609-ə hissə-Muminoni surə-52-56 şərifə ayəon

609-ə hissə

وَإِنَّ هَذِهِ أُمَّتُكُمْ أُمَّةً وَاحِدَةً وَأَنَا رَبُّكُمْ فَاتَّقُونِ (52) 

Və həlbəttə şımə ım ummət vahidə umməte və az şımə pərvərdıqorim. çən, çımıku bıtarsənən.

Navnə bərnomədə Xıdovənde-Aləm,qırd peyğombəron iyən çəvon tərəfdoron bə saleh iyən loyığınə əməli tərəf dəvətış karde iyən çəvonku tələbış karde ki,çı harcurnə nopokətiku bə diyəro bımandon və fəğət çı pok iyən həlolə çiyonku istifodəkəyn.

In ayəon bə insonon xitob kardedə və hamyedə:qırd şımə iqlə ummətiyon və bə yektapərəsti bıə iqlə ayini pemandənən.həmmə peyğombəron çı iqlə Xıdo tərəfiku oməyn və qırd əvon məxloğışon bə tohid iyən pərhizkorəti tərəf dəvətışon kardə. peyğombəron miğdor bə xılğəti ofəyə Xıdo çandə qılə bıey dəlil ni. peyğombəron təlimon iqlə cəhət iyən iqlə hədəfışon bıə.əmmo əvon bənə ibtidayi, miyonə iyən aliyə sinfon mellimon iqlə təlimiyə sistemədə hərəkət kardedən və iqlə məğsədışon heste. əvon de mıxotəbi şərayiti təlimi səthon iyən proqramon bəpe bardedən iyən vəzifəon mıəyyən kardedən.

Çın ayəku umutedəmon:

1-yeqanə pərvərdıqor qırd insonon bə iqlə yektapərəstə ayin iyən vəhdəti tərəf dəvət kardedə.

2-həmmə ilahi peyğombəron dəvəti usul iyən prinsip iqləy. çoko ki, çı qırd insonon fıtrət iyən təbyət iqləy.

فَتَقَطَّعُوا أَمْرَهُم بَيْنَهُمْ زُبُراً كُلُّ حِزْبٍ بِمَا لَدَيْهِمْ فَرِحُونَ (53) 

Əmmo məxloğ ıştə miyono bıə koonədə ixtilof kardeşone. har qıləy dastə bə qıləy ro şin. har dastə ıştə dinədə şoyvonəti kardedən.

فَذَرْهُمْ فِي غَمْرَتِهِمْ حَتَّى حِينٍ (54) 

Çən, əvoni tosə qıləy mıddəti(tosə çəvon mardey) cəhl iyən ğəfləti girdobədə va bıdə.

Vəynə ayə qırd insonon bə vəhdət iyən ibemoni tərəf dəvət kardedəbe. ın ayəon həmmə şəxson çı ixtilof iyən pərokəndətiku nəhy kardedə və hamyedə: millətiku har qıləy qrup dumo qıləy pəyğombər iyən kitobi şıən iyən ıştənışon çı cokəsonku co kardəşone.deməkə ki, qırd peyğombəron iyən osmoniyə kitobon iqlə Xıdo tərəfiku bıən iyən əvon milləti bə iqlə Xıdo iyən bəçəy ayini tərəfdəvət kardedəbin.

Iştə əğedə iyən fikədə bıə bemənoə təəssıb iyən ğəcəti və co kəson məntığ iyən istidloli nıməse, çı milləti təfrığə iyən ixtilofi səbəbonkue.qıləy holədə ki, ağl iyən məntığ hukm kardedə ki,de peşonə peyğombəri omey iyən de nuə osmoniyə kitobi enovniye, navnə peyğombəron tərəfdoron bəy imon vardəşone iyən ıştə təəssıbiku dast peqətəşone.

Həyğətədə jıqo bemənoə diniyə təəssıbon bə ilahi əsl iyən orijinalə dinon ayid ni,bəlkəm ımon çı məğrurəti iyən eqoistətiku nəşət seydə.

Ayə dəvomədə bə islomi peyğombəri(s) xitob kardedə və hamyedə: ısət ki, ıştı mıxolifon çı həyğəti dumo nin iyən boəy ğəbul kardey hozzı nin iyən ıştə əğedəku dast kəşeydənin, tı həm çəvon sə va bıdə ki,bıdə əvon ıştə nodonəti, ğəflət iyən zəlolətədə bımandon tainki,əvon ıştə qətə royku dast bıkəşon ya çəvon əcəl boy bırəso.

Çın ayəonku umutedəmon:

1-çı dini tərəfdoron miyono təfrığə iyən mısılmon, məsihi və yəhudiyon miyono bıə ım ixtilofon, bənə həzrəte Muhəmməd(s),həzrəte Mosə(ə) iyən həzrəte İsa(ə)-I bıə yolə peyğombəron piyə çiyonku ni.

2-bə qıləy fırğə iyən partiyə anqıl qıniyədə,ım bəbe bə səhihə din iyən ağli əsos bıbu, nəinki, bə nəfsaniyə tələbon iyən şəxsiyə ğərəzon əsos.

أَيَحْسَبُونَ أَنَّمَا نُمِدُّهُم بِهِ مِن مَّالٍ وَبَنِينَ (55) 

Ayə qımon kardedən ki, çəmə bəvon əto kardə mol iyən fərzəndon, boçəy xotoe ki.

نُسَارِعُ لَهُمْ فِي الْخَيْرَاتِ بَل لَّا يَشْعُرُونَ (56) 

Əmə bəvon xəy rosneyədə dastpoçəti kardedəmon?(ne jıqo ni) bəlkəm əvon famedənin(dərəseydənin).

In ayəon bə əhali miyono vey rayic bıə qıləy nodırıst və nosəhihə fiki işorə kardedə və hamyedə: kali şəxson qımon kardedən ki,ehanə kofiron rifoh iyən madddi cəhəto çokə jimonışon heste,ım çı Xıdovəndi bəvon bıə lutf iyən inoyəti nışonəy.jıləvoni Xıdovəndi bəvon çəvon jimonədə koməqış kardə və çı xəy-bərəkəti bəon boəvon ojış kardə. çoko ki,Kərimə-Ğıron Ğaruni macəradə nəğl kardedə ki,millət bəçəy mol-dıvləti de həsrəti çəşi erəxeydəbin iyən oruzu kardedəbin ki,Xıdo bəvon həm jıqo qıləy mol-əmvol və sərvət baxşkəy.

Və holinki, əvvəla Xıdovənde-Xalığ dınyo iyən maddiyə imkonaton əto kardey koyədə çı mumin iyən kofiri miyono hiç qıləy fərğ noydəni və hakəs cəhdkoy bəy əto bəkay. saniyən mol iyən sərvət bo qırd insonon,ısət çı mumin bıbu ya kofir çı imtovoni vositəy və ıştən-boştə çı Xıdo bəvon bıə lutf iyən rəhməti nışonə ni.

Çın ayəonku umuteydəmon:

1-bəştə mol,fərzənd iyən imkonaton məğrur məbəmon ki, çımon hiç qılə çı insoni perəxey iyən nicoti amilonku ni.

2-çı kofiron jimoni təhlilədə çı nodırıst iyən səthiyə fameyku pərhizkəmon iyən zohiriyə rifohi çı hərəbaxtəti dəlil məzınəmon.