475-ə hissə-İsra surə-25-28 şərifə ayəon

475-ə hissə

رَّبُّكُمْ أَعْلَمُ بِمَا فِي نُفُوسِكُمْ إِن تَكُونُواْ صَالِحِينَ فَإِنَّهُ كَانَ لِلأَوَّابِينَ غَفُوراً (25)

Şımə pərvədıqor şımə dılədə bıə çiyon(şıməku)vey çok zıneydə. ehanə saleh bıbon, hukmən əv, tobə əkəyon bəbaxşe.

Dəvardə proqramədə bə valideyni ayid iyən bəvon ehson kardey barədə bıə ayə be. ın ayə çə bəhsi dəvomədə hamyedə:kali fərdon ıştə pı-mo ğədri loyığ bıə holədə zıneydənin iyən ıştə erəxey,sıxan kardey iyən rəftorədə bəvon be ehtiroməti kardeydən ki,Xıdovənd bəçəvon həmməy aqahe.de ın holi ehanə ın fərdon tobə bıkoyn iyən ləyoğətinə əməlon ıştəku nışon bıdon iyən ıştə dəvardə koon əvəzi beşon, bəvədə Xıdovənd həm çəvon qınonku dəbəvarde.

In ayə nışon doydə ki,bə valideyni ehtirom qıləy dini vacibə əmre,nəinki,fəğət qıləy əxloğiyə ko.liza bəçəvon əzob-əziyyəti boyis bıə har qıləy rəftor qıno məhsub bedə və hakəs bəbe çəy əvəzi beşey dumo bıbu.jıqo nıbu,bə ilahi əzob və ğəzəbi dıço bəbe.

Çın ayəku umutedəmon:

1-qahi faxti salehə şəxson həm fırsiyedən ki,bəbe rəyrə ımi dərəsin və ıştəni islohkəyn.

2-Xıdovənd nəinki,bəçəmə əməlon bəlkəm,bəçəmə niyyət və məğsədon həm aqahe.qıləy (dəğiğə)səhvış nıbə aqahəti.

وَآتِ ذَا الْقُرْبَى حَقَّهُ وَالْمِسْكِينَ وَابْنَ السَّبِيلِ وَلاَ تُبَذِّرْ تَبْذِيراً (26)

Çı nezə odəmon iyən beçizə(beçorə) şəxson həx-huğuğon ədo bıkənən və(ıştə moli) peməşand isrof məkə.

 إِنَّ الْمُبَذِّرِينَ كَانُواْ إِخْوَانَ الشَّيَاطِينِ وَكَانَ الشَّيْطَانُ لِرَبِّهِ كَفُوراً (27)‏

Həyğətən,isrofəkəyon çı şəytoni boonin və şəyton bəştə pərvərdıqori nisbətədə vey nunkur be.

Insoni bəştə valideyni həx-huğuğon rioyət kardey bəyoni dəvomədə,ın ayəon çı nezə odəmon iyən səfil və beçizə insonon həxon bəyon kardedə və hamyedə:çəvon həx-huğuğon həm şımə qiyədə heste ki,bəbe əy ədo bıkoyn.məələsəf iyən de təəssıfi camiyədə kali şəxson bə cokəson koməq kardey barədə bə ifrot iyən təfriti dıço bedən.qıləy hissə fəğət bəştə iyən bəştə xıyzoni fik mandedən və bə cokəson həni dığğət kardedənin,hətta çəvon nezə odəmon həm bıbon.çımi mığobilədə kali şəxson ıştə xıyzoni çı yodo bekardedən iyən bəştə duston və bə cokəson problemon rəseydən iyən çəvon koon anqıli oj kardedən.

In ayəon ım dıqlə şivə mızəmmət kardə holədə hamyedə:şımə həmmə bəyənde fik bıbənən iyən bın koyədə bə ifrot-təfriti dıço məbənən ki,ım ko ıştən isrofe.peşonə ayə isrofkori çı şəytoni dust iyən nezə odəm elan kardedə.zira ğeyri məntıği iyən ıştə vırədə sərf nıbə şivə inov bə Xıdovəndi neməton noşukurətiye və İblis iminə kəs be ki, bə Xıdo nunkurəti kardeşe. zira Xıdovəndi bəy doə çiş, çı Xıdo bandəon bə dast dənoey iyən bə qıno və xəto kardey dəvəti royədə okoş doe.həlbəttə çı təbzir iyən isrofi bəhs,harçənd mali iyən ixtisodiyə sektoronədə çəyku bəhs bedə, əmmo vey dıjdə isrof insoni ıştə umr və cıvonəti bə hədər doeye.ehanə inson çı jimoni nemət iyən ıştə vucudi  imkonatonku çok-çoki istifodə nıkəy və səhihə royədə çəyku bəhrə nıbo,har dıqlə bə həsrət iyən xusrani boyis bəbe.

Çın ayəonku umutedəmon:

1-ehson iyən infoğədə bəbe iminə dərəcə çiyon ıştə nəzədə bıqətəmon.sıftədə valideyn, peşo nezə odəmon və çəy bəpeştə çı camiyə fəğıron və beçizə insonon.

2-çı əğniya və puldoron bə fəğıron doə çi,çı miskin iyən fəğıron həxe.liza ərbobon və puldoron bəbe bəvon mınnət nınəyn.

3-infoğədə bəbe bə ədoləti rioyətkəmon iyən çı harcurnə isrofiku bə diyəro bımandəmon.

وَإِمَّا تُعْرِضَنَّ عَنْهُمُ ابْتِغَاء رَحْمَةٍ مِّن رَّبِّكَ تَرْجُوهَا فَقُل لَّهُمْ قَوْلاً مَّيْسُوراً (28)

Və əgər ıştə pərvərdıqori rəhməti intizorədəş ki,bəy umudəvoş,çəvonku dim bıqordınoş, çən de əvon namə qəp bıjən.

Vəynə ayəon dəvomədə ki,bə nezə odəmon iyən puli cəhəto zəyifə şəxson koməq kardey barədə be,ın ayə hamyedə:əgər bə cokəson infoğ kardeyro  şımə ixtiyorədə qıləy çi nibu, çən, hiç nıbu de nam iyən şinə zıvoni de əvon qəp bıjənən və çəvon dılon şo bıkənən.əvoni umudəvo bıkənən ki,hafaxti Xıdovənd çımı ruzi ziyod bıko, ıştə imkoni həddədə bəşmə koməq bəkamon.

Rəvoyətonədə omə ki,hafaxti qıləy şəxs peyğombər(s)-ku qıləy çi tələb kardedəbe və ə həzrət çəy hacəti bə vırə rosney zıneydənıbe,bəvədə bo həmınə peçınə şəxsi dıvo kardedəbe və hamyedəbe:”Xıdovənd bəmə iyən bəşmə ıştə fəzliku ruzi bıdəy”.

Çın ayəku umutedəmon:

1-hejo bəbe bə ilahi rəhməti umudəvo bıbu və bə cokəson həm de namə zıvoni umudəvo bıdəy.

2-ehanə kardey zıneydəniyon qıləy şəxsi puliyə ehtiyocon bərtəfkoyn,hiç nıbu əvoni umudəvo bıkənən.