487-ə hissə-İsra surə-68-70 şərifə ayəon

487-ə hissə

أَفَأَمِنتُمْ أَن يَخْسِفَ بِكُمْ جَانِبَ الْبَرِّ أَوْ يُرْسِلَ عَلَيْكُمْ حَاصِباً ثُمَّ لاَ تَجِدُواْ لَكُمْ وَكِيلاً (68)

Ayə şımə peştıpur bıon ki,əv şıməni(deştə ğəzəbi) hışkiyədə bə zəmini ji nibəbarde ya rığon(sığon) voşi bəşmə nıvoy? Çən,peşo şımə boştə hiç qıləy hifzəkə və hıvoskə pəydu nıkoyn.

Dəvardə bərnomədə Kərimə-Ğıroni ayəon bə ım nuktə işorə kardedəbe ki, Xıdovənde-Aləm dıyoş bo şımə hozzış kardə ki,ta çəyku bəhrə bobənən iyən ha faxti bə qıləy hadisə giriftor biyon,fəğət əv şıməni nicot kardey bəzıne.ın ayə hamyedə: qımon məkənən ki,xətər iyən təhlukə fəğət dıyoədəy.vey mumkine hışkiyədə şımə lınqi jiku qıləy əzob bəşmə nozil bıbu və bənə Ğaruni zəmin şıməni ebordıni ya qıləy tındə vo bıqıni və ya çı osmoniku qədə sığon bəşmə sə rukoy.bın zəmononədə sovə Xəllağe-Aləmi kii şımə coni roxney bəzıne iyən bəşmə koməq kardey bəzıne?

Çın ayəku umutedəmon:

1-har co bıbəmon çı Xıdo sultə jiku xaricədənimon və bo ilahi irodə mığobilədə mandey hiç qıləy ğudrətımon ni.çən,bə Xıdo əmron pemandəmon.

2-əzobiku əmonədə mandey hiss,çı ğəflət iyən ilahi həddonku dəvardey zəminə hozzı kardedə.

أَمْ أَمِنتُمْ أَن يُعِيدَكُمْ فِيهِ تَارَةً أُخْرَى فَيُرْسِلَ عَلَيْكُمْ قَاصِفا مِّنَ الرِّيحِ فَيُغْرِقَكُم بِمَا كَفَرْتُمْ ثُمَّ لاَ تَجِدُواْ لَكُمْ عَلَيْنَا بِهِ تَبِيعاً (69)

Yaan ki,xatırcəmiyon Xıdovənd ijən sənibəton şıməni bə dıyo bardə faxti, bəşmə sə qıləy vironəkə tufan nibəvğande iyən şıməni bəşmə kufri xoto ğərğ nibəkay? bın zəmon çəmə ğəzəbi vədə boştə hiç qıləy havarkəş pəydu nibəkayon.

Vəynə ayəon dəvomədə ın ayə hamyedə:ehanə Xıdo şıməni bə əmnə vırə iyən hışki sahil rosney bədiqə,şımə kufr iyən nunkurəti bıkoyn,Xıdovənd ğadire şıməni ijən bə dıyo oqordıno və jıqo ovəyz iyən tufanon bəşmə soyəx bıvğandi ki,həni bo şımə nicot pəydu kardey iyən bo ıştə coni roxney hiç qıləy vırə nımando və şımə dıyoədə ğərğ bıbon.

Bəle, ilahi ğəhro-ğəzəb zəmon iyən məkon zıneydəni və kufr iyən noşukurəti bın dınyoədə yavə ağıbəton dumo ıştə vardedə ki,əgər inson bəy giriftor bıbu,həni xilosi ro nibəvinde.

Çın ayəku umutedəmon:

1-insoni bədbəxti iyən həlokəti amil,çəy nodırıstə meyl iyən rəftorone.Xıdovənd bə bəşəri lutf kardedə,əmmo insoni nunkurəti Xıdo neməton bə neğmət,yəni bəlo təbdil kardedə.

2-təhlukə hejo ratədəy.de tufani bəpeştə bıə oroməti məğrur məbəmon.zira,qıləy mə`rəkəku perəxey,çı kulli bəloonku ozod bıey mənoədə ni.

وَلَقَدْ كَرَّمْنَا بَنِي آدَمَ وَحَمَلْنَاهُمْ فِي الْبَرِّ وَالْبَحْرِ وَرَزَقْنَاهُم مِّنَ الطَّيِّبَاتِ وَفَضَّلْنَاهُمْ عَلَى كَثِيرٍ مِّمَّنْ خَلَقْنَا تَفْضِيلاً (70)

Və həyğətən,əmə Odəmi fərzəndonımon əziz qəte iyən əvonımon hışki və dıyoədə(de mərkəbon) novnomone və çı pokə çiyonku bəvon ruzimon doe iyən əvonımon bəsə veyə məxloğisə komil bəpemon qəte.

In ayə bə insoni çı co movcudonsə zotiyə bəpe bıey işorə kardedə, hamyedə: Xıdovənde-Aləm joqo bə bəşəri kəromətış inoyət kardə ki,əvış bə təbyəti sultəş baxş kardə.liza əv kardey zıneydə qırd çiyon bəştə xıdmət biyəy iyən çəyku bəhrə bobəy. hışki iyən dıyo  çı bəşəri lınqi jiyədəy və əv de mıxtəlifə mərkəb iyən penıştə çiyon ısət çı heyvonon bıbu ya kəşti və co nəğliyyat vositəon bıbu ki,hışki iyən dıyoku dəvardedə.

Həlbəttə bın ayədə bəhs bıə kəroməton,umumiyə kəromətonin və bə bəşəri qırd fərdon şomil bedə.əmmo inov iktisobiyə kəroməte ki,pokon,çokə ko soybon iyən təğvaninə şəxson de cəhdo-təloşi əy bə dast vardedən.Kərimə-Ğıron bın barədə hamyedə: ”innə əkrəməkum indəllahi ətğakum”. yəni Xıdovəndi palu şımə vey əzizə qılə şımə vey təğvaninə şəxsonin.umumən inson nəinki,bəsə zəmini məxloğisə, bəlkəm bəsə osmoniyə mələkonsə həm zotiyə ərcəhiyyətış və bəpe bıeyış heste. liza çı məlayikon məscud və səjdə bıə kəs be və Xıdovənde-Aləm bə məlayikon əmrış karde ki,bəy xıdmətkəyn.

Həlbəttə çın kəroməti hurməti nıoqətə iyən çəy ğədri nızınə insonon və çı insoniyyəti royku xaric bıə kəson,kəromətışon ni iyən de Ğıroni təbiri əvon hətta çı ço lınqə heyvononku həm bejin.zira ıştə sıxan,rəftor iyən co koonədə bıə deştə nodırıstə intixobi,ıştə insonətişon çı dasto doə.

Çın ayəku umutedəmon:

1-insoni bəştə məğam iyən kəroməti dığğət kardey,çəy bə ilahi dərqo bıə şukri iyən çı nunkurətiku bə diyəro bıey zəminə hozzı kardedə.  

2-Xıdovəndi çı insoni vucudədə çəy ruşd iyən kəmoli qırd zəminəonış noəşe iyən təbyət və xarici muhitədə çəy qırd imkonatonış hozzı kardə.

3-səfər karde səbəbon,ısət çı dıyo ya hışki bıbu,Xıdovəndi çı bəşəri ixtiyorədə ğərol doə nemətonkue ta boştə ehtiyocon bərtərəf kardey iyən bo təcrubə kəsb kardey xoto çəyku bəhrə bobəy.