480-ə hissə-İsra surə-41-44 şərifə ayəon

480-ə hissə

وَلَقَدْ صَرَّفْنَا فِي هَـذَا الْقُرْآنِ لِيَذَّكَّرُواْ وَمَا يَزِيدُهُمْ إِلاَّ نُفُوراً (41)

Bərosti əmə bın Ğıronədə(de mıxtəlifə bəyonon həyğətonro)tikrorinə şikilədə bəyon kardemone ta pand bıqəton və əmmo çəvon nifrətış ziyod karde.

Kərimə-Ğıroni xısusiyyətonku qıləyni çəy ranqbəranqəti iyən mətləbon tikror bıeye. zira əv qıləy moyizəkə iyən hidoyətəkə kitobe və hidoyət fəğət de zıney iyən aqahəti hosil nibəbe,bəlkəm bəbe qıləy həyğəti mıxtəlifə ğalibədə çandə kərə bəyon bıkəy ta bə fərdon ruf iyən coni təsir bınəy.liza ayə dəvomədə hamyedə:ım tikroron bəçəy xotoe ki,məxloğ pand bıqəton iyən mutəzəkkir bıbon.

Həlbəttə ruşine ki,həxı ğəbul kardey qıləy solimə ğəlbış piyedə və inodkor iyən mıtəəssıbə insonon hiç faxti həxı ğəbul kardedənin.binobərin çanəndə həxə sıxan bəçəvon quşi bırəso,çəy vədə mandedən iyən tiki həm vey inodkorəti kardeydən. Çın ayəku umutedəmon:

1-insoni hejo bə təzəkkur iyən dığğəti ehtiyocış heste ki,de həxə sıxani votey iyən məsey hosil bedə.

2-çı həxı ələyhdoron ın ko,bə həxı məntıği zəyfəti xoto ni,bəlkəm ım bəçəvon ruhi aludə bıey iyən inodkorəti xotoe.

3-bə tərbiyəvi aliyə hədəfon rəseyro,bəbe iqlə metodiku oko nıdəy,bəlkəm bə məxloği mıxtəlifə zovğon iyən istedadon xoto, çı mıxtəlifə şivəonku istifodəkəy.

قُل لَّوْ كَانَ مَعَهُ آلِهَةٌ كَمَا يَقُولُونَ إِذاً لاَّبْتَغَوْاْ إِلَى ذِي الْعَرْشِ سَبِيلاً (42)

Vuji:ehanə çı mışrikon votəynə de Xıdo co qıləy Xıdo bıəbe-bın zəmon həmonə xıdoon,bə ərşi xıvand bıə  Xıdo qıləy nufuz kardey ro dumo əbin(ta çəy ğudrəti bıstənon).

سُبْحَانَهُ وَتَعَالَى عَمَّا يَقُولُونَ عُلُوّاً كَبِيراً (43)

Xıdovənd çəvon votə çiyonku pok iyən bəpeye.qıləy yolə bəpe bıey.

Məkkə mışrikon Xıdovəndi  çı hestemoni aləmi ofəyəkəsi unvanədə ğəbul  kardedəbin. əmmo çın aləmi mudiriyyət və idorə koonədə boəy şərik ğərolışon doəbe iyən əvınışon ıştə de Xıdo miyono qıləy vositəçiyionışon qətə və bəçəy xoto əy pərəstış kardedəbin.

In ayə bəvon cəvob doə holədə hamyedə ki,ehanə jıqo bıəbe,həmonə vasitəçi məbudon bəbe bə Xıdo nufuz kardey iyən çəy ğudrəti bə dast sıeydumo əbin, nənki, çəy sultə iyən əmri jiyədə baği bımandon iyən bəvon Xıdoəti bıkəy.de qıləy co bəyoni ehanə çı vahidəXıdoku əlovə, co qıləy Xıdo bıəbe,əvon həm əpiyşone bə hestemoni aləmi hukumət əkəyn iyən çəvon miyono bo hukumət kardeyro iyən ğudrəti bə dast vardeyro, canq iyən daveon bə əməl əvoy.

