744-ə hissə-Loğmani surə-7-11 şərifə ayəon

744-ə hissə

وَإِذَا تُتْلَى عَلَيْهِ آيَاتُنَا وَلَّى مُسْتَكْبِراً كَأَن لَّمْ يَسْمَعْهَا كَأَنَّ فِي أُذُنَيْهِ وَقْراً فَبَشِّرْهُ بِعَذَابٍ أَلِيمٍ (7) 

Və hafaxti çəmə ayəon boəvon handey bedə, de təkəbbır iyən məğrurəti dim qordıneydən. jıqo bızın əvışon məsəni. jıqo bızın çəy quşon sanqine. çən, bəy qıləy dardinə əzobi mıjdəvoni bıdə.

Dəvardə bərnomədə oxonə ayədə hamyeşe: bəzi fərdon de botıl iyən bihudə sıxanon tərvic kardey, milləti sə tasponeydən ta əvon bə həxə sıxani tərəf nışon iyən əy ğəbul nıkəyn. ın ayə hamyedə: jıqo fərdon hətto hozzı nin Kərimə-Ğıroni ayəon bıməson, ısət çı bımando çəy barədə de məntıği fikkəyn və imon biyən. həlbəttə, çı həxıku joqo dim qordıney mənşə, yoləşəxəti iyən təkəbbıre. əvon ıştəni çı peyğombər iyən muminonsə bəpe zıneydəbin və boçəvon sıxanon məsey həm hozzı bedənıbin.

Təbiiye jıqo əhvol-ruhiyyəinsoni bə zəmin jeydə iyən əy bə ilahi əzobi giriftor kardeydə. zira çəy kufr bəçəy təkəbbır iyən məğrurəti xotoe, nəinki, bəçəy coyil iyən nodonəti xoto.

Çın ayəku umutedəmon:

1-istikbari iyən yoləşəxəti ruhiyyə, bə həx iyən həyğəton ğəbul kardey mane bəbe və insoni bə zəloləti tərəf bəşıkırne.

2-bə botıl iyən bihudə sıxanon quş doey, insoniku həxə sıxani məsey və əy ğəbul kardey ğıvvə bəstəne.

إِنَّ الَّذِينَ آمَنُوا وَعَمِلُوا الصَّالِحَاتِ لَهُمْ جَنَّاتُ النَّعِيمِ (8) 

Həyğətən, imon vardə iyən salehə əməl əncom doəkəson, boəvon(vəhıştədə) de neməti pur bıə boğon heste.

خَالِدِينَ فِيهَا وَعْدَ اللَّهِ حَقّاً وَهُوَ الْعَزِيزُ الْحَكِيمُ (9) 

Əyo əbədi bəmandeyn. ilahi və`də həxe və əv məğlub bıənin ni, hikməti soybe.

Votemone kali fərdon hestin ki, həxə sıxani məsey əvəzi, çı botılə kəliməon dumo şeydən. jıqo fərdon kufri tərvic kardedən və oxoyədə bə ilahi əzobi dıço bedən. əmmo çımi mığobilədəjıqo şəxson hestin ki, bə məbdə iyən miadi imonışon heste, çokə koon bə vırə rosneydən və oxoyədə bə ilahi dıjdə əcr iyən mukofoton rəsyedən. ə şəxson ki, Kərimə-Ğıroni ayəon de dığğəti handedən və bəy quş doydən iyən çəy həxədə təfəkkur kardedən və deştə dərk iyən fame bəy imon vardedən. əvon çı hestemoni aləmi Xalıği vədə təkəbbırəti kardey əvəzi, bə Xıdo iyən bəçəy əmron təslim bedən iyən deçəy bandəon təvozukorə surətədə rəftor kardedən. zira əv əziz iyən hikməti soybe.əv nə ıştə doə və`dəon bə vırə rosneyədə ociz ni və nə nıpamuə və`dəon doydəni.

Çın ayəonku umuteydəmon:

1-imon iyən salehə əməl yali bə insoni bə vəhışt rəsey boyis nibəbe. imon de əməli bə ico qıləy foydəş bəbe və ımon insoni bə əbədiyə səodəti bərosneyn.

2-vəhışt de ilahi neməton pur bıə qıləy vırəy. ısət çı maddi bıbu ya mənəvi. liza əyo oqıney iyən bezo bıey mənoş ni.

3-bə Xıdovəndi və`də iyən mıkofoton bovəkəmon və əy de cokəson və`dəon mığoyisə məkəmon ki, əv ya du bedə və ya çəy əncom doey ğeyri-mumkin.

