469-ə hissə-İsra surə-3-6 şərifə ayəon

469-ə hissə

ذُرِّيَّةَ مَنْ حَمَلْنَا مَعَ نُوحٍ إِنَّهُ كَانَ عَبْداً شَكُوراً (3)

(Ha Bəni-İsrayilha!)ha de Nuhi bə ico (bə kəşti) suvar kardə kəson və nicot doə kəson)fərzəndonha! Həyğətən,Nuh qıləy ziyodə şukrəkə bandə be.(şımə həm bənə əy bıbənən ta nicot pəydukənən).

Navnə ayədə Kərimə-Ğıroni hamyeşe ki,əmə bo Bəni-İsrayili hidoyətiro Tovratımon vığande.ın ayə bəvon xitob kardə holədə hamyedə ki,çən,şımə həm bə ilahi ın yolə neməti şukrkənən iyən bəy tabe bıbənən.bın zəmon nımunə unvanədə həzrəte Nuh(ə)-i qıləy şukrəkə bandə unvanədə misol jeydə və hamyedə:şımə əbo-əjdod ə şəxson bıən ki,de Nuh(ə)-i bə ico bə kəşti(qəmi) suvar bıəbin iyən əmə əvonımon nicot doe.əvon çəmə şukr kardə bandəon bin.əve əvon xilos bin.şımə həm bənə əvon bıbənən ki,ta nicot pəydukənən.

Həzrəte Nuh(ə) qırd peyğombəronsə veyə umrış kardə iyən de Xıdo dini təblıği məşğul be.ə həzrət deməkə ki,dini royədə ziyodə əzob-əziyyətonış kəşe,əmmo ijən hejo Xıdovəndi dərqoyədə şukrəkəyonku be və hiçfaxti giloyə və şikoyət kardedənıbin.

Çın ayəku umutedəmon:

1-tojə nəsli bəştə şərofətin iyən imoninə dədə-bobon dığğət kardey,çı təlim və tərbiyə koonədə qıləy hissiyə koye.

2-həmmə holədə şukr kardey,ısət çı muşkilaton faxti bıbu ya çı rifoh və asayişi faxti bıbu,çı səodət və nicotirəmze.

وَقَضَيْنَا إِلَى بَنِي إِسْرَائِيلَ فِي الْكِتَابِ لَتُفْسِدُنَّ فِي الأَرْضِ مَرَّتَيْنِ وَلَتَعْلُنَّ عُلُوّاً كَبِيراً (4)

Əmə kitobədə(Tovratədə) bə Bəni-İsraili elan kardemone ki,hukmən şımə dı kərə zəmini dimisə fəsod bəkayon iyən çı yolyəti dumo bəbiyon.

Vəynə ayə dəvomədə,ın ayə bə Bəni-İsrayili xitob kardedə hamyedə:əmmo şımə bə Xıdo neməton şukr kardey əvəzi,fəsod iyən çı tuğyonkorəti dumo bin iyən zəmini dimisə yoləşəxəti kardeyon piyedəbe.

Kərimə-Ğıron mıxtəlifə ayəonədə bə Bəni-İsrayili bənə peyğombəron kıştey,rışvə iyən riba rəvoj doe vəbənə həxı niyon kardey bıə yavə koon  işorə bıə.əmmo bın ayədə hamyedə:şımə bə dıqlə fəsodi mırtəkib bəbiyon ki,çəy mənfiyə təsiron zəmini dimi ebəqəte.bın ayədə dıqlə kəlimə ki,”fəsad iyən ğuluvv “yənde tonoku omə ta nışon bıdəy çı zəmini dimisə bıə qırd fəsodon rəğ-rişəon bırniye bıbu.çoko ki, Kərimə-Ğıron çı Fironi barədə hamyedə:”innə Firəovnə əla fil ərz”-Firon zəmini dimisə bəpe bıey dumo be.liza Kərimə-Ğıroni co ayəonədə  hamyedə ki, Xıdovənd vəhıştış bo ə şəxsonış ğərol doə ki,əvon çı yoləşəxəti iyən bəpe bıey dumo nin.

Çın ayəku umutedəmon:`

1-çı yəhud ğovm iyən Bəni-israyili miyono fəsod iyən xərobkorətikanə tarıx və stajış heste.

