521-ə hissə-Məryəmi surə-6-11 şərifə ayəon

521-ə hissə

يَرِثُنِي وَيَرِثُ مِنْ آلِ يَعْقُوبَ وَاجْعَلْهُ رَبِّ رَضِيّاً (6) 

(Xıdolimha! Bəmı qıləy canişin ətokə ki)Çımı iyən çı Yəğubi nəsli varis bıbu və Xıdolimha! əy ıştı çəyku rozi bıə kəsonku ğərol bıdə.

يَا زَكَرِيَّا إِنَّا نُبَشِّرُكَ بِغُلَامٍ اسْمُهُ يَحْيَى لَمْ نَجْعَل لَّهُ مِن قَبْلُ سَمِيّاً (7) 

(Nido ome)Ha Zəkəriyya ha!əmə bətı de qıləy Yəhya nomo bıə zoə(fərzəndi) mıjdəvoni doydəmon iyən çımi bənav ım nom bo hiçkəsi noey bıəni.

Çoko ki,vəynə proqramədə votemone,həzrəte Zəkəriyya(ə) norohət be ki,çəy mardey bəpeştə məxloği çəy palu iyən ixtiyorədə nəzri unvanədə noə mol iyən imkonaton bə noəhlon və no salehon dast eqıni.liza Xıdovəndiku boştə qıləy salehə fərzəndış tələbış karde.bın ayəonədə bə Ali-Yəğubi mirosi həm işorə bıə.zira çı Zəkəriyya(ə)-i jimoni həmro çı həzərəte Suleymon(ə)-i nəsliku be ki,əv həm çı Yəğub(ə)-i zoə bıə Yəhuda fərzəndonku be və ziyodə mol-əmvolış bə irs bardəşbe. binobərin vırəş hestebe ki,Zəkəriyya ıştə bəpeştə bıə canişini barədə fik kardənin be. zira ehanə ım molon bə nosaleh iyən fosığon dast eqıniyəbe,camiyədə çı fəsodi mənşə əbin.

Binobərin ıştə dıvo dəvomədə çı Xıdovəndiku tələb kardedə ki,qıləy loyığə fərd, bəçəy xoşomə iyən çəy rozi bıə qıləy canişini bəy ətokəy.həlbəttə kali mıfəssıron nəzəku bın ayədə çı irs bardeyku məğsəd,nıbuvvəti məğame,nəinki,çı moliku bə dast omə irs.əmmo bə nəzə rəseydə ım dıqlə nəzə deyənde i omeydəni.yəni Zəkəriyya Xıdokuş piyedə bəy qıləy fərzənd ətokəy ki,çəy mol-əmvoliku bəy irs bırəso iyən çəy bəpeştə əv bə nıbuvvəti məğami bırəso.

Xıdovənd çı Zəkəriyya dıvoş ğəbul karde iyən bəy qıləy fərzəndi bəşorətış doe ki, mıxtəlifə cəhətiku bemisl bıbu iyən imtiyazonış bıbu ki,çəy bənav bə hiç kəsi doey bıəni. Xıdovənde-Aləm çəy nomış ıştən vıjniye iyən əvış hırdənəti faxti bə peyğombərəti rosneşe.Yəhya hırdənəti faxti qıləy veyəzınə zoə be .əv bə məxsusə şərayiti dəlilon xoto ki,hejo səfərədə be,izdivacış nıkarde iyən çı dınyo ləzzət və şəhvətonku bə diyəro be.çoko ki,çəy bəpeştə həzrəte İsa(ə) həm bə həmınə dəlili xoto izdivacış kardə nıbe.

Çın ayəonku umutedəmon:

1-fərzəndi dumo bıey qıləy təbiiyə meyle və Xıdovəndiku fərzəndi tələb,de peyğombərəti məğami hiç qıləy ziddiyətış ni.

2-ıştə fərzəndon nomi noə faxti dığğətkəmon.zira nom çı fərhənq,əğıdə iyən vabəstə bıey nışonəy.

قَالَ رَبِّ أَنَّى يَكُونُ لِي غُلَامٌ وَكَانَتِ امْرَأَتِي عَاقِراً وَقَدْ بَلَغْتُ مِنَ الْكِبَرِ عِتِيّاً (8) 

(Zəkəriyya)Voteşe: Xıdolim ha! çoko çımı zoə bıey bəzıne qıləy holədə ki, çımı jen besone və az bə piyəmerdəti xoto zəyif bıəm?

