493-ə hissə-İsra surə-89-93 şərifə ayəon

493-ə hissə

وَلَقَدْ صَرَّفْنَا لِلنَّاسِ فِي هَـذَا الْقُرْآنِ مِن كُلِّ مَثَلٍ فَأَبَى أَكْثَرُ النَّاسِ إِلاَّ كُفُوراً (89)

Və həyğətən,bın Ğıronədə bo məxloği harcurnə misol vardemone.əmmo milləti veyni nıpemandin və sovə inkori co qıləy ko nıkardeşone.

Vəynə proqramədə,Kərimə-Ğıroni hamyeşe ki,ehanə təmom inso-cın bə ico qırdə bıbon, bənə Ğıroni qıləy kitobi vardey fikədə bıbon,əvon bo ın ko əncom doey ğudrətışon nibəbe.ın ayə hamyedə ki, çı Kərimə-Ğıroni xısusiyyətonku qıləyni ıme ki, bə insoni jimoni koon ayid bıə həmmə çiyon,ısət çı fərdi ya iştimayi bıbu, mətləbonış bəyon kardə və de mıxtəlifə bəyonon formə bə Xıdo kitobi qıləy məxsusə cəzzabiyyət və reçinətiş baxş kardə ki,ım ıştən çı Ğıroni ecaz və mecuzə bə hisob omeydə.

Ayə dəvomədə hamyedə:əmmo insoni nunkurəti ruhiyyə boyis bedə ki,bə Kərimə-Ğıroni həxə kəlomi dığğət kardey əvəzi,çəyku dim bıqordıno iyən çəy həyğəton inkorkəy.

Çın ayəku umutedəmon:

1-təlim və tərbiyə şivəonku qıləyni,mətləbon de təmsili bəyon kardeye ki,Kərimə-Ğıron çəyku ziyodə bəhrəş bardə.

2-çı məxloği əksəriyyəti inkor və noşukurəti,bə Ğıroni həğğaniyyəti qıləy xələl nibərosne. zira həx iyən botıl bə əksəriyyət iyən əğəliiyyəti(kami)tabe ni.

وَقَالُواْ لَن نُّؤْمِنَ لَكَ حَتَّى تَفْجُرَ لَنَا مِنَ الأَرْضِ يَنبُوعاً (90)

Və voteşone: çanəndə ki,tı boəmə zəminiku qıləy honi cari nıkoyş,əmə bətı imon nibəvardemon.

أَوْ تَكُونَ لَكَ جَنَّةٌ مِّن نَّخِيلٍ وَعِنَبٍ فَتُفَجِّرَ الأَنْهَارَ خِلالَهَا تَفْجِيراً (91)

Ya botı çı anqı və xımoku qıləy boğı bıbu ki,çəvon miyono ruon cari bıkoyş.

Çun mışrikon çı Kərimə-Ğıroni mecuzə bıey inkor kardeydəbin,əve bə peyğombər(s)-i voteydəbin ki,əmə bəştı nıbuvvəti bəvədə imon bəvamon ki,tı bənə navnə peyğombəron maddi iyən təbiiyə mecuzəon bəmə nışon bıdə.məsələn, tı qıləy hışkə zəminiku qıləy ovi çeşmə xarickə ya ovə ruon boəmə carikə.

Qıləy holədə ki,peyğombəron ıştə risoləti isbot kardeyro,de Xıdovəndi izni qıləy mecuzə vardedəbin və jıqo nıbe ki,harçi məxloğ tələb kardedəbe,əvon həm dərhol əy bo milləti vardedəbin.ehanə kali vırəonədə jıqo bıəbu,ım xəbərdorəti doey bıə ki, ehanə mecuzə de mıxloği irodə bıbu və millət əy inkorkəy,bənə Saleh(ə)-i ğovmi ilahi əzob həmonə ğovmi ebəqəte.

Çın ayəku umutedəmon:

1-peyğombəron hədəf məxloği irşod iyən hidoyət kardey bıə.əmmo məxloği veyni boğ, telı və sərvəti çı yolyəti iyən ğudrəti nışonə zıneydən və çı peyğombəron əsliyə hədəfiku bexəbən.

