494-ə hissə-İsra surə-94-97 şərifə ayəon

494-ə hissə

وَمَا مَنَعَ النَّاسَ أَن يُؤْمِنُواْ إِذْ جَاءهُمُ الْهُدَى إِلاَّ أَن قَالُواْ أَبَعَثَ اللّهُ بَشَراً رَّسُولاً (94)

Və hidoyət bə məxloği soyəx omeyədə,hiççi əvonış bo imon vardeyro nıoqəteşe. fəğət voteşone:”ayə Xıdovəndi bəşərış peyğombəri unvanədə məbusış kardə?”.

Dəvardə bərnomədə votemone ki,Məkkə mışrikon boştə imon vardeyro,şərton noydəbin. min cumlə voteydəbin ki,bəbe əvon Xıdo iyən çəy məlayikon bıvindon yaanki, peyğombər bə osmon bışo iyən deştə qıləy kitob biyəy ta əvon əy ğəbulkəyn. ın ayə bəçəvon bın bəhonə rişə işorə kardedə və hamyedə:əvon qımon nıkəyn bəbe Xıdo ıştən ya çəy məlayikon nozil bıbu və ya de əvon sıxankəyn iyən əvoni hidoyətkəyn.qıləy holədə ki,Xıdovənd bənə əvon qıləy bəşərış məbusış kardə ki, ta de zıvoniyə hidoyətiku əlovə,əmələdə həm bo əvon ulqu bıbu.əvon bəbe bıvindon ki, peyğombər həm bənə əvon qıləy insone və çiç voteydə sıftədə ıştən əməl kardeydə və cokəson həm kardey bəzıneyn əməlkəyn.

De qıləy co iborəti,çəvon bo peyğombəri zəyif hisob kardə noxtə,çəy zumandə noxtə be. çı peyğombəri inson bıey,çəy zumandə noxtə be.çun deməkə ki,çəy bə insoni xas bıə cinsiyə meyl və ğərizəş hestebe,əmmo əv bə insoniyə kəmolaton nayil bıəbe.

Çın ayəku umutedəmon:

1-çı peyğombəron həx iyən məntığiyə sıxanon mığobilədə bəhonə vardey de insoni ıştən zərəl kardey obərəxe iyən inson çı hidoyətiku məhrum bəmande.

2-insoni dınyoədə bıə məğam və kəromət,tosə əvırəy ki,kardey zıneydə Xıdovəndi tərəfiku bə risoləti bılındə məğami bırəso.

قُل لَّوْ كَانَ فِي الأَرْضِ مَلآئِكَةٌ يَمْشُونَ مُطْمَئِنِّينَ لَنَزَّلْنَا عَلَيْهِم مِّنَ السَّمَاءِ مَلَكاً رَّسُولاً (95)

(Ha pəyğombər ha! bəvon) vuji:əgər zəminisə mələkon bıəbin ki, de oroməti bə ro poyəbin, həyğətən əmə osmoniku qıləy firiştə peyğombəri unvanədə bo əvon əvğandimon.

Çı mışrikon bəhonəon cəvobədə,ın ayə vəynə ayə dəvomədə hamyedə:ehanə zəmini dimisə şımə insonon əvəzi məlayikon jimon kardəşonbe,hukmən bo əvon qıləy firiştə nozil əkəmon tə əvoni hidoyətkəyn.ım çı Xıdovəndi ğanune ki, boştə bandəon hidoyətiro çəvon ıştən cinsiku bo əvon qıləy peyğombər bıvğando ta əv boəvon ulqu bıbu və çı sıxaniku əlovə çəvon əməl həm boəvon huccət və dəlil bıbu.

Odəmi dığğəti cəlbəkə nuktə ıme ki,ın ayə bəy işorə kardedə,çı be`səti lozım bıey məsələy ki, hamyedə:əgər qırd zəmini əhl mələk bıəbin və əvon həmmə rifoh, oroməti iyən asayişədə bıəbin,ijən bo əvon çəvon ıştəniku qıləy şəxs əvğandimon. zira bandəon de kəmol iyən oroməti xulosə bedəni,bəlkəm mənəviyə ruşdiyən təkamul həm lozıme və ım mənəviyə kəmol be peyğombər iyən ro nışon doə kəson hosil nibəbe.

Çın ayəku umutedəmon:

1-tərbiyə şərt,tərbiyə doəkəsi de tərbiyə ğəbul kardey eynicinsətiye və jıqo nıbu sırfən de zıvoni təblıği foydəş ni.