2-vey mumkine mustəsəzəf iyən məzlumon bə ğudrət rəsey bədiqə yoləşəxəti kardedən. Bəni-İsrayili ğovm de həzrəte Mosə(ə)-i vositə çı Fironi sultəku nicotış pəydu karde,əmmo əvon ıştən zəmini dimisə de fəsodi məşğul bin.

فَإِذَا جَاء وَعْدُ أُولاهُمَا بَعَثْنَا عَلَيْكُمْ عِبَاداً لَّنَا أُوْلِي بَأْسٍ شَدِيدٍ فَجَاسُواْ خِلاَلَ الدِّيَارِ وَكَانَ وَعْداً مَّفْعُولاً (5)

Çən,çoko ki,çı firnə iminə və`də ome rəse,əmə ıştə zumandə iyən canqavarə bandəon(bo şıməni etosniyero) bəyji bəkamon ki, de kəon dılə nəvey məşğul bıbon(ta fitnəkoron pəydukəyn və bəvon cəzo bıdəyn) və əv(qıləy) ğətiyə və`dəy.

ثُمَّ رَدَدْنَا لَكُمُ الْكَرَّةَ عَلَيْهِمْ وَأَمْدَدْنَاكُم بِأَمْوَالٍ وَبَنِينَ وَجَعَلْنَاكُمْ أَكْثَرَ نَفِيراً (6)

Peşo canqi bəşmə xəy iyən bəçəvon ələyh obəqırdınımon(əvəz bəkamon) və bəşmə de mol iyən fərzəndon koməq bəkamon iyən şımə miğdori ziyod bəkamon.

Navnə ayə çı Bəni-İsrayili dı kərə zəmini dimisə de fitnə-fəsodi məşğul bıeyku xəbə doydəbe,ın ayəon hamyedə:Xıdovəndi həm və`dəş doə ki,har dıqlə faxti əvoni bəçəvon cəzo bırorsni.ım çı Xıdovəndi ğətiyə və`dəy.çoko ki,tarıxiyə kitobonədə omə ki,təğribən çı Miladiku 600 sor bənav Bəxtun-Nəsr nomo bıə qıləy zumand və ğudrətinə podşo Babilədə podşoəti kardedəbe.əv çoko çı yəhud ğovmi bə əmri nıpemandətiş vinde,bəçəvon şəhro-diyori həmləş karde və çəvon veyniş bə ğətl rosne iyən çanəndəş həm bə əsorətış barde.oxoyədə Bəxtun-Nəsr bə Beytul-Mığəddəs varid be iyən əvrəş vironış karde.liza tosə çı Bəxtun-Nəsri bəyjiyə faxti Bəni-İsrayil de zıllət və xarəti Babilədə əsorətədə jimon kardedəbin.tainki,İroni yolə podşo bıə Kuruş Babilış fəth karde iyən yəhudiyonış çəy sultəku ozodış karde. Kuruşi icozəş doe ki, yəhud ğovm bəştə navkonə jiyə mığəddəsə sərzəminon oqardon iyən ıştə kə-bəon ijən sənibəton bısoxton.

Bəni-İsrayil bə Beytul-Mığəddəs ijən oqardey bəpeştə tədricən çı ğudrət iyən mılki soyb bin iyən çəvon cəmiyyət ziyod be.tainki,ijən ısətnə səfə Roma ğeysər və imperator bə Beytul-Mığəddəsi həmləş karde və əvrəş bəştə sultə ji vardeşe.əy əmrış kardeşe ki,Beytul-Mığəddəsi viron bıkənən iyən çı məxliği kə-bəon ğarətkənən.

Çın ayəonku umutedəmon:

1-tuğyonkoron bəbe bızınon ki,Xıdo çəvon hiyləon bə puç bebəkay.Bəni-İsrayili tuğyonkorətiş karde,Xıdovənd həm çəvonku bəpe bıə qıləy ğudrətış bəvon musəllətış karde.

2-tobə əsl həm fərdiye həmən iştimayi.liza ehanə qıləy ummət ıştə dəvardə koonku peşmonbıbuiyənoqardo,Xıdovəndhəm ıştə lutfi bəvon şomil bəkay.