خَلَقَ السَّمَاوَاتِ بِغَيْرِ عَمَدٍ تَرَوْنَهَا وَأَلْقَى فِي الْأَرْضِ رَوَاسِيَ أَن تَمِيدَ بِكُمْ وَبَثَّ فِيهَا مِن كُلِّ دَابَّةٍ وَأَنزَلْنَا مِنَ السَّمَاءِ مَاءً فَأَنبَتْنَا فِيهَا مِن كُلِّ زَوْجٍ كَرِيمٍ (10) 

(Xıdovənd)Osmononış de (şımə nıvində)sutuni ofəyəşe. və zəminədə ğoymə bandonış ğərolış doə ta(zəmin) şıməni nılorzıno və əyo har qıləy coninə(məxloğış) pevolo kardə və osmoniku ov vığandemone. çən, zəminədə ğəşənqə(beməyonku) qiton perosnemone.

هَذَا خَلْقُ اللَّهِ فَأَرُونِي مَاذَا خَلَقَ الَّذِينَ مِن دُونِهِ بَلِ الظَّالِمُونَ فِي ضَلَالٍ مُّبِينٍ (11)‏

Im Xıdovəndi xılğəte. çən, bəmı nışon bıdə ki, ğərəz əv bıə(məbudon) çiçışon ofəyə? bəlkəm, sıtəmkoron(mışrikon) oşkoə zəlolətədən.

In ayəon hestemoni xılğətədə bə ilahi ğudrəti penc qılə nımunəon işorə kardedə. əzəmətinə planeton iyən osmonon bəçəş nıçiyə sutunon ğoyməti, bə zəmini oroməti iyən sabitəti boyis bıədıjdə bandon xılğət, dıyo, osmon iyən hışkiyədə mıxtəlifə coninə məxloği ofəyəmon, voşi voye iyən beməyon perəse. qırd ımon bə iqlə çi dəlolət kardedə və əv çı hestemoni ofəyə Xıdo benəhoyətə ğudrəte ki, hiçkəs bın koyədə çəy şərik ni.

Bın ayəonədə bə çəş nıçiyə sutunon işorə bıə ki, osmoni kurə iyən planeton iyənçəvon ıştə orbitədə qardey və ıştə muvazinəti oqəteyku bəhs kardedə. ım ayəon həmçinin bə zəmini larzeyku oqətə bandon muhimmə roli işorə kardedə. ımon çı Kərimə-Ğıroni elmi mecuzəonku çandə qılə bə hisob omeydə. əcibə nuktə ıme ki, ım mətləbi həxədə qıləy zəmonədə bəhs bıə ki, bəşəri çın movzu barədə hiç qıləy məlumatış nıbe.

Xıdovəndi hestemoni aləmədə bıə de ım oşkoə nışonəon, de təəssıfi millətiku i dastə bəştə nodonəti və nodırıstə təfəkkuri xoto, şəxson ya əşyaon çı Xıdo cərqədə ğərol doydən və qımon kardedən ki, ımon çəvon taleyədə qıləy rolışon heste. jıqo bızın Xıdovəndi hestemoni aləmi kali koon tədbirış bə ım şərikon ohdəş noə və çımon koonış bəvon aspardəşe. əve ayə dəvomədə hamyedə: şımə Xıdo şərik zınə kəson, çı hestemoni aləmi ım təbiiyə çiyon kom qılə xılğətədə Xıdo şərik bıən? ayə umumən əvon qıləy muzi xəlğ kardey zuşon heste ki, ısət çı bımando osmonon iyən rəsəyon?

Ayəon oxoyədə jıqo bovə iyən təfəkkuri bəştə iyən bə Xıdo zılm zıneydə ki, jıqo inson Xıdo ofəyə məxloği çəy şərik bızıno və Xıdo ibodət kardey əvəzi, bə cokəson soyəx bışo.

Çın ayəonku umutedəmon:

1-çandə milyard qalaktikəon və səyyarəon osmonədə ehaştə formədə mande, həm ilahi ğudrəti nışonəy, həmən çı Ğıroni mecuzəonku qıləyniye ki, bə bəçəş nıçiyə sutunon ki, ımruj bəy cazibə ğıvvə voteydən-işorəş kardə.

2-ov, zəmin, bejəyon iyən təbyəti Xıdovəndi palu ğeymətış heste. inson həm bəbe ekoloqiyə hifz kardey koyədə ciddi bıbu və ım ilahi dıjdə əmonəti çokə formədə hifzko.

3-Xıdoşınosi roonku qıləyni, ilahi ğudrəti de cokəson ğudrəti mığoyisə kardeye.

4-bə ğərəz Xıdo soyəx şıəkəson, bə zılm iyən sıtəmi dıço bedən. qıləy zılm ki, oxoyədə bəçəy zəloləti dıço bedə.