483-ə hissə-İsra surə-53-55 şərifə ayəon

483-ə hissə

وَقُل لِّعِبَادِي يَقُولُواْ الَّتِي هِيَ أَحْسَنُ إِنَّ الشَّيْطَانَ يَنزَغُ بَيْنَهُمْ إِنَّ الشَّيْطَانَ كَانَ لِلإِنْسَانِ عَدُوّاً مُّبِيناً (53)

Və bəçımı bandəon vuji:vey çokə sıxanon bıkəyn.boçiki,şəyton çəvon miyono fitnə-fəsod kardeydə.həyğətən,şəyton hejo bo insoni qıləy ojə-oşkoə deşmon bıə.

Çımi bənav çandə kərə votemone ki,dini-islomi kali əmron baxşonku bo imoni əhli istimayi rabitəon hifz kardeyroe ta çəvon de camiyə mıxtəlifə qrupon rəftorədə bə sulh iyən oroməti boyis bıbu iyən canqo-muharibəon bərtərəf bıbu.sıxan votey tərz sosiyal rabitəonədə vey muhimmə rol ifo kardedə.liza Xıdovənde-Aləm bın ayədə hamyedə: tı fəğət bo məxloği ibodət kardey iyən ıştə diniyə vəzifəon əncom doey xoto cəvobdeh niş,bəlkəm bəbe bə mominə şəxson bıvotiş ki,bıdə şəyton çəvon sıxanonku suyi-istifodə nıkəy və bə camiyədə jiyə kəson kin-kudurəti boyis nıbu.

Sıxan votey barədə Kərimə-Ğıronədə ziyodə ayəon omə ki,kali qılə bə sıxani məzmuni iyən bəzi qılə bə çı cur sıxan votey işorə kardedə.çun Xıdovənde-Aləm ıştən vey çoke,çəməkuş həm vey çokə sıxan iyən əməlış piyedə.

Çın ayəku umutedəmon:

1-çokə qəp jıey,çı məhəbbət iyən dustəti zəminə hozzı kardedə iyən norəvoə sıxan çı şəytoni vəsvəsəon zəminə hozzı kardedə.

2-hakəs deştə zənni camiyədədeşmınəti iyən dave icod bıko,əv çı şəytoni dust iyən həmkoe.

رَّبُّكُمْ أَعْلَمُ بِكُمْ إِن يَشَأْ يَرْحَمْكُمْ أَوْ إِن يَشَأْ يُعَذِّبْكُمْ وَمَا أَرْسَلْنَاكَ عَلَيْهِمْ وَكِيلاً (54)

Şımə pərvərdıqor şıməni vey çok zıneydə.əgər bıpyişe bəşmə rəhmət bəvay ya əgər bıpyişe (bəşmə əməlon xoto) bəşmə əzob bəkay.və əmə tınımon boəvon vəkil vığandəmon ni(ta əvoni məcburkəyş).

De cokəson sıxan voteyədə vey yavə qəp jıey iyən hoziyəti dəlilonku qıləyni,ıştəni bəpe zıney iyən co kəson exroc və beji zıneye.çın nodırıstə rəftori mənşə,həm dini həmən elmiyə ğurur bıey bəzıne.çun əmə çı imoni əhlimon,təsəvvur məkəmon ki, hukmən əmə bə vəhışt bəşemon və çəmə tərəf mığobil çun kofire hukmən bə cəhəndım bəşe.ım ko bə insoni duyədə bıə ğururi boyis bəbe.ım nodırıstə xiyol boyis bedə ki, inson bəştə harcurnə həx bıdəy çokonə dılış piyedə de kofiron qəp bıjəno və hətta lozım bıə surətədə bəvon norəvoə sıxan həm bıvoti.

In ayə hamyedə: bə ilahi rəhməti ya bə ilahi əzobi şomil bıə kəson kon şəxsonin,bə Xıdovəndi ayide ki,əv çı həmmə kəsi daxili zıneydə.hiçkəs cokəsi çı cəhəndımi əhl bıey təsəvvır kardey əzıni və bəçəy xoto bəştə əsos doey nibəzıne ki,bə qıləy şəxsi iftiro bığandi ya əy təhğırkəy.

Nəinki, fəğət adiyə millət,bəlkəm peyğombər(s) həm bo məxloği vəkil ni ta əvoni bo imon vardey məcburkəy iyən kofiron bəçəvon kufri xoto bıkışto.Xıdovənd bə qırd insonon ixtiyorış doə ki,çı kufr iyən imoni miyono qıləyni bıvıjno.həlbəttə oxoyədə har qıləyniş mıəyyən kardə iyən bəvonış elan kardə.

Çın ayəku umutedəmon:

1-bəştə imoni məğrur məbəmon iyən ıştəni bəpe məqətəmon.zira hiçkəs nəinki,ıştə vəoməyku,bəlkəm çı cokəson vəoməyku həm xəbəş ni.

2-dini mıbəllığ bəbe ıştəni çı məxloği vəkil iyən yol nızıno,bəlkəm bəbe bızıno hətta peyğombəron həm həxışon nıbe,məxloği bo imon vardeyro məcburkəyn.

وَرَبُّكَ أَعْلَمُ بِمَن فِي السَّمَاوَاتِ وَالأَرْضِ وَلَقَدْ فَضَّلْنَا بَعْضَ النَّبِيِّينَ عَلَى بَعْضٍ وَآتَيْنَا دَاوُودَ زَبُوراً (55)

Və ıştı pərvərdıqor osmonon iyən zəminədə bıə hakəsi vey çok zıneydə.və həlbəttə əmə kali peyğombəron bəsə co qıləynisə bəpe qətemone və bə Davudi Zəbur əto kardemone.

Vəynə ayədə Xıdovənde-Aləm çı insonon botın iyən zohiri zıneyku bəhs kardedəbe. ın ayə bə Xıdovəndi osmonon iyən zəminədə bıə bə hestemoni-aləmi qırd movcudaton bıə elmi işorə kardedə və ayə dəvomədə çı peyğombəron təbliğon  iyən çəvon risoləti tafuton barədəy.çəvonku qıləy qrup çı kitob iyən şəryəti soyb bıən iyən veyə şəxson çəvon dini təbliğ kardey vəzifəşon bıə.

Kali peyğombəron bə qıləy məxsusə ğovm və ğəbilə məhdud bıə.çəvon bəzi qılə məmur bin ki,çı zəmini kurə ziyodə məntəğəonədə bıə insonon hidoyətkəyn.çoko ki, Kərimə-Ğıroni co ayəonədə kali peyğombəron “ulul-əzm” unvaniyədə ğeyd bıə ki, həzrəte Nuh(ə) iyən həzrəte İbreyim(ə) çəvonku bıə.

Çın ayəku umutedəmon:

1-aləm çı Xıdo məhzəre əv bə həmmə çiyon aqahe.ısət çı osmoni bılındə vırədə bıbu ya zəmini nığılə vırədə.

2-çı peyğombəron miyono həm mərtəbəon movcude və umumən bənə xılğəti sistemi mənodor iyən hədəfış bıə farğonış heste.şəryəti soxtemonədə həm tafuton heste ki, ımon qırd bə ilahi hikmət və elmi əsose.