497-ə hissə-İsra surə-107-111 şərifə ayəon

497-ə hissə

قُلْ آمِنُواْ بِهِ أَوْ لاَ تُؤْمِنُواْ إِنَّ الَّذِينَ أُوتُواْ الْعِلْمَ مِن قَبْلِهِ إِذَا يُتْلَى عَلَيْهِمْ يَخِرُّونَ لِلأَذْقَانِ سُجَّداً (107)

Vuji: bə Ğıroni imon biyon ya nıvon(bo Xıdo hiç qıləy fərğ kardedəni)şəkk ni ki, çımi bənav elm doə bıə kəson hafaxti (ilahi ayəon)boəvon tilovət bıbu,bəsə çonəsə bə səjdə eqıneydən.

Navnə proqramədə votemone ki,Xıdovənde-Aləm Kərimə-Ğıronış bə ikkərə nozilış kardəni, bəlkəm islomi-peyğombəri(s) risoləti dırozi vistıse sori mıddətədə de tədrici nozilış karde və dumo bəhonə bıə mıxolifon voteydəbin:çıro Ğıron bə ikkərə nozil nıbe? Çən,əmə bəy imon nibəvamon.

In ayə hamyedə: bə jıqo beməntığə fərdon votey lozıme ki,Xıdovənd bəşmə imon vardey ehtiyocış ni ki,şımə joqo bəhonəon vardedon.elm iyən zıney soybon iyən de navkonə osmoniyə kitobon oşno bıə kəson,de Kərimə-Ğıroni handey,çəy həx bıey sərəseydən. əvon çı Kərimə-Ğıroni əzəməti mığobilədə bə səjdə eqınedən.joqo ki, nəinki, çəvon çəkut iyən təvili,bəlkəm çəvon surət iyən çonə həm çı tulisə ğərol bəqəte.

Çın ayəku umutedəmon:

1-çı məxloği kufr iyən Imoni,bə Kərimə-Ğıroni həx bıey hiç qıləy təsirış ni.ehanə qırd məxloğ kofir bıbon,bənə ımiye ki,həmmə millət ıştə çəşon dəbaston iyən çı həşi vucudi inkorkəyn.

2-həyğiyə elm əve ki,inson çı həxı vədə muti bıbu,nəinki,de bəşəri elmon və təhsili səthi bəpe bıey, dini iyən mənəviyə həxıku imtinokəy.

وَيَقُولُونَ سُبْحَانَ رَبِّنَا إِن كَانَ وَعْدُ رَبِّنَا لَمَفْعُولاً (108)

Və voteydən:çəmə pərvərdıqor mınəzzəhe(poke). Həyğətən,çəmə pərvərdıqori və`də əncom bıənine.

وَيَخِرُّونَ لِلأَذْقَانِ يَبْكُونَ وَيَزِيدُهُمْ خُشُوعا ً(س) (109)

Və(əvon) bəmə holədə bəsə çonəsə(bə səjdə şedən) və (Ğıroni handey)hejo çəvon xuşu və təvazukorəti ziyod kardedə.

Çun Tovrat və İncil oxonə peyğombəri ome və`dəş doəbe,əveçı əhle-kitobiku bə peyğombər(s)-i imon vardə kəson voteydəbin:Xıdovəndi bəştə və`dəş əməl karde və liza bə Xıdo həmdo-təsbih voteydəbin.təbiiye joqo fərdon həxı mığobilədə xaşe iyən mutin. çanəndə Ğıroni ayəon tilovət kardedəbin,anəndə həm çəvon dılon nam bedəbe iyən de bəme və çəşi arsi rukarde bə səjdə şedəbin.Kərimə-Ğıron çəvon ım arifanə əməlon sitoyiş kardedə və əvoni tərif kardedə.

Çın ayəonku umutedəmon:

1-Ğıroni tilovət,bə hozzı bıə dılon joqo təsir noydə ki,əvoni beixtiyor bə Xıdo təsbih kardey iyən çəşi arsi rukardey və səjdə şıey vadar kardedə.həlbəttə de mərıfəti bıə iyən Xıdo kəlomi əzəməti dərk kardə formədə.

2-Ğıroni tilovət,insoni dayima bəpe bəbarde iyən həxı vədə muti bıey,çı qırd kəmolaton sərçəşməy və bə insoni ozavziye boyis bedə.

