740-ə hissə-Rumi surə-47-49 şərifə ayəon

740-ə hissə

وَلَقَدْ أَرْسَلْنَا مِن قَبْلِكَ رُسُلاً إِلَى قَوْمِهِمْ فَجَاؤُوهُم بِالْبَيِّنَاتِ فَانتَقَمْنَا مِنَ الَّذِينَ أَجْرَمُوا وَكَانَ حَقّاً عَلَيْنَا نَصْرُ الْمُؤْمِنِينَ (47) 

Və həlbəttə əmə ıştı bənav peyğombəron bəçəvon ğovmon tərəf vığandemone. çən, əvon bo milləti ruşinə dəlilon vardeşone. çən, bə qıno mırtəkib bıə kəsonku intiğom semone və(bə muminon koməq kardemone ki) bə muminon bıə koməq çəmə ohdədə bıə qıləy həxe.

Vəynə proqrami oxonə ayə bo inson, heyvon iyən beməyon jimoniro çı vavəzi vığandey iyən voşi nozil kardey işorəş karde. ın ayə bə insonon hidoyəti xoto peyğombəron de ruşinə dəlilon vığandeyku bəhs kardedə və çəy bəpeşt bıə ayəon ijən bo zəmini bəyji kardeyro bə vo iyən kuloki vığandey və voşi nozil kardey məsələ işorə kardedə. jıqo bızın ın ayə çı bə ilahi xılğətədə bıə ğudrət iyən hikməti ayid bıə ayəon miyono ğərol qəte, ım zərifə nuktə bəyon kardedə ki, təkvini iyən təşrii sistem çı iqlə məbdəku sərçəşmə seydə. yəni şıməni ofəyə Xıdo, boşımə cismiyə ehtiyocon təmin kardey xoto, həşi, avə, vo iyən voşış şımə xıdmətədə ğərolış doə. həmçinin bəşmə mənəvi iyən ruhi ehtiyocon xoto boşımə peyğombəronış vığande ta şımə deştə ağl iyən fitrəti oko doey, bə hidoyəti bırəsənən.

Təbiiye bın surətədə əvon ki, həyğəti dərk kardedən və imon vardedən,bəvədə bə ilahi lutf iyən rəhməti şomil bəbeyn və Xıdovənd həm çəvon dasto bəqəte iyən bəvon koməq və mədəd bəkay. əmmo de həxı mıborizə bardə iyən bə Xıdovəndi fərmonon nıpemandə kəson, bə ilahi dıjdə əzobi dıço bəbeyn.

Çın ayəku umutedəmon:

1-Xıdovənd de peyğombəron, mecuzə və ruşinə dəlilon vığandey, huccətış bo milləti təmomış kardə.

2-bə qınokoron cəzo doey, çəvon hidoyət iyən huccəti təmom kardey bədiqəy. zira ehanə huccət bə ikəsi təmom nıbu, həmonə cəzo bə ədoləti əsos nibəbe.

3-çı muminon bə kofiron və həxı bə botılə dastə oxonə ğələbə, Xıdovəndi ğətiyə və`dəy.

اللَّهُ الَّذِي يُرْسِلُ الرِّيَاحَ فَتُثِيرُ سَحَاباً فَيَبْسُطُهُ فِي السَّمَاء كَيْفَ يَشَاءُ وَيَجْعَلُهُ كِسَفاً فَتَرَى الْوَدْقَ يَخْرُجُ مِنْ خِلَالِهِ فَإِذَا أَصَابَ بِهِ مَن يَشَاءُ مِنْ عِبَادِهِ إِذَا هُمْ يَسْتَبْشِرُونَ (48) 

Xıdovənd əkəse ki, vavazi(kuloki) vığandeydə və avə rost kardedə və əy osmonədə çoko piyedəşe hevuj kardedəvə əy baxş-baxş kardedə. çən, vindedəş ki, voş çəy(avə) miyono bə bi beşedə. çən, hafaxti əy(voş) bəştə bandəon kon qılə bıpyişe bərosne. bın zəmon əvon şoyvonəti kardedən.

