507-ə hissə-Kəhfi surə-45-49 şərifə ayəon

507-ə hissə

وَاضْرِبْ لَهُم مَّثَلَ الْحَيَاةِ الدُّنْيَا كَمَاء أَنزَلْنَاهُ مِنَ السَّمَاءِ فَاخْتَلَطَ بِهِ نَبَاتُ الْأَرْضِ فَأَصْبَحَ هَشِيماً تَذْرُوهُ الرِّيَاحُ وَكَانَ اللَّهُ عَلَى كُلِّ شَيْءٍ مُّقْتَدِراً (45)

Və(ha pəyğombər ha!) boəvon dınyo jimoni misoli bıjən ki,bənə osmoniku voyə oviye. çən,zəmini beməyon deçəy vositə (jıqo ozavziyedə) bəyənde umjən qınedə. çən,ğəflətən hışk bedə,jıqo ki,vo(kuluk) əy peşandedə və Xıdovənd bə harçi ğadire.

Navnə proqramonədə Kərimə-Ğıron de təmsil iyən misoli bəyoni,çı momin iyən kofiron dınyoədə bıə vəzyəti bəyon kardedəbe.

In ayəon çı dınyo vəzyəti iyən bəvədə  bə əməl omə çiyon və koon  bəyon kardedə və hamyedə: dınyo bənə qıləy rəğ-rişəş nıbə rəsə və beməy ki, de lıski voşi voye, havz iyən ziyod bedə iyən de qədəy gemıjə vo qıniye sutedə iyən hışk və məhv bedə. əvəsorədə, qırd vırəon kavu iyən xurrəm bedə və poz iyən zımıstonədə doon iyən rəsəyon hışk iyən çəvon livəon ru bedən.həni ehtiyoc ni ki,şımə umriku qıləy hissə dəvardi ta şımə çı dınyo nopoydor və sabit nıbey bıvindiyon,şımə ha sor ım səhnəon vindedon ki, çokonə əv kırt iyən sabit ni.çən,ım bə faxtiye ki,koon cərəyan təbiiyə surətədə bə nav bışo,ısət mumkine çı beməyon ruşdi bənav,qıləy ofot bırəso və beməyon həmonə miğdorədə həm umrkəyn.

Çın ayəku umutedəmon:

1-Kərimə-Ğıron qıləy tərbiyəviyə kitobe və de təmsili zıvoni oko doey,çı hestemoni həyğəton bəyon kardedə ta məxloğ pand bıqəton.

2-bə dınyo rədəvardə cilvəon dıl dəmavəstəmon və çı ğıyoməti hejo mandə koon barədə fikkəmon. 

الْمَالُ وَالْبَنُونَ زِينَةُ الْحَيَاةِ الدُّنْيَا وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَاباً وَخَيْرٌ أَمَلاً (46) 

Mol iyən fərzəndon dınyo jimoni ziynəte və əbədi bıə loyığınə koon ıştı pərvərdıqori palu veyçokə mıkofot heste iyən bəvon umudəvo bıey vey çoke.

Dınyo bə beməyon kırtə umri təşbih kardey dəvomədə,ın ayə hamyedə:bın dınyoədə bo şımə çı ziynəti moyə hisob bıə çiyon,ısət çı mol ya fərzənd bıbu,ımon qırd çı dınyo cilvəonin və ğıyoməti ruji çımonku hiç qıləy xəbə ni və ımon əyo bə qıləy dardi dəvo nibəkayn.əyo bə axırəti rəsə əbədi mandə çokə koon bə hisob omeydə. ısət mumkine çokə koon bə riyokorəti və ıştəni nışon doey və ya bə mınnət noey xoto,məhv bıbon və bə ğıyomət nırəso.ın ayə həm hamyedə: şımə pərvərdıqori doə mıkofot veyçok iyən şımə əməlisə veyçoke və ehanə şımə qıləy umu iyən oruzon heste,bə ilahi lutf iyən inoyəti umuon bıbu,nəinki,bə cokəson.

Çın ayəku umutedəmon:

1-dınyoədə be-nıbe,bə məğrurəti iyən məyusəti boyis nıbu və muhimm ğıyoməti ruje və əyo çı mıhokimə meyar əməle,nəinki,nom iyən post.