قُلِ ادْعُواْ اللّهَ أَوِ ادْعُواْ الرَّحْمَـنَ أَيّاً مَّا تَدْعُواْ فَلَهُ الأَسْمَاء الْحُسْنَى وَلاَ تَجْهَرْ بِصَلاَتِكَ وَلاَ تُخَافِتْ بِهَا وَابْتَغِ بَيْنَ ذَلِكَ سَبِيلاً (110)

Vuji:çı Allah ya Rəhmannomi vanq bıjənon,kon qılə sədokoyn(fərğ kardedəni) vey çokə nomon boəye və ıştə nımoji nə vey barzəvo və nə vey ahəstə məvot və çın dıqlə miyono qıləy miyonə ro bıvıjın.

Rəvoyətonədə omə ki,peyğombər(s) Məscidul-Həramədə jıqo dıvo kardedəbe:ya Allahu ya Rahman! Ihissə jıqo fik kardedəbin ki,əv dıqlə Xıdo vanq jedə ki,çəy qıləyni nom Allah iyən co qıləyni Rəhmane.ın ayə nozil be və hamyeşe ki,hardıqlə nom çı Xıdo nome və çın dıqlə nomiku əlovə,Xıdovəndi ziyodə nom iyən sıfətonış heste ki, har qıləyni çəy kəmolatonku qıləy cilvə bəyon kardedə.çən,Xıdovəndi de har ım nomon vanq jıey bəbe.

Həmçinin hafaxti peyğombər(s) ıştə nımoji de barzəvo handə faxti,mışrikon de bılındə sədo şeer handedəbin və bə ə həzrəti mane bedəbin və hafaxti peyğombər(s) ahəstə və qədə-qədə nımoji voteyədə,əshab çə həzrəti sədo məseydənıbin. liza ın ayə bə barzəvo iyən ahəstə votey sıfarış kardedə.umumən dini islom bə ibodət iyən əməli şivə və keyfiyyəti dığğət  kardedə.məxsusən nımoj bəbe de qıləy məxsusiyə adab və formə votey bıbu.

Çın ayəku umutedəmon:

1-vey çokə nom və sıfəton bo Xıdoe ki,məzmun və mənoşon heste və deştə nomon mıtobiğin.

2-islom motədil iyən miyonə ro şıə dine.hətta nımoji ğiroət həm bəbe de miyonə sədo votey bıbu.

وَقُلِ الْحَمْدُ لِلّهِ الَّذِي لَمْ يَتَّخِذْ وَلَداً وَلَم يَكُن لَّهُ شَرِيكٌ فِي الْمُلْكِ وَلَمْ يَكُن لَّهُ وَلِيٌّ مِّنَ الذُّلَّ وَكَبِّرْهُ تَكْبِيراً (111)

Və bıvot: sitoyış bo ə Xıdoe ki,nə boştə qıləy fərzəndış vıjniyə və nə çəy hukumətədə boəy qıləy şərik heste və hiçfaxti bə zıllət iyən zəyfəti xoto boştə qıləy koməqış vıjniyəni və əy loyığinə holədə yol hisobkə.

Kali Ğıroni surəon de Xıdovəndi təsbih kardey bino bedə.ın surə həm de Xıdo təsbihi bino bedə iyən de həmdo-təkbiri bə oxo rəseydə.həlbəttə qıləy həmdı-tərif ki, de təsbih və tənzihi(pok zıney) bə icoe.zira ın ayə Xıdovəndi harcurnə şırk iyən jimoni həmro iyən fərzəndi soyb bıeyku pok zıneydə və əy zəyif və ociz zıneydəni. təbiiye jıqo qıləy Xıdo,bə təkbir iyən yol zıney loyığe.

Çın ayəku umutedəmon:

1-bənə “Əlhəmdu lillah”,Subhanəllah,Allahu-Əkbər bıə zikron,Xıdovəndi bə peyğombər(s) iyən mominon sıfarışış kardə.

2-Xıdovənde-Aləm mıtləğə be ehtiyoce.çı pı-moku,jen iyən fərzəndiku. çən, əy bənə co insonon məzınəmon iyən əy çın koonku pok bızınəmon.