721-ə hissə-Ənkəbuti surə-27-30 şərifə ayəon

721-ə hissə

وَوَهَبْنَا لَهُ إِسْحَاقَ وَيَعْقُوبَ وَجَعَلْنَا فِي ذُرِّيَّتِهِ النُّبُوَّةَ وَالْكِتَابَ وَآتَيْنَاهُ أَجْرَهُ فِي الدُّنْيَا وَإِنَّهُ فِي الْآخِرَةِ لَمِنَ الصَّالِحِينَ (27) 

Və İshoğ iyən Yəğubımon bəy(İbreymi) əto kardemone və çəy fərzəndon miyono peyğombər və kitob ğərol domone və çəy mıkofot dınyoədə bəy əto kardemone. və hukmən əv axırətədə çı ləyoğətinə(şəxsonkue).

Vəynə ayəonədə çı həzrəte İbreym(ə)-i sərquzəşton icmoli surətədə bəyon be. ın ayə çə ayəon dəvomədə hamyedə: İbreym(ə) cokəson bə rostə roy tərəf hidoyət kardey xoto, ıştə sərzəminiku hicrət kardey bədiqə, Xıdovəndi bəy yolə nemətonış əto karde. çəy ləyoğətin iyən  pokə xıyzon iyən fərzəndon çəy qətə royışon dəvom doevə de ilahi lutfi bə nıbuvvəti məğam rəsin və ıştə ğovmi miyono imoni nurışon ruşin karde. bənə İshoğ iyən çəy fərzənd Yəğub və Yəğubi zoə Yusif-həmçinin Mos və Harun və Suleymon, ımon həmmə çı İbreymi nəsliku bin və ilahi risolətışon bəştə duş peqətəşonbe.

Qırd ım neməton həm dınyəvi iyən həmən uxrəviye. həm çokə nomışon bə dumo noe və həmən ilahi mıkofot. zira pokə fərzənd bə pı-mo çəvon zəmonədə fəxri boyis bedə, həmən çəvon mardey bədiqə əvoni de çokə nomi zikr kardedən.

Çınayəku umutedəmon:

1-salehə fərzənd ilahi nemətonkue ki, Xıdovənd əy bə pok iyən ləyoğtinə şəxson əto kardedə.

2-ilahi dınyoədə mıkofatonku qıləyni, bə saleh iyən pokə xıyzoni mailk bıeye.

3-bə inhirofiyə nəzəon əks, dınyo iyən axırəti bə ico cəm kardey bəbe. islomi mədəniyyətədə bəbe axırəti bə dınyo fədo nıkəy və bə axırəti rəsey xoto dınyo bəbe tərk nıkəy.

وَلُوطاً إِذْ قَالَ لِقَوْمِهِ إِنَّكُمْ لَتَأْتُونَ الْفَاحِشَةَ مَا سَبَقَكُم بِهَا مِنْ أَحَدٍ مِّنَ الْعَالَمِينَ (28) 

Və(bə yod biyə) Luti ki, bəştə ğovmi voteşe: həyğətən, şımə de qıləy yavə ko məşğuliyon ki, dınyo hiç qıləy milləti jıqo qıləy koş kardəni.

أَئِنَّكُمْ لَتَأْتُونَ الرِّجَالَ وَتَقْطَعُونَ السَّبِيلَ وَتَأْتُونَ فِي نَادِيكُمُ الْمُنكَرَ فَمَا كَانَ جَوَابَ قَوْمِهِ إِلَّا أَن قَالُوا ائْتِنَا بِعَذَابِ اللَّهِ إِن كُنتَ مِنَ الصَّادِقِينَ (29) 

Şımə bə merdon soyəx şedon və(təbiiyi jenı-merdəti) roy ğət kardedon(bırniyedon) və ıştə məslicədə(oşko) bevəcə əməlon əncom doydon. çən, çəy ğovmi ğərəz ımi co qıləy cəvobışon nıbe ki, voteşone: ehanə tı ıştə pəyğombərəti iddoədə rostişbu,(jəqodə) Xıdo əzobi boəmə biyə.

Həzrəte İbreym(ə)-i bədiqə, ın ayəon bə həzrəte Lut(ə)-i sərquzəşti işorə kardedə ki, əv həm Xıdo pəyğombər be və çəy macəra kırtə formədə bəyon kardedə. Lut(ə) de həzrəte İbreym(ə)-i i əsrədə jiyedəbe və ıştə ğovmi miyono çı həzrəte İbreym(ə)-i vardə şəryəti təblığ kardedəbe. əmmo millət nəinki, çəy dəvəti ğəbul kardedə nıbe, bəlkəm əvoni bəçəvon yavə əməlonku nəhy kardey xoto, əy de ğətl iyən çəy kə-bəku dərbədər kardey təhdid həm kardedəbin.

