491-ə hissə-İsra surə-81-84 şərifə ayəon

491-ə hissə

وَقُلْ جَاء الْحَقُّ وَزَهَقَ الْبَاطِلُ إِنَّ الْبَاطِلَ كَانَ زَهُوقاً (81)

Və vuji:”həx ome botıl nobud be,həyğətən botıl məhv bıənine”.

In ayə bə islomi-peyğombəri(s) xitob kardedə və hamyedə: tı məmuriş ki, bə mominon bəşorət bıdə və bəvon çı həxı səbarz iyən botıli məhv bıey elankə. ın ayə mominon həm umudəvo  kardedə ki,de qırd problemon iyən muşkilaton bə ico bə vəomə nikbin və umudəvo bıbon və bızınon ki,botıl deştə qırd cilvəon oxoyədə şıənine iyən hiç qıləy dəvomış ni.

Həxı kəlimə qıləy sabit iyən baği mandə koy mənoədəy. Çun fəğət Xıdoe ki,hejo sabit iyən əbədi bəmande iyən co koon hejo əvəz bıənine.liza çı Xıdovəndi nomonku qıləyni həxe.həlbəttə harçi çəy tərfiku nozil bedə,həx iyən sabit bəbe.çın ayəku umutedəmon:

1-həxı baği mande iyən botıli məhv bıey,qıləy ilahi sınnət və ğanune.harçənd həxı tərəfdoron kam iyən botıli tərəfdoron ziyod həm bıbu.

2-de həxı omey,botıl çı miyoniku şeydə.çən,həxı tərəfdoron bəbe cəhdkən ki,həxə sistem camiyədə bərğərol bıbu.

وَنُنَزِّلُ مِنَ الْقُرْآنِ مَا هُوَ شِفَاء وَرَحْمَةٌ لِّلْمُؤْمِنِينَ وَلاَ يَزِيدُ الظَّالِمِينَ إَلاَّ خَسَاراً (82)

Və Çəmə Ğıronədə vığandə çiyon bo mominon(dılon)şifo iyən rəhməte və çı sıtəmkoron fəğət xusrani(zərəli) ziyod bəkay.

Vəynə ayə dəvomədə ki,bə həxı əbədi iyən botıli məhv bıey təkid kardedəbe,ın ayə bə həxı barizə dəlilonku qıləyni işorə kardedə və hamyedə:Kərimə-Ğıron ki,Xıdo tərəfiku nozil bıə,fəğət bo həxı tərəfdoron yəni bo mominon foydədnin iyən səmərbaxşe.

Əvon Ğıroni şua nur iyən hidoyətiku bəhrə bardedən iyən deçəy vositə ıştə ruhiyə noxəşətiyon mualicə kardedən iyən bə ilahi məxsusə rəhməti şomil bedən.əmmo mışrikon və kofiron ki,bəştə inodkorəti xoto de Kərimə-Ğıroni maarif və həyğəton mıxolifət kardeydən, bəçəvon bın mırdoləti xoto fəğət çəvon ruhiyə yavətiyon ziyod bəbe iyən əvon bə veyə zərəl və xusrani dıço bəbeyn.

Çoko ki, voşi ov bə munbit iyən hozzıə zəminədə beməyon perəsey iyən şoyvonəti boyis bəbe. əmmo çə həmonə voşi ovi bəsə nemekinə vırə səpe voye,ğərəz teğ iyən aləfi co çi nibəbe.

Həlbəttə Ğıroni şifo bıey,bə insoni ğəlb iyən ruhi məxsus ni və bə rəvoyəton əsos hətta çəy handey bə kali cismoniyə dardon şifo pəydu kardey həm boyis bedə.ım qıləy koe ki, ımruj elmiyə surətədə mualicə mərkəzonədə subut bıə.çın ayəku umutedəmon:

1-bə Xıdo imon,ilahi məxsusə rəhmət və lutfi zəminəon hozzı kardedə.

