502-ə hissə-Kəhfi surə-18-21 şərifə ayəon

502-ə hissə

وَتَحْسَبُهُمْ أَيْقَاظاً وَهُمْ رُقُودٌ وَنُقَلِّبُهُمْ ذَاتَ الْيَمِينِ وَذَاتَ الشِّمَالِ وَكَلْبُهُم بَاسِطٌ ذِرَاعَيْهِ بِالْوَصِيدِ لَوِ اطَّلَعْتَ عَلَيْهِمْ لَوَلَّيْتَ مِنْهُمْ فِرَاراً وَلَمُلِئْتَ مِنْهُمْ رُعْباً (18) 

Və(əgər bəvon diyə kardəbe) əvoni oğo fik əkəyş(zira çəvon çəşon oj be)qıləy holədə ki, əvon hıtəbin və əmə əvoni bəsə rost iyən çəpə kəmisə qordınedəbimon (ta çəvon bədəm solim bımando) və çəvon sıpə ıştə dastış bə mağarə dəşə vırədə noəşbe.(çəvon ğərəvoli kəşedəbe) ehanə bəvon diyə kardəbe,peşt əqordıniş və çəvonku fərol əkəyş və tars ıştı qırd vucudi eəqəti.

Navnə bərnomədə votemone ki,Xıdovənde-Aləm qıləy şərayit hozzı kardedə ta boştə din iyən əğedə hifz kardey xoto bə mağarə pənoh bardə kəson bıhıton iyən çıvon quşon hiççi nıməson və çı haniku oğo nıbon.ın ayə hamyedə:əvon qıləy holədə hani bardəşbe ki,çəvon çəşon oj be iyən hakəsi əvonışon vindəbe,qımon əkəyn oğon,əmmo məseydənin.ha holədə joqo bin ki,ehanə qıləy şəxs bəvon nez mandey piyə faxti,dast-tarsi bə nez mandedənıbin iyən fərol kardedəbin.ğasbu ım bəçəy xotobe ki,hiçki bəvon qıləy zərəl nırosni iyən çəvon conon çı xətəriku əmonədə bımando.

Ayə dəvomədə hamyedə:boçəvon conon hifz kardey xoto ,dayima əvoni çı kəmiku bə kəmi peqordıneydəbimon ta çəvon peşt və kəmər bə zəxm iyən noxəşəti dıço nıbu iyən çı co tərəfiku çəvon sıpə çı mağarə vədə boəvon ğərəvolçəti kardedəbe və jıqo ğərolış qətəbe ki,həni hiçkəs curət pəydu kardey zıneydənıbe bə koç və lonə nez bımando.

Ha holədə Xıdovənde –Aləmi tərəfiku bo Əshabi-Kəhfi cism iyən coni hifz kardey xoto qıləy tədbir vindey be ki,əvon bo vəomə ğovmi ibrəti boyis bıbu.

Çın ayəku umutedəmon:

1-ehanə Xıdovənd irodəkəy,qıləy koç və mağarədə ıştə peyğombəri de korətəni vositə iyən co qıləy lonədə mominon de sıpə vositə hifz kardedə.

2-Xıdovəndi nemətonku qıləyni,insoni ğeyri-irodiyə şikilədə hanədə bı-bə tərəf peqardeye .

وَكَذَلِكَ بَعَثْنَاهُمْ لِيَتَسَاءلُوا بَيْنَهُمْ قَالَ قَائِلٌ مِّنْهُمْ كَمْ لَبِثْتُمْ قَالُوا لَبِثْنَا يَوْماً أَوْ بَعْضَ يَوْمٍ قَالُوا رَبُّكُمْ أَعْلَمُ بِمَا لَبِثْتُمْ فَابْعَثُوا أَحَدَكُم بِوَرِقِكُمْ هَذِهِ إِلَى الْمَدِينَةِ فَلْيَنظُرْ أَيُّهَا أَزْكَى طَعَاماً فَلْيَأْتِكُم بِرِزْقٍ مِّنْهُ وَلْيَتَلَطَّفْ وَلَا يُشْعِرَنَّ بِكُمْ أَحَداً (19) 

Və əmə jıləvoni(əvonımon ki,bə han jıəmonbe) bəyji kardemone ta ıştə miyono iyande bə sıvol-cəvob bıqəton.çəvonku qıləyni voteşe:əmə (bın koçədə)çanəndə mandəmon? Voteşone:iruj ya rujiku i hissə. (oxoyədə) voteşone:çəmə pərvərdıqor  vey çok zıneydə əmə çand miğdor mandəmon.çən,de ın puli ıştəku ikəsi bə şəhr bıvğandənən bunum hələ çiki pokə xorəkış heste.çən,çə həmonə xorəkiku boşımə biyəy və bəbe(bın koyədə) dığğətkəy və zırənq bıbu və bıdə hiçkəs şıməku aqah nıbu.

إِنَّهُمْ إِن يَظْهَرُوا عَلَيْكُمْ يَرْجُمُوكُمْ أَوْ يُعِيدُوكُمْ فِي مِلَّتِهِمْ وَلَن تُفْلِحُوا إِذاً أَبَداً (20)

Zira ehanə əvon (mışrikon) bəşmə dast pəydukəyn,şıməni sənqsar bəkayn ya şıməni bəştə ayini obəqırdıneyn və bın surətədə həni hiç faxti nicot pəydu nibəkayon.

