611-ə hissə-Muminoni surə-63-69 şərifə ayəon

611-ə hissə

بَلْ قُلُوبُهُمْ فِي غَمْرَةٍ مِّنْ هَذَا وَلَهُمْ أَعْمَالٌ مِن دُونِ ذَلِكَ هُمْ لَهَا عَامِلُونَ (63) 

Lakin kofiron dılon çın(həyğətonku) ğafile və ğərəz ımi(yavə) koon əncom doydən ki, hejo de əy məşğulin.

Vəynə bərnomədə  çı mumin iyən kofiron kali xısusiyyəton bəyon be. ın ayə bə kufri əhli co qıləy xususiyyəti işorə kardedə və hamyedə:dınyopərəstəti fik jıqo əvonış ıştədə ğərğış kardəbe ki,əvon hətta çı məbdə iyən məadiku həm ğafil mandəbin. əvon nə bo Xıdo bandəçəti kardedən və nə ıştə mardey bədiqə bıə dınyo barədə fik kardedən.təbiiye jıqo şəxson rəftoron de muminon rəftoron şıvə fərğ kardedə iyən əvon yavə koəncom doeyədə,hiç qıləy həyo və abruşon ni. hətta mumkine əvon deştə bevəcə koon fəxr həm kardedən və əy çı mədəniyyət iyən inkişofi nışonə zıneydən.

Çın ayəku umuteydəmon:

1-həyğəton zıneyədə ğəflət kardey,bə insoni fik iyən əmələdə inhirofi boyis bəbe.

2-yavə koonədə isror kardey,insoni əxloğ iyən xosyəti əvəz  kardedə iyən əy çə həmonə koon əsir kardedə.

حَتَّى إِذَا أَخَذْنَا مُتْرَفِيهِم بِالْعَذَابِ إِذَا هُمْ يَجْأَرُونَ (64) 

Çoko ki, de nazo-neməti jiyə iyən rifohədə bıə kəson bə əzobi giriftorkəmon, bın zəmon nolə jeydən iyən ahu-zor kardedən.

لَا تَجْأَرُوا الْيَوْمَ إِنَّكُم مِّنَّا لَا تُنصَرُونَ (65) 

(Bəvon votey bəbe:)Im ruj fəryod məkənən ki, çəmə tərəfiku bəşmə qıləy koməq nibəbe.

Tosə ilahi əzobi nıomey,kofiron ğəflət iyən bexəbəti dəvom pəydu kardedə iyən əvon oğo bedənin.əmmo çoko ilahi əzob nozil bedə iyən qırd kofiron dəqəteydə, nazo-neməti dılədə jiyəkəson ,bəştə sərvət iyən mol-əmvoli və ıştə maddiyə rifohi çı dasto doey xoto,nolə iyən fəryod jeydən iyən şikoyət kardedən. əmmo ısə çı foydə? Həni bo oqardey qıləy ro mandəni. hiççi iyən hiçkəs ilahi əzobi mığobilədə mandey ğudrətış nibəbe və Xıdovəndi tərəfiku həm cəzo sıvık nibəbe.

Çın ayəonku umutedəmon:

1-bə dınyo jimoni iyən bəçəy rifohi məftun bıey, çəyku co bıey bo odəmi saxt iyən çətin kardedə.

2- ilahi əzob bə ədoləti əsose, çən qınokoron bəbe çəş nıkəyn ki, Xıdovənd bəvon koməq bəkay.

قَدْ كَانَتْ آيَاتِي تُتْلَى عَلَيْكُمْ فَكُنتُمْ عَلَى أَعْقَابِكُمْ تَنكِصُونَ (66) 

Həyğətən,(dəvardə soronədə) çımı ayəon bo şımə handey bedəbe. əmmo şımə peşt qordıneydəbiyon.

مُسْتَكْبِرِينَ بِهِ سَامِراً تَهْجُرُونَ (67) 

Çəy mığobilədə yoləşəxəti kardedəbiyon iyən ıştə şəv-nıştonədə yavə sıxanon voteydəbiyon.

In ayəon çı kofiron kufri rişə jıqo bəyon kardedə. əvon nəinki, bəştə nodonəti iyən cəhli xoto, bəlkəm zıne-zıne kofir bin. zira peyğombəron boəvon ilahi ayəon tilovət kardeyədə, əvon de təkəbbıri peşt qordıneydəbin və bə peyğombəron quş doydə nıbin. əvon ıştə məxsusə məclisonədə həm bə peyğombər iyən bəçəvon sıxanon norəvoə nisbəton doydəbin.

Təbiiye jıqo yoləşəxə iyən təkəbbırə insonon ağıbət,ğərəz ilahi əzob iyən ğəzəbi co çi ni. əvon həyğətədə ıştə kaştə məhsuli dıveydən.

Çın ayəonku umuteydəmon:

1-yoləşəxəti ruhiyyə boyis bedə inson hətta bo həxə sıxani məsey həm hozzı ni,ısət çı bımando həxə sıxani ğəbulkəyn iyən bəy əməlkəyn.

2-peyğombəron dəvəti vədə ruşinə məntığ iyən istidlolışon nıbə kəson, de nosəzo iyən yavə sıxanon məşğul bedən.

أَفَلَمْ يَدَّبَّرُوا الْقَوْلَ أَمْ جَاءهُم مَّا لَمْ يَأْتِ آبَاءهُمُ الْأَوَّلِينَ (68) 

Ayə əvon bın sıxanonədə fik kardəşon ni? Ya qıləy çi bəvonrəsə ki, bəçəvon əbo-əjdodi rəsəni?

 أَمْ لَمْ يَعْرِفُوا رَسُولَهُمْ فَهُمْ لَهُ مُنكِرُونَ (69) 

Yaanki, ıştə peyğombərışon nızıneşone və bəçəy xoto əy inkor kardedən?

Dəvardə ayəon dəvomədə ki,çı kofiron yoləşəxəti rəğ-rişəon bəyon kardedəbe, ın ayəon  hamyedən:həyğət ıme ki,islomi-peyğombəri(s) mıxolifon çı Xıdovənde-Aləmi sıxan bıə çın kitobi barədə hiç qıləy fik-fam iyən təfəkkur nıkardeşone. əgər jıqo bıənıbe, əvon dərəsin ki,ım kitob həm bənə navnə peyğombəron kitobiye və çın kitobi mətləb həm bənə həmonə kitobon mətləbiye.əvon çı Tovrat iyən İncilku xəbəşon hestebe və zıneydəbin ki,bə tovhid iyən çokə koon tərəf dəvət kardey, həmonə kitobonədə həm movcude və çı islomi peyğombəri ım sıxan qıləy tojə sıxan ni.

Çımisə əlovə həzrəte Muhəmməd(s) i umr çı milləti miyono jiyə və həmmmə kəs əy çok-çoki zıneydəbin.hətta bəy “əmin” yəni əmonətdori nomışon həm noəbe. çən, çokonə əvon ə həzrəti jıqo zınə holədə iyən de jıqo qıləy vəzyəti, çəy dəvəti inkor kardedəbin iyən ə həzrəti duəvıj hisob kardedəbin?çın ayəonku umutedəmon:

1-Xıdovənde-Aləm hejo kofiron mızəmmət kardedə ki, boçi əvon Ğıroni barədə təfəkkur kardedənin?çən,ısə muminon əgər Ğıroni barədə təfəkkur nıkoyn ım çokonə bəbe?

2-qırd ilahi peyğombəron dəvəti əsos iqləy.liza bə qıləy peyğombəri pemandey iyən bə co qıləyni tabe nıbey,bəməntıği əsos ni.