495-ə hissə-İsra surə-98-101 şərifə ayəon

495-ə hissə

ذَلِكَ جَزَآؤُهُم بِأَنَّهُمْ كَفَرُواْ بِآيَاتِنَا وَقَالُواْ أَئِذَا كُنَّا عِظَاماً وَرُفَاتاً أَإِنَّا لَمَبْعُوثُونَ خَلْقاً جَدِيداً (98)

Həmonə(cəhəndım) çəvon cəzoe.bəçəy xoto ki,əvon kofir bin iyən voteşone:ayə əmə qıləy(pıxə) astə və volo-volo bıey bəpeştə ijən tojə xılğəti surətədə bəyji bəbemon?

أَوَلَمْ يَرَوْاْ أَنَّ اللّهَ الَّذِي خَلَقَ السَّمَاوَاتِ وَالأَرْضَ قَادِرٌ عَلَى أَن يَخْلُقَ مِثْلَهُمْ وَجَعَلَ لَهُمْ أَجَلاً لاَّ رَيْبَ فِيهِ فَأَبَى الظَّالِمُونَ إَلاَّ كُفُوراً (99)

Ayə əvon vindedənin ki,Xıdovənd osmonon iyən zəminış ofəyə,bənə əvoni ijən xəlğ kardey ğadire? Və Xıdovənd bo əvon qıləy mıddətış mıəyyən kardə ki, bəvədə hiç qıləy şəkk ni.əmmo sıtəmkoron ğərəz kufr və inkori hiççi ğəbul kardedənin.

In ayəon bə ğıyoməti ayid bıə vey ğədim iyən kanə şubhəon qıləyni cəvob doydə və hamyedə:kofiron qımon kardedən ki,çı Xıdovəndi ğudrət həmonə bın dınyo ayide. liza dınyoku şıey iyən çəvon cism bə tuli təbdil bıey bəpeştə,həni Xıdovəndi ijən əvoni sənibəton xəlğ kardey və ğıyoməti məhkəmədə mıhokimə kardey iyən cəzo və mıkofot doey ğudrətış ni -zənn kardedən.qıləy holədə çı həmmə kəsi jimon iyən mardey Xıdovəndi dastədəy.çəy ğudrət ım hestemoni-aləmış deçəy qırd əzəməti ofəyəşe,əvoni ijən dıminə kərə xəlğ kardey bo əy qıləy hostonə koe.əmmo kufr iyən inodkorəti ruhiyyə boyis bedə ki,qınokor və sıtəmkorə insonon jıqo həyğəton inkor kardedən iyən əy ğəbulkardedənin.zira jıqo qıləy ko ğəbul kardə surətədə həni əvon bəştə nodırıstə ro dəvom doydənin.

Çın ayəku umutedəmon:

1-miadi inkori rişə,Xıdovəndi ğudrəti məhdud zıneye və jıqo nıbu kofiron bo miadi inkor kardey hiç qıləy əğliyə dəlilışon ni.

2-miad cismaniye iyən həmmə insonon deştə cismi ğıyəməti ruji hozzı bəbeyn və bəştə koon cəzo bərəseyn.

3-kufri rişə qıno iyən zılme.qınokor boştə ro oj kardeyro həxə sıxani təkzib kardeydə.

قُل لَّوْ أَنتُمْ تَمْلِكُونَ خَزَآئِنَ رَحْمَةِ رَبِّي إِذاً لَّأَمْسَكْتُمْ خَشْيَةَ الإِنفَاقِ وَكَانَ الإنسَانُ قَتُوراً (100)

Vuji:ehanə şımə çımı pərvərdıqori xəzinədoroon bıəbiyon,hukmən çı infoği tarsiku hiççi bə hiçkəsi nıədəyon və inson tanq nəzə və pəxıle.

