dınyo iyən axırətədə bə İlahi ğəhri dıço nıbu.çın ayəonku omutedəmon:

1-deməkə ki,şaturi kıştəkəs ikəs be,əmmo çun umum millət bəçəy kardə koy rozi bin,Ğıron  ım koş bəçəvon həmməş nisbət doə.liza əvon həmmə bə əzobi şomil bin.

2-İlahi irodə vədə hiçkəsi mandey ğudrətış ni.Səmud ğovmi zumandə fərdon bənə arşiyə iyən hışk bıə xıçon və xolon bəsə zəminisə rubin.

3-Ğıron torıxi kitob ni,əmmo dəvardə ğovmon kali qıləyni torıxi dırıst iyən bə həyğəti əsos bəyon kardedə ta bə həmmə kəson ibrəti səbəb bıbu.