2-dini rəhbəron bəbe bo məxloği nəzə cəlb kardey xoto bəçəvon bemənoə tələbon dığğət nıkəyn.

أَوْ تُسْقِطَ السَّمَاء كَمَا زَعَمْتَ عَلَيْنَا كِسَفاً أَوْ تَأْتِيَ بِاللّهِ وَالْمَلآئِكَةِ قَبِيلاً (92)

Ya çəmə fik kardə formədə osmoni poəkə çəmə səpe rukə ya Xıdo və mələkon bəçəmə mığobil biyə.

أَوْ يَكُونَ لَكَ بَيْتٌ مِّن زُخْرُفٍ أَوْ تَرْقَى فِي السَّمَاء وَلَن نُّؤْمِنَ لِرُقِيِّكَ حَتَّى تُنَزِّلَ عَلَيْنَا كِتَاباً نَّقْرَؤُهُ قُلْ سُبْحَانَ رَبِّي هَلْ كُنتُ إَلاَّ بَشَراً رَّسُولاً (93)

Ya anki, botı de zəro-zibo pur bıə qıləy kə bıbu ya tı osmonədə bıpəroş. həlbəttə bəştı osmonədə pəre bəvədə bovə bəkamon ki,tı bo əmə qıləy kitob enovnış və əmə əy bəhandəmon.vuji:”çımı pərvərdıqor poke. ayə az ğərəz vığandə bıə bəşəri co qıləy çim?”.

Navnə ayəon dəvomədə ki,çı mıxolifon bəhonə vardeyku bəhs kardeydəbe,ın ayəon çəvon co bemənoə təvəğğon joqo bəyon kardedə.əvon voteydəbin ki,bəmə vədə doə bıə həmonə əzobi çı osmoniku nozilkə və əməni məhvo-nobudkə.ya həmonə Xıdo iyən mələk ki,iddio kardedən bətı vəhy nozil kardedən,əvoni zəmini dimisə biyə ta əmə əvoni deştə çəşon bıvindəmon.yaanki,ıştən bıpər bə osmon  və boəmə qıləy kitob biyə ki,əmə əy bəhandəmon.

Peyğombər(s)-i çəvon beədəbəti iyən bemənoə bəhonəon mığobilədə cəvobış iqlə sıxan be ki, az həm bənə şımə qıləy bəşərim ki,Xıdovəndi əmənış ofəyə iyən mı həm çəy bandəm.fəğət çımı deşmə fərğ ıme ki,Xıdovəndi bəçımı duş qıləy risolətış noə ta çəy kəlomi bəşmə bırosnım. Çımı votə sıxanon bəşmə xeyriye və az çımi mığobilədə şıməku hiççim piyedəni.

Umumən mecuzə qıləy koe ki,ağli cəhəto məhal və ğeyri-mumkin ni.əmmo təbiiyə surətədə bın maddiyə aləmədə vağe beydəni. qıləy holədə ki, kali mıxolifon tələb kardə çiyon ağli cəhəto ğeyri-mumkin be. məsələn əvon voteydəbin ki,Xıdo iyən mələkon bə zəmin biyə və əmə əvoni deştə çəşi bıvindəmon,ım məhal və ğeyre mumkine. çun əvon cism nin və çəmə çəşon fəğət cismon vindedən.hətta kali cismon təsiron vindey bedəni.bənə cazibə ğuvvə və maqniti xosyəti ki,har dynən cismin və maddən.əmmo de çəşi vindey bedənin.

Çın ayəonku umutedəmon:

1-çı məxloği veyni ağl,çəvon çəşonədəy və fəğət çiç vindedən əy həm ğəbul kardedən. qıləy holədə ki,aləmədə ziyodə həyğəton heste ki,de çəşi mışohidə bedəni.

2-peyğombəron ıştə tərəfiku hiç qıləy ko əncom doydənin.əvon bə ilahi əmron təslimin və Xıdovənd həm behikmətə ko əncom doydəni.