وَإِن كَانُوا مِن قَبْلِ أَن يُنَزَّلَ عَلَيْهِم مِّن قَبْلِهِ لَمُبْلِسِينَ (49) 

Və harçənd əvon çın voşi nozil bıey bənav, məyus və noumu bin.

De həşi dətıve iyən deçəy qamə şuaon, çı dıyo iyən okeyanon ov səviyyə bıxor bedə və bə osmon şedə. peşo Xıdovənde-Aləm həmonə bıxor bıə ovi nəinki, bə diyəroə noxtəon zəminon vığandeydə iyən əyo de bo voşi voye təbiiyə şərayiti icod kardey, voşi lətifə ğətrəon bəsə zəmini dimisə peşandedə. çın koy əzəmət bə faxti oşko bedə ki, əmə bızənəmon ımruj bəşər bo ğaz ya ov iyən nati qıləy noxtəku bə co noxtə ovoştıneyro və bo zəmini kandey, ğazi torbəon hozzı kardey, nəzorət stansiyəon icod kardey və co qılə çiyonro, məcbure çandə milyard dollarxarckəy. de ın holi ımon bə qıləy məhdudə məntəğə dardi dəvo bəkay. əmmo Xıdovənde-Aləm de qıləy sistemi oko doey ki, bəşər boçimiro hiç qıləy vəsayit xarc kardedəni, bo zəmini kurə sakinon jimoni mənbə bıə ovi rohətə holətədə çəvon ixtiyorədə ğərol doydə ta nəinki, fəğət bəşər, bəlkəm zəmini dimisə bıə Xıdovəndi qırd bəyjiyə məxloğat çəyku bəhrə bardedə.

Çı voşi nozil bıeyku, nəinki, çı bəşəri cism, bəlkəm çəy ruf həmçinin bəhrə bardedə. bə insoni ruhi cəhəto şoyvonəti boyis ıə voşi ome iyən boxçəonədəvılon beşe, de voşi voye ıştədə qıləy tojə tərovət pəydu kardedə. ım voş har qıləy insonədə şoyvonəti və fərəhi hiss icod kardedə və çı insoni ğəmo-ğussəku bə kam kardedə. de kaştevoni ya de ğələvonəti məşğul bıə qıləy divoj, ehanə hışkə sor bıbu iyən voş nıvoy, əv de ziyodə problemon dim bə dim bome iyən çəy dasti kəşə zəhməton bə hədər şıey mə`rəzədə bəmande. əmmo həmonə insonon çoko ki, avəon qırdə bıey, vavazi iyən voşi voye ləzəon mışohidə kardedən, çəy çəşonədə çı umu ruşnə dəvəşedə və çı şoyvonəti təbəssım bəçəy lıv-luputi nışteydə. ım həmonə bə ilahi benəhoyətə lutf iyən rəhməti umudəvo bıeye ki, vavaz iyən voş çəy bəşorəti doydə.

Çın ayəonku umutedəmon:

1-təbiiyə amilon qıləy təsodufiyə ko məzınəmon. əvon çı hestemoni aləmi min cumlə zəmini kurə  koonədə ilahi ğudrət iyən hikməti nışonəonin.

2-ilahi irodə tələb kardedə ki, dınyo koon de təbiiyi səbəb iyən illəton ro bə həyğət bırəso və səbəb iyən nəticə soxtemon, çı Həkimə Xıdovəndi ofəyə çiyonin.

3-bə ilahi benəhoyətə lutf iyən inoyəton dığğət kardey, çı insoni məyusəti ruhiyyə əloc kardedə. bə rosti çı saxtiyon kəno asayiş iyən beçizəti kəno puldorəti ğərolış qətə.