2-çun kofiron bə ilahi əmron əməl kardedənin,çəvon mıxolifət çəvon qınon ziyod iyən çəvon cəzo qon kardedə və oxoyədə çəvon xəsorət vey bedə.

وَإِذَا أَنْعَمْنَا عَلَى الإِنسَانِ أَعْرَضَ وَنَأَى بِجَانِبِهِ وَإِذَا مَسَّهُ الشَّرُّ كَانَ يَؤُوساً (83)

Və Ha faxti bə insoni qıləy nemət ətokəmon, dim qordıneydə(və bəştə təkəbbırətiro) ıştə ami pekırnedə və çun tikəy bəy zərəl bırəso,(həmmə çiyku) məyus və noomid beydə.

In ayə bə umum-məxloği xısusiyyətonku qıləyni ki, ilahi və dini tərbiyə jiyədə ğərolış qətəni, işorə kardedə və  hamyedə:deməkə ki,həmmə neməton çı Xıdovəndi tərəfikue. əmmo kali insononədə təkəbbırəti ruhiyyə boyis bedə ki,bəy nemət baxş kardə kəsi çı yodo bekəy iyən de yoləşəxəti formə Xıdovəndi mığobilədə mandedən iyən bəçəy əmron pemandedənin.

Təbiiye joqo fərdon bə problemon giriftor bıə faxti,çun qıləy ğoymə təkyəcoşon ni, bə sərqərdonəti dıço bedən iyən məyus və noomid bedən.əmmo imoni əhl bə Xıdovəndi təvəkkul iyən təkyə kardə formədə,hətta vey yavə şərayitədə həm umudəvo mandedən və hiçfaxti bə vəomə noomid bedənin.çın ayəku umutedəmon:

1-qırd insonon Xıdo neməton zıney iyən bəy şık kardey əvəzi,ıştə fik və istedadi iyən zəhməti məhsul zıneydə və Xıdo çı yodo bekardedən.ım hiss mumkine ziyodə insononədə bə vucud boy.

2-Xıdoş nıbə inson zəyife.kamə zərfiyyətə insonon rifoh və asyişədə vəbə ğəfləti iyən problemondıço bıə faxti, məyus və noomud bedən.

قُلْ كُلٌّ يَعْمَلُ عَلَى شَاكِلَتِهِ فَرَبُّكُمْ أَعْلَمُ بِمَنْ هُوَ أَهْدَى سَبِيلاً (84)

Bıvot:”hakəs bəştə soxtemon və əxloği əsos əməl kardeydə. çən, şımə pərvərdıqor bə hidoyəti vey nez bıə kəsi vey çok zıneydə.”

In ayə bə insonon xıslət və ruhi çəvon rəftor və əmələdə bıə roli işorə kardedə və hamyedə:çı fərdon daxiliyə xıslət və xosyət çəvon jimonədə bıə rəftor və əməli şivə və metodi mıəyyən kardedə.həlbəttə ruhiyyə və xıslət çı dıqlə əməli təsiri jiyədəy. qıləy vərasət və varisəti və co qıləyni tərbiyə.iminə qılə xeyzoniku peqətey bedə və dıminə qılə çı muhitiku(xıyzon,məktəb və camiyə muhit).əmmo de ım holi bə ım dıqlə daxili iyən xariciyə amili hakime,çı insoni ıştən ixtiyore ki,kardey bəzıne bə ha deynən ğələbəkəy.oxoyədə varisəti və tərbiyə nəticə çı fərdi irodə və ixtiyore ki, çəy soxtemon və şikili soxteydə və çəy rəftori bə vucud vardedə.çın ayəku umutedəmon:

1-insoni rəftor,çəy fikiyə şəxsiyyəti iyən çəy ruhi və əxlaği xısusiyyəton ovəynəy.(kuzə dılədə çiç heste,əv həm bə bi bebəşe).

2-mırdolə fik iyən niyyəton,nodırıstə rəftoron zəminə hozzı kardedə.çən,bəbe çəvonku pərhizkəy.