In ayəon  Əshabi-Kəhfi çı dırozə haniku oğo bıey bədiqə bıə diyaloqi nəğl kardedə və hamyedə: çoko ki,əvonımon de qıləy məxsusə formə bə han bardemone,hejo jəqo ijən əvonımon bənə mardey bıə çı haniku pekardemone.əvon sənibəton ıştə koçədə bıə mıddəti barədə deyənde hesı-pesışon karde.əmmo bə hiç qıləy ray nıomin iyən əvışon bə Xıdo elmi ohdəşon noe.əmmo təbiiyi be ki,əvon həmmə vəşi qətəşonbe və mağarədə həm hiççi bo hardey pəyduşon nıkarde.liza qıləynişon vığande ta bışo bə şəhr və çəyo tikəy pokə harde-həş pəydukəy və boəvon biyəy.

Əmmo əv çı nun iyən harde-həşi puli doə faxti,çı dukun və mağazə soybi vindeşe ki, çın merdiku kanə antik pulon heste,əve bəy şəkkış karde və ın ko bərməlo be və ım movzu hətta bə məxloğ iyən podşo quş həm rəse.peşonə ayə həmonə macəra bəyon kardedə.

Çı ayəonku umutedəmon:

1-Əshabi-Kəhfi macəra,çı Xıdovəndi bo məxloği ğıyoməti ruji bəyji kardey ğudrəti qıləy nımunəonkue.

2-momin bəbe sırpuş(sıroqətə) iyən huşyar bıbu iyən ıştə zu vışkiye ğədərədə ıştə dini usuli çı deşmoni mığobilədə hifzkəy,harçənd mumkine deşmon çı roonku nufuzkəy.

3-imoni əhl har qıləy xorəki hardedəni iyən boəvon pok və həlolə xorək muhimme.

وَكَذَلِكَ أَعْثَرْنَا عَلَيْهِمْ لِيَعْلَمُوا أَنَّ وَعْدَ اللَّهِ حَقٌّ وَأَنَّ السَّاعَةَ لَا رَيْبَ فِيهَا إِذْ يَتَنَازَعُونَ بَيْنَهُمْ أَمْرَهُمْ فَقَالُوا ابْنُوا عَلَيْهِم بُنْيَاناً رَّبُّهُمْ أَعْلَمُ بِهِمْ قَالَ الَّذِينَ غَلَبُوا عَلَى أَمْرِهِمْ لَنَتَّخِذَنَّ عَلَيْهِم مَّسْجِداً (21) 

Və jıləvoni(məxloğımon) çəvon holonku aqah kardemone ta bızınon Xıdovəndi və`də həxe və çı ğıyoməti rəseyədə hiç qıləy şəkk ni.çən,ıştə miyono de yənde mıbohisə kardedəbin.qıləy qrupi voteşone:çəvon səpe qıləy xotirə bina(abidə) bısoxtəmon ki,çəvon Xıdo çəvon holiku vey aqahe.əmmo çəvon koonku aqah bıəkəson(çəvon sırron zınəkəson) voteşone:”əmə çəvon (məzari) kənoyədə qıləy məçit bəsoxtemon”.

Çoko ki,votemone de sesa sor bənav bıə sikkə vindey,məxloğ Əshabi-Kəhfi odəmonku xəbədo bin və qıləy dıjdə dastə bə mağarə tərəf bə hərəkət omin.co tərəfiyo bo harde-həşi hozzı kardey xoto bə şəhr şıə şəxs ımoni sərəse bədiqə rəyrə bə koç oqarde və macarəş boştə dustonış bəyon karde.iyobe ki,qırd əvon çı Xıdovənde-Aləmiku tələbışon karde ki,çəvon coni bıstəno və Xıdovənd həm çəvon dıvoş ğəbul karde.əmmo məxloğ çəvon palu omeyədə,əvon çı dınyoku şıəbin , əmmo çəvon bədəm bın sesa sori ərzədə komilən solim mandəbe.ım çı Xıdovənde-Aləmi insoni bəyji karde və kışteyədə bıə ğudrəti nışon doydə.iyo kali şəxson təklifışon doe ki,boçəvon xatirə əziz qəteyro,çəvon sape qıləy bina bısoxton.əmmo həyğiyə mominon ki,ın macəra bo ğıyoməti ruji insonon bəyji bıey isbot kardeyro qıləy sənəd zıneydəbin,cəhd kardedəbin ım daston hiçfaxtı çı yodo benışo.əve bo ım tohidiyə hərəkəti əbədi mandeyro,voteşone ki,əmə çəvon dəfn bıə vırə kəno qıləy məçit dutedəmon ki,bıdə hejo çəvon xatirə bəyji bımando.

Çın ayəku umutedəmon:

1-dəvardə nəsli tarıxədə ilahi ğudrəti nışonə və əsəron,bəbe hifz bıbu ta bə cokəson ibrəti boyis bıbu.

2-ilahi ovliyaon ğəbi kəno məçit soxte,qıləy ğıroniyə rişəş heste və əgər ğərole boəvoni bə yod dənoe xoto qıləy bina soxtey bıbu,çı məçitisə çokə bina kom bıey bəzıne.