2-bo bandəon hidoyətiro peyğombər təyin karde,Xıdovəndi ğətiyə ğanunonkue.

قُلْ كَفَى بِاللّهِ شَهِيداً بَيْنِي وَبَيْنَكُمْ إِنَّهُ كَانَ بِعِبَادِهِ خَبِيراً بَصِيراً (96)

(Ha peyğombərha! bəvon) vuji:çımı deşmə miyono Xıdo bo şoydəti vəs kardedə. bərosti əv bəştə bandəon nisbətədə aqah və(əvoni) vindedə.

Çı mıxolifon inodkorəti və bəhonəon dəvomo,bın ayədə Xıdovənd bəştə peyğombəri dılvandi doydə ki,çəvon ım be məntığə sıxanon bəştı məyusəti boyis nıbu, bəlkəm bəvon vuji:çımı bəşmə imon vardey,mıni təsdığ kardey iyən himoyə kardey hiç qıləy ehtiyocım ni.şımə çı imon biyon iyən çı kofir bıbon,Xıdovənd çımı koy iyən risolətiku aqahe.

Çın ayəku umutedəmon:

1-çı peyğombəron təkyəco Xıdoe.liza əvon de ğətiyyəti sıxan voteydən iyən ıştə mıxolifon vədə bə dumo pekıreydənin.

2-Xıdovənd bə həmmə kəson,ısət çı peyğombər,momin ya kofir bıbu,aqahe iyən hiçkəs çı ilahi elmi əhotəku xaricədə ni.

‏ وَمَن يَهْدِ اللّهُ فَهُوَ الْمُهْتَدِ وَمَن يُضْلِلْ فَلَن تَجِدَ لَهُمْ أَوْلِيَاء مِن دُونِهِ وَنَحْشُرُهُمْ يَوْمَ الْقِيَامَةِ عَلَى وُجُوهِهِمْ عُمْياً وَبُكْماً وَصُمّاً مَّأْوَاهُمْ جَهَنَّمُ كُلَّمَا خَبَتْ زِدْنَاهُمْ سَعِيراً (97)

Və hakəsi Xıdovənd hidoyətkəy, çən əv hidoyətış pəydu kardə və hakəsi əv bə zəlolət eğando, həni hiçfaxti ğərəz Xıdo bo əy qıləy koməqəkə pəydu nibəbe və əmə ğıyoməti ruji əy sə-beji(fırsiyə şikilədə)ku,kor iyən lol məhşur bəkamon və çəvon vırə cəhəndıme ki,hafaxti çəy otəş həmuş bıbu,bəy tojə şolə əlovə bəkamon.

Kofir iyən mışrikon de peyğombəri bıə mucodilə və bəhson oxoyədə,ın ayə qıləy kulliyə ğanuni unvanədə hamyedə:səbəro bıəkəs ə şəxse ki,əv ilahi hidoyəti ğəbulkəy və de ilahi peyğombəron məsir və ro bə hidoyəti bırəso.çımi mığobilədə hakəs çı peyğombəron vədə bımando,ilahi rəhmət iyən hidoyətiku məhrum bəmande və bə zəlolət iyən inhirofi dıço bəbe.hiçkəs hətta bəşəri məzhəbi rəhbəron həm, jıqo qıləy şəxsi nicot doey nibəzıneyn.əmmo əvon  ıştə royku oqardon və ilahi hidoyəti ğəbulkəyn,ım istisnay.təbiiye qıləy şəxs ki,dınyoədə bə həxə sıxanon quş doey iyən boəy ğəbul və bəy iğror kardey hozzı ni, ğıyoməti ruji həm bənə fırsiyə kəson məhşur bəbe ki,lol,kor və ku bəbe iyən bəştə qınoon və xilofkorətiyon xoto,hejo cəhəndımədə bəsute.

Çın ayəku umutedəmon:

1- bə peyğombəron ro tabe nıbe iyən bə ğeyri-ilahiyə rəhbəron pemandey,ısət çı ideoloji və etığodiyə məsələonədə bıbu və çı iştimayi və siyosiyə koonədə,ğərəz bədbəxtəti co qıləy oxoş ni.

2-ğıyoməti ruj, çı insonon dınyoədə bıə əməlon təcəssıme.dınyoədə çoko əməl bıkəmon, axırətədə həm de həmonə şikili məhşur bəbemon.