488-ə hissə-İsra surə-71-73 şərifə ayəon

488-ə hissə

يَوْمَ نَدْعُو كُلَّ أُنَاسٍ بِإِمَامِهِمْ فَمَنْ أُوتِيَ كِتَابَهُ بِيَمِينِهِ فَأُوْلَـئِكَ يَقْرَؤُونَ كِتَابَهُمْ وَلاَ يُظْلَمُونَ فَتِيلاً (71)

Qıləy ruj ki,çı məxloğiku ha dastə de çəvon yol iyən rəhbəron bə ico vanq bəkamon. çən,hakəsi noməye-əməli bəçəy rostə dasti doey bıbu,əvon ıştə nomə(de şoy-vonəti) bəhandeyn iyən bəvon i zərrə həm sıtəm nibəbe.

Har qıləy inson iştimayi və ideolojiyə koonədə boştə qıləy rəhbər vıjniyedən və əy boştə nımunə ğərol doydən və ıştə jimoni koonədə bəvon tabe beydən.Kərimə-Ğıron bın ayədə hamyedə:ğıyoməti ruji həm fərdon deştə həmonə rəhbəron məhşur bəbeyn. zira,axırət çı həmonə dınyo jimoni təcəssıme.ehanə çəy fiki iyən idelojiyə rəhbərçı nur iyən hidoyəti imom bıbu,əv həm nicot pəydu bəkay və vəhıştədə bəbe və əgər çəy rəhbər qıləy fosid iyən ro dəqıjnə kəs bıbu,əv həm ğıyoməti ruji cəhəndımədə bəbe.ayədəvomədə hamyedə:həlbəttə ğıyoməti məhkəmə bə ilahi ədoləti əsos mıhokimə bəbe və bə hiç kəsi çı darzəni tıki həddədə həm zılm nibəbe.

Çın ayəku umutedəmon:

1-bəştə iştimayi,fiki iyən ideolojiyə rəhbəron pemandey təsir,tosə ğıyoməti ruji dəvom bəkay və məxloği ğıyoməti ruji bəçəvon rəhbəron əsos co bəkayn.

2-imomət iyən rəhbərəti çı insoni jimoni mətn və daxilədə ğərolış qətə və çəy əbədiyə baxtəvərəti iyən bədbəxtəti zəminə hozzı kardedə.

وَمَن كَانَ فِي هَـذِهِ أَعْمَى فَهُوَ فِي الآخِرَةِ أَعْمَى وَأَضَلُّ سَبِيلاً (72)

Ha kəs bın dınyoədə ğəlbış ku(bıbu) iyən ro dəqıjno,axırətədə həm ku iyən ro dəbəqıjne.

Vəynə ayədə insoni uxrəviyə jimonədə baxtəvərəti iyən bədbəxtətiyədə bıə çəvon rəhbəron rolış bəyon karde,ın ayə həmonə mətləbi dəvomədə bə insoni xoşbəxtəti iyən bədbəxtəti daxiliyə amili işorə kardedə və hamyedə:çoko ki,qıləy rəhbər xariciyə amili unvanədə bə insoni tale təsirış heste,pokə dıləti və həxı ğəbul kardey və ya çımi əks dıli nopokəti və həxı vədə kuə dıləti həm, joqo çı insoni jimonədə yolə rol ifo kardedə.liza çoko ki,inson ğıyoməti ruji deştə dınyəviyə rəhbəron bə ivrə məhşur bəbe, ehanə əvon dınyoədə kuə dıl bıbon,ğıyoməti ruji həm ku iyən ro dəqıjniyə holədə məhşur bəbeyn.

Çın ayəku umutedəmon:

1-ğıyomət çəmə dınyoədə bıə əməlon əks-şuayvə harçi bıkaştəmon əy həm bəçınemon.

2-dınyoədə bəsirət,axırətədə həm bəsirət dumo ıştə vardedə iyən dınyoədə kuyədıləti bə ğıyoməti ruji ıştə sə qim kardey və zəloləti boyis beydə.

وَإِن كَادُواْ لَيَفْتِنُونَكَ عَنِ الَّذِي أَوْحَيْنَا إِلَيْكَ لِتفْتَرِيَ عَلَيْنَا غَيْرَهُ وَإِذاً لاَّتَّخَذُوكَ خَلِيلاً (73)

Kam mandəbe ki,(əvon) tıni əmə bətı vəhy kardə çiyku bexəbə bıkəyn ta vəhyiku co qıləy çi bəmə nisbət bıdəyş və bın zəmon tıni boştə dust bəzıneyn.

Çı peyğombəron xısusiyyətonku qıləyni ismət və beqınoəti məğame.Xıdovənde-Aləm ıştə sıxani dırıst iyən komilə surətədə bəştə bandəon quşi rosney xoto,ıştə peyğombəron çı harcurnə xəto,səhv və yodo bekardeyku bə diyəro oqətəşe. ım bəçəy xotoe ki,əvon ıştə votemonədə bə səhvi dıço nıbon iyən ğərəz Xıdovəndi bəvon ilhom kardə çiyonku co qıləy çi ıştəku bə məxloği nırosnon və ıştə rəftor iyən sıxanonədə bə yodo bekardey və səhvi giriftor nıbon ki,həni məxloğ bəvon etımod nıkəyn.

In ayə hamyedə: mışrikon təloş kardedəbin ki,deştə hiyləqərə sıxanon iyən de duyə vədəon, peyğombəri məxloği bə Xıdo tərəf dəvət kardey koyku oqəton.çoko ki, tarıxədə omə Məkkə şəhri yolon çandə xonəxoşon çı peyğombəri palu vığandeşone və bə həzrəti voteşone ki,ehanə tı dumo mol və sərvətiş,tı harçi bıpyoş,əmə bətı bədomon. əgər reçinə jenon oruzuədəş,əmə ıştı ixtiyorədə ğərol bədomon.əmmo məxloği bəştə din iyən ayini tərəf dəvət kardeyku dast bıkəş.peyğombər(s) çəvon cəvobədə hamyeşe:bə Xıdo ğəssəm! əgər həşi bəçımı qıləy dasti və ovşumi bəçımı co qıləy dasti həm bınon,az ijən ıştə risolətiku dast nibəkəşem.

23 sori mıddətədə peyğombər(s) həm çı Məkkədə bıə faxti iyən çı peşo Mədinədə bə hukumət rəsə faxti,mışrikon de mıxtəlifə formə ə həzrəti ya təhdid kardeydəbin və ya bə ə həzrəti mıəyyən çiyon təklif kardedəbin ki,əv ıştə risolətiku dast bıkəşo. əmmo ə həzrət bə dumo penıkıriye  iyən ıştə dastiku omə koş əncom doe.

In ayə həm hamyedə:mışrikon ziyodə cəhdışon karde ta de saziş və dustəti ro tıni(peyğombəri) bə dast dənən iyən çı Xıdo royku ğafil və bexəbəkəyn,əmmo Xıdovənde-Aləm tınış çəvon hiyləonku əmonədə oqətışe iyən icozəş nıdoe ki, şəytoni vəsvəsəon bətı təsirkəy.

Çın ayəku umutedəmon:

1-islomi camiyə rəhbəron bəbe oğo bıbon və bızınon ki,deşmınon de zohiriyə dustəti plani, islom iyən mısılmınon zəyif kardey dumon.

2-bə insoni əxloğiyə erjon iyən diniyə əğıdəon zəyifəti boyis bıə harcurnə dustəti, çı Ğıroni prizmaku rədd bıə iyən ğəbul bıənin ni.