قَالَ كَذَلِكَ قَالَ رَبُّكَ هُوَ عَلَيَّ هَيِّنٌ وَقَدْ خَلَقْتُكَ مِن قَبْلُ وَلَمْ تَكُ شَيْئاً (9) 

(Firiştə voteşe:)Jıləvoniye, ıştı pərvərdıqori hamyeşe: ım ko bomı hostone. zira çımi bənav tınım ofəyə, qıləy holədə ki,tı hiççi nıbiş.

Zəkəriyya ıştən çı Xıdoku fərzəndış tələb kardəbe. əmmo zıneydənıbe çəy tələb çokonə bə həyğət bərəse. ayə əv iyən çəy jimoni həmro cıvon bəbe və əvon fərzəndi soyb bıənine yaanki,həmonə piyəmerdəti holədə Xıdovənde-Aləm bəvon Yəhya nomo qıləy fərzənd əto kardənin be.çım təəccıb iyən sıvoli de nıbuvvət məğami hiç qıləy ziddiyətış ni. zira ha holədə peyğombəron elm həm məhdude və əvon çı elmı-ğeybiku fəğət Xıdo bəvon icozə doə faxti zıneydən.

Təbiiye mutləğə ğadir bıə  Xıdovənd ki, hestemoni aləmi xalığe iyən çəy ğanunış noə, kardey bəzıne çəy təbiiyə səbəbon inkişof doydə ya məhdudkəy. zira əv bə qırd hestemoni aləmi hakime.

Çın ayəonku umutedəmon:

1-besonə merdı-jen, Xıdovəndi lutf iyən rəhmətiku məyus nıbon ki, təcrubə nışonış doə çəvonku ziyodə şəxson fərzəndi soyb bıən.

2-ıştə xılğətədə təfəkkur kardey,Xıdovəndi ğudrəti barədə bıə şəkko-şubhə bərtərəf kardeydə.

قَالَ رَبِّ اجْعَل لِّي آيَةً قَالَ آيَتُكَ أَلَّا تُكَلِّمَ النَّاسَ ثَلَاثَ لَيَالٍ سَوِيّاً (10)

(Zəkəriyya)Voteşe: Xıdolimha! Bomı qıləy nışonə(əlomət)ğərol bıdə. (Xıdovəndi hamyeşe)ıştı əlomət ıme ki,se şəvı-ruj de məxloği sıxan votey ğudrətı nibəbe.

فَخَرَجَ عَلَى قَوْمِهِ مِنَ الْمِحْرَابِ فَأَوْحَى إِلَيْهِمْ أَن سَبِّحُوا بُكْرَةً وَعَشِيّاً (11)

Çən, əv çı ibodəti mehrabiku bə məxloği tərəf bə bi ome iyən bəvon işorəş karde ki, ha sıb iyən şami faxti Xıdo təsbihkənən.

Bə kali təfsirəvonon nəzə əsos Zəkəriyya dərəsi ki,ım nido vəhy bıə, nəinki, şəytoniyə ilğa, əve Xıdovənde-Aləmiku qıləy nışonəş tələbış karde.cəvob ome ki, ıştı nışonə ıme ki, se rujı-şəv de hiç kəsi qəp məjən və ıştə qəvi fəğət bo Xıdo zikr kardey xoto ojkə. ıştı zıvon solime,əmmo ğərəz Xıdo zikri hiççi votey nibəzıne. çən, əv ım nışonə ğəbul kardey bədiqə ıştə ibodəti vırəku bə bi beşə faxti,məxloğış həm bo Xıdo zikr kardey iyən har sıb iyən şanqovə nezi nımoj voteyış dəvət karde və çun qəp jıey zıneydənıbe,de işorə ıştə sıxanon bə məxloği rosneydəbe.

Çın ayəonku umutedəmon:

1-çəmə əzo və cəvarih Xıdovəndi irodə jiyədəy.əgər əv bıpyişe de solimə holi əzo hiç qıləy ko əncom doey əzıni.

2-Xıdo zikr kardey və ibodət bəbe dayimi bıbu.nəinki,qıləy fəsl və zəmonədə.ha ruji sıb iyən şəvi faxti.