2-dınyo koon həmmə faniye iyən sabit ni.fəğət çokə əməl baği iyən əbədiye və Xıdovənd çəvon mıkofoti təzmin kardedə.

وَيَوْمَ نُسَيِّرُ الْجِبَالَ وَتَرَى الْأَرْضَ بَارِزَةً وَحَشَرْنَاهُمْ فَلَمْ نُغَادِرْ مِنْهُمْ أَحَداً (47) 

Və(bə yod dənə) ə rujiki,bandon bə hərəkət bəvardemon və zəminiro oşko(sof,həmo) bəvindeyş. qıləy holədə ki,həmmə kəsi məhşur bəkamon iyən hiç kəsi çı yodo nibebəkamon.

وَعُرِضُوا عَلَى رَبِّكَ صَفّاً لَّقَدْ جِئْتُمُونَا كَمَا خَلَقْنَاكُمْ أَوَّلَ مَرَّةٍ بَلْ زَعَمْتُمْ أَلَّن نَّجْعَلَ لَكُم مَّوْعِداً (48) 

Və(həmonə ruji)qırd məxloğ ıştı pərvərdıqori vədə səfədə bəmandeyn (Xıdo bəvon bəvote) çoko şımənım iminə kərə ofəyəmbe(ım ruj) bəçəmə tərəf omiyon. əmmo şımə qımon kardedəbiyon əmə hiçfaxti bo şımə qıləy və`də vırə təyin nibəkamon.

وَوُضِعَ الْكِتَابُ فَتَرَى الْمُجْرِمِينَ مُشْفِقِينَ مِمَّا فِيهِ وَيَقُولُونَ يَا وَيْلَتَنَا مَالِ هَذَا الْكِتَابِ لَا يُغَادِرُ صَغِيرَةً وَلَا كَبِيرَةً إِلَّا أَحْصَاهَا وَوَجَدُوا مَا عَمِلُوا حَاضِراً وَلَا يَظْلِمُ رَبُّكَ أَحَداً (49) 

Və kitob:(naməye-əməl) miyonədə noey bəbe.çən qınokoron bəvindeyş ki,əyo bıeyku tarsışon heste və voteydən:vay bıbu bəmə!ım çı nıvıştə bıə(kitobe) ki, çəmə qırd (sıxan və əməlon) əyo hisob bıə,ısət çı hırd bıbu ya dıjd və çiçışon əncom doə(ıştə vədə)hozzı bəvindeyn və ıştı pərvərədıqor bə hiç kəsi zılm nibəkay.

Çı dınyo iyən çəy koon nopoydor və ğeyri-sabit bıey bəyoni dəvomədə,ın ayəon bə ğıyoməti ruji vəzyəti işorə kardedə və hamyedə:şımə ısətnə vində dınyo umuməm məhv bəbe, əyo bıə bandon vırto-volo bəbe iyən zəmini səth həmo bəbe iyən həşi və astovəon obəkuşeyn.peşo qıləy nuə dınyo deştə tojə soxtemoni bə ico bərpo bəbe.

Tarıxi dırozi bıə qırd insonon bə ico iyən i zəmonədə bəyji və çı ilahi ədolətinə məhkəmə vədə hozzı bəbeyn.çı qırd insonon vəzyəti qıləy nıvıştə bıə kitob mıəyyən bəkay və bəvədə çı insoni qırd ğeyd bıə əməlon,ruşin bəbe.əyo fəğət qınokorə şəxson çı vəhşət iyən tarsi dılədə bəbeyn.zira zıneydən ki,dınyoədə bə kon qınoon mırtəkib bıən və bəvindeyn ki,əvon həmmə həmonə kitobədə nıvıştey bıə iyən bo əvoni inkor kardeyro,həni hiç qılə ro mandəni.

Çın ayəonku umutedəmon:

1-ğıyoməti ruji çı məxloği huzur,bənə çəvon dınyoədə bıə cismani formədə bəbe.

2-çı ğıyomətiku ğafil bıey iyən bəy etino nıkardey, ğıyoməti ruji bə insoni tars iyən vəhşəti boyis bəbe.

3-ğıyoməti ruji fəğət çı insoni əməl zohir iyən hozzı bəbe iyən dınyoədə de əy bıə çiyon bə ğıyomət nibərəse.