Çın ayəonku umutedəmon:

1-bəbe hejo Xıdovəndi təsbihkəy iyən bo əy ıştə sıxan iyən zehnədə şərik ğərol doeyku bə diyəro bızıni. Zira mığəddəsə zoti soyb bıə Xıdo çəvon deştə zehn iyən zıvoni zikr kardə çiysə bəpeye.

2-bəbe mığət bıbi və icozə nıdəy ki,xorafi rəftor iyən fikon bə Xıdopərəston miyon nufuzkəy. həmçinin bəbe fırsət nıdəy ki, har qıləy əğıdə iyən fik de dini nomi, camiyədə rəvoc pəydukəy.

تُسَبِّحُ لَهُ السَّمَاوَاتُ السَّبْعُ وَالأَرْضُ وَمَن فِيهِنَّ وَإِن مِّن شَيْءٍ إِلاَّ يُسَبِّحُ بِحَمْدَهِ وَلَـكِن لاَّ تَفْقَهُونَ تَسْبِيحَهُمْ إِنَّهُ كَانَ حَلِيماً غَفُوراً (44)

Haft qılə osmonon iyən zəmin iyən bəvonədə bıə hakəs Xıdo təsbih kardedən. qırd çiyon əy de sıtoyişi bə yod dənoydən.əmmo şımə çəvon təsbihi dərk kardeydəniyon. həyğətən, əv həlim iyən əbaxşe.

Kərimə-Ğıroni bılındə maarifonku qıləyni,çı movcudaton şuurin bıey iyən çəvon çı Xıdovənde-Aləmi mığobilədə muti iyən xaze bıey iyən əy təsbih kardeye ki,çandə qılə ayədə bəy işorə bıə.ın ayə de ojə-oşkoə holəti bə ın məsələ işorə kardedə və hamyedə:ehanə şımə jıqo qıləy ko dərk kardey zıneydəniyon,əy inkor məkənən. zira, ın ko şımə fam iyən dərkiku xaricədəy. fəğət bızınən ki,jıqo qıləy ko movcude iyən şımə bə ın hestemoni aləmi və movcudaton bıə nəzə,de şuur iyən dərki bə ico ni.

Həlbəttə kali dini ruşinfikə şəxson movcudaton çı Xidovəndi mığobilədə səjdə iyən təsbihi,çəvon təbyəti ğanunon vədə  movcudaton təkviniyə təslim bıey zıneydən. əvvəla çı təbyəti ğanunon vədə çı movcudaton təslim bıey,təsbihi mənoədə ni. saniyən əmə həm çı təbyəti ğanunon mığobilədə movcudaton təslim bıey dərk kardedəmon. ım qıləy holədəy ki,ın ayə hamyedə ki,şımə bo movcudaton təsbihi dərk kardey ğudrəton ni.

Həlbəttə ilahi ovliyaon çı movcudaton və məxloğaton təsbihi dərk kardey zıneydən. çoko ki,bə Kərimə-Ğıroni ayəon əsos həzrəte Suleymon(ə) çı mujnəon sıxani sərəseydəbe iyən de pərəndəon qəp jeydəbe və ya çı islomi peyğombəri(s) dastədə bıə qədə sığon bəçəy risolət və peyğombərəti şəhodət doydəbin.

Çın ayəku umutedəmon:

1-hestemoni aləm Xıdovəndi təsbih kardedə,çən çıro inson de qırd ım məxloğati bə ico hərəkət kardedəni iyən çın kərvoniku bə dumoe.

2-insoni ım aləmi iyən çəy haləton zıney məhdud və noğise iyən çı veyə həyğəton dərk de təcrubiyə elmon mumkin ni,bəlkəm boçəy famero çəmə bəvəhyi ehtiyocımon heste.