In ayə bə kufr iyən inkori rişəonku qıləyni işorə kardedə və hamyedə:əgər şımə çı qırd hestemoni aləmi soyb və malik iyən həmmə çiyon şımə ixtiyorədə bıəbe,ijən şımə sərvət qırdə kardey ruhiyyə icozə doydəni ki,çəyku itikə bə cokəson infoğ iyən baxşkoyn iyən həmmə çiyon boştə pebəqətiyon.həlbəttə ım xıslət umum insononədə heste.liza hakəsi dılış heste bə ruşdo-kəmoli bırəso,bəbe deəy mıborizəkəyn ta çı səxovət iyən baxşeşi ruhiyyə bəvədə icod bıbu.dırsıt bənə elm və cəhli ki, qırd insonon sıftədə cohil bə dınyo omeydən və bəbe de ziyodə cəhdo-təloşi elmi kəsbkəyn və bə ruşd iyən aqahəti bırəson.

Çın ayəku umutedəmon:

1-mol-dıvlət cəm kardey iyən dınyopərəstəti,pəxıləti iyən xəsisəti ruhiyyə zumand kardedə. qıləy ko ki,de osmoniyə təlimon mıvofiğ ni.liza qırd saray əhl dinonışon ğəbul kardəni.

2-harçənd insonon təbiiyə surətədə pəxılin,əmmo Xıdovənd qırd fərdonədə səxovətin bıey istedad və zəminəş ğərolış doə ta hakəsi bıpyişe deştə irodə ım kəmoli kəsbkəy.

وَلَقَدْ آتَيْنَا مُوسَى تِسْعَ آيَاتٍ بَيِّنَاتٍ فَاسْأَلْ بَنِي إِسْرَائِيلَ إِذْ جَاءهُمْ فَقَالَ لَهُ فِرْعَونُ إِنِّي لَأَظُنُّكَ يَا مُوسَى مَسْحُوراً (101)

Həyğətən,əmə bə Mosə nəv qılə ruşinə mecuzəmon doe.çən,çı Bəni-İsrayiliku dəpars bə zəmon ki,Mosə bəçəvon soyəx ome(əvon çoko bin?) və Fironi voteşe: ”Ha Mosə ha! az qımon kardedəm bo tışon codu kardə”.

In ayə və çımi bəpeştə çandə qılə ayə bə həzrəte Mosə(ə)-I de Fironi bıə diyaloqi ayide ki, çı dıqlə qrup bıə həxı de botıli tərze təfəkkuri nışon doydə.ın ayə hamyedə: həzrəte Mosə(ə) Xıdovəndi tərəfiku 9 qılə mecuzəş hestebe ki,çəy mecuzə bıey bo həmmə kəsi ruşin və oşko be.bənə çı əso mor bıey,dıyo de əso vositə poə bıey,de əso jıey vositə donzə qılə ovi çeşmə oj bıey və sayirə.əmmo çı Fironi palu şıə faxti,əv bə Mosə(ə)-I voteydə ki,ımon həmmə sehro-codue.tı bənə co sahiron qıləy caduqəriş ki,sehrı umutə və ıştən həm bə cokəson codu və sehri təsiri ji dəşəş.

Im həmonə təkəbbır iyən yoləşəxəti ruhiyyəy ki,çun hozzı ni bə həzrəte Mosə(ə)-ibə Xıdo imon vardey iyən Bəni-İsrayiliozodəti barədə bıə həx iyən məntığiyə sıxan və kəlomi tabe bıbon,çəy ruşinə mecuzəon sehr və codu zıneydən və hətta Mosə(ə)-I təhğır həm kardedəbin.

Çın ayəku umutedəmon:

1-peyğombəron əsliyə məmuriyyət,xaruğul-addə koon iyən mecuzəon nışon doey ni ta de sahiron səhv nıeqıno.bəlkəm,çəvon vəzifə bəşəri hidoyət kardey iyən mecuzə nışon doey fəğət bo huccəti təmom kardey iyən çəvon Xıdo tərəfiku bıə risoləti həğğaniyyəti isbot kardeye.

2-peyğombəron bənə dıləsutə doktoron bə məxloği soyəx şedəbin,nəinki,kədə bınışton ta məxloğ bəçəvon soyəx boon.