610-ə hissə-Muminoni surə-57-62 şərifə ayəon

610-ə hissə

إِنَّ الَّذِينَ هُم مِّنْ خَشْيَةِ رَبِّهِم مُّشْفِقُونَ (57)  ‏

Həyğətən, ıştə pərvərdıqori xofiku tarsə kəson.

وَالَّذِينَ هُم بِآيَاتِ رَبِّهِمْ يُؤْمِنُونَ (58)

Əvonki, bəştə pərvərdıqori ayəon imonışon heste.

وَالَّذِينَ هُم بِرَبِّهِمْ لَا يُشْرِكُونَ (59)

Və əvon ki, boştə pərvərdıqori şərik qəteydənin.

Navnə bərnomədə millətii iqlə dastə milləti hol bəyon be ki, mol, fərzənd iyən maddiyə rifohi soyb bıey xəyr zıneydəbin iyən bo əy rəseyro cəhdo-təloş kardedəbin. əmmo ın ayəon  çı muminon xısusiyyəton bəyon kardedə ki, çəvon palu xəy de çoki kardey,bə milləti ehson kardey iyən boəvon rifoh və asayişi icod kardeye.

Çı rostə muminon iminə xısusiyyət,çı pərvərdıqore-aləmi əzəməti məğamiku bıə qıləy tarse ki,çəvon qırd vucudış eqətə iyən bə Xıdo ğanunon əməl kardedən. qıləy tars iyən həyo ki,ilahi mərıfətiku sərçəşmə seydə və boyis bedə ki, hiçkəs iyən hiççi boəy şərik qəteydəni və fəğət bəçəy əmron imonışon heste.”xəşyət” qıləy çiku təbiiyə surətədə tarsey mənoədə ni,bəlkəm çı yolon mığobilədə bə noloyığə rəftoron mırtəkib bıey xoto bıə qıləy tarse və ayə dınyoədə xılğəti ofəyə Xıdoku co qıləy yolə məğami soyb heste?

Çın ayəonku umutedəmon:

1-bə de pərvərdıqorı-aləmi əmron mıxolifətiku pərhiz kardey  iyən bə sərostə royədə hərəkət kardey boyis bıə tars,qıləy mısbət iyən çokə tarse iyən bə insoni ruşd və kəmoli boyis bəbe.

2-çə imoni ğeymətış heste ki,xolis iyən komil bıbu, nəinki, inson ibodətədə Xıdo bandə bıbu, əmmo ixtisod iyən siyosətədə və jimoni co koonədə bə ğeyri-ilahi əğıdəon tabe bıbu.

وَالَّذِينَ يُؤْتُونَ مَا آتَوا وَّقُلُوبُهُمْ وَجِلَةٌ أَنَّهُمْ إِلَى رَبِّهِمْ رَاجِعُونَ (60) 

Və ə kəson ki, çiçışon heste(ıştə moli Xıdo royədə) doydən. qıləy holədə ki, çəvon dılon tarseydən ki, əvon oxoyədə bəştə pərvərdıqori tərəf obəqardeyn.

أُوْلَئِكَ يُسَارِعُونَ فِي الْخَيْرَاتِ وَهُمْ لَهَا سَابِقُونَ (61)

(Əvon)jəqo şəxsonin ki, çokə koonədə dastpoçən iyən əvoni əncom doeyədə iyəndeyku bənav dəşeydən.

Vəynə ayəon dəvomədə ın ayəon bə muminon kali sıfət iyən xısusiyyəton işorə kardedə və hamyedə:əvon çokə koonədə dastpoçəti kardedən, de iyənde bəhs kardedən və çı iyəndeyku bənav dəşeydən.əvon Xıdo royədə doə iyən baxş kardə çiyon, boştə qıləy vəzifə zıneydən və hejo norohətin ki, məbodə, nobənobu çəvon əməlon xolis nıbu iyən Xıdovənd çəvon əməlon ğəbul nıkəy. əvon hiçfaxti deştə çokə koon məğrur bedənin iyən Xıdovəndi bəştə ğarzıxo zıneydənin və bə milləti həm mınnət noydənin.

Çın ayəonku umutedəmon:

1-dınyo əhl mol iyən sərvəti cəm kardey koyədə de iyənde bəhs kardedən,əmmo imoni əhl çokə koon əncom doeyədə iyən bə məxloği xəy rosneyədə de iyənde bəhs kardedən.

2-dınyo koonədə iyəndeyku bənav dəşe təhlukəş və xətoş heste, əmmo bə axırəti rəseyro bıə surət lozım iyən bə tərıfi loyığe.

وَلَا نُكَلِّفُ نَفْساً إِلَّا وُسْعَهَا وَلَدَيْنَا كِتَابٌ يَنطِقُ بِالْحَقِّ وَهُمْ لَا يُظْلَمُونَ (62) 

Və əmə hakəsi(çəy) zu vışkiyə ğədərədə bəçəy gi vəzifə noydəmon və çəmə palu qıləy kitob heste ki,(bandəon əməlon barədə) həxədə sıxan voteydə iyən bəvon hiç qıləy sıtəm nibəbe.

Navnə ayəonədə çokə koonədə bənav dəşey iyən surətin bıey çı muminon barizə xısusiyyətonku hisob kardedəbe,ın ayə hamyedə:həlbəttə Xıdovənde-Aləm ıştə qırd bandəonku i formədə əməl çəş kardedəni.zira əvonış tafut doə formədə ofəyəşe. hakəs bəştə cism iyən ağli mutənasib cəvobdehe, nəinki, çəysə ziyodə. çiçi dərəseydə bəbe ğəbulkəy iyən əməli mərhələdə həm bəbe ıştə cismi iyən moli ğudrəti miğdorədə bəbe əməlkəy.

Şək ni ki, çı fərdon camiyədə bıə imkonat,movğıyyət iyən ğudrəton fərğ kardedə. de qırd ım fərğon vucudi Xıdovənd həm bə həmmə kəsi gi eyni formədə vəzifəş noəni. Xıdovənd ıştən həxe iyən dınyoədə bəştə bandəon gi noə vəzifəş həm bə ədolət iyən həxı əsos noəşe.axırətədə həm ıştə bandəon əməlon mıhosibə,bəçəvon imkonat iyən ğudrəton əsos əncom bədoe.binobərin Xıdovəndi tonoku çı pul bıəkəs iyən nıbəkəsi təklif iyən vəzifə eyni ni.çoko ki,çı alimi məsuliyyət iyən vəzifə bəsə nodoni məsuliyyətisə ziyod və veye.

Çın ayəku umutedəmon:

1-Dini vəzifə iyən uxrəviyə mukafatonədə Xıdovəndi meyar, bə insonon mol, ağl iyən cismi zərfiyyəton əsose.

2-bo Xıdo ko kardey hiçfaxti dəboxte iyən peşmonətiş ni. zira Xıdovənd bəşəri zu vışkiye ğədərisə ziyod bəçəy gi vəzifə noydəni və bə nəticə rəsey, bəştə bandə mukofati  doey şərt elan kardedəni.