In ayəon hətta çı heyvonon miyono analoqış nıbə bə bəşəri vey yavə aməlonku qıləyni, yəni bə homoseksualizmi işorə kardedə və hamyedə: Xıdo pəyğombər həzrəte Lut(ə) hejo bə milləti təzəkkur doydəbe iyən bəçəvon yod dənoydəbe ki, merdon de iyənde cinsi əloğə, qıləy vey yavə koye və ım merdon bə jenon dığğət nıkardey və bə bəşəri nəsli bırniye və məhv bıey boyis bəbe. ım ko bə təbyəti addiyə koon cərəyoni əkse və ım bə iyənde meylışon bıə jenı-merdi ğanuni əks qıləy cinsiyə meyle. hətta heyvonon ki, bəştə ğərizə iyən instinkti tabeyin, jıqo qıləy mırdolə ko əncom doydənin.

Lut(ə)-i ğovm nəinki, bə ın yavə koy mırtəkib bedəbin, bəlkəm əvon ım ko qıləy məxfiyə vırədə çı camaati çəşiku bə diyəro bıə məkanonədə əncom doey əvəzi, əvon əy iştimayi vırəonədə həm əncom doydəbin və ıştə qırd iffət iyən abru-həyoşon çı dasto doəşonbe. əvon ım ko inov boştə eyşo-işrət və kefi məclis hisob kardedəbin.

Ayəon dəvomədə hamyedə: əvon bə həzrəte Lut(ə)-i pand və nəsyətonku nəinki, quş doydə nıbin iyən isloh bıey fikədə nıbin, bəlkəm de məsxərəamizə formə bə həzrəti voteşone: ehanə ıştı Xıdo çəmə ım koyku norəhətebu və boəmə əzob vığandey fikədəybu, vuji həmonə bın dınyoədə əzobi nozilkəy və əməni çı miyono bobəy. de qıləy co iborəti  piyedəşonbe bəhəzrəte Lut(ə)-i bıvoton: tı duyədə peyğombərəti iddio kardə qıləy duyəvıjə şəxsiş iyən bə hədərə bəçəmə koon mane məbi.

Çın ayəonku umutedəmon:

1-dini rəhbəron fəğət milləti bə Xıdo tərəf dəvət kardey məsuliyyətışon ni, bəlkəm əvon bəbe de camiyə fosid və ğeyri-əxloği koon həm mıborizə bobəyn və cəmiyyəti muhiti təmiz kardey koyədə cəhdkəyn.

2-ehanə camiyə de fəsodi pur bıbu,votey nibəbe ki,nəhy əz munkəri həni foydəş ni və ıştəni bə hədərə bə zəhmət eməğandəmon.

3-ilahi peyğombəron bəşəri deçəy təbiiyi iyən səhihə roy bə cinsi rabitə tərəf təşviğ kardedəbin və əvon de əxloğiyə fəsodi, həmcinsbozəti və inhirofiyə cinsi əloğəon zidd bin.

4-qıno çanədə ki, camiyədə ələni və oşko nıbu, qıləy fərdiyə ko bə hisob omeydə. əmmo çoko iştimayi surətədə be, bəbe de əy kollektivə formədə mıborizə bobəy.

5-homoseksualizm ki, ımrujnə kali ğərbi keşvəronədə leqal formədəy, qırd ilahi dinonədə qıləy yavə və bə xoş nıomə ko hisob bıə və peyğombəron vəzifəonku qıləyni de ın yavə koon mıborizə bardey bıə.

قَالَ رَبِّ انصُرْنِي عَلَى الْقَوْمِ الْمُفْسِدِينَ (30)‏

(Luti)Voteşe: Xıdolim ha! mıni bə(ın fosidə) qınokorəğovmi səbarzkə!

Çoko ki, qınokorə ğovm həzrəte Lut(ə)-şon duyəvıj zıneyşone iyən çəy nıbuvvətışon bə sıvoli ji bardeşone, ə həzrəti bə Xıdo pənoh bardeşe ki, boştə sədoğət iyən nıbıvvəti iddo rostəvıjəti isbot kardey xoto, qıləy mecuzə nışon doşe. qıləy mecuzə ki, həm çəy risoləti nışonə be və həmən qınokoron tənbih iyən həxı bə botıli ğələbə amil be. əvon ki, deştə qıno fəxr kardedəbin və pokəti iyən pokdovnəti qıləy yavə ko hisob kardedəbin, qıləy fosiğə ğovmin ki, çı fəsodi dayirə hevuj kardedən və və əy qıləy normalə ko unvanədə ğeyd kardedən. ın fərdon  jıqo çı əsliyə royku mınhərif bıən ki, ehanə pok iyən dindorə insonon bəvon pand iyən təzəkkur bıdoyn, bəvon məsxərə kardedən iyən çəvon nəsyəton ğəbul kardedənin.

Çın ayəku umutedəmon:

1-islomi fərhənqədə homoseksualizm inov zəmini dimisə fəsodi tərvic kardeye və hakəs ki, ələni surətədə bə ım qıno mırtəkib bıbu, hukmən şiddətinə cəzo bəvinde.

2-camiyədə fəsodi pevolo kardey mığobilədə, həm bəbe bımandəmon, həmən bə fosidə insonon səbarzəti xoto, Xıdoku koməq tələbkəmon.