Bə Ğədrə şəvi ayid məxsusə bərnomə-2

Bə Ğədrə şəvi ayid məxsusə bərnomə-2

Əziz həmzıvonon səlom, ın şanqonə Həzrəte Əli(ə)-i şəhodətə şəvi sorəqardışe ki ım matəmə şəvi bə şımə təsliyət ərz kardəm, əzizon həmçınin Rəməzan Mıborəkə manqədəmon iyən ın şanqo ğədr və əhya şəvədə, şımə xosə Tolışonro Xıdo məğfirət, baxşış iyən rəhməti tələb kardəm, umidım heste karde bızonəmon ım əzizə şəviku vey çok istifodə kəmon. Dəvət kardəm de Tolışi Rədio dəmə bə ico bımandın və həminə şəvi fəziləton iyən xusiyəton barədə məlumaton bıməsən.

Əzizon Əhyo şəvədə, mumin iyən Xıdo tələbə millət bə məçiton iyən ziyorətiyə vırəon səmti hərəkət kardedən ta əhyoə şəvi muğaddəsə vırədə dəvardonon. Ğədrə şəv, tojədən, bino bey noğtə bə hisob omeydə, jıqo ki ,İmom Sadığ(ə) hamiyəşe: “Ğədrə şəv sori ya əməlon bino heste, ım şəvədə, ə çi ki vağe bıbu, tosə omə sori, nıvışte bəbe iyən tale təyinəkəy.”

Həğiğətədə Əhyoə şəv, aləmi rəmzi illəte, və çəy əzəmət bo insonon, dark nibəbe. əmə fəğət de bə Kərimə Ğıroni ayəon və əeme məsumin(ə)-i rəvoyəton imon vardey vositə, karde bəznemon dərk kəmon ki Ğədrə şəv, ım dınyo iyən mələkoti miyono qıləy dəvardəcoe.

Əhyoə şəv, insoni mənəvi jimoni bino beyro, vey muhimm iyən erjinə mərkəz bə hisob omeydə. İnson ım şəvədə, ğərəz məxsusə ibodəton ki sıforış bıə, bə fik  kardey ehtiyocış heste, jəqo ki vote bıdə, ım şəvədə, 1 saət fik kardey, 1000 sori ibodət kardeyku vey erjin heste. Im şəv həmonə şəve ki inson deşət irodə iyən intixobi vositə, karde bəzne ıştə muxtəlifə sərnıvışti təiin ko, həmonə sərnıvışt ki karde bəzne insoni, çı səadət və kəmoli royədə ğəror bıdə və ya ımi ki jimoni oxonə vırədə qiriftor bıbu.

Həğiğətədə, əqə inson ıştə erj iyən vırəku çok aqah bıbu ki çəy erj iyən ğeymət ğərəz beheşt ni, ıştəni bə dınyo be stabilə ləzzəton məşğul nibəkay, və ıştə dini iyən əxloği prosniyədə, vey səyo cəhd bəkarde iyən nəfsi məerefət cəhətədə ğədəm pebəqəte, ki bə İlahi zıney qıləy muğəddəməy.

Əzizə rujə əqəton, Iştəni zıney de Xıdo zıney, mıstəğimə rabitəşe, ım cumlə rəvoyətonku omə və lozime ki inson ıştə əhvolədə vey diğğət bıkə və bəştə çok iyən bevəcə xusiyəton çok surəti diyəş bıbu. Im muhimmə mıvzoonədə fik kardeyro, əhyoə şəv vey çokə ləzzəon bə hisob omeydən. Ğədrə şəv ıştəni zıney, daxıliyə noxəşion və problemon mıolicə kardeyro vey çokə bəhonə və fırsəte. Həmonə muşkilaton ki insoni çı beheştiku bə cəhənnım səmti bardedə,

Dınyo jimonədə, insoni muhimmə muşkilatonku qıləyni ıme ki , modi ləzzətonədə ğərğ bıə və mənəvi ləzzətoni ki de Xıdovənde Xalıği unsiyət qətey vositə icod bəbe, ıştə yodiku bardəşe. əhyoə şəvon vey çokə fırsətin ki inson ıştə jimoni metodi əvəz ko və modi jimoni bə mənəvi ləzzəton səmti hərəkət bıdə, həğiğətədə inson, kom şəxsi  Xıdoku vey çokə mahbub iyən munes peydo karde bəzne, ki çəy ənis və dıli dust bıbu? Im Xıdovənde Xalıği sıxəne ki hamiyəşe: “imon vardə kəson bə Xıdo vey məhəbbət kardən iyən əy pidəşone”

Beşək əqə inson ıştə vırə, erj iyən məğomiku vey çok aqah bıbu, bəvinde  ki çəy ğeymət ğərəz beheşt ni, əv ıştəni bə dınyo be stabilə ləzzəon məşğul nibəkay və ıştə dini iyən əxloği tərbiyədə vey səyo cəhd bəkay iyən ıştə mənəviyə tərbiyəku ğafil nibəbe.

İmom Səccad(ə) ıştə aşığonə və arifonə mınocotədə bə Xıdo ərz kardə:” ey Xıdo, əv kiye ki ıştı məhəbbəti şinəti dərk ko və ğərz tı co kəson dumoədə bıbu? əv kiye ki de tı uns qətəşe əmmo ijən dılış bıbu ın holətiku xarıc bıbu və ğərəz tı de co kəsi unsiyət bıqəti?

Və çı ğəşənqe ki əhyoə şəvədə, inson, tojə koy bino və ıştə bandə bey tojə ko. De Xıdo əhd bıbasto ki bandə bey və itoət, nımoji əvvələ vaxt votey, de Ğıroni unsiyət qətey və har ruj təlovət kardey, həmçıni bə Ğıroni məno diğğət kardey, bevəcə əxloğ və rəftori isloh kardey iyən har çi ki vey çokə bandə beyədə bəy ehtiyoce, əncom bıdə və vəoməy sori ğədrə şəvədə, ısətnəku vey çokə inson bıbu.

mehribonon bə ım bərnomə quş doe xoto şıməku təşəkkur kardəm, tojədən dıvo kardəm ım əzizə şəvonədə, Xıdovənde Xalıği baxşış, lutf və inoyəti şomil bıbəmon.